Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Kɛ́ nakai ni lɛ, no lɛ kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛɛ gbɛ̀i srɔtoi ejwɛ anɔ Kristofoi a-Hela Ŋmalɛi lɛ kɛ wiemɔ ni ji “asafo” lɛ tsu nii?

Mɛi klɛŋklɛŋ ni enɛ kɔɔ amɛhe ji kuu ni ji Kristofoi ni afɔ amɛ mu lɛ (yɛ ŋmalɛi komɛi amli lɛ atsĩɔ Kristo tã afataa he). Yɛ bei krokomɛi amli lɛ, “Nyɔŋmɔ asafo” ni atsĩɔ tã lɛ kɔɔ Kristofoi fɛɛ ni yɔɔ yɛ be pɔtɛɛ ko mli lɛ ahe. Gbɛ ni ji etɛ ni akɛtsu nii lɛ kɔɔ Kristofoi fɛɛ ni yɔɔ he ko lɛ ahe. Nɔ ni ji ejwɛ lɛ, wiemɔ lɛ baanyɛ akɔ Kristofoi ni yɔɔ asafo kome mli lɛ ahe.—4/15, baafa 21-23.

• Mɛɛ be Kristofoi ni yaa ŋwɛi lɛ ahalamɔ lɛ sɛɛ baafo?

Biblia lɛ haaa sanebimɔ nɛɛ hetoo tɛ̃ɛ. Nakai halamɔ lɛ je shishi yɛ afi 33 Ŋ.B. ni etee nɔ kɛbashi wɔbei nɛɛ amli. Kɛjɛ afi 1935 sɛɛ kɛbaa lɛ, nɔ titri ni atsu yɛ kaselɔfeemɔ nitsumɔ lɛ mli ji asafo babaoo lɛ anaabuamɔ. Kɛtsɔ mumɔ krɔŋkrɔŋ lɛ nɔ lɛ mɛi komɛi ni abaptisi amɛ yɛ afi 1935 sɛɛ lɛ ená odaseyeli ni tsɔɔ akɛ amɛbaaya ŋwɛi, no hewɔ lɛ wɔnyɛŋ wɔtsɔɔ be pɔtɛɛ ni mɛi ni yaa ŋwɛi lɛ ahalamɔ lɛ sɛɛ baafo. Mɛi ni afɔ amɛ mu diɛŋtsɛ lɛ bɛ Nyɔŋmɔ mumɔ lɛ babaoo fe tooi krokomɛi lɛ amli bii lɛ, ni asaŋ amɛkpaaa gbɛ ákɛ akɛ amɛ aye yɛ gbɛ krɛdɛɛ ko nɔ. Ekɔɔɔ he eko hiɛnɔkamɔ ni Kristofoi yɔɔ lɛ, ehe miihia ni amɛye anɔkwa ni amɛya nɔ amɛfee Nyɔŋmɔ suɔmɔnaa nii.—5/1, baafa 30-31.

• Beni Yefta wo shi lɛ, ani no mli lɛ efee klalo akɛ ekɛ ebiyoo lɛ baashã afɔle diɛŋtsɛ eha Nyɔŋmɔ?

Dabi. Yefta miitsɔɔ akɛ, ebaajɔɔ mɔ ni kɛ lɛ aaabakpe lɛ nɔ kwraa eha Nyɔŋmɔ ni esɔmɔ lɛ kwraa taakɛ Mose Mla lɛ ŋmɛɔ gbɛ lɛ. (1 Samuel 2:22) Bɔni afee ni Yefta biyoo lɛ aha etsɛ anyɛ aye eshiwoo lɛ nɔ lɛ, etee nɔ esɔmɔ yɛ kpeebuu lɛ mli, ni nakai ní efee lɛ ji afɔleshãa wulu diɛŋtsɛ ejaakɛ no tsɔɔ akɛ eboteŋ gbalashihilɛ mli kɔkɔɔkɔ.—5/15, baafa 9-10.

• Mɛɛ gbɛfaŋnɔ kodɛs lɛ tsu yɛ mra be mli Kristofoi abe lɛ mli?

Etamɔ nɔ ni Kristofoi lɛ kɛ wolokpo tsu nii titri, kɛ́ hooo kwraa lɛ, kɛyashi klɛŋklɛŋ afii 100 Ŋ.B. naagbee gbɛ. Yɛ afii 100 Ŋ.B. afii lɛ amli lɛ, naataamɔ tee nɔ yɛ mɛi ni sumɔɔ ni akɛ kodɛs atsu nii kɛ mɛi ni sumɔɔ ni akɛ wolokpo atsu nii lɛ ateŋ. Ni kɛlɛ, woloŋlelɔi heɔ amɛyeɔ akɛ kodɛs lɛ ní Kristofoi lɛ kɛtsu nii lɛ ji nɔ ni ye ebua waa ni eha mɛi pii kpɛlɛ ekɛ nitsumɔ nɔ lɛ.—6/1, baafa 14-15.

• Mɛni ji Gezer Kalanda lɛ?

Eji kaaloo tɛtao bibioo ko ni ayana yɛ afi 1908 yɛ he ko ni yɔɔ Gezer maŋtiase lɛ mli. Mɛi pii susu akɛ niŋmaa ni yɔɔ tɛtao lɛ nɔ lɛ ji skul nifeemɔ ko ni skul gbekɛ ko ŋmala. Niŋmaa ni yɔɔ tɛtao lɛ nɔ lɛ wieɔ saji ni kɔɔ okwaayeli nitsumɔ ni yaa nɔ yɛ afi lɛ mli fɛɛ ni afee lɛ mlɛo lɛ he, ni nɔ̃ klɛŋklɛŋ ni ewieɔ he ji nibii anaabuamɔ be lɛ ni kɛ September loo October yeɔ hegbɔ lɛ ni asaŋ etsĩɔ ŋmɔshi nibii srɔtoi kɛ okwaayeli nitsumɔi srɔtoi ni yaa nɔ lɛ atã.—6/15, baafa 8.

• Te atsɔɔ tɛŋŋ kɛ́ akɛɛ mɔ efee esha eshi mumɔ krɔŋkrɔŋ lɛ?

Abaanyɛ afee esha ashi Yehowa mumɔ krɔŋkrɔŋ lɛ, esha ko ni akɛkeŋ. (Mateo 12:31) Nyɔŋmɔ ji mɔ ni tsɔɔ kɛji akɛ mɔ efee esha ni akɛkeee, ni lɛ ji mɔ ni baanyɛ ajie emumɔ lɛ kɛjɛ wɔnɔ. (Lala 51:11) Kɛ́ esha ko ni wɔfee lɛ eha wɔhao waa lɛ, no lɛ eeenyɛ efee akɛ wɔtsake wɔtsui yɛ anɔkwale mli ni no hewɔ lɛ abaanyɛ akɛɛ akɛ wɔfeko esha wɔshiko mumɔ lɛ.—7/15, baafa 16-17.

• Akɛni Maŋtsɛ Saul kɛ David etsu nii yɛ be ko ni eho lɛ mli hewɔ lɛ, mɛni hewɔ ni ebi akɛ namɔ bi ji David lɛ? (1 Samuel 16:22; 17:58)

Jeee David tsɛ gbɛi kɛkɛ Saul taoɔ akɛ ele. Akɛni Saul na akɛ David ni gbe Goliat etsɛko lɛ ji nuu ni yɔɔ hemɔkɛyeli kɛ ekãa hewɔ lɛ, eetao ele nɔ̃ gbɔmɔ ni tsɔse oblanyo nɛɛ. Ekolɛ Saul baasumɔ ni ekɛ Ishai loo eweku lɛ mlibii krokomɛi lɛ afata etabilɔi lɛ ahe.—8/1, baafa 31.