Mɛni He Yɔɔ Sɛɛnamɔ Kɛha Bo?

KENNY tsuɔ nii yɛ nitsumɔhe wulu ko, eyɛ kar ni jara wa waa, ni eyɛ shia fɛfɛo ko yɛ he ko ni niiatsɛmɛi ji mɛi ni hiɔ jɛmɛ yɛ maŋ wulu ko mli. Enyɛɔ etuɔ kɛjɛɔ ŋwɛi shɔŋŋ aaafee kilomitai nyɔŋmai abɔ ebayiɔ shi, ni enyaa shwɛmɔ nɛɛ he waa ejaakɛ ehe esa yɛ mli. Ani nibii nɛɛ fɛɛ haa etsui nyɔɔ emli? Kenny bɔ amaniɛ yɛ adafitswaa wolo ni ji The Wall Street Journal lɛ mli akɛ: “Naa mi, miye afii 45 shi mibɛ hiɛnɔkamɔ kɛha wɔsɛɛ . . . Sɛɛnamɔ ko bɛ mishihilɛ he.”

Elyn bɔ mɔdɛŋ ni ehe basa waa akɛ mɔ ni shwɛɔ yɛ ais nɔ. Kɛ́ aatsɛ mɛi ni he esa yɛ ais nɔ shwɛmɔ mli lɛ atsɛɔ lɛ afataa he. Oblayoo nɛɛ efee gbɛi ni etaoɔ efee lɛ. Eye ŋkɔmɔ akɛ: “Shi nɛgbɛ miishɛɛ ni kulɛ esa akɛ eha maná lɛ yɔɔ? Minuɔ shoofeemɔ he waa. Eyɛ mli akɛ miyɛ shika pii moŋ, shi etsɛŋ ni magbɔ ni sɛɛnamɔ baŋ mishihilɛ he kɛ́ ais nɔ shwɛmɔ pɛ ji oti hewɔ ni miyɔɔ wala mli lɛ.”

Hideo efee gbɛi akɛ mɔ ko ni he esa waa yɛ bɔ ni akɛ kɔlai srɔtoi tsuɔ nii yɛ nitɛŋmɔ mli,  ni ekɛ nitɛŋmɔ efee oti ni ma ehiɛ yɛ shihilɛ mli. Ehɔɔɔ mfonirii ni etɛŋɔ lɛ; esusuɔ akɛ nakai feemɔ baaba enitɛŋmɔ nitsumɔ lɛ shi. Egbo beni eye afii 98, ni beni eshwɛ fioo ni ebaagbo lɛ, ekɛ nibii ni etɛŋ lɛ babaoo yake nitsumɔhe ko ní akɛ blema nibii toɔ jɛmɛ. Hideo tuu ehe eha nitɛŋmɔ. Shi etsui enyɔɔɔ emli ejaakɛ ena akɛ bɔ fɛɛ bɔ ni ji lɛ ehe esaŋ kɛshɛŋ he ni ebaanyɛ ekɛɛ akɛ tɔmɔ ko bɛ enitɛŋmɔi lɛ ahe.

Mɛi komɛi tuɔ amɛhe amɛhaa kwraa koni amɛye amɛbua mɛi krokomɛi. Susumɔ sinifeemɔ nitsumɔ ko mli hiɛnaanɔbii lɛ ateŋ mɔ kome ni yɔɔ Hollywood lɛ nɔkwɛmɔnɔ lɛ he okwɛ. Lɛ ji sinifeemɔ nitsumɔi wuji ni yɔɔ United States lɛ ateŋ ekome sɛinɔtalɔ sɛɛmɔ, ni ekɛ sini mli bii ni efee gbɛi lɛ bɔɔ ni eyɛ akutsoŋ ni niiatsɛmɛi sɔŋŋ yɔɔ jɛmɛ lɛ mli. Beni etee Cambodia kɛha hejɔɔmɔ lɛ, be ko lɛ eeye nii yɛ niyelihe ko yɛ Phnom Penh ni gbekɛyoo fioo ko baba lɛ shika. Eha lɛ lamlee kɛ dollar kome. Gbekɛyoo lɛ ná miishɛɛ. Shi eba jɛmɛ ekoŋŋ enɔ jetsɛremɔ gbɛkɛ ni ebaba nii. Nuu lɛ na akɛ yelikɛbuamɔ diɛŋtsɛ he miihia ohiafoi.

No sɛɛ afi lɛ, ekpɛ eyiŋ akɛ ebaashi hiɛtserɛjiemɔ nitsumɔ ni etsuɔ lɛ koni eyaye ebua ohiafoi ni yɔɔ Cambodia lɛ. Efee skul ni ahaa mɛi ni baa lɛ niyenii ní amɛwɔɔ jɛmɛ. Eyɛ mli akɛ enáa miishɛɛ ni etsui nyɔɔ emli yɛ nɔ ni enyɛ efee lɛ hewɔ moŋ, shi efeɔ yeyeeye daa ejaakɛ naagbai ni esa akɛ etsu he nii ní yaa nɔ efaa lɛ jeɔ enijiaŋ wui.

Mɛi ejwɛ ni wɔtsĩ amɛ tã nɛɛ fɛɛ susu akɛ amɛle otii ni amɛtaoɔ amɛshɛ he lɛ. Shi amɛtsui enyɔɔɔ amɛ mli beni amɛshɛ otii ni amɛgbo he deŋmɛ lɛ ahe lɛ. Mɛni ji oti ni okɛma ohiɛ? Mɛni okɛyeɔ klɛŋklɛŋ gbɛhe yɛ oshihilɛ mli? Ani oyɛ nɔmimaa yɛ he akɛ oshwaŋ ohe akɛ okɔ nakai gbɛ?