Niŋmaa Ehe Sɛɛnamɔ Yɛ Blema Israel

ANI ona hegbɛ okane Iliad loo Odyssey ni ji lalafoo wiemɔi enyɔ ni mli saji fa babaoo ni ale waa yɛ blema Hela lɛ ekomɛi pɛŋ? Asusuɔ akɛ aŋma lalafoo wiemɔi nɛɛ yɛ afi 800 loo afi 700 afii lɛ amli D.Ŋ.B. Kɛ́ akɛ niŋmaai nɛɛ to Biblia lɛ ni aje eŋmaa shishi afii ohai abɔ dani aŋma lalafoo wiemɔi nɛɛ ahe lɛ, mɛni abaanyɛ awie yɛ Biblia lɛ he? Wolokpo ko (The Jewish Bible and the Christian Bible) tsɔɔ mli akɛ: “Kɛ́ hooo kwraa lɛ, Biblia lɛ tsɛ́ woji 429 ni aŋmala ashwie shi lɛ mli saji ayisɛɛ. Enɛ sa kadimɔ waa kɛji akɛ mɔ kai akɛ Iliad lalafoo wiemɔi lɛ tsɛ́ wolo kome pɛ ni aŋma yisɛɛ yɛ be mli ni Odyssey nɔ̃ lɛ tsɛɛɛ wolo kome po yisɛɛ.”

The Oxford Encyclopedia of Archaeology in the Near East wolo lɛ tsɔɔ mli akɛ, “etamɔ nɔ ni yɛ blema Israel lɛ niŋmaa ji nɔ̃ titri ko ni fata amɛjamɔŋ nifeemɔi lɛ ahe.” Ákɛ nɔkwɛmɔnɔ lɛ, aŋmala Mla kpaŋmɔ lɛ mli saji lɛ ashwie shi, ni yɛ sɛɛ mli lɛ akane lɛ be kɛ beaŋ yɛ maŋ lɛ mli yɛ hii, yei kɛ gbekɛbii fɛɛ ahiɛ. Agbɛnɛ hu kui kɛ aŋkroaŋkroi fɛɛ kane Mla kpaŋmɔ lɛ ni amɛkase. Beni Alan Millard ni eji tsɔɔlɔ kpanaa yɛ Liverpool Univɛsiti lɛ epɛi Mla lɛ he nibii komɛi amli lɛ, emu sane naa yɛ sɛɛ mli akɛ: “Ekã shi faŋŋ akɛ abuɔ Israelnyo fɛɛ Israelnyo akɛ mɔ ni baanyɛ nii akane ní asaŋ enyɛ eŋma hu.”—5 Mose 31:9-13; Yoshua 1:8; Nehemia 8:13-15; Lala 1:2.

Bɔfo Paulo tsɔɔ bɔ ni esa akɛ Kristofoi abu ŋmalɛi krɔŋkrɔŋi lɛ aha beni eŋma akɛ: “Nibii abɔ ní aŋma ato momo lɛ, wɔ diɛŋtsɛ wɔhe nitsɔɔmɔ hewɔ aŋma ato lɛ, koni wɔkɛ tsuishiŋmɛɛ kɛ ŋmalɛi lɛ amli miishɛjemɔ lɛ aná hiɛnɔkamɔ.” Ani otsɔɔ akɛ ohiɛ sɔɔ Biblia lɛ kɛtsɔ kanemɔ ni okaneɔ lɛ daa lɛ nɔ?—Romabii 15:4.