Sanebimɔi ni Jɛ Kanelɔi Adɛŋ

Akɛni yɛ mla naa lɛ ajeɔ nikpamɔ lɛ shishi beni hii fɛɛ ni yɔɔ Israel lɛ etee amɛyaaye Akpiti Gbi Jurɔ lɛ hewɔ lɛ, namɛi kpaa akoko klɛŋklɛŋ yibii ni akɛbaa hekrɔŋkrɔŋ lɛ?

Mose Mla lɛ fã Israelbii lɛ akɛ: “Afi kome mli lɛ shii etɛ ohii lɛ fɛɛ abapue yɛ Yehowa, o-Nyɔŋmɔ lɛ, hiɛ, yɛ he ni ehala lɛ, yɛ akpiti gbijurɔ lɛ kɛ otsii agbijurɔ lɛ kɛ asesei agbijurɔ lɛ nɔ.” (5 Mose 16:16) Kɛjɛ Maŋtsɛ Salomo beaŋ kɛbaa lɛ, he ni Nyɔŋmɔ hala ji sɔlemɔwe ni yɔɔ Yerusalem lɛ.

No beaŋ lɛ, ayeɔ gbii juji etɛ lɛ ateŋ klɛŋklɛŋ nɔ̃ lɛ yɛ April nyɔŋ lɛ mli. Atsɛɔ gbi jurɔ nɛɛ akɛ Akpiti Gbi Jurɔ, ni ajeɔ eyeli shishi kɛjɛɔ gbi ni ayeɔ Hehoo lɛ ni ji Nisan 14 lɛ nɔ jetsɛremɔ, ni etsaa nɔ aahu kɛyashiɔ gbii kpawo ni ji Nisan 21. Nisan 16, ni ji gbi ni ji enyɔ yɛ gbijurɔyeli nɛɛ mli lɛ kadiɔ be ni akɛjeɔ klɛŋklɛŋ nikpamɔ lɛ shishi yɛ afi lɛ mli yɛ Yudafoi akalanda ni abuɔ lɛ akɛ eyɛ krɔŋkrɔŋ lɛ bei buu naa. Yɛ nakai gbi lɛ nɔ lɛ, osɔfonukpa lɛ ŋɔɔ akoko kpamɔ mli “klɛŋklɛŋ jatsu [yibii, NW] lɛ” ni ‘efɔ̃ɔ yɛ Yehowa hiɛ’ yɛ hekrɔŋkrɔŋ lɛ. (3 Mose 23:5-12) Akɛni abiɔ ni hii lɛ fɛɛ ahi Akpiti Gbi Jurɔ lɛ shishi hewɔ lɛ, namɛi kpaa yibii nɛɛ ni akɛbaa lɛ?

Afã Israel maŋ muu lɛ fɛɛ akɛ amɛkɛ amɛnikpamɔ mli klɛŋklɛŋ yibii lɛ abaha Yehowa beni ayeɔ Akpiti Gbi Jurɔ lɛ. Abiii ni mɔ aŋkro ko aje nikpamɔ lɛ shishi ni lɛ diɛŋtsɛ ekɛ emli klɛŋklɛŋ yibii lɛ aba hekrɔŋkrɔŋ lɛ. Yɛ no najiaŋ lɛ, aŋkroaŋkroi komɛi yɛ ni damɔɔ maŋ lɛ najiaŋ kɛtsuɔ famɔ nɛɛ he nii. No hewɔ lɛ, ekolɛ najiaŋdamɔlɔi ji mɛi ni atsuɔ kɛyaa akoko ŋmɔ ko ni bɛŋkɛ lɛ mli, ni amɛyakpaa eko kɛbaa ni akɛyeɔ Akpiti Gbi Jurɔ lɛ. Beni Encyclopaedia Judaica wolo lɛ wieɔ sane nɛɛ he lɛ, etsɔɔ akɛ: “Kɛ́ akoko lɛ shɛ kpamɔ lɛ, akpaa eko kɛjɛɔ he ko ni bɛŋkɛ Yerusalem; kɛ́ jeee nakai lɛ, abaanyɛ akpa eko kɛjɛ he fɛɛ he yɛ Israel maŋ lɛŋ. Hii etɛ ji mɛi ni kpaa yibii nɛɛ, ni amɛteŋ mɔ fɛɛ mɔ hiɛ enikpamɔ kakla kɛ kafu.” No sɛɛ lɛ, akɛ akoko kpamɔ mli yibii ni afimɔ lɛ keikei lɛ eko bahaa osɔfonukpa lɛ ni ekɛhaa Yehowa.

Taomɔ nii ákɛ Israelbii lɛ kɛ amɛnikpamɔ mli klɛŋklɛŋ yibii abaha Nyɔŋmɔ lɛ ha amɛná hegbɛ kpele koni amɛkɛtsɔɔ akɛ amɛhiɛ sɔɔ jɔɔmɔ ni ejɔɔ amɛshikpɔŋ lɛ kɛ nikpamɔ lɛ nɔ lɛ. (5 Mose 8:6-10) Shi nɔ ni fe fɛɛ lɛ, nifeemɔ nɛɛ ji “nii kpakpai ni baaba lɛ asusuma.” (Hebribii 10:1) Nɔ ni sa kadimɔ ji akɛ, atee Yesu Kristo shi yɛ Nisan 16 afi 33 Ŋ.B., ni ji gbi ni akɛ nikpamɔ mli klɛŋklɛŋ yibii lɛ bahaa Yehowa lɛ. Bɔfo Paulo ŋma yɛ Yesu he akɛ: “Atee Kristo shi kɛjɛ gbohii ateŋ, efee klɛŋklɛŋ mɔ yɛ mɛi ni ewɔ lɛ ateŋ. . . . Shi mɔ fɛɛ mɔ yɛ lɛ diɛŋtsɛ egbɛjianɔ: klɛŋklɛŋ mɔ ji Kristo, no sɛɛ lɛ mɛi ni ji Kristo nii lɛ, yɛ ebaa lɛ mli.” (1 Korintobii 15:20-23) Klɛŋklɛŋ yibii ni afee lɛ ke kome ni osɔfonukpa lɛ fɔ̃ɔ yɛ Yehowa hiɛ lɛ fee Yesu Kristo ni atee lɛ shi lɛ he mfoniri—ni lɛ ji mɔ klɛŋklɛŋ ni atee lɛ shi kɛjɛ gbohii ateŋ kɛtee naanɔ wala mli. No hewɔ lɛ, Yesu gbele gbɛ kɛha adesai koni akpɔ̃ amɛ kɛjɛ esha kɛ gbele mli.

[He ni Mfoniri ni yɔɔ baafa 26 lɛ Jɛ]

© 2003 BiblePlaces.com