Sanebimɔi ni Jɛ Kanelɔ Adɛŋ

Akɛni afã Yudafoi lɛ koni amɛkaye “masha nii” kɛ́ amɛmiiye Hehoo lɛ hewɔ lɛ, mɛni hewɔ mɔ ni Yesu kɛ wein ní akɛ nibii ni esha fee lɛ tsu nii beni etoɔ egbele lɛ Kaimɔ lɛ shishi lɛ?—2 Mose 12:20; Luka 22:7, 8, 14-20.

Ato Hehoo ni akɛkaiɔ be ni Israelbii lɛ shi Mizraim lɛ yeli shishi yɛ afi 1513 D.Ŋ.B. Beni Yehowa kɛ gbɛtsɔɔmɔ haa yɛ bɔ ni esa akɛ aye gbi jurɔ nɛɛ aha lɛ he lɛ, ekɛɛ akɛ: “Nyɛkayea masha nii; nyɛyea akpiti yɛ nyɛshihilɛhei lɛ fɛɛ.” (2 Mose 12:11, 20) Nii ni ŋmalɛ nɛɛ wieɔ he akɛ Nyɔŋmɔ gu eyeli lɛ kɔɔ aboloo ni esa akɛ aye yɛ Hehoo be lɛ mli lɛ pɛ he. Atsĩii wein tã yɛ sane lɛ mli.

Yiŋtoo titri hewɔ ni akɛɛ Israelbii lɛ akɛ amɛkaye masha nii yɛ nakai gbi lɛ nɔ ji akɛ, amɛ Mizraim shimɔ lɛ fee kpalakpala. Mose Wolo ni Ji Enyɔ 12:34 lɛ tsɔɔ mli akɛ: “Maŋ lɛ hole amɛmãi ni nako asha lɛ, ni amɛfimɔ amɛmãtsesei lɛ amɛwo amɛmamai amli, ni amɛkɛtswia amɛkɔji.” Masha ni ayeŋ yɛ Hehoo krokomɛi ni abaaye yɛ sɛɛ mli lɛ amli lɛ baakai yinɔbii ni baaba yɛ sɛɛ mli lɛ sane ni he hiaa waa ni ŋmalɛ nɛɛ wieɔ he lɛ.

Sɛɛ mli lɛ, akɛ masha bɔi esha loo fitemɔ he okadifeemɔ. Ákɛ nɔkwɛmɔnɔ lɛ, beni bɔfo Paulo wieɔ mɔ ko ni kɛ ehe yawo jeŋba shara mli ní hi Kristofoi asafo lɛ mli lɛ he lɛ, ebi akɛ: “Nyɛleee akɛ masha bibioo shaa mã sui lɛ fɛɛ?” Kɛkɛ ni ekɛfata he akɛ: “No hewɔ lɛ nyɛjiea masha momo lɛ, koni nyɛtsɔmɔ mã hee, tamɔ bɔ ni mã akpiti ji nyɛ lɛ; ejaakɛ agbe wɔ Hehoo toobi ni ji Kristo lɛ aha wɔ. No hewɔ lɛ nyɛhaa wɔyea Hehoo gbijurɔ lɛ, jeee kɛ masha momo, ni asaŋ jeee kɛ efɔŋ loo nɔshafeemɔ masha, shi moŋ kɛ anɔkwale akpiti ŋmiiŋmi.” (1 Korintobii 5:6-8) Akpiti mã pɛ abaanyɛ akɛdamɔ shi aha Yesu gbɔmɔtso ni esha bɛ mli lɛ.—Hebribii 7:26.

Sɛɛ mli lɛ, Yudafoi lɛ kɛ wein fata nibii ni amɛkɛyeɔ Hehoo lɛ ahe. Eeenyɛ efee akɛ amɛfee nakai beni amɛku amɛsɛɛ kɛjɛ Babilon nomŋɔɔ lɛ mli lɛ. Biblia lɛ ewieee eshiii wein ni akɛfata nibii ni akɛyeɔ nakai gbi jurɔ lɛ ahe lɛ, ni no hewɔ lɛ tɔmɔ ko bɛ he akɛ Yesu kɛ wein tsu nii beni amɛyeɔ Hehoo lɛ. Yɛ anɔkwale mli lɛ, gbɛ ni wein tsɔɔ nɔ ni lɛ diɛŋtsɛ eshaa yɛ blema beaŋ lɛ yɛ srɔto yɛ gbɛ ni atsɔɔ nɔ ahaa mã shaa yɛ no beaŋ lɛ he. Yɛ mã gbɛfaŋ lɛ, akɛ nɔ ko ni haa nibii fũɔ loo masha woɔ mli, ni no haa eshaa. Ehe ehiaaa ni akɛ nɔ ko awo wein yibii ni akɛfeɔ wein lɛ amli bɔni afee ni no aha esha. Nibii ni haa nii shaa yɛ wein yibii lɛ amli momo. Akɛni akpaa wein yibii lɛ kwraa dani Hehoo be lɛ shɛɔ yɛ Agbiɛnaa beaŋ hewɔ lɛ, anyɛŋ aná wein yibii amli nu ni eshako beni ayeɔ Hehoo lɛ.

No hewɔ lɛ, wein ni Yesu kɛtsu nii yɛ Kaimɔ lɛ mli ákɛ okadi nɔ̃ lɛ eteee shi ewooo fãmɔ ni akɛha akɛ akaye masha yɛ Hehoo lɛ yeli mli lɛ yɛ gbɛ ko kwraa nɔ. Abaanyɛ akɛ wein tsuru fɛɛ wein tsuru ni bɛ dɔkɔdɔkɔ, ní akɛ dãa ni naa wa, kɛ bai loo tsofai komɛi futuko mli lɛ atsu nii kɛdamɔ shi aha Kristo “lá ni jara wa lɛ.”—1 Petro 1:19.