Sui Kpakpai ní Esa akɛ Gbekɛbii Akase

GLADYS tsuɔ nii yɛ skul ko ni yɔɔ Mendoza, yɛ Argentina. Gbi ko ni eeho lɛ, ena akɛ tsɔɔlɔ ko miikane Mi-Wolo ni Gbaa Biblia Mli Saji * wolo lɛ eeeha eklas gbekɛbii ni amɛye aaafee afii 10 lɛ. Gladys jie ehe shi etsɔɔ tsɔɔlɔ lɛ akɛ eji Yehowa Odasefonyo, ni ekɛɛ tsɔɔlɔ lɛ akɛ ebaasumɔ ni etsɔɔ lɛ bɔ ni ebaanyɛ ekɛ wolo lɛ atsu nii yɛ gbɛ ni mɔɔ shi nɔ. Akɛni tsɔɔlɔ lɛ nyã bɔ ni Gladys gbala nibii amli eha lɛ lɛ he waa hewɔ lɛ, eto eyiŋ akɛ ekɛ wolo lɛ baafata woji ni ekɛtsɔɔ nii lɛ ahe. Shi esa akɛ ebi gbɛ kɛjɛ skul nɔkwɛlɔi lɛ adɛŋ dã. Aŋmɛ lɛ gbɛ, ni enɛ ha ena miishɛɛ waa.

Sɛɛ mli beni eshɛ gbi ko ni ato ni akɛwoɔ mɛi ahewalɛ koni amɛkane woji lɛ, tsɔɔlɔ lɛ ha eklasbii lɛ kane yitso ko ni yɔɔ wolo lɛ mli lɛ yɛ skulbii krokomɛi lɛ fɛɛ ahiɛ. Yɛ bɔ ni nibii tee nɔ jogbaŋŋ yɛ nifeemɔ nɛɛ shishi hewɔ lɛ, afɔ̃ tsɔɔlɔ lɛ nine koni akɛlɛ agba sane yɛ tɛlivishiŋ nɔ gbɛjianɔtoo ko mli. Beni awó sane ni kɔɔ skul gbekɛbii ajeŋba he lɛ nɔ lɛ, mɔ ni kwɛɔ gbɛjianɔtoo lɛ nɔ bi tsɔɔlɔ lɛ akɛ, “Mɛni ofeɔ koni okɛha gbekɛbii ni yɔɔ oklas lɛ aba amɛjeŋ jogbaŋŋ?” Tsɔɔlɔ lɛ tsɔɔ mli akɛ ekɛ wolo ni gbɛi ji Mi-Wolo ni Gbaa Biblia Mli Saji lɛ tsuɔ nii. Etsa nɔ akɛ eyɛ mli akɛ jeee jamɔ he saji etsɔɔ yɛ eklas lɛ moŋ, shi kɛtsɔ wolo nɛɛ nɔ lɛ, enyɛ eeedu sui kpakpai tamɔ bulɛ, tsuishiŋmɛɛ, ekomefeemɔ, sɛɛfimɔ, toiboo, kɛ suɔmɔ eeewo gbekɛbii lɛ amli. Mɛi fɛɛ kpɛlɛ nɔ akɛ enɛɛmɛi ji sui kpakpai komɛi ní esa akɛ gbekɛbii akase.

Ani obaasumɔ ni okɛ sui kpakpai ni tamɔ nɛkɛ atsɔse obii? Obaanyɛ obi Yehowa Odasefoi lɛ ateŋ mɔ ko ní eha bo Mi-Wolo ni Gbaa Biblia Mli Saji wolo ní kasemɔ yɔɔ miishɛɛ waa lɛ eko.

[Shishigbɛ niŋmaa]