Hegbɛ Ni Yehowa Yɔɔ Akɛ Eyeɔ Nɔ Kɛ Nyɔŋmɔ Maŋtsɛyeli Lɛ
Hegbɛ Ni Yehowa Yɔɔ Akɛ Eyeɔ Nɔ Kɛ Nyɔŋmɔ Maŋtsɛyeli Lɛ
“Bo, Yehowa, onɔ̃ ji dalɛ kɛ hewalɛ kɛ anunyam kɛ kunimyeli kɛ agbojee . . . Bo, Yehowa, onɔ̃ ji maŋtsɛyeli lɛ!”—1 KRONIKA 29:11.
1. Mɛni hewɔ Yehowa ji mɔ ni sa akɛ Eyeɔ jeŋ muu lɛ fɛɛ nɔ lɛ?
“YEHOWA lɛ, eŋɔ emaŋtsɛsɛi lɛ ema shi yɛ ŋwɛi, ni emaŋtsɛyeli lɛ yeɔ nii fɛɛ nɔ.” (Lala 103:19) Lalatsɛ lɛ tsɔ wiemɔi nɛɛ anɔ eha ale anɔkwa sane ko ni kɔɔ nɔyeli he. Ákɛ Bɔlɔ lɛ, Yehowa Nyɔŋmɔ ji mɔ ni sa akɛ Eyeɔ jeŋ muu lɛ fɛɛ nɔ.
2. Te Daniel tsɔɔ bɔ ni Yehowa mumɔŋ shihilɛhe lɛ yɔɔ lɛ mli eha tɛŋŋ?
2 Yɛ anɔkwale mli lɛ, kɛ́ nɔyelɔ ko baaye nɔ lɛ, belɛ esa akɛ ená shishibii. Yɛ shishijee mli lɛ, Yehowa ye mumɔŋ bɔɔ nii lɛ anɔ—klɛŋklɛŋ lɛ eye e-Bi koome lɛ nɔ ni sɛɛ mli lɛ eye ŋwɛibɔfoi akpekpei abɔ lɛ hu anɔ. (Kolosebii 1:15-17) Yɛ afii babaoo sɛɛ lɛ, aha gbalɔ Daniel na Yehowa nɔyeli lɛ he nɔ ko fioo. Daniel bɔ amaniɛ akɛ: “Mihiɛ kwɛmɔ aahu kɛyashi beyinɔ ní akɛ maŋtsɛsɛii bamamɔ shi, ni mɔ ni eye gbii pii lɛ ho tá shi. . . . Mɛi akpei akpe sɔmɔɔ lɛ, ni mɛi akpei nyɔŋma nyɔŋma toi akpei nyɔŋma damɔ ehiɛ.” (Daniel 7:9, 10) Yehowa ni ji “mɔ ni eye gbii pii lɛ” kɛ afii babaoo ni aleee eye emumɔŋ bii ni ji weku ni da ni ato amɛhe gbɛjianɔ jogbaŋŋ, ní sɔmɔɔ akɛ ‘sɔɔlɔi’ ni feɔ esuɔmɔnaa nii lɛ anɔ akɛ Maŋtsɛ.—Lala 103:20, 21.
3. Mɛɛ gbɛ nɔ Yehowa lɛɛ enɔyeli lɛ mli kɛkpele jeŋ muu lɛ fɛɛ?
3 Sɛɛ mli lɛ Yehowa lɛɛ enɔyeli lɛ mli kɛkpele jeŋ muu lɛ fɛɛ kɛ emli nibii ni yɔɔ hwanyaŋŋ ni ebɔ, ni shikpɔŋ lɛ hu fata he lɛ nɔ. (Hiob 38:4, 7) Kɛha adesa ni yɔɔ shikpɔŋ nɔ lɛ, etamɔ nɔ ni nibii ni yɔɔ ŋwɛiniiaŋ lɛ tsuɔ nii jogbaŋŋ yɛ gbɛjianɔtoo naa oookɛɛ nɔ ni ehe ehiaaa ni mɔ ko akudɔ amɛ loo aye amɛnɔ. Kɛlɛ, lalatsɛ lɛ jaje akɛ: ‘Yehowa fã, ni abɔ amɛ. Eŋɔ amɛ emamɔ shi kɛmiiya naanɔ; ewo akpɔ ni akuŋ mli.’ (Lala 148:5, 6) Kɛjɛ teteete lɛ, Yehowa etee nɔ eye nɔ akɛ maŋtsɛ ní kɛ gbɛtsɔɔmɔ haa bɔɔ nii fɛɛ ni yɔɔ ŋwɛi kɛ jeŋ muu lɛ fɛɛ mli.—Nehemia 9:6.
4. Mɛɛ gbɛ nɔ Yehowa kɛ enɔyeli hegbɛ lɛ tsuɔ nii yɛ adesai anɔ?
4 Nyɔŋmɔ kɛ enɔyeli hegbɛ lɛ tsu nii yɛ gbɛ kroko nɔ beni ebɔ klɛŋklɛŋ adesai enyɔ lɛ. Yehowa ha adesai lɛ hiamɔ nii fɛɛ ni baaha amɛtsui anyɔ amɛmli yɛ shihilɛ mli, ni ekɛ hegbɛ hu ha akɛ amɛye adebɔɔ nibii krokomɛi ni yɔɔ shikpɔŋ nɛɛ nɔ lɛ anɔ—enɛ ji nɔyeli hegbɛ ni akpãa mli ahaa mɔ kroko. (1 Mose 1:26-28; 2:8, 9) No hewɔ lɛ, eyɛ faŋŋ akɛ jeee akɛ Nyɔŋmɔ kɛ mlihilɛ yeɔ nɔ yɛ gbɛ ni ja nɔ kɛkɛ, shi moŋ ekɛ woo kɛ bulɛ hu haa eshishibii lɛ. Bei abɔ ni Adam kɛ Hawa tee nɔ amɛba amɛhe shi amɛha Yehowa nɔyeli lɛ, amɛná gbɛkpamɔ akɛ amɛbaahi shi kɛya naanɔ yɛ shikpɔŋ lɛ nɔ yɛ paradeiso shĩa lɛ mli.—1 Mose 2:15-17.
5. Mɛni wɔbaanyɛ wɔkɛɛ yɛ bɔ ni Yehowa yeɔ nɔ ehaa lɛ he?
5 Kɛ́ wɔsusu enɛɛmɛi fɛɛ he lɛ, te wɔbaanyɛ wɔmu sane naa wɔha tɛŋŋ? Klɛŋklɛŋ lɛ, Yehowa etee nɔ eye ebɔɔ nii lɛ fɛɛ anɔ akɛ maŋtsɛ be fɛɛ be. Nɔ ni ji enyɔ lɛ, Nyɔŋmɔ nɔyeli lɛ hi jogbaŋŋ diɛŋtsɛ ni ekɛ woo haa eshishibii lɛ. Naagbee nɔ lɛ ji akɛ, kɛ́ wɔtee nɔ wɔbo Nyɔŋmɔ nɔyeli lɛ toi ni wɔfi esɛɛ lɛ, wɔbaaná naanɔ jɔɔmɔi. Ebɛ naakpɛɛ mɔ akɛ enɛ tsirɛ Maŋtsɛ David ni hi shi yɛ blema Israel lɛ ni ewie akɛ: “Bo, Yehowa, onɔ̃ ji dalɛ kɛ hewalɛ kɛ anunyam kɛ kunimyeli kɛ agbojee; ejaakɛ nɔ fɛɛ nɔ ni yɔɔ ŋwɛi kɛ shikpɔŋ lɛ nɔ lɛ onɔ̃ ni. Bo, Yehowa, onɔ̃ ji maŋtsɛyeli lɛ, ni bo ji mɔ ni ta nii fɛɛ nɔ akɛ yitso!”—1 Kronika 29:11.
Mɛni Hewɔ Nyɔŋmɔ Maŋtsɛyeli lɛ He Hiaa Lɛ?
6. Mɛni ji tsakpãa ni yɔɔ maŋtsɛ ni Nyɔŋmɔ ji lɛ kɛ e-Maŋtsɛyeli lɛ teŋ?
6 Akɛni Yehowa ni ji Jeŋ Muu Fɛɛ Maŋtsɛ lɛ etee nɔ etsɔɔ be fɛɛ be akɛ eyɛ hewalɛ kɛ nyɛmɔ kpele hewɔ lɛ, mɛni hewɔ Nyɔŋmɔ Maŋtsɛyeli lɛ he hiaa lɛ? Bei babaoo lɛ nɔyelɔ ko kɛ hegbɛ ni eyɔɔ lɛ tsuɔ nii kɛyeɔ eshishibii lɛ anɔ kɛtsɔ gbɛjianɔ ko ni ato nɔ. No hewɔ lɛ, Nyɔŋmɔ Maŋtsɛyeli lɛ ji gbɛ ni Nyɔŋmɔ tsɔɔ nɔ eyeɔ ebɔɔ nii lɛ anɔ akɛ jeŋ muu fɛɛ maŋtsɛ, eji gbɛjianɔtoo ni ekɛtsuɔ enɔyeli lɛ he nii.
7. Mɛni hewɔ Yehowa to nɔyeli hee ko shishi lɛ?
7 Yehowa eye nɔ yɛ gbɛ̀i srɔtoi anɔ yɛ bei srɔtoi amli. Eto nɔyeli hee ko shishi koni ekɛtsu sane hee ko ni ba lɛ he nii. Sane nɛɛ ba beni Nyɔŋmɔ mumɔŋ bi atuatselɔ ko ni ji Satan laka Adam kɛ Hawa koni amɛtse atua amɛshi Yehowa nɔyeli lɛ. Nakai atuatsemɔ lɛ tswa Nyɔŋmɔ nɔyeli lɛ mpoa. Yɛ mɛɛ gbɛ nɔ? Satan tsɔ kɛɛmɔ ni ekɛɛ Hawa akɛ kɛ́ eye tso yibii ni agu eyeli lɛ, ‘egboŋ kɔkɔɔkɔ’ lɛ nɔ etsɔɔ akɛ Yehowa ji amalelɔ, ni no hewɔ lɛ anyɛŋ akɛ he afɔ̃ enɔ. Satan tee nɔ ekɛɛ Hawa akɛ: “Nyɔŋmɔ le akɛ gbi nɔ ni nyɛaaye eko lɛ, nyɛhiŋmɛii aaagbele, ni nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ.” Satan miitsɔɔ akɛ, kɛ́ Adam kɛ Hawa kpoo famɔ ni Nyɔŋmɔ kɛha amɛ lɛ ni amɛ diɛŋtsɛ amɛkɔ amɛgbɛ lɛ, nibii baahi jogbaŋŋ kɛha amɛ. (1 Mose 3:1-6) Enɛ ji nɔ ko ni te shi ewo hegbɛ ni Nyɔŋmɔ yɔɔ akɛ eyeɔ nɔ lɛ kɛ ja ni enɔyeli lɛ ja lɛ tɛ̃ɛ. Mɛni Yehowa baafee yɛ sane nɛɛ he?
8, 9. (a) Te adesa nɔyelɔ ko baatsu atuatsemɔ he nii yɛ enɔyelihe lɛ eha tɛŋŋ? (b) Mɛni Yehowa fee kɛtsu atua ni atse yɛ Eden abɔɔ lɛ mli lɛ he nii?
8 Mɛni wɔkpaa gbɛ akɛ nɔyelɔ ko baafee kɛ́ atse atua diɛŋtsɛ ashi lɛ yɛ enɔyelihe lɛ? Mɛi ni le yinɔsane lɛ baanyɛ akai akɛ nibii ni tamɔ nakai eba pɛŋ. Kɛ́ ebalɛ nakai lɛ, yɛ nɔ najiaŋ ni nɔyelɔ ko ni mli jɔ po baaku ehiɛ eshwie sane lɛ nɔ lɛ, ekojoɔ atuatselɔi lɛ, ni ebuɔ amɛ fɔ́ akɛ amɛji maŋjwalɔi. No sɛɛ lɛ, ekolɛ nɔyelɔ lɛ kɛ hegbɛ baaha mɔ ko ni eyaye atuatselɔi lɛ anɔ kunim koni eha toiŋjɔlɛ aba ekoŋŋ. Nakai nɔŋŋ Yehowa ha ana akɛ eyɛ hewalɛ yɛ sane ni ba lɛ nɔ, beni etsu sane lɛ he nii amrɔ nɔŋŋ ní ebu atuatselɔi lɛ fɔ́ lɛ. Ebu Adam kɛ Hawa fɔ́ akɛ amɛsaaa naanɔ wala nikeenii lɛ, ni Eshwie amɛ kɛjɛ Eden abɔɔ lɛ mli.—1 Mose 3:16-19, 22-24.
9 Beni Yehowa jajeɔ fɔbuu kojomɔ eshwieɔ Satan nɔ lɛ, ejie enɔyeli hee ni ji gbɛjianɔtoo hee ni ekɛbaatsu nii koni ekɛ toiŋjɔlɛ kɛ shihilɛ kpakpa aba enɔyelihe lɛ mli fɛɛ ekoŋŋ lɛ kpo etsɔɔ. Nyɔŋmɔ kɛɛ Satan akɛ: “Mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ̃, ni bo hu oootswa enanetsitsi nɔ̃.” (1 Mose 3:15) No hewɔ lɛ, Yehowa ha efee faŋŋ akɛ eji eyiŋtoo akɛ ekɛ hegbɛ baaha “seshi” ko, ni ekpata Satan kɛ eta lɛ hiɛ, koni ekɛtsɔɔ akɛ Lɛ ji mɔ ni sa akɛ eyeɔ nɔ.—Lala 2:7-9; 110:1, 2.
10. (a) Namɔ bafee “seshi” lɛ? (b) Mɛni Paulo wie yɛ klɛŋklɛŋ gbalɛ lɛ mlibaa he?
10 Nakai “seshi” lɛ bafee Yesu Kristo, kɛ kuu krɛdɛɛ ko ni baafata ehe kɛye nɔ. Amɛ fɛɛ amɛfeɔ ekome kɛfeɔ Nyɔŋmɔ Mesia Maŋtsɛyeli lɛ. (Daniel 7:13, 14, 27; Mateo 19:28; Luka 12:32; 22:28-30) Shi, ajieee enɛɛmɛi fɛɛ kpo shikome. Yɛ anɔkwale mli lɛ, klɛŋklɛŋ gbalɛ lɛ mlibaa tee nɔ efee “teemɔŋ sane ni aŋɔtee kɛjɛ naanɔ beebe.” (Romabii 16:25) Hii anɔkwafoi kɛ afii ohai abɔ shwe akɛ amɛaale be ni abaajie “teemɔŋ sane” lɛ kpo koni klɛŋklɛŋ gbalɛ lɛ aba mli ni abu maŋtsɛ ni Yehowa ji lɛ bem.—Romabii 8:19-21.
Ajie “Teemɔŋ Sane lɛ” Kpo Fiofio
11. Mɛni Yehowa ha Abraham le?
11 Beni be shwie mli lɛ, Yehowa tee nɔ eha ale “Nyɔŋmɔ maŋtsɛyeli he teemɔŋ sane lɛ” he nibii komɛi fiofio. (Marko 4:11) Mɛi ni Yehowa ha amɛle sane nɛɛ he nɔ ko lɛ ateŋ mɔ kome ji Abraham ní atsɛ lɛ akɛ “Nyɔŋmɔ shieŋtsɛ” lɛ. (Yakobo 2:23) Yehowa wo Abraham shi akɛ ‘ebaaha etsɔ jeŋmaŋ kpeteŋkpele.’ Sɛɛ mli lɛ, Nyɔŋmɔ kɛɛ Abraham akɛ: “Maŋtsɛmɛi aaajɛ omli,” ni “oseshi lɛ mli aaajɛ ajɔɔ shikpɔŋ lɛ nɔ jeŋmaji fɛɛ.”—1 Mose 12:2, 3; 17:6; 22:17, 18.
12. Mɛɛ gbɛ nɔ Satan seshi lɛ jie ehe kpo yɛ Nu Afua lɛ sɛɛ?
12 Beni shɛɔ Abraham beaŋ lɛ, no mli lɛ adesai eje shishi momo amɛmiitao nɔyeli hegbɛi ni amɛkɛye mɛi krokomɛi anɔ. Ákɛ nɔkwɛmɔnɔ lɛ, Biblia lɛ wie Nimrod ni ji Noa nanakaŋsowa lɛ he akɛ: “Lɛ eje shishi efee ehe kakalɔ yɛ shikpɔŋ lɛ nɔ. Lɛ nɔŋŋ ji gbɔbilɔ kpanaa [ni te shi ewo, NW] Yehowa.” (1 Mose 10:8, 9) Eyɛ faŋŋ akɛ Nimrod kɛ mɛi krokomɛi ni hole amɛ diɛŋtsɛ amɛhe nɔyelɔi lɛ ji mɛi ni Satan kudɔɔ amɛ. Amɛ kɛ mɛi ni fiɔ amɛsɛɛ lɛ batsɔmɔ Satan seshi lɛ fã.—1 Yohane 5:19.
13. Mɛni Yehowa ha ale kɛtsɔ Yakob nɔ?
13 Yɛ mɔdɛŋ fɛɛ ni Satan bɔ koni eha aná adesai nɔyelɔi lɛ fɛɛ sɛɛ lɛ, Yehowa tee nɔ etsu eyiŋtoi lɛ ahe nii. Yehowa ha ale kɛtsɔ Abraham nabi Yakob nɔ akɛ: “Maŋtsɛ tso ejeŋ Yuda dɛŋ, ni nɔyeli tso hu ejeŋ enaji ateŋ, kɛyashi beyinɔ ní mɔ nɔ̃ ni ji lɛ aaaba, ni lɛ toi majimaji lɛ aaabo.” (1 Mose 49:10) Wiemɔ ni atsɔɔ shishi akɛ “Mɔ Nɔ̃ ni Ji” lɛ ji “Shilo.” No hewɔ lɛ, gbalɛ wiemɔi nɛɛ tsɔɔ akɛ mɔ ko baaba ni yɔɔ mla naa hegbɛ akɛ eheɔ “maŋtsɛ tso” loo maŋtsɛyeli lɛ, kɛ “nɔyeli tso” loo nɔyeli lɛ yɛ “majimaji lɛ” loo adesai fɛɛ adɛŋ. Namɔ baafee nɛkɛ Mɔ nɛɛ?
“Kɛyashi Beyinɔ ní Mɔ Nɔ̃ ni Ji lɛ Aaaba”
14. Mɛɛ kpaŋmɔ Yehowa kɛ David fee?
14 Klɛŋklɛŋ mɔ ni Yehowa hala yɛ Yuda seshibii lɛ ateŋ koni eye ewebii lɛ anɔ akɛ maŋtsɛ ji tookwɛlɔ David, ni ji Ishai bi lɛ. * (1 Samuel 16:1-13) Yɛ eshai ni David fee kɛ tɔmɔi ni etɔ̃ lɛ fɛɛ sɛɛ lɛ, ená Yehowa hiɛ duromɔ ejaakɛ eye Yehowa nɔyeli lɛ anɔkwa. Beni Yehowa haa klɛŋklɛŋ gbalɛ ni egba yɛ Eden lɛ feɔ faŋŋ lɛ, ekɛ David fee kpaŋmɔ ni ekɛɛ akɛ: “Matée oseshinyo ni jɛ omusuŋ shi yɛ osɛɛ, ni maha emaŋtsɛyeli lɛ adamɔ shi shiŋŋ.” Nakai wiemɔ lɛ yaa shɔŋŋ fe nɔ ni kɔɔ David bi ni baaye esɛɛ ni ji Salomo lɛ he, ejaakɛ atsa nɔ yɛ kpaŋmɔ lɛ mli akɛ: “Maha emaŋtsɛyeli sɛ̃i lɛ ama shi shiŋŋ kɛya naanɔ.” Nakai kpaŋmɔ ni akɛ David fee lɛ fee lɛ faŋŋ akɛ yɛ be ni sa mli lɛ, Maŋtsɛyeli lɛ “seshi” ni awo shi yɛ ehe lɛ baaba kɛtsɔ David wekutɔkpãa lɛ nɔ.—2 Samuel 7:12, 13.
15. Mɛni hewɔ abaanyɛ akɛɛ akɛ Yuda maŋtsɛyeli lɛ feɔ Nyɔŋmɔ Maŋtsɛyeli lɛ he mfoniri lɛ?
15 Yɛ mɛi ni jɛ maŋtsɛmɛi aweku ni yeɔ nɔ, ní osɔfonukpa lɛ kɛ mu krɔŋkrɔŋ fɔ amɛ mu lɛ ateŋ lɛ, David ji mɔ klɛŋklɛŋ ni ye nɔ. No hewɔ lɛ, abaanyɛ atsɛ maŋtsɛmɛi nɛɛ akɛ mɛi ni afɔ amɛ mu loo mesiai. (1 Samuel 16:13; 2 Samuel 2:4; 5:3; 1 Maŋtsɛmɛi 1:39) Akɛɔ akɛ amɛta Yehowa maŋtsɛsɛi lɛ nɔ ni amɛmiiye nɔ akɛ maŋtsɛmɛi kɛha Yehowa yɛ Yerusalem. (2 Kronika 9:8) Yɛ shishinumɔ nɛɛ naa lɛ, Yuda maŋtsɛyeli lɛ damɔ shi kɛha Nyɔŋmɔ Maŋtsɛyeli, ni ji Yehowa nɔyeli lɛ.
16. Mɛni jɛ maŋtsɛmɛi ni ye nɔ yɛ Yuda lɛ anifeemɔi lɛ amli kɛba?
16 Kɛ́ maŋtsɛ lɛ kɛ maŋbii lɛ ba amɛhe shi amɛha Yehowa nɔyeli lɛ, amɛnáa Edɛŋ hebuu kɛ jɔɔmɔ. Salomo nɔyeli lɛ beaŋ bafee toiŋjɔlɛ kɛ shweremɔ be ko ni eko kɛ lɛ yeee egbɔ, ni enɛ feɔ beni Nyɔŋmɔ Maŋtsɛyeli lɛ baaye nɔ lɛ he mfoniri, be mli ni Yehowa nɔyeli lɛ ejie hewalɛ ni Satan náa yɛ mɛi anɔ lɛ kɛtee kwraa ni abu maŋtsɛ ni Yehowa ji lɛ bem lɛ. (1 Maŋtsɛmɛi 4:20, 25) Dɔlɛ sane ji akɛ, maŋtsɛmɛi ni jɛ David wekutɔkpãa lɛ mli lɛ ateŋ mɛi babaoo eyahiii shi yɛ Yehowa taomɔnii lɛ anaa, ni enɛ ha maŋbii lɛ kɛ amɛhe wo wɔŋjamɔ kɛ jeŋba shara mli. Nɔ ni jɛ nifeemɔ nɛɛ mli kɛba ji akɛ, Yehowa ŋmɛ gbɛ ni Babilonbii lɛ bakpata maŋtsɛyeli lɛ hiɛ yɛ afi 607 D.Ŋ.B. Enɛ ha Satan bafee tamɔ mɔ ni eye omanye yɛ mɔdɛŋ ni ebɔ akɛ egbe Yehowa nɔyeli lɛ he guɔ lɛ mli.
17. Beni abutu David maŋtsɛyeli lɛ sɛɛ lɛ, mɛni tsɔɔ akɛ Yehowa tee nɔ eye nɔ akɛ maŋtsɛ?
17 David maŋtsɛyeli lɛ ni abutu—kɛ Israel kooyigbɛ maŋtsɛyeli lɛ ni atsɔ hiɛ abutu lɛ—etsɔɔɔ akɛ Yehowa bɛ hegbɛ akɛ eyeɔ adesai anɔ loo akɛ enɔyeli lɛ nine enyɛ shi, shi moŋ etsɔɔ nɔ ni jɛɔ hewalɛ ni Satan náa yɛ mɛi anɔ kɛ adesai ahe ni amɛtseɔ kɛjɛɔ Nyɔŋmɔ he lɛ mli kɛbaa. (Abɛi 16:25; Yeremia 10:23) Bɔni afee ni Yehowa aha ana akɛ ekã he eji nɔyelɔ lɛ, etsɔ gbalɔ Ezekiel nɔ ejaje akɛ: “Ajie fai lɛ, ni akpɔ akekre lɛ! . . . Butumɔ, butumɔ, butumɔ mabutu lɛ; ni enɛ hu ehiŋ shi kɛyashi beyinɔ ní mɔ gbɛnaa ni ji lɛ aaaba, ni maŋɔ ha lɛ!” (Ezekiel 21:31, 32) Nakai wiemɔi lɛ tsɔɔ akɛ “seshi” ni awo shi yɛ ehe, ni ji ‘Mɔ gbɛnaa ni ji lɛ’ baaba yɛ wɔsɛɛ be mli.
18. Mɛɛ sane bɔfo Gabriel jaje etsɔɔ Maria?
18 Nyɛhaa wɔkua wɔsɛɛ kɛyaa aaafee afi 2 D.Ŋ.B. Atsu bɔfo Gabriel kɛtee Maria ni ji oblayoo fro ko ni yɔɔ Nazaret, yɛ Galilea maŋtiase ni yɔɔ Palestina kooyigbɛ lɛ ŋɔɔ. Gabriel jaje akɛ: “Naa, obaaná musu ni ooofɔ́ binuu, ni ooowo lɛ gbɛi akɛ Yesu. Eeetsɔ agbo, ni aaatsɛ́ lɛ Ŋwɛinyo lɛ bi, ni Nuŋtsɔ Nyɔŋmɔ aaaŋɔ etsɛ David maŋtsɛsɛi lɛ aha lɛ. Ni eeeye Yakob we lɛ nɔ maŋtsɛ kɛaatee naanɔ, ni emaŋtsɛyeli lɛ sɛɛ efoŋ.”—Luka 1:31-33.
19. Mɛɛ nibii ni yɔɔ miishɛɛ akpojiemɔ ebɛŋkɛ?
19 Agbɛnɛ, be ni akɛbaajie “teemɔŋ sane” lɛ kpo atsɔɔ lɛ ebɛŋkɛ kpaakpa. Etsɛŋ ni Mɔ titri ni ji shiwoo “seshi” lɛ baapue. (Galatabii 4:4; 1 Timoteo 3:16) Satan baatswa enanetsitsi nɔ̃. Shi nakai “seshi” lɛ baatswa Satan yitso nɔ̃, ni no kɛ hewalɛ ni lɛ kɛ ehefatalɔi lɛ náa yɛ mɛi anɔ lɛ baaba naagbee. Seshi lɛ baaha ana hu akɛ kɛtsɔ Nyɔŋmɔ Maŋtsɛyeli lɛ nɔ lɛ, abaasaa nibii fɛɛ ni Satan efite lɛ, ni abaabu maŋtsɛ ni Yehowa ji lɛ bem. (Hebribii 2:14; 1 Yohane 3:8) Mɛɛ gbɛ nɔ Yesu baatsɔ etsu enɛ he nii? Mɛɛ nɔkwɛmɔnɔ efee efɔ̃ shi eha wɔ koni wɔnyiɛ sɛɛ? Wɔbaana sanebimɔi nɛɛ ahetoo yɛ nikasemɔ ni nyiɛ sɛɛ lɛ mli.
[Shishigbɛ niŋmaa]
^ kk. 14 Saul ni ji klɛŋklɛŋ mɔ ni Nyɔŋmɔ hala koni eye Israel nɔ lɛ jɛ Benyamin akutso lɛ mli.—1 Samuel 9:15, 16; 10:1.
Ani Obaanyɛ Otsɔɔ Mli?
• Mɛni haa Yehowa bafeɔ mɔ ni sa akɛ Eyeɔ jeŋ muu lɛ fɛɛ nɔ lɛ?
• Mɛni hewɔ Yehowa kpɛ eyiŋ akɛ ebaato Maŋtsɛyeli lɛ shishi lɛ?
• Mɛɛ gbɛ nɔ Yehowa ha ale “teemɔŋ sane lɛ” fiofio?
• Beni abutu David maŋtsɛyeli lɛ sɛɛ lɛ, mɛni tsɔɔ akɛ Yehowa tee nɔ eye nɔ akɛ maŋtsɛ?
[Nikasemɔ lɛ he Sanebimɔi]
[Mfoniri ni yɔɔ baafa 23]
Mɛni Yehowa ha ale kɛtsɔ Abraham nɔ?
[Mfoniri ni yɔɔ baafa 25]
Mɛni hewɔ David maŋtsɛyeli lɛ ni abutu lɛ etsɔɔɔ akɛ Yehowa nɔyeli lɛ nine enyɛ shi lɛ?