Sirakusa Hejɔɔmɔhe Kɛha Paulo Yɛ Egbɛfãa Lɛ Mli

AAAFEE afi 59 Ŋ.B. lɛ, lɛlɛ ko fã kɛjɛ Mediteranea ŋshɔkpɔ ni ji Melita lɛ nɔ kɛtee Italia. Gbɛi ni aŋma yɛ lɛlɛ lɛ he ni kadiɔ lɛ ji “Dioskurioi (aloo haaji),” ni ji nyɔŋmɔi ni abuɔ amɛ akɛ amɛbuɔ amlakui ahe. Biblia ŋmalɔ Luka tsɔɔ akɛ, lɛlɛ lɛ ‘yadamɔ Sirakusa’ yɛ Sicily wuoyi-bokagbɛ ŋshɔ lɛ naa ni ‘amɛhi jɛi gbii etɛ.’ (Bɔfoi lɛ Asaji 28:11, 12) Mɛi ni fata Luka he yɛ lɛlɛ lɛ mli ji Aristarko kɛ bɔfo Paulo ní no mli lɛ akɛ lɛ miiya Roma ni ayaye esane lɛ.—Bɔfoi lɛ Asaji 27:2.

Wɔleee kɛji akɛ Paulo yi shi kɛjɛ lɛlɛ lɛ mli yɛ Sirakusa. Kɛji Paulo loo enanemɛi ni ekɛfãa gbɛ lɛ yi shi kɛjɛ lɛlɛ lɛ mli lɛ, mɛni ekolɛ amɛna?

Yɛ blema Hela kɛ Roma beaŋ lɛ, abuɔ Sirakusa waa tamɔ abuɔ Ateene kɛ Roma lɛ. Taakɛ blema sane tsɔɔ lɛ, Korintobii lɛ ji mɛi ni to maŋ nɛɛ yɛ afi 734 D.Ŋ.B. Sirakusa fee gbɛi waa eha ehe, ni jɛmɛ ji he ni afɔ́ mɛi ní hé gbɛi waa yɛ blema beaŋ tamɔ shwɛmɔi ahe woloŋmalɔ Epicharmus kɛ akɔntaabulɔ kpanaa Archimedes yɛ. Yɛ afi 212 D.Ŋ.B. lɛ, Romabii lɛ ye Sirakusa nɔ kunim.

Kɛ́ oyashara shi yɛ ŋmɛnɛŋmɛnɛ beaŋ Sirakusa maŋtiase lɛ mli lɛ, obaanyɛ ona bɔ ni Sirakusa yɔɔ ha yɛ Paulo beaŋ. No mli lɛ, aja maŋtiase lɛ mli enyɔ—fã kome yɛ Ortygia ŋshɔkpɔ bibioo ni ekolɛ Paulo lɛlɛ lɛ yakpeleke yɛ jɛmɛ lɛ nɔ, ni fã kroko hu yɛ maŋ wulu lɛ mli.

Ŋmɛnɛ lɛ, kɛ́ otee ŋshɔkpɔ nɛɛ nɔ lɛ, obaanyɛ ona sɔlemɔtsu ni etsɛ fe fɛɛ ni ama lɛ tamɔ bɔ ni Helabii maa tsu lɛ he nibii yɛ Sicily—atsɛɔ sɔlemɔtsu nɛɛ akɛ Apollo sɔlemɔtsu, ni ama yɛ afi 500 D.Ŋ.B. afii lɛ amli. Ayɛ sɔlemɔtsu akulashiŋi hu ni ajɔɔ nɔ aha nyɔŋmɔyoo ni ji Athena yɛ jɛmɛ, ni afee enɛɛmɛi yɛ afi 400 D.Ŋ.B. afii lɛ amli, shi akɛ nomɛi fata sɔlemɔtsu wulu lɛ he.

Ŋmɛnɛŋmɛnɛ beaŋ maŋtiase lɛ yɛ maŋ wulu lɛ mli, ni kɛ́ oyashara shi yɛ jɛmɛ lɛ, obaanyɛ ona Neapoli blema nibii amlitaomɔhe lɛ. Helabii ashwɛmɔhe lɛ bɛŋkɛ nibii amlitaomɔhe nɛɛ agbó lɛ naa. Eji Helabii ashwɛmɔhe ni da fe fɛɛ lɛ ateŋ ekome ni yɔɔ. Bɔ ni eyɔɔ ŋshɔnaa gbɛ hewɔ lɛ, efeɔ he ko ni hi jogbaŋŋ kɛha shwɛmɔi akwɛmɔ. Yɛ Neapoli blema nibii amlitaomɔhe lɛ wuoyigbɛ kwraa lɛ, obaana Romabii ashwɛmɔhe wulu ní ama yɛ afi 200 Ŋ.B. afii lɛ amli lɛ. Eyɛ kokroo, ni ekɛlɛ ji mitai 140, ni elɛɛmɔ feɔ mitai 119, ni kɛfata he lɛ, no ji tsũ ni ji etɛ ni da fe fɛɛ yɛ Italia.

Kɛ́ ona hegbɛ oyashara shi yɛ Sirakusa lɛ, obaanyɛ oyata sɛi ni kwɛɔ ŋshɔnaa gbɛ lɛ nɔ yɛ Ortygia, ni ogbele o-Biblia lɛ kɛya Bɔfoi lɛ Asaji 28:12 lɛ, ni ofee bɔfo Paulo ni ta lɛlɛ ni bakpeleke yɛ biɛ nɛɛ lɛ mli lɛ he mfoniri yɛ ojwɛŋmɔŋ okwɛ.

[Nitɛŋmɔ ni akɛmiitsɔɔ nɔ ko mli/​Shikpɔŋ he mfoniri ni yɔɔ baafa 30]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Melita

Sicily

Sirakusa

ITALIA

Regio

Puteoli

Roma

[Mfoniri ni yɔɔ baafa 30]

Helabii ashwɛmɔhe ko ni efite ni yɔɔ Sirakusa