“Mɛni Ji Anɔkwale?”

BLEMA Roma kpokpaa ko nɔyelɔ ni atsɛɔ lɛ Pontio Pilato lɛ ni bi sane nɛɛ, eheee eyeee akɛ hetoo yɛ kɛha esanebimɔ lɛ. Ebiii sane nɛɛ koni aha lɛ hetoo, ni Yesu hu haaa lɛ hetoo. Ekolɛ Pilato susu akɛ anyɛŋ anu shishi akɛ ayɛ anɔkwale kome pɛ yɛ sane ko he.—Yohane 18:38.

Ŋmɛnɛ hu lɛ, mɛi babaoo ni jamɔŋ hiɛnyiɛlɔi, skul tsɔselɔi kɛ maŋkwralɔi fata he lɛ hiɛ susumɔi ni tamɔ nakai. Amɛheɔ amɛyeɔ akɛ anyɛŋ akɛɛ akɛ nɔ ko ji anɔkwale shiishi—titri lɛ nibii ni kɔɔ jeŋba kɛ jamɔŋ anɔkwale he—ni akɛ shihilɛ fɛɛ shihilɛ ni baatsɔɔ nɔ ni ji anɔkwale ni anɔkwalei nɛɛ tsakeɔ. Eyɛ faŋŋ akɛ nɔ ni susumɔ nɛɛ tsɔɔ ji akɛ mɔ fɛɛ mɔ baanyɛ atsɔɔ nɔ ni ja kɛ nɔ ni ejaaa yɛ esuɔmɔnaa. (Yesaia 5:20, 21) Mɔ fɛɛ mɔ baanyɛ akpoo shishitoo mlai kɛ jeŋba he mlai ni blemabii lɛ hi shi yɛ naa lɛ akɛ amɛbe eho.

Sɛɛnamɔ yɛ he akɛ wɔɔsusu sane ni ha Pilato bi sane ní ebi lɛ he. No mli lɛ, Yesu kɛɛ akɛ: “Enɛ hewɔ afɔ́ mi ni enɛ hewɔ nɔŋŋ miba je lɛ mli, koni mibaye anɔkwale lɛ he odase.” (Yohane 18:37) Yesu heɔ eyeɔ akɛ anɔkwale ji nɔ ko ni abaanyɛ anu shishi. Ewo ekaselɔi lɛ ashi akɛ: “Nyɛaale anɔkwale lɛ, ni anɔkwale lɛ aaaha nyɛye nyɛhe.”—Yohane 8:32.

Nɛgbɛ abaanyɛ ana anɔkwale yɛ? Be ko lɛ, Yesu sɔle eha Nyɔŋmɔ akɛ: “Owiemɔ lɛ anɔkwaleŋ.” (Yohane 17:17) Biblia lɛ ni ajɛ Nyɔŋmɔ mumɔŋ aŋma lɛ haa wɔnaa anɔkwalei ni kɛ gbɛtsɔɔmɔ kpakpa kɛ wɔsɛɛ be he anɔkwa hiɛnɔkamɔ ni ji naanɔ wala lɛ haa.—2 Timoteo 3:15-17.

Beni Pilato ná hegbɛ akɛ eeekase anɔkwale nɛɛ lɛ ekpoo, ni ekɛtsɔɔ akɛ ebɛ he miishɛɛ. Kɛ́ oná hegbɛ ni tamɔ nakai lɛ mɛni obaafee? Mɛni hewɔ obiii Yehowa Odasefoi koni amɛtsɔɔ bo nɔ ni ji “anɔkwale lɛ” ni Yesu tsɔɔ mɛi lɛ? Ebaaŋɔɔ amɛnaa akɛ amɛaajaje anɔkwale nɛɛ amɛtsɔɔ bo.