Ani Oyɛ Mɔ Ni Woɔ Bo Ŋaa Yɛ Nyɔŋmɔjamɔ He?

UZIA batsɔ Yuda wuoyigbɛ maŋtsɛyeli lɛ nɔ maŋtsɛ beni eji oblanyo fioo ni eye afii 16 pɛ. Ekɛ nɔ ni fa fe afii 50 ye nɔ, kɛjɛ afi 800 D.Ŋ.B. afii lɛ anaagbee gbɛ kɛyashi afi 700 D.Ŋ.B. afii lɛ shishijee gbɛ. Uzia ‘fee nɔ ni ja yɛ Yehowa hiɛ’ kɛjɛ egbekɛbiiashi. Mɛni ye ebua lɛ ni ekɔ gbɛ ni ja lɛ? Sane ni aŋma afɔ shi yɛ ehe lɛ kɛɔ akɛ: “Gbii abɔ ní Zakaria ni tsɔɔ [Uzia] Nyɔŋmɔ ninaai lɛ amli lɛ yɔɔ lɛ, ediɔ Nyɔŋmɔ sɛɛ; ni gbii abɔ ní ediɔ Yehowa sɛɛ lɛ, Nyɔŋmɔ haa eshwereɔ.”—2 Kronika 26:1, 4, 5.

Alé Zakaria ni ji Uzia ŋaawolɔ lɛ he saji tsɔ, ja nɔ ni Biblia lɛ wie yɛ ehe nɛɛ pɛ. Shi Zakaria ji mɔ ni ‘tsɔɔ Uzia ni edi anɔkwa Nyɔŋmɔ lɛ sɛɛ lɛ’ ni eye ebua maŋtsɛ oblanyo lɛ waa ni efee nɔ ni ja. Wolo ni ji The Expositor’s Bible lɛ wie akɛ Zakaria “le ŋmalɛ krɔŋkrɔŋ lɛ mli waa, eyɛ niiashikpamɔi babaoo yɛ Nyɔŋmɔjamɔ mli, ni ele nitsɔɔmɔ.” Biblia he nilelɔ ko wie Zakaria he akɛ: “Enuɔ gbalɛi ashishi jogbaŋŋ ni . . . asaŋ eji nuu nilelɔ, mɔ ni etuu ehe kwraa eha Nyɔŋmɔ, ni eji jalɔ; ni etamɔ nɔ ni ená Uzia nɔ hewalɛ waa.”

Beni Uzia ba ejeŋ yɛ anɔkwayeli mli lɛ, Nyɔŋmɔ jɔɔ lɛ babaoo, ni “eje agbo naakpa” ejaakɛ “Nyɔŋmɔ ye bua lɛ.” Hɛɛ akɛni edi Nyɔŋmɔjamɔ sɛɛ yɛ ‘Zakaria gbii lɛ amli’ hewɔ lɛ, eye omanyɛ yɛ enitsumɔi lɛ hu amli. (2 Kronika 26:6-8) Beni Uzia baje agbo lɛ, ekpoo nibii ni Zakaria, eŋaawolɔ lɛ tsɔɔ lɛ lɛ. Uzia ‘tsui wó ehe nɔ ni eha ehiɛ kpata, ni etɔ̃ Yehowa nɔ.’ Akɛni eyafee nɔ ko ni tsɔɔ akɛ ebɛ bulɛ kɛha gbɛjianɔ ni Nyɔŋmɔ eto lɛ hewɔ lɛ, hewolonɔ hela ko ni yɔɔ nyaŋemɔ shwie ehe, ni hela nɛɛ nyɛɛɛ eha eya nɔ esɔmɔ akɛ maŋtsɛ kɛmɔ shi dɔŋŋ.—2 Kronika 26:16-21.

Ani oyɛ mɔ ko ni abaanyɛ atsɛ lɛ akɛ eji otsɔɔlɔ, ŋaawolo, ni woɔ bo hewalɛ ni ‘odi Nyɔŋmɔ sɛɛ’? Gbekɛbii kɛ oblahii kɛ oblayei ni amɛsale gbala fɛɛ baanyɛ aná ŋaawolɔ ni tamɔ nɛkɛ. Ha ohiɛ asɔ oŋaawolɔ nɛɛ, ejaakɛ eŋaawoo lɛ baanyɛ aye abua bo ni oya nɔ ofee nɔ ni ja yɛ Yehowa hiɛ. Bó Kristofonyo nuu loo yoo ni eda yɛ mumɔŋ nɛɛ toi, ni osusu ŋaa ni ewoɔ bo lɛ he jogbaŋŋ. Kaakpale kɔkɔɔkɔ kɛmiijɛ wiemɔi ni nilee yɔɔ mli, ni ‘etsɔɔ bo koni odi anɔkwa Nyɔŋmɔ lɛ sɛɛ’ lɛ ahe.—Abɛi 1:5; 12:15; 19:20.