Nyɔŋmɔ Yiŋtoo Lɛ Ni Wɔɔhi Shi Yɛ Naa Ŋmɛnɛ
Nyɔŋmɔ Yiŋtoo Lɛ Ni Wɔɔhi Shi Yɛ Naa Ŋmɛnɛ
‘Kristo gbo mɛi fɛɛ yigbele, koni mɛi ni hiɛ kãmɔ lɛ ahiɛ akakãmɔ miiha amɛ diɛŋtsɛ amɛhe dɔŋŋ.’—2 KORINTOBII 5:15.
1. Gbaa shihilɛ ko ni maŋsɛɛ sanekpakpa jajelɔ ko kɛkpe yɛ he ni akɛha lɛ akɛ eyasɔmɔ yɛ lɛ.
AARON ni eji maŋsɛɛ sanekpakpa shiɛlɔ lɛ bɔ amaniɛ akɛ: “Wɔtsɔne lɛ ji klɛŋklɛŋ tsɔne ni jeee asraafoi atsɔne ni bote Afrika akrowa ni etse ehe banee lɛ mli yɛ ta ni tee nɔ yɛ maŋbii lɛ ateŋ lɛ naagbee. * Wɔnuuu Kristofoi asafo bibioo ni yɔɔ jɛmɛ lɛ he, ni esa akɛ wɔya jɛmɛ ni wɔyatsu wɔnyɛmimɛi lɛ ahiamɔ nii lɛ ahe nii wɔha amɛ. Wɔkɛ vidio ni saneyitso ji Jehovah’s Witnesses—The Organization Behind the Name lɛ fata niyenii, atadei kɛ Biblia kasemɔ woji ni wɔkɛtee lɛ he. * Akɛni mɛi ni yɔɔ wɔwiemɔ lɛ he miishɛɛ lɛ babaoo ke yuu kɛbakwɛ vidio nɛɛ yɛ jwɛi agba agbo ko ni wɔjie vidio nɛɛ yɛ mli lɛ hewɔ lɛ, jɛmɛ bafee tamɔ akrowa lɛ sini jiemɔ he, ni wɔjie vidio nɛɛ shii enyɔ. Wɔna Biblia mli nikaselɔi babaoo yɛ eko fɛɛ eko sɛɛ. Ŋwanejee ko bɛ he akɛ wɔmɔdɛŋbɔɔ lɛ efeee yaka.”
2. (a) Mɛni hewɔ Kristofoi etswa amɛfai shi akɛ amɛkɛ amɛwala baatsu nii yɛ Nyɔŋmɔ sɔɔmɔ mli lɛ? (b) Mɛɛ sanebimɔi wɔbaasusu he agbɛnɛ?
2 Mɛni hewɔ Aaron kɛ hii krokomɛi ni fata ehe lɛ fã gbɛ ni yɔɔ oshara tamɔ nakai? Akɛni amɛhiɛ esɔ Yesu Kristo kpɔ̃mɔ afɔleshãa lɛ hewɔ lɛ amɛjɔɔ amɛwala nɔ amɛha Nyɔŋmɔ ni amɛmiisumɔ koni amɛkɛtsu nii koni ekɛ Nyɔŋmɔ yiŋtoo lɛ akpa gbee. Kristofoi krokomɛi fɛɛ ni amɛjɔɔ amɛhe nɔ lɛ etswa amɛfai shi taakɛ mɛnɛɛmɛi hu efee lɛ akɛ ‘amɛhiɛ kãmɔŋ haŋ amɛ diɛŋtsɛ amɛhe dɔŋŋ,’ shi moŋ amɛbaafee bɔ fɛɛ bɔ ni amɛaanyɛ yɛ “sanekpakpa lɛ hewɔ.” (2 Korintobii 5:15; 1 Korintobii 9:23) Amɛle akɛ kɛ nibii agbɛjianɔtoo nɛɛ ba naagbee lɛ, sɛɛnamɔ baŋ shika kɛ hegbɛi ni yɔɔ je nɛɛ mli lɛ he. Hewɔ lɛ, akɛni amɛyɔɔ wala kɛ gbɔmɔtsoŋ hewalɛ bɔ ni sa nɛɛ lɛ amɛkɛ enɛɛmɛi baatsu nii koni ekɛ Nyɔŋmɔ yiŋtoo lɛ akpã gbee. (Jajelɔ 12:1) Mɛɛ gbɛ nɔ wɔbaatsɔ wɔfee enɛ? Nɛgbɛ wɔbaanyɛ wɔná ekãa kɛ hewalɛ ni he hiaa kɛha enɛ feemɔ lɛ yɛ? Ni mɛɛ sɔɔmɔ hegbɛi yɔɔ kɛha wɔ?
Gbɛ Kpakpa ni Aaakɔ Fiofio
3. Mɛɛ nibii wɔfeɔ kɛjeɔ Nyɔŋmɔ suɔmɔnaa nii feemɔ shishi?
3 Yɛ anɔkwa Kristofoi agbɛfaŋ lɛ Nyɔŋmɔ suɔmɔnaa nii feemɔ lɛ ji wala beaŋ fɛɛ nifeemɔ. Ejeɔ shishi kɛ nifeemɔi tamɔ Teokrase Sɔɔmɔ Skul lɛ ni akɛ he aaawo mli, Biblia lɛ kanemɔ daa gbi, shiɛmɔ nitsumɔ lɛ ni akɛ he woɔ mli kɛ hiɛ ni ayaa koni ashɛ baptisimɔ he. Beni wɔyaa wɔhiɛ lɛ wɔhaa bɔfo Paulo wiemɔ nɛɛ hiɔ wɔjwɛŋmɔ mli akɛ: “Bɔɔ nii nɛɛ ahe mɔdɛŋ, okɛ ohe awo mli kwraa, koni mɛi fɛɛ ana oshweremɔ faŋŋ.” (1 Timoteo 4:15) Wɔshweremɔ ni mɛi fɛɛ aaana lɛ etsɔɔɔ akɛ wɔ diɛŋtsɛ wɔɔjie wɔyi wɔtsɔɔ mɛi, shi moŋ etsɔɔ wɔfai shi ni wɔtswa akɛ wɔbaafee Nyɔŋmɔ suɔmɔnaa nii ni wɔfooo wɔ pɛ wɔnɔ mli. Kɛ́ wɔkɔ gbɛ ni tamɔ nakai lɛ no tsɔɔ akɛ wɔŋmɛɔ Nyɔŋmɔ gbɛ ni etsɔɔ wɔ gbɛ yɛ nɔ fɛɛ nɔ mli, ni efeɔ enɛ yɛ gbɛ ni hi fe fɛɛ nɔ.—Lala 32:8.
4. Mɛɛ gbɛ nɔ wɔɔtsɔ wɔye yeyeeyefeemɔi ni he ehiaaa lɛ anɔ?
4 Kɛ́ wɔshashao shi loo wɔjwɛŋ wɔhe fe nine lɛ ehaŋ wɔya wɔhiɛ yɛ Nyɔŋmɔ sɔɔmɔ lɛ mli. (Jajelɔ 11:4) No hewɔ lɛ ja wɔye wɔyeyeeyefeemɔi lɛ anɔ dani wɔbaanyɛ wɔna miishɛɛ diɛŋtsɛ yɛ Nyɔŋmɔ sɔɔmɔ mli. Ákɛ nɔkwɛmɔnɔ lɛ, Erik miisumɔ ni eyasɔmɔ yɛ asafo ni awieɔ maŋ kroko nɔ wiemɔ yɛ mli lɛ mli. Shi eye ŋkɔmɔ akɛ: ‘Ani manyɛ mikɛ amɛ abɔ? Ani maná amɛhe miishɛɛ? Ani amɛbaasumɔ misane?’ Ebɔ amaniɛ akɛ: “Naagbee lɛ miyɔse akɛ ehe miihia ni masusu nyɛmimɛi lɛ ahe fe bɔ ni misusuɔ mihe. Mitswa mifai shi akɛ miyeee ŋkɔmɔ dɔŋŋ shi moŋ mafee bɔ fɛɛ bɔ ni manyɛ, ni mifeŋ ŋkomeŋfa. Misɔle kɛbi yelikɛbuamɔ ni mifee nɔ ni mito miyiŋ akɛ mafee lɛ. Amrɔ nɛɛ lɛ mináa miishɛɛ waa yɛ sɔɔmɔ ni misɔmɔ yɛ jɛmɛ lɛ mli.” (Romabii 4:20) Hɛɛ, bɔ ni wɔjɛɔ wɔtsuiŋ wɔsɔmɔɔ Nyɔŋmɔ kɛ mɛi krokomɛi lɛ, nakai wɔbaaná miishɛɛ ni wɔtsui baanyɔ wɔmli.
5. Mɛni hewɔ gbɛjianɔtoo kpakpa he hiaa kɛ wɔɔnyɛ wɔhi shi yɛ Nyɔŋmɔ yiŋtoo lɛ naa lɛ? Hã enɛ he nɔkwɛmɔnɔ.
5 Kɛ́ wɔbaaye omanye yɛ Nyɔŋmɔ yiŋtoo lɛ ni wɔɔhi shi yɛ naa lɛ mli lɛ esa akɛ wɔkwɛ wɔnajiafamɔi jogbaŋŋ. Esa akɛ wɔkɛ nilee atsu nii ni wɔkahiɛ nyɔmɔ babaoo ejaakɛ ebaanyɛ eha wɔtsɔmɔ nyɔji eha nibii agbɛjianɔtoo nɛɛ. Biblia lɛ kaiɔ wɔ akɛ: “Nifalɔ lɛ, mɔ ni fa lɛ lɛ tsulɔ ji lɛ.” (Abɛi 22:7) Nɔ ni baaye ebua wɔ koni wɔkɛ wɔhiɛ ama oti ni kã wɔhiɛ lɛ nɔ ji hekɛnɔfɔɔ ni wɔɔná yɛ Yehowa mli kɛ sɔɔmɔ ni wɔkɛhaa lɛ lɛ ni wɔkɛaaye klɛŋklɛŋ gbɛhe. Ákɛ nɔkwɛmɔnɔ lɛ, Guoming kɛ enyɛmimɛi yei enyɔ lɛ kɛ amɛmami yɛ akutso ko ni tsũi ajara wa ni nitsumɔ ni abaanyɛ akɛ he afɔ nɔ namɔ wa mli. Akɛni amɛkɛ shika ni amɛyɔɔ lɛ tsu nii yɛ nilee mli ni amɛ fɛɛ amɛkɛ shika baa ni akɛkwraa shĩa hewɔ lɛ, amɛnine shɛ amɛhiamɔ nii anɔ yɛ bei ni amɛteŋ mɛi komɛi tsuuu nii lɛ po amli. Guoming kɛɛ akɛ: “Bei komɛi lɛ ebaa lɛ akɛ wɔteŋ mɛi komɛi anitsumɔ jeɔ amɛdɛŋ, shi wɔnyɛ wɔtee nɔ wɔtsu gbɛgbamɔ nitsumɔ lɛ ni wɔnyɛ wɔkwɛ wɔmami hu. Wɔhiɛ sɔɔ Awo waa ejaakɛ esumɔɔɔ ni wɔkpaa gbɛgbamɔ nitsumɔ lɛ koni no aha ena ogbɔjɔ shihilɛ.”—2 Korintobii 12:14; Hebribii 13:5.
6. Mɛɛ nɔkwɛmɔnɔ tsɔɔ bɔ ni wɔbaanyɛ wɔfee wɔnii koni wɔshihilɛ kɛ Nyɔŋmɔ yiŋtoo lɛ akpã gbee?
6 Kɛ́ okɛ ohe ewo jeŋ nɛɛ nifeemɔ ko mli vii—kɛ́ eji nɔ ni okɛmiitao shika loo nɔ kroko lɛ—ehe baahia ni ofee tsakemɔi wuji dani obaanyɛ okɛ Nyɔŋmɔ yiŋtoo lɛ aye klɛŋklɛŋ gbɛhe. Onyɛŋ okɛ be kukuoo ko afee tsakemɔi nɛɛ, ni kɛ́ obɔ he mɔdɛŋ klɛŋklɛŋ kwraa ni otɔ fã yɛ he ko lɛ kaasusu akɛ onyɛŋ oye omanye. Susumɔ Koichi ni be ko ni eho lɛ ekɛ be babaoo jieɔ ehiɛtserɛ lɛ nɔkwɛmɔnɔ lɛ he. Akɛ Koichi kase Biblia lɛ beni eji oblanyo, shi vidio nɔ shwɛmɔi ná eshihilɛ nɔ ehewalɛ afii pii. Gbi ko lɛ, Koichi kɛ ehe wie ni ekɛɛ akɛ: ‘Mɛni mifeɔ nɛɛ? Miye fe afii 30 shi mifeee nɔ ko ni yiŋtoo kpakpa yɔɔ he!’ Koichi ha akɛ lɛ kase Biblia lɛ ekoŋŋ ni eŋmɛ gbɛ ni asafo lɛ ye ebua lɛ. Eyɛ mli akɛ enyɛɛɛ efee tsakemɔi oyayaayai moŋ shi ehaaa no aha enijiaŋ aje wui. Akɛni esɔle daa ni mɛi krokomɛi jɛ suɔmɔ mli amɛwo lɛ hewalɛ hewɔ lɛ, naagbee lɛ enyɛ eye su ni eka ehe nɛɛ nɔ. (Luka 11:9) Amrɔ nɛɛ Koichi kɛ miishɛɛ miisɔmɔ akɛ asafoŋ sɔɔlɔ.
Kasemɔ Bɔ ni Aŋmɛɔ Pɛpɛɛpɛ
7. Mɛni hewɔ esa akɛ wɔŋmɛ pɛpɛɛpɛ beni wɔtsuɔ Nyɔŋmɔ nitsumɔ lɛ?
7 Esa akɛ wɔhi shi yɛ Nyɔŋmɔ yiŋtoo lɛ naa kɛ wɔsusuma muu fɛɛ. Esaaa akɛ wɔyiŋ feɔ wɔ enyɔnyɔ yɛ wɔhe ni wɔkɛaasha afɔle lɛ he loo wɔfeɔ anyagba yɛ enɛ feemɔ mli. (Hebribii 6:11, 12) Shi kɛlɛ, Yehowa sumɔɔɔ ni wɔtsuɔ nii dɛŋdɛŋ kɛyashiɔ he ni wɔɔfee gbedee yɛ heloo mli, jwɛŋmɔ mli loo henumɔ mli. Kɛ́ wɔjɛ heshibaa mli wɔkpɛlɛ nɔ akɛ wɔnyɛŋ wɔtsu Nyɔŋmɔ nitsumɔ lɛ kɛ wɔ diɛŋtsɛ wɔhewalɛ lɛ ewoɔ Nyɔŋmɔ hiɛ nyam ni etsɔɔ hu akɛ wɔŋmɛɔ pɛpɛɛpɛ. (1 Petro 4:11) Yehowa ewo shi akɛ ebaaha wɔ hewalɛ ni he hiaa lɛ koni wɔfee esuɔmɔnaa nii, shi esaaa akɛ wɔtsuɔ nii fe wɔnyɛmɔ kɛfee nɔ ni ekpaaa wɔ gbɛ akɛ wɔfee. (2 Korintobii 4:7) Bɔni afee ni wɔya nɔ wɔsɔmɔ Nyɔŋmɔ ni wɔkafee gbedee lɛ esa akɛ wɔkɛ wɔhewalɛ lɛ atsu nii yɛ nilee mli.
8. Mɛni ba beni Kristofonyo oblayoo ko bɔ mɔdɛŋ akɛ ebaatsu enitsumɔ kɛ Yehowa nɔ̃ lɛ jogbaŋŋ lɛ, ni mɛni tsakemɔi efee?
8 Ákɛ nɔkwɛmɔnɔ lɛ Ji Hye ni yɔɔ Asia Bokagbɛ lɛ kɛ afii enyɔ tsu nitsumɔ ko ni heɔ ebe waa, ni yɛ nakai beaŋ nɔŋŋ lɛ eesɔmɔ akɛ gbɛgbalɔ. Nyɛmiyoo nɛɛ bɔ amaniɛ akɛ: “Mibɔ mɔdɛŋ akɛ matsu Yehowa nitsumɔ lɛ kɛ minitsumɔ lɛ fɛɛ jogbaŋŋ, ni miwɔɔ ŋmɛlɛtswai enumɔ pɛ daa gbɛkɛ. Naagbee lɛ minyɛɛɛ ni mikɛ mijwɛŋmɔ ama anɔkwale lɛ nɔ dɔŋŋ, ni minaaa miishɛɛ yɛ sɔɔmɔ ni misɔmɔɔ Nyɔŋmɔ lɛ mli.” Bɔni afee ni Ji Hye asɔmɔ Yehowa kɛ ‘etsui fɛɛ kɛ esusuma fɛɛ kɛ ejwɛŋmɔ fɛɛ kɛ enyɛmɔ fɛɛ’ lɛ, etao nitsumɔ ni haŋ ekɛ bei pii atsu nii. (Marko 12:30) Ekɛɛ akɛ: “Yɛ mɔdɛŋ ni miweku lɛ mlibii bɔ koni amɛnyɛ minɔ ni matsu nii ni baaha mi shika pii lɛ fɛɛ sɛɛ lɛ mibɔ mɔdɛŋ akɛ mikɛ Nyɔŋmɔ yiŋtoo lɛ baaye klɛŋklɛŋ gbɛhe. Shika ni mináa amrɔ nɛɛ haa minine shɛɔ hiamɔ nibii tamɔ atade ni yɔɔ hiŋmɛi nɔ nɛkɛ lɛ nɔ. Akɛni mináa be pii mikɛwɔɔ hewɔ lɛ, miyɛ miishɛɛ! Minaa miishɛɛ yɛ misɔɔmɔ nitsumɔ lɛ mli ni wekukpãa ni kã mikɛ Nyɔŋmɔ teŋ lɛ hi fe tsutsu nɔ lɛ. Nɔ hewɔ ni eba lɛ nakai ji akɛ mifɔɔɔ nibii ni yɔɔ je lɛ mli ni feɔ mɛi akɔnɔ kɛ nɔ ni gbalaa mɛi ajwɛŋmɔ lɛ namɔ.”—Jajelɔ 4:6; Mateo 6:24, 28-30.
9. Mɛɛ gbɛ nɔ ekolɛ wɔmɔdɛŋbɔi lɛ baaná mɛi anɔ hewalɛ yɛ shiɛmɔ nitsumɔ lɛ mli?
9 Jeee mɔ fɛɛ mɔ baanyɛ asɔmɔ Nyɔŋmɔ akɛ be-fɛɛ sanekpakpa shiɛlɔ. Kɛ́ gbɔlɛ, gbɔmɔtsoŋ hewalɛ ni obɛ tsɔ loo gbɔjɔmɔi krokomɛi ahewɔ lɛ onyɛɛɛ ofee pii lɛ, ná ole akɛ Yehowa kaiɔ ni ehiɛ sɔɔ anɔkwa ni oyeɔ lɛ lɛ kɛ nɔ ni obaanyɛ ojɛ otsui muu fɛɛ mli ofee lɛ waa. (Luka 21:2, 3) No hewɔ lɛ, esaaa akɛ wɔteŋ mɔ ko susuɔ akɛ emɔdɛŋbɔɔ yɛ Nyɔŋmɔ sɔɔmɔ mli lɛ nyɛŋ ana mɛi krokomɛi anɔ hewalɛ kɛ́ nɔ ni ebaanyɛ efee lɛ faaa po. Ákɛ nɔkwɛmɔnɔ lɛ, ŋɔɔ lɛ akɛ otee shĩai fioo komɛi amli shi onine eyashɛɛɛ mɔ ko ni yɔɔ wɔshɛɛ sane lɛ he miishɛɛ lɛ nɔ. Kɛ́ wɔshi lɛ eeenyɛ eba akɛ shĩai nɛɛ amlibii lɛ kɛ ŋmɛlɛtswai pii loo gbii pii baawie wɔsaramɔ nɛɛ he, ni mɛi ni haaa wɔ sɛi lɛ po baanyɛ afee nakai! Wɔkpaaa gbɛ akɛ mɔ fɛɛ mɔ ni baanu sanekpakpa lɛ baafee tsakemɔi kpakpai shi amɛteaŋ mɛi komɛi baafee nakai. (Mateo 13:19-23) Mɛi komɛi baafee tsakemɔi nɛɛ kɛ́ shihilɛ ni yɔɔ je lɛ mli lɛ tsake loo amɛshihilɛ tsake. Bɔ fɛɛ bɔ ni eeeba lɛ eha lɛ kɛ́ wɔfee bɔ ni wɔɔnyɛ yɛ shiɛmɔ nitsumɔ lɛ mli lɛ wɔmiitsu Nyɔŋmɔ nitsumɔ. Wɔji “Nyɔŋmɔ hefatalɔi nitsulɔi.”—1 Korintobii 3:9.
10. Mɛɛ hegbɛi yɔɔ kɛha wɔ fɛɛ yɛ asafo lɛ mli?
10 Agbɛnɛ hu lɛ, wɔ fɛɛ wɔbaanyɛ wɔye wɔbua wɔwekui lɛ amlibii kɛ nyɛmimɛi hii kɛ yei ni yɔɔ Kristofoi asafo lɛ mli lɛ. (Galatabii 6:10) Wɔnɔkwɛmɔnɔ kpakpa lɛ náa mɛi krokomɛi anɔ hewalɛ waa yɛ be kpalaŋŋ mli. (Jajelɔ 11:1, 6) Kɛ́ asafoŋ onukpai kɛ sɔɔlɔi tsu amɛsɔ̃i lɛ ahe nii jogbaŋŋ lɛ ehaa wekukpãa ni kã asafoŋbii lɛ kɛ Nyɔŋmɔ teŋ lɛ feɔ ekpakpa ni emli waa, ni Kristofoi anitsumɔi lɛ shwereɔ. Wɔyɛ nɔmimaa akɛ kɛ ‘wɔteke nɔ yɛ Nuŋtsɔ lɛ nitsumɔ lɛ mli’ lɛ wɔmɔdɛŋbɔɔ lɛ ‘efeŋ yaka.’—1 Korintobii 15:58.
Okɛ Nyɔŋmɔ Yiŋtoo lɛ Sɛɛtiumɔ Afee Onitsumɔ
11. Mɛɛ hegbɛi anaa baanyɛ agbele yɛ wɔsafo lɛ sɛɛ?
11 Ákɛ Kristofoi lɛ wɔsumɔɔ wala ni wɔshwelɛ ji ni wɔwo Nyɔŋmɔ hiɛ nyam yɛ nɔ fɛɛ nɔ ni wɔfeɔ lɛ mli. (1 Korintobii 10:31) Kɛ́ wɔjɛ anɔkwayeli mli wɔshiɛ Maŋtsɛyeli lɛ he sanekpakpa lɛ ni wɔtsɔɔ mɛi koni amɛye Yesu kitai lɛ fɛɛ nɔ lɛ, wɔbaaná sɔɔmɔ hegbɛi babaoo ni baaha wɔná miishɛɛ. (Mateo 24:14; 28:19, 20) Yɛ nitsumɔ ni wɔtsuɔ yɛ wɔsafoŋ lɛ sɛɛ lɛ, wɔbaanyɛ wɔná hegbɛi kɛsɔmɔ yɛ he ni shiɛlɔi ahe ehia yɛ, eeenyɛ efee shikpɔŋkuku kroko mli, wiemɔ kroko mli loo yɛ maŋ kroko mli. Abaanyɛ afɔ̃ asafoŋ onukpai kɛ sɔɔlɔi ni shɛɔ taomɔ nii lɛ ahe ni boteko gbalashihilɛ mli lɛ anine koni amɛya Sɔɔmɔ Tsɔsemɔ Skul lɛ, ni kɛ amɛgbe naa lɛ aha amɛyasɔmɔ yɛ asafoi ni Kristofoi ni edara yɛ mumɔŋ ahe ehia amɛ lɛ mli yɛ amɛmaŋ loo maŋsɛɛ. Abaanyɛ afɔ̃ gbalashihilɛ mli hefatalɔi ni ji be-fɛɛ sɔɔlɔi ni shɛɔ taomɔ nii lɛ ahe lɛ anine koni atsɔse amɛ yɛ Gilead kɛha maŋsɛɛ sanekpakpa shiɛmɔ nitsumɔ lɛ, koni aha amɛyasɔmɔ yɛ shikpɔji krokomɛi anɔ. Agbɛnɛ hu lɛ, be fɛɛ be lɛ mɛi ni etuu amɛhe amɛha ahe miihia koni amɛtsu nitsumɔi srɔtoi yɛ Betel loo ni amɛye amɛbua ni amamɔ kpeehei kɛ nitsumɔhe niji ni amɛkwra tsũi nɛɛ.
12, 13. (a) Mɛɛ gbɛ nɔ oootsɔ okpɛ oyiŋ yɛ sɔɔmɔ nitsumɔ ni obaatsu lɛ he? (b) Okɛ nɔkwɛmɔnɔ ni tsɔɔ bɔ ni niiashikpamɔ ni anáa yɛ sɔɔmɔ hegbɛ ko mli lɛ yeɔ ebuaa ni anyɛɔ atsuɔ ekrokomɛi ahe nii lɛ aha.
12 Mɛɛ sɔɔmɔ hegbɛ esa akɛ otiu sɛɛ? Akɛ Yehowa sɔɔlɔ ni ejɔɔ ehe nɔ lɛ be fɛɛ be lɛ taomɔ gbɛtsɔɔmɔ kɛjɛ Yehowa kɛ egbɛjianɔtoo lɛ dɛŋ. ‘Emumɔ kpakpa’ lɛ baaye ebua bo koni okpɛ yiŋ kpakpa. (Nehemia 9:20) Bei pii lɛ sɔɔmɔ hegbɛ ko ni akɛhaa wɔ lɛ tsɔseɔ wɔ kɛha ekroko, ni niiashikpamɔ kɛ hesaai ni wɔnáa yɛ sɔɔmɔ hegbɛ ko mli lɛ baanyɛ aye abua wɔ ni wɔtsu sɔɔmɔ hegbɛ kroko he nii yɛ sɛɛ mli.
13 Ákɛ nɔkwɛmɔnɔ lɛ, Dennis kɛ eŋa Jenny kɛ amɛhe woɔ Maŋtsɛyeli Asai amaamɔ nitsumɔi amli daa. Beni ahum ko ni naa waa ni atsɛ lɛ akɛ Katrina lɛ tswa yɛ Amerika wuoyigbɛ lɛ, amɛtuu amɛhe amɛha koni amɛye amɛbua mɛi ni ehia amɛ lɛ. Dennis bɔ amaniɛ akɛ: “Hesaai ni wɔná kɛjɛ Maŋtsɛyeli Asai amaamɔ mli ni wɔkɛye bua wɔnyɛmimɛi lɛ ha wɔná miishɛɛ waa. Hiɛsɔɔ ni mɛi ni wɔye wɔbua amɛ jie lɛ kpo lɛ taa mɔ tsuiŋ diɛŋtsɛ. Kui krokomɛi ni miiye amɛbua mɛi lɛ nyɛko amɛsaa amɛma tsũi ni efite lɛ pii. Yehowa Odasefoi esaa loo amɛsaa amɛmamɔ shĩai ni fa fe 5,300 kɛ Maŋtsɛyeli Asai babaoo. Mɛi naa enɛ ni amrɔ nɛɛ amɛjieɔ miishɛɛ pii kpo yɛ wɔshɛɛ sane lɛ he.”
14. Mɛni obaanyɛ ofee kɛ́ ooshwe ni okɛ ohe awo be-fɛɛ sɔɔmɔ nitsumɔ lɛ mli lɛ?
14 Ani obaanyɛ ohi shi yɛ Nyɔŋmɔ yiŋtoo lɛ naa kɛtsɔ be-fɛɛ sɔɔmɔ nitsumɔ lɛ ni okɛaafee onitsumɔ lɛ nɔ? Kɛ́ ofee nakai lɛ jɔɔmɔi babaoo aaafee onɔ. Kɛ́ shihilɛ ni oyɔɔ mli amrɔ nɛɛ eŋmɛŋ bo gbɛ ni ofee nakai lɛ obaanyɛ ofee tsakemɔi. Sɔlemɔ taakɛ Nehemia sɔle beni ená shwelɛ akɛ eeetsu nitsumɔ ko ni he hiaa lɛ, akɛ: “Oo Nuŋtsɔ [Yehowa], . . . ha otsulɔ aye omanye.” (Nehemia 1:11) No sɛɛ lɛ, ná hekɛnɔfɔɔ yɛ ‘Mɔ ni boɔ sɔlemɔ toi’ lɛ mli, ni ofee onii yɛ gbɛ ni kɛ osɔlemɔ lɛ kpãa gbee nɔ. (Lala 65:3) Enɛɛmɛi ji nibii ni esa akɛ ofee klɛŋklɛŋ dani Yehowa baajɔɔ mɔdɛŋ ni obɔɔ koni osɔmɔ lɛ kɛmɔ shi fe bɔ ni ofeɔ tsutsu lɛ nɔ. Kɛ́ okpɛ oyiŋ akɛ okɛ ohe baawo be-fɛɛ sɔɔmɔ nitsumɔ lɛ mli lɛ, hiɛmɔ oyiŋkpɛɛ lɛ mli. Beni be shwieɔ mli lɛ, obaaná niiashikpamɔi babaoo ni obaaná miishɛɛ waa.
Shihilɛ ni Sɛɛnamɔ Yɔɔ He Diɛŋtsɛ
15. (a) Kɛ́ wɔkɛ Nyɔŋmɔ sɔɔlɔi ni kɛ afii pii esɔmɔ lɛ gba sane loo wɔkane amɛhe saji lɛ, mɛɛ gbɛ nɔ wɔnáa he sɛɛ? (b) Tsĩi wala shihilɛ mli sane ko ni wo bo hewalɛ waa lɛ tã.
15 Mɛni obaanyɛ okpa gbɛ akɛ Nyɔŋmɔ yiŋtoo lɛ naa ni ooohi yɛ lɛ baaha oná? Okɛ mɛi ni kɛ afii pii esɔmɔ Yehowa, titri lɛ mɛi ni kɛ afii pii ehi be-fɛɛ sɔɔmɔ nitsumɔ lɛ mli lɛ agba sane. Akɛni amɛhiɔ shi yɛ yiŋtoo ni haa mɔ náa miishɛɛ lɛ naa lɛ hewɔ lɛ, amɛyɛ miishɛɛ naakpa! (Abɛi 10:22) Amɛbaakɛɛ bo akɛ Yehowa kwako amɛ pɛŋ, ni eyeɔ ebuaa amɛ ni amɛnáa amɛhiamɔ nii diɛŋtsɛ kɛ ekrokomɛi babaoo yɛ fimɔ beaŋ po. (Filipibii 4:11-13) Aŋmala anɔkwafoi awala shihilɛ mli saji awo The Watchtower lɛ mli kɛjɛ 1955 kɛyashi 1961, ni awo saji nɛɛ fɛɛ gbɛi akɛ “Miwala Shihilɛ Mli Yiŋtoo lɛ ni Mihi Shi yɛ Naa.” Kɛjɛ no sɛɛ kɛbaa nɛɛ aŋmala wala shihilɛ mli saji krokomɛi ohai abɔ. Anaa ekãa kɛ miishɛɛ ni tamɔ nɔ ni yɔɔ Biblia mli wolo ni atsɛɔ lɛ Bɔfoi Asaji lɛ mli yɛ wala shihilɛ mli saji nɛɛ eko fɛɛ eko mli. Amaniɛbɔi ni taa mɔ tsuiŋ nɛɛ ni oookane lɛ baatsirɛ bo ni okɛɛ akɛ, ‘Nɛkɛ ji bɔ ni masumɔ ni mahi shi!’
16. Mɛni haa Kristofonyo shihilɛ feɔ nɔ ni yiŋtoo kpakpa yɔɔ sɛɛ ni ehaa enáa miishɛɛ?
16 Aaron ni atsĩ etã yɛ klɛŋklɛŋ kuku lɛ mli lɛ kai akɛ: “Yɛ Afrika lɛ mikɛ oblahii kɛ oblayei fɔɔ kpee ni amɛmiijɛ amɛmaŋ lɛ he kome kɛmiiya he kroko kɛmiitao yiŋtoo ni yɔɔ shihilɛ sɛɛ lɛ. Amɛteaŋ mɛi pii eyanáaa yiŋtoo nɛɛ. Shi naa wɔ, wɔmiihi shi yɛ Nyɔŋmɔ yiŋtoo lɛ naa kɛtsɔ Maŋtsɛyeli lɛ he sanekpakpa lɛ ni wɔshiɛɔ lɛ nɔ, ni wɔyɛ miishɛɛ ni yiŋtoo kpakpa yɛ wɔshihilɛ sɛɛ. Wɔ diɛŋtsɛ wɔna akɛ nɔhamɔ mli yɛ miishɛɛ fe hemɔ.”—Bɔfoi lɛ Asaji 20:35.
17. Mɛni hewɔ esa akɛ wɔhi shi yɛ Nyɔŋmɔ yiŋtoo lɛ naa ŋmɛnɛ lɛ?
17 Ni bo hu? Mɛɛ yiŋtoo ohiɔ shi yɛ naa? Kɛ́ obɛ oti pɔtɛɛ ko ni baaha ohi shi yɛ Nyɔŋmɔ yiŋtoo lɛ naa lɛ, yiŋtoo krokomɛi baahe obe kɛ onyɛmɔ fɛɛ. Mɛni hewɔ esa akɛ okɛ owala ni jara wa lɛ aha nibii ni Satan je lɛ kafoɔ akɛ nomɛi ji nibii ni amɛhe hiaa lɛ? Etsɛŋ, kɛ́ “amanehulu kpeteŋkpele lɛ” fɛ lɛ heloonaa ninamɔ kɛ jeŋ nɛɛ mli hegbɛi lɛ ahe baŋ sɛɛnamɔ. Nɔ ni he baahia ji wekukpãa ni kã wɔkɛ Yehowa teŋ lɛ. Kwɛ bɔ ni wɔbaaná miishɛɛ yɛ nakai beaŋ akɛni wɔsɔmɔ Nyɔŋmɔ kɛ mɛi krokomɛi ni wɔhi shi yɛ Nyɔŋmɔ yiŋtoo lɛ naa kɛmɔ shi lɛ hewɔ!—Mateo 24:21; Kpojiemɔ 7:14, 15.
[Shishigbɛ niŋmai]
^ kk. 1 Atsake gbɛi lɛ ekomɛi.
^ kk. 1 Mɛi ni fee ji Yehowa Odasefoi.
Ani Obaanyɛ Otsɔɔ Mli?
• Te Yehowa nuɔ sɔɔmɔ ni wɔkɛhaa lɛ lɛ he ehaa tɛŋŋ?
• Kɛ́ wɔkɛ nilee tsu nii ni wɔŋmɛ pɛpɛɛpɛ lɛ ebaaye ebua wɔ ni wɔsɔmɔ Nyɔŋmɔ kɛ mɛi krokomɛi yɛ mɛɛ gbɛ nɔ?
• Mɛɛ sɔɔmɔ hegbɛi yɔɔ kɛha wɔ?
• Mɛɛ gbɛ nɔ wɔbaanyɛ wɔtsɔ koni wɔhi shi yɛ yiŋtoo kpakpa diɛŋtsɛ naa ŋmɛnɛ?
[Nikasemɔ lɛ he Sanebimɔi]
[Mfonirii ni yɔɔ baafa 23]
Kɛ́ wɔɔya nɔ wɔsɔmɔ Yehowa kɛ wɔsusuma muu fɛɛ lɛ ehe miihia ni wɔŋmɛ pɛpɛɛpɛ
[Mfonirii ni yɔɔ baafa 24]
Abaanyɛ asɔmɔ Nyɔŋmɔ yɛ gbɛ̀i srɔtoi anɔ