Nɔ Hewɔ ni Ewa akɛ Aaaba He Shi

MƐI pii susuɔ akɛ heshibaa he ehiaaa yɛ jeŋ ni wɔyɔɔ mli ŋmɛnɛ nɛɛ mli. Hiɛnaanɔbii ni etamɔ nɔ ni amɛye omanye waa yɛ shihilɛ mli lɛ ji mɛi ni yeɔ amim, mɛi ni ebuuu saa, kɛ mɛi ni sumɔɔ akɛ amɛfee amɛtsui naa nii. Mɛi babaoo ná kulɛ amɛtamɔ mɛi ni ená nii waa ni amɛfee gbɛi lɛ, shi jeee mɛi ni baa amɛhe shi ni amɛmli jɔ lɛ. Bei pii lɛ, mɛi ni eye omanye lɛ kɛ omanye ni amɛye lɛ shiɔ amɛtsitsi akɛ amɛmɔdɛŋbɔɔ naa hewɔ amɛshɛ he ni amɛshɛ lɛ. Yɛ nɔ najiaŋ ni amɛaaba amɛhe shi lɛ, amɛkɛ henɔwomɔ kafoɔ amɛ diɛŋtsɛ amɛhe yɛ omanye ni amɛye lɛ mli.

Niiamlitaolɔ ko ni jɛ Canada lɛ tsɔɔ akɛ, “ŋkomeŋfa kɛ henɔwomɔ su miihe shi” yɛ amɛmaŋ lɛ mli. Mɛi komɛi hu susuɔ akɛ wɔyɛ jeŋ ko ni abuɔ mɔ diɛŋtsɛ miishɛɛnamɔ akɛ sɛɛnamɔ yɛ he fe mɔ gbɛnaa nii ahe nii ní eeetsu, ni amɛnaa akɛ gbɔmɛi ni yɔɔ ŋmɛnɛ ní susuɔ amɛ pɛ amɛhe lɛ ayi miifa waa. Yɛ jeŋ ni tamɔ nɛkɛ mli lɛ, ekolɛ heshibaa jeee su ni mɛi baanya he.

Yɛ anɔkwale mli lɛ, mɛi fioo ko pɛ ekpɛlɛŋ susumɔ ni ahiɛ akɛ heshibaa ji su kpakpa ni mɛi komɛi sumɔɔ waa lɛ nɔ, ejaakɛ ewaaa ákɛ akɛ mɛi ni baa amɛhe shi lɛ aaahi shi. Shi yɛ wɔjeŋ ni mɔ fɛɛ mɔ miipele lɛ diɛŋtsɛ enɔ mli nɛɛ mli lɛ, mɛi komɛi sheɔ gbeyei akɛ kɛ́ amɛba amɛhe shi lɛ abaabu amɛ akɛ amɛhiɛ waaa.

Nyɔŋmɔ Wiemɔ ni ji Biblia lɛ gba efɔ̃ shi akɛ yɛ wɔgbii nɛɛ amli lɛ, mɛi baatsɔmɔ “shwãlɔi, hewolɔi.” (2 Timoteo 3:1, 2) Ani okpɛlɛɛɛ nɔ akɛ gbalɛ nɛɛ miiba mli? Ani osusuɔ akɛ sɛɛnamɔ yɛ he akɛ aaaba he shi? Aloo osusuɔ akɛ kɛ́ mɔ ko baa ehe shi lɛ, abaabu lɛ akɛ ehiɛ waaa, ni eshishiumɔ hu waaa?

Biblia lɛ tsɔɔ wɔ yiŋtoi kpakpai ahewɔ ni esa akɛ wɔbu heshibaa akɛ eji su ni sɛɛnamɔ yɔɔ he, ni wɔba wɔhe shi hu lɛ. Ehaa wɔnáa jwɛŋmɔ ni ja yɛ heshibaa he, ni ewoɔ wɔ hewalɛ ni wɔba wɔhe shi, ni ehaa wɔnaa hu akɛ heshibaa diɛŋtsɛ tsɔɔ ekãa ni mɔ ko yɔɔ shi jeee akɛ mɔ lɛ hiɛ waaa. Sane ni nyiɛ sɛɛ lɛ baatsɔɔ nɔ̃ hewɔ ni akɛɔ nakai lɛ mli.

[Mfoniri ni yɔɔ baafa 3]

Te esa akɛ wɔnu he wɔha tɛŋŋ yɛ nibii ni wɔnyɛ wɔfee lɛ ahe?