‘Amɛwoɔ Yibii Yɛ Gbɔlɛ Mli’

MƐI ni yɔɔ Mediteranea lɛ ateŋ mɛi babaoo duɔ amitsrɔbii, ni ji tɛŋ tso henɔ ko, yɛ amɛkpoi anɔ. Ale tsei nɛɛ jogbaaŋ yɛ bɔ ni amɛyɔɔ fɛo kɛ amɛnɔ aduawai ni ŋɔɔ lɛ hewɔ. Agbɛnɛ hu, amɛkãa he amɛwoɔ yibii nɔ ni fe afii oha.

Blema Israel Maŋtsɛ Salomo tsɔ lalafoo wiemɔ nɔ ekɛ Shulamit oblayoo fɛfɛo lɛ to tɛŋ tso he. (Salomo Lalai 7: 7) Wolo ni ji Plants of the Bible lɛ kɛɛ akɛ: “Hebri wiemɔ kɛha amitsrɔbi ji ‘tàmâr.’ . . . Ebatsɔ Yudafoi lɛ akadimɔnɔ kɛha nibii ni yɔɔ nyam kɛ fɛo, ni eji gbɛi ni akɛfɔɔ yei woo.” Ákɛ nɔkwɛmɔnɔ lɛ, awo Salomo tsɛ biyoo fɛfɛo ko gbɛi akɛ Tamar. (2 Samuel 13:1) Fɔlɔi komɛi kɛ nakai gbɛi lɛ woɔ amɛbiyei lolo.

Jeee yei fɛfɛji pɛ akɛ amɛ toɔ tɛŋ tso he. Lalatsɛ lɛ lá akɛ: “Jalɔ lɛ aaafrɔke tamɔ tɛŋ; eeeda tamɔ Lebanon tseneduru. Mɛi ni atɛo amɛ yɛ Yehowa we lɛ, amɛaafrɔke yɛ wɔ-Nyɔŋmɔ lɛ kpoi lɛ anɔ. Amɛaakã he amɛwo yibii yɛ gbɔlɛ mli tete, amɛmli aaahi nu ni amɛaahi frɔ̃frɔ̃.”—Lala 92:13-15.

Yɛ mfonirifeemɔŋ lɛ, nibii pii yɛ mɛi ni kɛ anɔkwayeli sɔmɔɔ Nyɔŋmɔ yɛ amɛgbɔlɛ beaŋ lɛ ahe ni tamɔ tɛŋ tso fɛfɛo lɛ. Biblia lɛ kɛɔ akɛ: “Waŋ lɛ, anunyam akekere ni, kɛ́ aná lɛ yɛ jalɛ gbɛ nɔ lɛ.” (Abɛi 16:31) Eyɛ mli akɛ mɛi ni edara lɛ agbɔmɔtsoŋ hewalɛnamɔ baanyɛ aba shi moŋ, shi amɛbaanyɛ amɛhiɛ amɛmumɔŋ nyɛmɔi lɛ amli lolo kɛtsɔ Nyɔŋmɔ Wiemɔ lɛ, ni ji Biblia lɛ ní amɛaakase daa lɛ nɔ. (Lala 1:1-3; Yeremia 17:7, 8) Yɛ anɔkwafoi ni edara nɛɛ awiemɔi ni ŋɔɔ kɛ amɛnɔkwɛmɔnɔ kpakpai ahewɔ lɛ, amɛji hewalɛwoo kple jɛɛhe kɛha mɛi krokomɛi. Ni amɛkãa he amɛwoɔ yibii gbo kɛ gbiɛnaa. (Tito 2:2-5; Hebribii 13:15, 16) Taakɛ amitsrɔbi ji lɛ, mɛi ni edara nɛɛ baanyɛ awo yibii babaoo yɛ amɛgbɔlɛ beaŋ.