Ani Yesu Yɛ Biblia Beni Eyɔɔ Shikpɔŋ Lɛ Nɔ Lɛ?

DABI, Yesu bɛ Biblia. Mɛni hewɔ? Ejaakɛ yɛ Yesu gbii lɛ amli lɛ, no mli lɛ abɛ Biblia muu lɛ fɛɛ tamɔ bɔ ni wɔyɔɔ lɛ ŋmɛnɛ lɛ. Shi no mli lɛ, kpeehei lɛ buaa wolokpoi ní kɛbashi nakai beaŋ lɛ amɛmli niŋmaai lɛ ebatsɔ Biblia lɛ fã taakɛ wɔle ŋmɛnɛ lɛ anaa amɛtoɔ. Yesu kane Yesaia wolokpo lɛ yɛ kpeehe ni yɔɔ Nazaret lɛ. (Luka 4:16, 17) Beni “akane mla lɛ kɛ gbalɔi lɛ” yɛ Antiokia ni yɔɔ Pisidia lɛ, bɔfo Paulo bo toi. (Bɔfoi lɛ Asaji 13:14, 15) Ni kaselɔ Yakobo hu wie akɛ ‘daa hejɔɔmɔ gbi lɛ akaneɔ Mose woji lɛ yɛ kpeehei lɛ.’—Bɔfoi lɛ Asaji 15:21.

Ani no mli lɛ aŋkroaŋkroi ni hi shi yɛ klɛŋklɛŋ afii 100 lɛ mli lɛ yɛ Ŋmalɛ Krɔŋkrɔŋ lɛ wolokpoi lɛ eko? Ekã shi faŋŋ akɛ no mli lɛ Etiopia piafonyo lɛ ni sɔmɔ yɛ Etiopiabii amaŋnyɛ Kandake we lɛ yɛ eko, ejaakɛ beni Filipo kɛ lɛ kpe yɛ gbɛ ni yaa Gaza lɛ nɔ lɛ, ena akɛ “etá eshwiili mli kɛmiiya, ni eekane gbalɔ Yesaia wolo lɛ.” (Bɔfoi lɛ Asaji 8:26-30) Bɔfo Paulo kɛɛ Timoteo ni ekɛ ‘woji lɛ, titri lɛ kooloi ahe woji ní aŋmaa nii yɛ nɔ lɛ’ abaha lɛ. (2 Timoteo 4:13) Eyɛ mli akɛ Paulo etsɔɔɔ woji pɔtɛɛ ni amɛji moŋ, shi eeenyɛ efee akɛ enɛɛmɛi ji Hebri Ŋmalɛi lɛ fãi komɛi.

Alan Millard ni eji Hebri kɛ Arabia wiemɔi lɛ ahe nilelɔ kpanaa lɛ tsɔɔ mli akɛ, mɛi pɛ ni ekolɛ amɛyɔɔ Ŋmalɛ wolokpoi lɛ eko yɛ Yudafoi lɛ ateŋ ji “hii ni ji hiɛnaanɔbii ni yɔɔ Palestina, mɛi ni tsɛɔ amɛhe woloŋlelɔi, Farisifoi lɛ ateŋ mɛi komɛi, kɛ tsɔɔlɔi tamɔ Nikodemo nɛkɛ.” Yiŋtoo kome hewɔ ni ebalɛ nakai lɛ ji akɛ, amɛjara wa. Millard bu akɔntaa akɛ “Yesaia wolo lɛ pɛ jara baanyɛ afee denarioi ekpaa kɛmiimɔ denarioi nyɔŋma,” ni etsɔɔ akɛ Hebri Biblia muu lɛ fɛɛ “baanyɛ ashɛ wolokpoi 15 kɛmiimɔ 20,” loo kɛ́ aaawie yɛ gbɛ kroko nɔ lɛ, ejara lɛ baanyɛ ashɛ mɔ ko nyɔji ekpaa nyɔmɔwoo.

Biblia lɛ etsɔɔɔ kɛji Yesu loo ekaselɔi lɛ yɛ amɛ diɛŋtsɛ amɛ-Biblia wolokpoi. Shi kɛlɛ, ŋwanejee ko kwraa bɛ he akɛ no mli lɛ Yesu le Ŋmalɛi lɛ amli jogbaŋŋ, ni enyɛɔ etsɛɔ Ŋmalɛi lɛ ayisɛɛ loo ewieɔ he kɛjɛɔ eyitsoŋ. (Mateo 4:4, 7, 10; 19:4, 5) Ani esaaa akɛ ŋmɛnɛ lɛ, enɛ kanyaa wɔ koni wɔkase Biblia lɛ jogbaŋŋ, akɛni ejara waaa ni ewaaa hu akɛ aaaná eko lɛ hewɔ?