Ani Oŋɔɔ Hegbɛi ni Onáa lɛ Koni Oha Mɛi Ale Ohemɔkɛyelii Lɛ?

“ANI anɔkwale shiŋŋshi yɛ lo?” Enɛ ji maŋ niŋmaa he akaŋshii ko ni tee nɔ yɛ Poland lɛ saneyitso. Gbɛtsɔɔmɔi ni akɛha yɛ niŋmaa he akaŋshii lɛ he ji akɛ: “Anɔkwale shiŋŋshi he ehiaaa wɔ. Ehe ehiaaa mɔ ko mɔ ko. Anɔkwale shiŋŋshi yɛ sane ko he bɛ kwraa.” Agata ni eye afii 15, ni eyaa nɔtsamɔ skul ni eji Yehowa Odasefonyo lɛ, kpɛ eyiŋ akɛ ebaaŋɔ hegbɛ nɛɛ koni eha mɛi krokomɛi ale ejamɔŋ hemɔkɛyelii lɛ.

Nɔ̃ klɛŋklɛŋ ni Agata fee koni ekɛsaa ehe kɛha niŋmaa he akaŋshii lɛ ji akɛ, esɔle kɛbi Yehowa gbɛtsɔɔmɔ, ni no sɛɛ lɛ ebɔi saji ni kɔɔ saneyitso lɛ he lɛ taomɔ. Oblayoo nɛɛ ná sane ko ni kɔɔ akaŋshii saneyitso lɛ he lɛ yɛ July 1, 1995 Buu-Mɔɔ lɛ mli. Etsɛ sane ni Pontio Pilato bi Yesu lɛ yisɛɛ akɛ: “Mɛni ji anɔkwale?” (Yohane 18:38) Etsɔɔ akɛ nakai sanebimɔ lɛ tsɔɔ gbee ni mɔ ko kɛ mɔ kroko kpãaa yɛ sane ko he, tamɔ nɔ ni mɔ lɛ miibi akɛ: ‘Okɛɛ mɛni? Anɔkwale? Anɔkwale ko bɛ he ko he ko!’ Agata ŋma akɛ, “Pilato sanebimɔ lɛ ha mikai niŋmaa akaŋshii lɛ kɛ ehe gbɛtsɔɔmɔi lɛ.”

No sɛɛ lɛ, etsɔɔ bɔ ni fee ni aná susumɔ ni ji akɛ, nɔ ni mɔ ko susuɔ akɛ eji anɔkwale lɛ, yɛ mɔ kroko gbɛfaŋ lɛ eji amale, ni ákɛ ekolɛ amɛ fɛɛ amɛsane “ja.” Ebi saji tamɔ, “Wɔteŋ namɔ baakwɔ kɔɔyɔɔŋ lɛlɛ kɛji eheee mla ni kudɔɔ tsɔji ni fãa gbɛ yɛ kɔɔyɔɔŋ lɛ eyeee akɛ anɔkwale shiŋŋshi ni lɛ?” Ni egbala etoibolɔi lɛ ajwɛŋmɔ kɛba Biblia lɛ nɔ akɛ: “Hekɛnɔfɔɔ ni ayɔɔ yɛ Nyɔŋmɔ Wiemɔ lɛ mli lɛ damɔ anɔkwa saji ni ama nɔ mi shiŋŋshi lɛ anɔ.” Oblayoo lɛ tsɔɔ mli akɛ, eshwelɛ ji akɛ mɛi ni jɛɔ anɔkwayeli mli amɛtaoɔ nɔ ni ji anɔkwale shiŋŋshi lɛ baaŋmɛ amɛtsui shi jogbaŋŋ koni amɛna.

Agata ná yijiemɔ wolo krɛdɛɛ ko yɛ eniŋmaa lɛ hewɔ, ni ená hegbɛ hu ekane sane nɛɛ etsɔɔ eklasbii lɛ fɛɛ. Agata skulbii lɛ ateŋ mɛi pii kpɛlɛ nɔ akɛ ekɛ amɛ akase Biblia lɛ. Agata ná miishɛɛ akɛ ekɛ hegbɛ nɛɛ tsu nii, ni eha mɛi pii le ehemɔkɛyelii lɛ. Lɛɛlɛŋ, kɛ́ okɛ hegbɛi ni onáa koni oha mɛi ale ohemɔkɛyeli lɛ tsu nii jogbaŋŋ lɛ, ebaanyɛ ewo yibii. Mɛi hegbɛi obaanyɛ oŋɔ ní okɛha mɛi ale ohemɔkɛyelii lɛ?