Sanebimɔi ni Jɛ Kanelɔi Adɛŋ

Ani eja gbɛ akɛ Yehowa Odasefonyo ko aaaya ewekunyo ko loo mɔ ko ni ele ni ejeee Odasefonyo lɛ yookpeemɔ shishi?

Yookpeemɔ gbi ji miishɛɛ be, ni shishinumɔ ye he akɛ Kristofonyo ko baasumɔ ni lɛ hu ekɛ ehe awo nifeemɔ ni haa mɔ náa miishɛɛ nɛɛ mli. Shi kɛ́ afɔ̃ gbekɛbii anine ni amɛba yookpeemɔ ko shishi lɛ esa akɛ amɛbo yiŋ ni amɛfɔlɔi loo mɛi ni kwɛɔ amɛnɔ lɛ baakpɛ yɛ sane nɛɛ he lɛ toi ejaakɛ amɛji mɛi ni yɔɔ hegbɛ akɛ amɛkpɛɔ yiŋ yɛ sane nɛɛ he. (Efesobii 6:1-3) Shi kɛ́ eba lɛ akɛ nuu ko ni jeee Yehowa Odasefoi lɛ ateŋ mɔ kome bi eŋa ni ji Kristofonyo lɛ ni efata ehe kɛya yookpeemɔ ni abaafee yɛ sɔlemɔtsu mli lɛ hu? Ekolɛ yoo lɛ henilee baaŋmɛ lɛ gbɛ koni eya jɛmɛ shi ebaatswa efai shi akɛ ekɛ ehe woŋ jamɔŋ nifeemɔi ni baaya nɔ yɛ yookpeemɔ lɛ shishi lɛ mli.

No hewɔ lɛ, nɔ ni he hiaa yɛ sane nɛɛ he ji akɛ, mɔ fɛɛ mɔ baakpɛ yiŋ eha ehe kɛ́ ebaaya yookpeemɔ ko loo eyaŋ. Shi esa akɛ Kristofonyo fɛɛ Kristofonyo ale akɛ ebaabu ehe akɔntaa eha Yehowa, ni no hewɔ lɛ esa akɛ esusu Ŋmalɛ mli shishitoo mlai komɛi ahe dani ekpɛ eyiŋ akɛ ebaaya mɔ ko ni ejeee Odasefonyo lɛ yookpeemɔ shishi loo eyaaa.

Nɔ ni he hiaa fe fɛɛ ni esa akɛ ehi Kristofonyo jwɛŋmɔ mli ji kpɛlɛmɔ ni Nyɔŋmɔ aaakpɛlɛ enɔ lɛ. Yesu kɛɛ akɛ: “Nyɔŋmɔ lɛ Mumɔŋ, ni mɛi ni jaa lɛ lɛ, ja amɛja lɛ yɛ mumɔ kɛ anɔkwale mli.” (Yohane 4:24) No hewɔ lɛ, Yehowa Odasefoi kɛ amɛhe wooo jamɔi krokomɛi lɛ anifeemɔi tamɔ sɔlemɔi kɛ kusumii nifeemɔi ni kɛ Biblia mli anɔkwale kpãaa gbee lɛ amli.—2 Korintobii 6:14-17.

Kristofoi le akɛ amɛyiŋkpɛi baanyɛ asa mɛi krokomɛi ahe. Kɛ́ okpɛ oyiŋ akɛ obaaya lɛ ani owekumɛi lɛ amli baafu bo kɛ́ okɛ ohe wooo yookpeemɔ lɛ he nifeemɔi lɛ fɛɛ mli? Esa akɛ osusu hewalɛ ni ebaanyɛ ená yɛ nanemɛi heyelilɔi lɛ anɔ hu he. (Romabii 14:13) Kɛ́ bo loo oweku lɛ mli bii krokomɛi mu sane naa akɛ naagba ko bɛ he kɛ́ amɛtee mɔ ko ni ejeee Odasefonyo yookpeemɔ lɛ, ani ebaanyɛ egba nyɛnyɛmimɛi hii kɛ yei ni yɔɔ Kristofoi asafo lɛ mli lɛ anaa? Ani ebaanyɛ egba mɛi komɛi ahenilee naa?

Yookpeemɔ nifeemɔi ni kɔɔ wekumɛi ni jeee Odasefoi ahe lɛ baanyɛ ekɛ shihilɛi ni kaa mɔ aba. Kɛ́ abi bo koni obafee mɛi ni kpeeɔ amɛhe lɛ bialɔi lɛ ateŋ mɔ ko lɛ mɛni obaafee? Aloo kɛ́ ogbalashihilɛ mli hefatalɔ ni jeee Odasefonyo lɛ miisumɔ ni ekɛ ehe awo yookpeemɔ lɛ he nifeemɔi lɛ fɛɛ mli lɛ mɛni obaafee? Kɛ́ yookpeemɔ lɛ ji maŋ mla naa nɔ, ni kojolɔ ko loo amralo lɛ nitsulɔ ko ji mɔ ni baakwɛ gbalashihilɛ mlibotemɔ lɛ nɔ lɛ, ekolɛ jɛmɛ ni obaaya lɛ baatsɔɔ akɛ ooye mla naa nifeemɔ lɛ he odase kɛkɛ.

Shi kɛlɛ, yookpeemɔ ni afeɔ yɛ jamɔ hei loo nɔ ni osɔfo ko baakwɛ nɔ lɛ teɔ saji krokomɛi ashi. Ekolɛ obaakpoo akɛ oooya yookpeemɔ ni tamɔ enɛ shishi ejaakɛ oosumɔ ni obo ohenilee ni Biblia lɛ etsɔse lɛ lɛ toi, ni osumɔɔɔ ni ofeɔ nɔ ko ni kɛ ohemɔkɛyeli lɛ kpãaa gbee loo ooofee nɔ ko ni baagba mɛi ni yookpeemɔ lɛ kɔɔ amɛhe lɛ anaa. (Abɛi 22:3) Obaanyɛ otsĩ naagbai pii anaa kɛ́ otsɔ hiɛ ogbala ohemɔkɛyeli ni damɔ Biblia lɛ nɔ lɛ mli oha owekumɛi lɛ, ni otsɔɔ amɛ he ni osumɔɔ ni okɛ ohe awo nifeemɔ lɛ mli kɛyashi loo obaanyɛ otsɔɔ amɛ gbɛ kroko ni osusuɔ akɛ esa.

Ekolɛ be mli ni Kristofoi komɛi esusu saji ni kɔɔ he lɛ fɛɛ he jogbaŋŋ lɛ, amɛbaakpɛ amɛyiŋ akɛ tɔmɔ ko bɛ he akɛ amɛbaaya mɔ ko ni jeee Odasefonyo lɛ yookpeemɔ shishi bei abɔ ni amɛkɛ amɛhe woŋ jamɔ mli nifeemɔ ni baaya nɔ yɛ jɛmɛ lɛ mli lɛ. Shi kɛ́ Kristofonyo na akɛ jɛmɛ ni ebaaya lɛ baanyɛ aha ekɛ ehe awo nifeemɔ ko ni teɔ shi ewoɔ Nyɔŋmɔ shishitoo mlai lɛ mli lɛ, ekolɛ ebaamu sane naa akɛ sɛɛnamɔ yɛ he moŋ akɛ ekaya fe nɔ ni eeeya. Akɛni afɔ̃ lɛ nine kɛha yookpeemɔ lɛ hewɔ lɛ, kɛ́ ekpɛ eyiŋ akɛ eyaŋ yookpeemɔ lɛ, shi ebaaya okpɔlɔ ni abaaŋmɛ yɛ no sɛɛ lɛ shishi lɛ, esa akɛ etswa efai shi akɛ ebaafee ‘nii fɛɛ ni ekɛwo Nyɔŋmɔ hiɛ nyam.’ (1 Korintobii 10:31) “Mɔ fɛɛ mɔ aaatere lɛ diɛŋtsɛ ejatsu” ni ji esɔ lɛ, yɛ yiŋkpɛi ni tamɔ nɛkɛ lɛ amli. (Galatabii 6:5) No hewɔ lɛ, yiŋ fɛɛ yiŋ ni oookpɛ lɛ kaimɔ akɛ henilee kpakpa ni oooya nɔ ohiɛ yɛ Yehowa Nyɔŋmɔ hiɛ lɛ he hiaa waa.