Ani Nyɔŋmɔ Miina Bo?

ANI Yehowa ni ji Bɔlɔ Kpele lɛ naa nii? Hɛɛ, enaa nii! Biblia lɛ gbala mli jogbaŋŋ akɛ: “Mɔ ni shɔ̃ hiŋmɛi lɛ, aso enaŋ nii?” (Lala 94:9) Yehowa naa nii jogbaŋŋ kwraa fe adesai. Jeee bɔ ni mɔ ko ji yɛ kponɔgbɛ lɛ pɛ enaa, ejaakɛ ‘ekaa tsuii ekwɛɔ’ ni ‘eŋmɛɔ tsui ekwɛɔ.’ (Abɛi 17:3; 21:2) Hɛɛ, ebaanyɛ eŋmɛ wɔsusumɔi, nɔ ni kanyaa wɔnifeemɔi, kɛ nibii ni wɔshweɔ yɛ wɔmli gbɛ tɔɔ lɛ ekwɛ.

Yehowa le naagbai ni ekolɛ wɔkɛkpeɔ yɛ wɔshihilɛ mli lɛ ni eboɔ wɔfaikpamɔi lɛ atoi. Lalatsɛ lɛ ŋma akɛ: “Yehowa hiŋmɛi kã jalɔi ahe, ni efeɔ toi ehaa amɛbolɔmɔi lɛ. Yehowa bɛŋkɛɔ mɛi ni tsuii ekumɔ lɛ, ni ehereɔ mɛi ni mumɔ tswiaa shi kɛ dɔlɛ lɛ.” (Lala 34:16, 18) Kwɛ bɔ ni wɔtsuii nyɔɔ wɔmli waa akɛ wɔɔle akɛ Yehowa nuɔ shihilɛi ni wɔyɔɔ mli lɛ shishi ni eboɔ wɔfaikpamɔi ni jɛ tsuiiaŋ tɔɔ lɛ atoi!

Yehowa Nyɔŋmɔ naa nitsumɔi ni atsuɔ yɛ duŋ kpii mli lɛ po. Hɛɛ, “nibii fɛɛ yɛ faŋŋ ni agbele nɔ yɛ lɛ mɔ ni wɔkɛyɔɔ sane lɛ hiŋmɛiiaŋ.” (Hebribii 4:13) No hewɔ lɛ, kɛ wɔnifeemɔi ja loo ejaaa lɛ Nyɔŋmɔ naa fɛɛ. (Abɛi 15:3) Ákɛ nɔkwɛmɔnɔ lɛ, aŋma yɛ 1 Mose 6:8, 9 akɛ “Noa hiɛ ba nyam yɛ Yehowa hiɛ” ni ‘ekɛ Nyɔŋmɔ nyiɛ.’ (1 Mose 6:8, 9) Hɛɛ, Noa nifeemɔ ha Yehowa kpɛlɛ enɔ ni ejɔɔ lɛ ejaakɛ ebo Nyɔŋmɔ toi ni ekɛ Nyɔŋmɔ shishitoo mlai ni ja lɛ tsu nii. (1 Mose 6:22) Noa beaŋ bii lɛ efeee amɛnii tamɔ Noa, amɛsumɔ yiwalɛ ni amɛkɛ amɛhe wo efɔŋfeemɔ mli. Nyɔŋmɔ na amɛnifeemɔi lɛ fɛɛ. ‘Ena akɛ gbɔmɛi anɔ fɔŋ feemɔ fá yɛ shikpɔŋ lɛ nɔ, ni amɛtsuiŋ susumɔi ajwɛŋmɔ fɛɛ lɛ efɔŋ kɛkɛ ji daa nɛɛ.’ Naagbee kwraa lɛ, Yehowa kpãta efɔŋfeelɔi nɛɛ ahiɛ ni ebaa Noa kɛ eweku lɛ awala yi.—1 Mose 6:5; 7:23.

Ani Yehowa baakpɛlɛ onɔ? Eji anɔkwale akɛ Yehowa hiŋmɛi “kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsui ehi kɛwula shi yɛ egbɛfaŋ lɛ.” (2 Kronika 16:9) Etsɛŋ, eeejie efɔŋfeelɔi fɛɛ kɛjɛ shikpɔŋ lɛ nɔ ekoŋŋ ni ehere mɛi ni he jɔ yɛ amɛtsuiiaŋ tɔɔ lɛ ayiwala.—Lala 37:10, 11.