Kpɛtɛmɔ Jeŋba He Mlai Ni Be Hooo Lɛ Ahe

AKƐ jeŋba he mlai tsuɔ nii yɛ adesai ashihilɛi fɛɛ amli. Ani okpɛlɛɛɛ nɔ akɛ anɔkwayeli, mlihilɛ, musuŋtsɔlɛ, kɛ mɔ hesusumɔ ji sui ni adɔɔ he waa yɛ je lɛŋ fɛɛ, ni ákɛ wɔteŋ mɛi babaoo nyaa sui nɛɛ ahe?

Namɔ Jeŋba He Mlai?

Yɛ klɛŋklɛŋ afii 100 Ŋ.B. lɛ, nuu ko ni le woloŋ jogbaŋŋ ní atsɛɔ lɛ Saulo lɛ hi shi yɛ gbɛjianɔtoo ko ni jeŋba he mlai srɔtoi etɛ ní náa mɔ nɔ hewalɛ kudɔɔ lɛ lɛ mli—Yudafoi lɛ  anɔ̃, Helabii lɛ anɔ̃, kɛ Romabii lɛ anɔ̃. Kɛfata kusumii ni yɔɔ hwanyaŋŋ kɛ mlai babaoo ni akɛtsuɔ nii yɛ nakai gbɛjianɔtoi lɛ amli lɛ he lɛ, Saulo yɔse akɛ jeŋba he mla ko ni akɛfɔ́ adesai lɛ kudɔɔ amɛ. No ji wɔhenilee. Beni Saulo batsɔ Kristofonyo bɔfo Paulo sɛɛ lɛ, eŋma akɛ: “Ejaakɛ kɛ jeŋmajiaŋbii ni bɛ mla lɛ kɛ amɛfɔmɔŋ su lɛ tsuɔ mla naa nii lɛ, amɛ ni amɛbɛ mla lɛ amɛji mla ha amɛ diɛŋtsɛ amɛhe; no amɛkɛtsɔɔ akɛ aŋma mla lɛ nitsumɔ lɛ yɛ amɛtsuii amli, ni amɛhenilee hu yeɔ odase, ni amɛsusumɔi lɛ folɔfolɔɔ amɛnaa loo amɛjiejieɔ amɛnaa yɛ amɛteŋ.”—Romabii 2:14, 15.

Shi kɛlɛ, kɛ́ wɔmiikpɛ wɔyiŋ yɛ nɔ ni ja kɛ nɔ ni ejaaa he lɛ, ani esa akɛ wɔha ‘wɔfɔmɔŋ su’ lɛ pɛ kɛkɛ akudɔ wɔ? Taakɛ ekolɛ oyɔse lɛ, aŋkroaŋkroi kɛ kui ni yeee omanye yɛ shihilɛ mli lɛ eyi adesai ayinɔsane mli obɔ. Enɛ eha mɛi babaoo ayiŋ etsɔ akɛ esa akɛ wɔná gbɛtsɔɔmɔ jɛɛhe kroko ni nɔ bɛ bɔni afee ni wɔná jeŋba he mlai ni fe fɛɛ ní wɔbaanyɛ wɔhi shi yɛ naa. Mɛi babaoo baakpɛlɛ nɔ akɛ adesai a-Bɔlɔ lɛ ji mɔ ni fe fɛɛ ni baanyɛ ekɛ mlai ni be hooo nɛɛ aha wɔ. Dr. Carl Jung kɛɛ yɛ ewolo ni ji The Undiscovered Self lɛ mli akɛ: “Mɔ ni kɛ ehe kpɛtɛɛɛ Nyɔŋmɔ he lɛ, lɛ diɛŋtsɛ enyɛŋ ekpoo helooŋ kɛ jeŋba shara akɔnɔi ni yɔɔ je lɛŋ lɛ.”

Sane nɛɛ kɛ nɔ ni blema gbalɔ ko wie lɛ kpãa gbee. Ekɛɛ akɛ: “Gbɔmɔ gbɛ bɛ lɛ diɛŋtsɛ edɛŋ, ni adesa ní nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” (Yeremia 10:23) Wɔ-Bɔlɔ lɛ kɛɛ akɛ: “Mɔ ni tsɔɔo nii ni hi hao, mɔ ni tsɔɔo gbɛ ní onyiɛ nɔ lɛ.”—Yesaia 48:17.

Jeŋba He Mlai Kpakpai Ajɛɛhe ni Anyɛɔ akɛ He Fɔ̃ɔ Nɔ

Wiemɔi ni atsɛ́ yisɛɛ kɛtsɔ hiɛ lɛ yɛ jeŋba he mlai ajɛɛhe ní aja fe woji fɛɛ, ni ji Ŋmalɛ Krɔŋkrɔŋ lɛ mli. Adesai akpekpei abɔ ni yɔɔ jeŋ fɛɛ, ní mɛi ni jeee Kristofoi kɛ mɛi ni jeee Nyɔŋmɔ jálɔi lɛ po fata he lɛ etao sɛɛyoomɔ kɛ nilee kɛjɛ Ŋmalɛi lɛ amli. Lalafolɔ Johann Wolfgang von Goethe ni jɛ Germany lɛ ŋma akɛ: “Miyɛ suɔmɔ kɛ bulɛ waa kɛha [Biblia lɛ], ejaakɛ no titri ji nɔ ni haa mibaa mijeŋ jogbaŋŋ yɛ shihilɛ mli.” Abɔ amaniɛ akɛ Hindubii ahiɛnyiɛlɔ Mohandas Gandhi kɛɛ akɛ: “Bɔ fɛɛ bɔ ni fee lɛ, okɛ saji ni akɛhao yɛ Gɔŋ nɔ Shiɛmɔ lɛ mli [Yesu tsɔɔmɔi ni yɔɔ Biblia lɛ mli lɛ ateŋ ekomɛi] lɛ atsu nii . . . Ejaakɛ nibii ni [Yesu] tsɔɔ yɛ Gɔŋ lɛ nɔ lɛ yɛ kɛha wɔteŋ mɔ fɛɛ mɔ.”

Bɔfo Paulo ní atsĩ etã kɛtsɔ hiɛ lɛ mã gbɛfaŋnɔ ni he hiaa ní Ŋmalɛ Krɔŋkrɔŋ lɛ tsuɔ yɛ jeŋba kpakpa he mlai ni ekɛhaa lɛ he lɛ nɔ mi. Ekɛɛ akɛ: “Ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi ha nitsɔɔmɔ.” (2 Timoteo 3:16) Ani nakai eji lɛɛlɛŋ?

Ofainɛ, bo diɛŋtsɛ kwɛmɔ akɛ nakai ni lo. Pɛimɔ shishitoo mlai ni yɔɔ baafa ni nyiɛ sɛɛ lɛ mli amli okwɛ. Kadimɔ bɔ ni amɛhaa anáa jeŋba he mlai kpakpai lɛ. Jwɛŋmɔ bɔ ni saji ni yɔɔ tsɔɔmɔi nɛɛ amli lɛ baanyɛ aha oná shihilɛ kpakpa kɛ bɔ ni amɛbaanyɛ amɛha oná okɛ mɛi krokomɛi ateŋ wekukpaa kpakpa lɛ nɔ.

Ani Obaaná He Sɛɛ?

Shishitoo mlai ni ato naa nɛɛ ji ŋaawoi kpakpai ni yɔɔ Ŋmalɛ Krɔŋkrɔŋ lɛ mli lɛ ateŋ fioo komɛi kɛkɛ. Kɛfata enɛɛmɛi ahe lɛ, kɔkɔbɔi babaoo ní wieɔ amɛshiɔ susumɔi gbohii, wiemɔi kɛ nifeemɔi ni esaaa ní baanyɛ afite wɔshihilɛ lɛ eyi Nyɔŋmɔ Wiemɔ lɛ mli.—Abɛi 6:16-19.

Hɛɛ, tsɔɔmɔi ni yɔɔ Biblia lɛ mli lɛ kɛ ŋaawoi ni yeɔ ebuaa mɛi koni amɛba amɛjeŋ jogbaŋŋ bɔ ni amɛaanyɛ lɛ haa—ni adesai ashihilɛ ko kwraa nyɛŋ ekɛ enɛ aha. Mɛi ni kpɛlɛɔ tsɔɔmɔi nɛɛ anɔ ní amɛkɛtsuɔ nii lɛ tsakeɔ amɛshihilɛ kwraa. Bɔ ni amɛsusuɔ nii ahe amɛhaa lɛ tsakeɔ yɛ gbɛ kpakpa nɔ. (Efesobii 4:23, 24) Amɛnáa susumɔi kpakpai. Nyɔŋmɔ jeŋba he mlai ni yɔɔ Biblia lɛ mli  lɛ eye ebua mɛi babaoo ni eha amɛjie hetsɛ̃ ni anáa ahaa maji krokomɛi amli bii lɛ kɛjɛ amɛtsui mli. (Hebribii 4:12) Jeŋba he mlai ni yɔɔ Ŋmalɛ lɛ mli lɛ etsirɛ mɛi ni eha amɛtsi amɛhe kɛjɛ yiwalɛ nifeemɔi kɛ awuiyelii srɔtoi fɛɛ ahe, ni eha amɛtsɔmɔ gbɔmɛi kpakpai.

Hɛɛ, jeŋba he mlai ni yɔɔ Biblia lɛ mli lɛ eye ebua mɛi akpekpei abɔ ni amɛtsi amɛhe kɛjɛ sui ni kaa mɔ he, kɛ nifeemɔi ní efite mɛi ashihilɛ lɛ ahe. (1 Korintobii 6:9-11) Biblia mli tsɔɔmɔi lɛ miitsake aŋkroaŋkroi nɛɛ—jeee amɛnifeemɔi pɛ kɛkɛ, shi moŋ amɛtsui, amɛhiɛnɔkamɔi, kɛ amɛwekui hu. Ekɔɔɔ he  eko bɔ ni je lɛ baaya nɔ afite aha lɛ, mɛi ni yɔɔ je lɛŋ hei srɔtoi fɛɛ lɛ miiya nɔ amɛmiitsake amɛjeŋba. Ni enɛ baaya nɔ daa. “Jwɛi gbĩɔ, ni fɔfɔi hu ŋãlãa: shi wɔ-Nyɔŋmɔ lɛ wiemɔ lɛ aaadamɔ shi kɛaatee naanɔ!”—Yesaia 40:8.

Shi kɛlɛ, ani bo hu obaaná “wɔ-Nyɔŋmɔ lɛ wiemɔ lɛ” he sɛɛ? Yehowa Odasefoi baaná he miishɛɛ akɛ amɛaatsɔɔ bo bɔ ni ooofee okɛ Biblia mli jeŋba he mlai lɛ atsu nii koni oná he sɛɛ. Nakai jeŋba he mlai lɛ anaa ní ooohi shi yɛ lɛ baaha Nyɔŋmɔ akpɛlɛ onɔ amrɔ nɛɛ, ni ebaaha oná naanɔ shihilɛ ní Nyɔŋmɔ jeŋba he mlai ní be hooo lɛ kudɔɔ lɛ mli ŋɔɔmɔ.

[Akrabatsa/Mfonirii ni yɔɔ baafa 6, 7]

Shishitoo Mlai Ni Be Hooo

Mla Kpakpa Lɛ. “No hewɔ lɛ, nɔ fɛɛ nɔ ni nyɛtaoɔ akɛ mɛi aŋɔfee nyɛ lɛ, nyɛ hu nyɛfea amɛ nakai nɔŋŋ; ejaakɛ enɛ ji mla lɛ kɛ gbalɔi lɛ.”—Mateo 7:12.

Suɔmɔ Onaanyo. “Suɔmɔ onaanyo tamɔ bɔ ni osumɔɔ bo diɛŋtsɛ ohe.” (Mateo 22:39) “Suɔmɔ efeee enaanyo efɔŋ ko, hewɔ lɛ suɔmɔ pɛ ji mla lɛ nɔyeli.”—Romabii 13:10.

Jiemɔ bulɛ kpo atsɔɔ mɛi krokomɛi. “Nyɛkɛ nyɛmimɛi asuɔmɔ asumɔsumɔa nyɛhe; mɔ fɛɛ mɔ kɛ woo aha enaanyo tsutsu.”—Romabii 12:10.

Tiumɔ toiŋjɔlɛ sɛɛ. “Nyɛhia shi yɛ hejɔlɛ mli yɛ nyɛteŋ!” (Marko 9:50) “Kɛ aaaho lɛ nyɛgbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ mli.” (Romabii 12:18) ‘Nyɛhaa wɔtiua hejɔlɛ nibii asɛɛ.’—Romabii 14:19.

Kɛ tɔmɔi ake. “Okɛ wɔnyɔji lɛ ake wɔ, tamɔ bɔ ni wɔ hu wɔkɛkeɔ mɛi ni hiɛ wɔ nyɔji lɛ.” (Mateo 6:12) “Nyɛmli ahia ahaa nyɛhe, nyɛmusuŋ atsɔa nyɛ yɛ nyɛhe, nyɛŋɔfafaa nyɛhe.”—Efesobii 4:32.

Ye anɔkwa. “Nuu bo diɛŋtsɛ onubu mli nu ni ha ehi shi eha okome too . . . Ha onubu lɛ atsɔ nɔ ni ajɔɔ, ni oná oblahiiaŋ ŋa lɛ he miishɛɛ . . . Ha ekpokuai lɛ asa ohiɛ be fɛɛ be, ni esuɔmɔ lɛ aha oyitsoŋ akɔneo daa! . . . Mɛɛba mɔ kroko ŋa haa oyitsoŋ kɔneɔo, ni olooɔ yoo mɔkpɔŋ atuu nɛɛ?” (Abɛi 5:15-20 ) “Mɔ ni yeɔ nɔ ko bibioo mli anɔkwa lɛ, eyeɔ babaoo hu mli anɔkwa; ni mɔ ni yeee nɔ ko bibioo mli anɔkwa lɛ, eyeee babaoo hu mli anɔkwa.” (Luka 16:10) “Nɔ ni ataoɔ yɛ tsuji nukpai lɛ adɛŋ ji akɛ, ana amɛteŋ mɔ fɛɛ mɔ akɛ anɔkwafo.”—1 Korintobii 4:2.

Wiemɔ anɔkwale. “Ani mihe aaatse, kɛ́ mihiɛ ŋsɛnii fɔji kɛ fotro kɛ emli shishiumɔ ŋsɛni tɛi lɛ?” (Mika 6:11) “Wɔhiɛ ka nɔ akɛ wɔyɛ henilee kpakpa, ni wɔmiitao akɛ wɔba wɔjeŋ fɛfɛo yɛ nii fɛɛ mli.”—Hebribii 13:18.

Kaamale, feemɔ nɔ ni sa. “Nyɛnyɛ̃a nɔ̃ fɔŋ, ní nyɛsumɔa nɔ̃ kpakpa, ní nyɛhaa jalɛ saneyeli adamɔa shi yɛ koi shi.” (Amos 5:15) “Nyɛteŋ mɔ fɛɛ mɔ kɛ enaanyo awie anɔkwale, asaŋ nyɛkojoa anɔkwale kɛ hejɔlɛ kojomɔ yɛ nyɛgbói lɛ amli!” (Zakaria 8:16) “Nyɛshɛ́a amale nyɛfɔa ní nyɛteŋ mɔ fɛɛ mɔ kɛ enaanyo awie anɔkwale.”—Efesobii 4:25.

Tsu nii waa, bɔɔ ohe mɔdɛŋ. “Kɛ́ oona nuu ni bɔɔ mɔdɛŋ yɛ enitsumɔ mli lɛ, maŋtsɛmɛi ahiɛ tete eeedamɔ.” (Abɛi 22:29) “Nyɛmɔdɛŋbɔɔ lɛ naa akabaa shi.” (Romabii 12:11) “Ni nɔ fɛɛ nɔ ní nyɛfeɔ lɛ, nyɛjiea nyɛmusuŋ nyɛtsua, taakɛ Nuŋtsɔ lɛ nyɛtsuɔ nyɛhaa ni jeee gbɔmɛi.”—Kolosebii 3:23.

Jiemɔ mlijɔlɛ, musuŋtsɔlɛ kɛ mlihilɛ kpo. “Nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo.”—Kolosebii 3:12.

Kɛ́ ekpakpafeemɔ aye efɔŋ nɔ kunim. ‘Nyɛsumɔa nyɛhenyɛlɔi, nyɛsɔlea nyɛhaa mɛi ni waa nyɛ yi lɛ.’ (Mateo 5:44) “Kaaha efɔŋ miiye onɔ kunim, shi moŋ okɛ ekpakpafeemɔ aye efɔŋ nɔ kunim.”—Romabii 12:21.

Okɛ onii ni fe fɛɛ lɛ aha Nyɔŋmɔ. “Suɔmɔ Nuŋtsɔ, o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ. Kitãi lɛ amli otu kɛ ewulu nɛ.”—Mateo 22:37, 38.

[Mfonirii]

Biblia mli jeŋba he mlai lɛ ní okɛaatsu nii lɛ baanyɛ aye abua bo koni ogbalashihilɛ aye omanye, oná weku shihilɛ ni yɔɔ miishɛɛ, ní oná nanemɛi kpakpai