Mɛni Hewɔ Nyɔŋmɔ Ŋmɛɔ Efɔŋfeemɔ Gbɛ?

EHE ehiaaa ni oya shɔŋŋ dani ona akɛ efɔŋfeemɔ kɛ piŋmɔ efa babaoo. Tai gbeɔ maŋbii kɛ asraafoi fɛɛ. Awuiyeli kɛ yiwalɛ nifeemɔ egbɛ eshwã he fɛɛ he. Ekolɛ mɔ ko ená ohe jwɛŋmɔ fɔŋ loo aye bo sane ko ni ejaaa nyɛsɛɛ nɛɛ. Yɛ nɔ ni ona kɛ nɔ ni bo diɛŋtsɛ hu otsɔ mli pɛŋ nɛɛ hewɔ lɛ, ekolɛ obaabi ohe akɛ, ‘Mɛni hewɔ Nyɔŋmɔ ŋmɛɔ efɔŋfeemɔ gbɛ?’

Nakai sanebimɔ lɛ jeee nɔ ko hee. Aaafee afii 3,600 ni eho nɛ lɛ, Nyɔŋmɔ anɔkwa tsulɔ Hiob bi akɛ: “Mɛɛ hewɔ mɛi fɔji ayi náa wala?” (Hiob 21:7) Akɛni gbalɔ Yeremia ni hi shi yɛ afi 600 D.Ŋ.B lɛ hao waa yɛ emaŋbii lɛ anifeemɔi gbohii lɛ ahewɔ lɛ, ebi akɛ: “Mɛɛ hewɔ ni mɛi fɔji agbɛ jaa haa amɛ ni kutumpɔfoi ahe jɔɔ amɛ lɛ?” (Yeremia 12:1) Hiob kɛ Yeremia fɛɛ le akɛ jalɔ ji Nyɔŋmɔ. Ni kɛlɛ, amɛnaa kpɛ amɛhe yɛ nɔ̃ hewɔ ni efɔŋfeemɔ fa babaoo lɛ he. Ekolɛ bo hu ohiɛ feɔ bo yaa yɛ nɔ̃ hewɔ ni enɛ yaa nɔ lɛ he.

Mɛi komɛi shwaa Nyɔŋmɔ yɛ efɔŋfeemɔ kɛ piŋmɔ ni yɔɔ lɛ he. Mɛi krokomɛi hu biɔ amɛhe akɛ: ‘Kɛ́ Nyɔŋmɔ yɛ hewalɛ fe mɔ fɛɛ mɔ, ni jalɔ ji lɛ ní eyɛ suɔmɔ lɛ, mɛni hewɔ efooo efɔŋ kɛ piŋmɔ ni yaa nɔ lɛ sɛɛ? Mɛni hewɔ eŋmɛ gbɛ ni efɔŋfeemɔ etee nɔ aahu kɛbashi wɔbei nɛɛ amli lɛ?’ Sane ni nyiɛ sɛɛ lɛ baaha sanebimɔi nɛɛ kɛ ekrokomɛi ni he hiaa lɛ ahetoo.

[He ni Mfoniri ni yɔɔ baafa 3 lɛ Jɛ]

AP Photo/Adam Butler