‘Anɔkwa Odasefonyo ni Yɔɔ Atatuiaŋ’

LALAFOLƆI kɛ eŋmalɔi ejɛ jeeŋmɔ beebe amɛwie nyɔŋtsere lɛ he akɛ nɔ ko ni yɔɔ fɛo pam. Ákɛ nɔkwɛmɔnɔ lɛ, lala ko ni Nyɔŋmɔ ha aŋma lɛ wie yoo ko ni ‘he yɔɔ fɛo tamɔ nyɔɔŋtsere’ lɛ he. (Salomo Lalai 6:10) Ni lalatsɛ lɛ wie nyɔŋtsere lɛ he akɛ ‘anɔkwa odasefonyo ni yɔɔ atatuiaŋ.’ (Lala 89:38) Mɛni wiemɔ nɛɛ ni awie yɛ nyɔŋtsere lɛ he lɛ tsɔɔ?

Nyɔŋtsere lɛ kɛ gbii 27 kɛ aaafee ŋmɛlɛtswai kpawo bɔleɔ shikpɔŋ lɛ he be fɛɛ be. No hewɔ lɛ, anɔkwa ni nyɔŋtsere lɛ yeɔ lɛ tsɔɔ akɛ abaanyɛ akɛ he afɔ̃ enɔ. Kɛlɛ, ekolɛ no mli lɛ lalatsɛ lɛ yɛ nilee babaoo yɛ nyɔŋtsere lɛ he. Etsɛ́ nyɔŋtsere lɛ akɛ ‘anɔkwa odasefonyo’ yɛ gbalɛ lala ko ni efo ni kɔɔ Maŋtsɛyeli ní Yesu tsɔɔ esɛɛnyiɛlɔi lɛ akɛ amɛsɔle yɛ he lɛ mli.—Mateo 6:9, 10.

Nɔ ni fe afii 3,000 ni eho nɛ lɛ, Yehowa Nyɔŋmɔ kɛ Maŋtsɛ David ni hi shi yɛ blema Israel lɛ fee Maŋtsɛyeli he kpaŋmɔ. (2 Samuel 7:12-16) Yiŋtoo hewɔ ni afee nakai kpaŋmɔ lɛ ji ní aná wekutɔkpãa ni Yesu Kristo baajɛ mli ákɛ David seshinyo ni baata maŋtsɛsɛi lɛ nɔ kɛya naanɔ. (Yesaia 9:7; Luka 1:32, 33) Beni lalatsɛ lɛ wieɔ maŋtsɛsɛi ni David “seshi” lɛ baata nɔ lɛ he lɛ, elá akɛ: “Eeema shi daa tamɔ nyɔŋtsere, ni eye anɔkwa tamɔ odasefonyo ni yɔɔ atatuiaŋ lɛ!”—Lala 89:37, 38.

‘Kane ni yeɔ nyɔɔŋ nɔ’—ni ji nyɔŋtsere lɛ—feɔ kaimɔnɔ ni sa ni tsɔɔ bɔ ni Kristo nɔyeli lɛ baahi shi kɛyaa naanɔ. (1 Mose 1:16) Daniel 7:14 lɛ wieɔ e-Maŋtsɛyeli lɛ he akɛ: “Enɔyeli lɛ naanɔ nɔyeli ní hoŋ eyaŋ ni, ni emaŋtsɛyeli lɛ nɔ ni fiteŋ ni.” Nyɔŋtsere lɛ ji odasefonyo ni haa wɔkaiɔ nakai Maŋtsɛyeli lɛ kɛ jɔɔmɔi ni ekɛbaaha adesai lɛ.

[He ni Mfoniri ni yɔɔ baafa 32 lɛ Jɛ]

Nyɔŋtsere: NASA photo