Wɔyɛ Jeŋ ko ní Mɛi Ajeŋba Miitsake Mli

BLEMA adesã ko ni mɛi le jogbaŋŋ lɛ kɛɔ akɛ nuu ko kɛ kane nyiɛ shwane fintiŋŋ ní ehiɛ edɔ kɛmiitao akɛ ebaana mɔ ko ni baa ejeŋ jogbaŋŋ, shi enáaa mɔ ko. Atsɛɔ nuu nɛɛ akɛ Diogenes, ni eji jeŋ nilelɔ ni hi shi yɛ Ateene yɛ afi 300 D.Ŋ.B. afii lɛ amli.

Wɔnyɛŋ wɔma nɔ mi akɛ nakai adesã lɛ ji anɔkwale loo ejeee anɔkwale. Shi kɛlɛ, eji Diogenes yɛ wala mli amrɔ nɛɛ, ní ekɛ hiɛdɔɔ miitao akɛ eeená aŋkroaŋkroi ni hiɛ jeŋba kpakpa kulɛ lɛ, efeŋ wɔ naakpɛɛ akɛ no baabi ni ekɛ deŋme gbomɔ babaoo afee nakai. Etamɔ nɔ ni mɛi babaoo ekpɛlɛɛɛ nɔ akɛ esa akɛ amɛba amɛjeŋ yɛ subaŋ kpakpa he mlai ni afolɔ ashwie shi lɛ anaa. Bei babaoo lɛ atsɔɔ adafitswaa woji, redio, kɛ tɛlivishiŋ nɔ ahaa wɔleɔ bɔ ni jeŋba egbee shi kwraa yɛ—adesa shihilɛ mli, yɛ nɔyeli gbɛjianɔtoo mli, yɛ nitsumɔi amli, yɛ kpɔiaŋgbɔlemɔi amli, yɛ jarayeli kɛ nibii krokomɛi amli. Sui kpakpai babaoo ni blema bii lɛ kɛba amɛjeŋ lɛ jeee nɔ ni mɛi buɔ dɔŋŋ ŋmɛnɛ. Yɛ be kɛ beaŋ lɛ asaa asusuɔ jeŋba kpakpa he mlai lɛ ahe, shi bei pii lɛ akɛtsuuu nii. Akɛ naabu jieɔ sui krokomɛi hu ayi akɛ amɛsa, shi akɛtsuuu nii.

Alan Wolfe ni eji Nyɔŋmɔ jamɔ he nilelɔ lɛ kɛɛ akɛ: “Ŋmɛnɛ, adesai babaoo ekpɛlɛɛɛ jeŋba kpakpa ni kulɛ ahiɔ shi yɛ naa lɛ nɔ dɔŋŋ.” Ekɛfata he akɛ: “Mɛi pii nuɔ he ŋmɛnɛ akɛ amɛnyɛŋ amɛkɛ amɛhe afɔ kusumii kɛ gbɛjianɔtoi srɔtoi ni yɔɔ lɛ anɔ akɛ amɛtsɔɔ amɛ bɔ ni amɛbaaba amɛjeŋ amɛha.” Nilelɔ Jonathan Glover wie afii 100 ni eho lɛ he yɛ Los Angeles Times lɛ mli, ni etsɔɔ mli akɛ nyɔŋmɔjamɔ kɛ jeŋba kpakpa he mlai ni akpɛlɛɔ nɔ yɛ he fɛɛ he shi gbɔmɛi kɛtsuuu nii jogbaŋŋ lɛ fata he ni basabasafeemɔ kɛ yiwalɛ nifeemɔ efa babaoo yɛ je lɛ mli lɛ.

Ekɔɔɔ he eko bɔ ni adesai babaoo kɛ amɛhe kpãaa gbee yɛ jeŋba kpakpai ni akpɛlɛɔ nɔ lɛ he ha, amɛteaŋ mɛi komɛi kã he amɛmiitao jeŋba kpakpa he mlai ni amɛbaanyɛ amɛkɛba amɛjeŋ. Yɛ afii fioo ni eho amli lɛ, Federico Mayor, ni eji UNESCO tsutsu nukpa lɛ kɛɛ akɛ “amrɔ nɛɛ jeŋba he mla he miihia je lɛ waa fe bei fɛɛ ni eho.” Shi kpoomɔ ni je lɛ ekpoo jeŋba kpakpa he mlai  lɛ etsɔɔɔ akɛ nɛkɛ mlai nɛɛ bɛ ni wɔbaanyɛ wɔkpɛlɛ nɔ akɛ ehi koni wɔkɛba wɔjeŋ.

Ani adesai fɛɛ baanyɛ aba gbeekpãmɔ yɛ jeŋba kpakpai pɔtɛ̃ɛ ni esa akɛ akɛtsu nii he? Eyɛ faŋŋ akɛ enɛ nyɛŋ aba mli. Ni kɛ́ mɛi kpãaa gbee yɛ shishitoo mlai ni ja kɛ nɔ ni ejaaa he lɛ, te aaafee tɛŋŋ ni mɔ ko ana akɛ jeŋba ko hi loo ehiii? Nɔ ni eba nɔ ŋmɛnɛ ji akɛ, mɔ fɛɛ mɔ feɔ nɔ ni esumɔɔ. Kɛlɛ, obaana akɛ sú nɛɛ hako adesai anyɛ aba amɛjeŋ jogbaŋŋ.

Paul Johnson ni ji Britain yinɔsaneŋmalɔ lɛ hé eye akɛ jwɛŋmɔ ni ahiɛ akɛ mɔ afee nɔ fɛɛ nɔ ni esumɔɔ lɛ eha “mɛi baa bɔ ni esa akɛ amɛtsu amɛsɔ̃i ahe nii lɛ shi, ni amɛhiii shi yɛ jeŋba kpakpai ni akpɛlɛɔ nɔ” ni tamɔ nɔ ni hé shi dani afi 1900 afii lɛ je shishi “lɛ anaa dɔŋŋ.”

Belɛ, ani wɔbaanyɛ wɔná “jeŋba he mlai diɛŋtsɛ ni nɔ bɛ” loo wɔbaanyɛ wɔná “jeŋba kpakpa he mlai ni akpɛlɛɔ nɔ yɛ he fɛɛ he” koni wɔkɛba wɔjeŋ? Ani jɛɛhe ko yɛ ni wɔnine baanyɛ ashɛ jeŋba he mlai ni sa ni tsakeee gbikogbiko, ni baanyɛ aye abua koni wɔshihilɛ aya nɔ jogbaŋŋ ní wɔná wɔsɛɛ be he hiɛnɔkamɔ nɔ? Sane ni nyiɛ sɛɛ lɛ baatsɔɔ sanebimɔi nɛɛ amli.