Abu Amɛ Akɛ Amɛsa Mɛi Ni Atsɔɔ Amɛ Gbɛ Kɛyaa Wala Nubui Ahe
Abu Amɛ Akɛ Amɛsa Mɛi Ni Atsɔɔ Amɛ Gbɛ Kɛyaa Wala Nubui Ahe
“Toobi lɛ . . . aaalɛ̀ amɛ, ni eeetsɔɔ amɛ gbɛ kɛaatee wala nubui ahe.”—KPOJ. 7:17.
1. Mɛni Nyɔŋmɔ Wiemɔ lɛ tsɔɔ akɛ Kristofoi ni afɔ amɛ mu lɛ ji, ni mɛɛ nitsumɔ Yesu kɛwo amɛdɛŋ?
NYƆŊMƆ WIEMƆ lɛ tsɔɔ akɛ Kristofoi ni afɔ amɛ mu lɛ ji “tsulɔ anɔkwafo kɛ nilelɔ lɛ,” ni amɛ amɛkwɛɔ Kristo nibii ni yɔɔ shikpɔŋ lɛ nɔ lɛ anɔ. Beni Kristo basara “tsulɔ” lɛ yɛ afi 1918 lɛ, ena akɛ mɛi ni afɔ amɛ mu ni yɔɔ shikpɔŋ lɛ nɔ yɛ nakai beaŋ lɛ miiye anɔkwa ni amɛkɛ mumɔŋ niyenii miiha yɛ “be ni sa nɔ.” No hewɔ lɛ, Yesu ni ji Nuŋtsɔ lɛ ná he miishɛɛ akɛ ehala amɛ eto “enii fɛɛ kwa nɔ.” (Kanemɔ Mateo 24:45-47.) Enɛ hewɔ lɛ, mɛi ni afɔ amɛ mu lɛ sɔmɔɔ Yehowa jálɔi krokomɛi lɛ yɛ shikpɔŋ lɛ nɔ dani amɛnine shɛɔ ŋwɛi nyɔmɔwoo lɛ nɔ.
2. Mɛni ji Yesu nibii lɛ?
2 Nuŋtsɔ yɛ hegbɛ yɛ lɛ diɛŋtsɛ enibii anɔ, ni ebaanyɛ ekɛtsu nii bɔ ni esumɔɔ. Yesu Kristo ni ji Maŋtsɛ ni Yehowa ehala ní ebɔi nɔyeli lɛ nibii lɛ ji nɔ fɛɛ nɔ ni kɛ Maŋtsɛyeli lɛ yɔɔ tsakpãa yɛ shikpɔŋ lɛ nɔ lɛ. “Asafo babaoo” lɛ ni bɔfo Yohane na yɛ ninaa mli lɛ fata he. Yohane wie asafo babaoo lɛ he akɛ: “Naa, asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli damɔ maŋtsɛsɛi lɛ hiɛ kɛ toobi lɛ hiɛ, ni amɛwo atadei yɛji, ni amɛhiɛ blɛoi yɛ amɛdɛŋ.”—Kpoj. 7:9.
3, 4. Mɛɛ hegbɛ kpele asafo babaoo lɛ ená?
3 Asafo babaoo lɛ mli bii lɛ fata mɛi ni Yesu tsɛ́ amɛ akɛ amɛji ‘etooi krokomɛi’ lɛ ahe. (Yoh. 10:16) Amɛhiɛnɔkamɔ ji akɛ amɛbaahi shi kɛya naanɔ yɛ paradeiso yɛ shikpɔŋ lɛ nɔ. Amɛyɛ nɔmimaa akɛ Yesu ‘aaatsɔɔ amɛ gbɛ kɛaatee wala nubui ahe,’ ni akɛ “Nyɔŋmɔ aaatsumɔ amɛhiɛaŋ yaafonui fɛɛ.” Hiɛnɔkamɔ ni amɛyɔɔ nɛɛ eha “amɛfɔ́ amɛtadei lɛ ahe, ni amɛha eyɛ futaa yɛ toobi lɛ lá lɛ mli.” (Kpoj. 7:14, 17) Amɛyɛ hemɔkɛyeli yɛ Yesu afɔleshaa lɛ mli, ni no hewɔ lɛ yɛ Nyɔŋmɔ hiɛ lɛ amɛwo “atadei yɛji.” Abuɔ amɛ bem akɛ jalɔi, ni amɛbatsɔmɔ Nyɔŋmɔ shieŋtsɛmɛi taakɛ Abraham ji lɛ.
4 Kɛfata he lɛ, akɛni Nyɔŋmɔ buɔ asafo babaoo lɛ mli bii ni amɛyi miifa daa lɛ akɛ jalɔi hewɔ lɛ, amɛbaanyɛ amɛná hiɛnɔkamɔ akɛ abaabaa amɛyi yɛ amanehulu kpeteŋkpele lɛ mli beni akpataa nibii agbɛjianɔtoo nɛɛ hiɛ lɛ. (Yak. 2:23-26) Amɛbaanyɛ amɛtsi amɛbɛŋkɛ Yehowa, ni akɛ kuu lɛ amɛyɛ hiɛnɔkamɔ ni haa mɔ náa miishɛɛ waa akɛ abaabaa amɛyi yɛ Harmagedon. (Yak. 4:8; Kpoj. 7:15) Amɛkɔɔɔ amɛ diɛŋtsɛ amɛgbɛ, shi moŋ amɛjɛɔ amɛtsui mli amɛbaa amɛhe shi amɛhaa ŋwɛi Maŋtsɛ lɛ kɛ enyɛmimɛi ni afɔ amɛ mu ni yɔɔ shikpɔŋ lɛ nɔ lɛ.
5. Mɛɛ gbɛ nɔ asafo babaoo lɛ yeɔ amɛbuaa Kristo nyɛmimɛi ni afɔ amɛ mu lɛ?
5 Satan je lɛ ete shi ewo Kristofoi ni afɔ amɛ mu lɛ waa, ni ebaaya nɔ efee nakai. Ni kɛlɛ, amɛbaanyɛ amɛkpa gbɛ akɛ amɛnanemɛi asafo babaoo lɛ baaye amɛbua amɛ. Amrɔ nɛɛ Kristofoi ni afɔ amɛ mu lɛ ayi faaa, shi mɛi akpei ohai abɔ bafataa asafo babaoo lɛ he daa afi. Mɛi ni afɔ amɛ mu lɛ nyɛŋ ahi Kristofoi asafoi aaafee 100,000 ni yɔɔ jeŋ fɛɛ lɛ eko fɛɛ eko mli ni amɛkwɛ nɔ. No hewɔ lɛ, akɛ asafo babaoo lɛ ateŋ hii ni shɛɔ taomɔnii lɛ ahe lɛ tsuɔ nii ni amɛsɔmɔɔ akɛ asafoŋ onukpai, ni enɛ ji gbɛ kome ni tooi krokomɛi lɛ tsɔɔ nɔ amɛyeɔ amɛbuaa mɛi ni afɔ amɛ mu lɛ. Amɛyeɔ amɛbuaa kɛkwɛɔ Kristofoi akpekpei abɔ ni atuu awo “tsulɔ anɔkwafo kɛ nilelɔ” lɛ dɛŋ lɛ anɔ.
6. Te agba akɛ Kristofoi ni afɔ amɛ mu lɛ ananemɛi ni ji tooi krokomɛi lɛ baaye amɛbua amɛ lɛ aha tɛŋŋ?
6 Gbalɔ Yesaia gba akɛ tooi krokomɛi ni ji Kristofoi ni afɔ amɛ mu lɛ ananemɛi lɛ baajɛ amɛsuɔmɔ mli amɛye amɛbua amɛ. Eŋma akɛ: “Bɔ ni Yehowa kɛɛ nɛ: Mizraim nitsumɔ nii [loo apaafoi ni awooo amɛ nyɔmɔ lɛ] kɛ Kush jarayeli mli sɛɛnamɔ kɛ Sebabii, ni ji gbɔmɛi kãkãdãji lɛ, aaaho kɛaaba oŋɔɔ ni amɛaatsɔmɔ onii, amɛaanyiɛ osɛɛ.” (Yes. 45:14) Ŋmɛnɛ lɛ, Kristofoi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ nyiɛɔ tsulɔ kuu ni afɔ amɛ muu kɛ e-Nɔyeli Kuu lɛ sɛɛ yɛ mfonirifeemɔŋ ni amɛkɛ amɛgbɛtsɔɔmɔ tsuɔ nii. Ákɛ apaafoi ni awooo amɛ nyɔmɔ lɛ, tooi krokomɛi lɛ jɛɔ amɛsuɔmɔ kɛ amɛtsui fɛɛ mli amɛkɛ amɛhewalɛ kɛ nibii ni amɛyɔɔ lɛ yeɔ kɛbuaa ni akɛtsuɔ shiɛmɔ nitsumɔ ni Kristo kɛwo esɛɛnyiɛlɔi ni afɔ amɛ mu ni yɔɔ shikpɔŋ lɛ nɔ lɛ adɛŋ lɛ.—Bɔf. 1:8; Kpoj. 12:17.
7. Mɛni hewɔ atsɔseɔ asafo babaoo lɛ mli bii lɛ?
7 Be mli ni asafo babaoo lɛ yeɔ amɛbuaa amɛnyɛmimɛi ni afɔ amɛ mu lɛ, amɛnyɛmimɛi ni afɔ amɛ mu lɛ hu tsɔseɔ asafo babaoo lɛ mli bii lɛ koni amɛfee mɛi ni akɛbaaje adesai aweku hee ni baahi shi yɛ Harmagedon sɛɛ lɛ shishi. Esa akɛ mɛi ni akɛbaaje adesai aweku hee lɛ shishi lɛ afee mɛi ni abaanyɛ akɛ he afɔ amɛnɔ ni amɛgbugbaaa, ni esa akɛ weku nɛɛ mli bii lɛ afee mɛi ni baajɛ amɛsuɔmɔ mli ni amɛkɛ Nuŋtsɔ lɛ gbɛtsɔɔmɔ atsu nii ni amɛnyɛɔ amɛfeɔ nakai hu. Aha Kristofonyo fɛɛ Kristofonyo hegbɛ koni etsɔɔ akɛ Kristo Yesu ni ji Maŋtsɛ lɛ baanyɛ ekɛ lɛ atsu nii. Kɛ́ oná hemɔkɛyeli yɛ Yesu mli ni oye lɛ anɔkwa amrɔ nɛɛ, no tsɔɔ akɛ obaajɛ suɔmɔ mli obo gbɛtsɔɔmɔ ni Maŋtsɛ lɛ kɛaaha yɛ jeŋ hee lɛ mli lɛ toi.
Asafo Babaoo lɛ Miitsɔɔ akɛ Amɛyɛ Hemɔkɛyeli
8, 9. Mɛɛ gbɛ nɔ asafo babaoo lɛ mli bii lɛ haa anaa akɛ amɛyɛ hemɔkɛyeli?
8 Kristofoi ni afɔ amɛ mu lɛ nanemɛi ni ji tooi krokomɛi lɛ miitsɔɔ yɛ gbɛi srɔtoi anɔ akɛ amɛyɛ hemɔkɛyeli. Klɛŋklɛŋ lɛ amɛyeɔ amɛbuaa mɛi ni afɔ amɛ mu lɛ kɛshiɛɔ Nyɔŋmɔ Maŋtsɛyeli lɛ he sanekpakpa lɛ. (Mat. 24:14; 28:19, 20) Nɔ ni ji enyɔ lɛ amɛjɛɔ amɛsuɔmɔ mli ni amɛkɛ gbɛtsɔɔmɔ ni jɛɔ Nɔyeli Kuu lɛ ŋɔɔ lɛ tsuɔ nii.—Heb. 13:17; kanemɔ Zakaria 8:23.
9 Nɔ ni ji etɛ lɛ, asafo babaoo lɛ mli bii lɛ fiɔ amɛnyɛmimɛi ni afɔ amɛ mu lɛ sɛɛ kɛtsɔ Yehowa jalɛ shishitoo mlai lɛ ni amɛhiɔ shi yɛ naa lɛ nɔ. Amɛbɔɔ mɔdɛŋ ni amɛná sui tamɔ “suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, hiɛshikamɔ.” (Gal. 5:22, 23) Ŋmɛnɛ lɛ, bei pii lɛ abuuu mɛi ni jieɔ sui nɛɛ akpo ní amɛjieee “heloo lɛ nitsumɔi lɛ” akpo lɛ. Fɛɛ sɛɛ lɛ, asafo babaoo lɛ mli bii lɛ etswa amɛfai shi akɛ amɛbaakpoo “ajwamaŋbɔɔ, muji nitsumɔ, nyenyeŋtswibɔɔ, wɔŋjamɔ, sũu, nyɛɛ, béi, awuŋayelii, mlilawooi, bolɔmɔi, atuatsemɔi, mligbalamɔi, hiɛkɔɔi, awuyelii, dãatɔɔi, shwɛmɔ fɔŋ kɛ nii ni tamɔ enɛɛmɛi lɛ.”—Gal. 5:19-21.
10. Mɛni asafo babaoo lɛ mli bii lɛ etswa amɛfai shi akɛ amɛbaafee?
10 Akɛni wɔyeee emuu hewɔ lɛ, ebɛ mlɛo akɛ wɔɔwo mumɔ lɛ yibii lɛ, wɔkpoo heloo lɛ nitsumɔi lɛ, ni wɔte shi wɔwo nɔnyɛɛ ni Satan je lɛ kɛbaa wɔnɔ lɛ. Ni kɛlɛ wɔtswa wɔfai shi akɛ wɔŋmɛŋ gbɛ ni wɔ diɛŋtsɛ wɔgbɔjɔmɔi, nibii ni gbalaa mɔ sɛɛ, loo gbɔmɔtsoŋ naagbai ni haa mɔ nijiaŋ jeɔ wui lɛ agbɔjɔ wɔhemɔkɛyeli loo suɔmɔ ni wɔyɔɔ kɛha Yehowa lɛ. Wɔle akɛ Yehowa baaye eshiwoo akɛ ebaabaa asafo babaoo lɛ yi yɛ amanehulu kpeteŋkpele lɛ mli lɛ nɔ.
11. Mɛɛ ŋaa gbɛ̀i Satan kɛtsuɔ nii bɔni afee ni ekɛgbɔjɔ Kristofoi ahemɔkɛyeli lɛ?
11 Fɛɛ sɛɛ lɛ, wɔhiɛ yɛ wɔhe nɔ be fɛɛ be ejaakɛ wɔle akɛ Abonsam ji wɔhenyɛlɔ diɛŋtsɛ ni enijiaŋ ejeee wui mra. (Kanemɔ 1 Petro 5:8.) Ebɔɔ mɔdɛŋ ni ekɛ hemɔkɛyeli kwalɔi kɛ mɛi krokomɛi atsu nii koni eha wɔhe wɔye akɛ tsɔɔmɔi ni wɔhiɔ shi yɛ naa lɛ ejaaa. Shi bei pii lɛ eyeee omanye. Eyɛ mli akɛ bei komɛi lɛ yiwaa ni akɛbaa wɔnɔ lɛ haa shiɛmɔ nitsumɔ lɛ baashi moŋ, shi bei pii lɛ ehaa mɛi ni awaa amɛyi lɛ ahemɔkɛyeli lɛ mli waa. No hewɔ lɛ, Satan kɛ gbɛ ko ni esusuɔ akɛ no baagbɔjɔ wɔhemɔkɛyeli lɛ waa lɛ miitsu nii jogbaŋŋ amrɔ nɛɛ. Kɛ́ wɔnijiaŋ je wui lɛ enaa akɛ enine baanyɛ ashɛ wɔnɔ yɛ gbɛ ni waaa nɔ. Abɔ klɛŋklɛŋ afii 100 lɛ mli Kristofoi lɛ kɔkɔ yɛ enɛ he beni akɛɛ amɛ akɛ: “Nyɛjwɛŋa [Kristo] mɔ ni ŋmɛ etsui shi eha naashai ni eshafeelɔi ŋmɛ lɛ nɛɛ he.” Mɛni hewɔ? “Koni ekaje nyɛtsine ni nyɛsusumai lɛ anijiaŋ miije wui.”—Heb. 12:3.
12. Mɛɛ gbɛ nɔ Biblia mli ŋaawoo wajeɔ mɛi ni nijiaŋ eje wui lɛ?
12 Ani Yehowa sɔɔmɔ eje otsine be ko pɛŋ? Ani bei komɛi lɛ onuɔ he akɛ onine enyɛ shi? Kɛ́ nakai ni lɛ, kaaŋmɛ gbɛ ni Satan kɛ no tsu nii kɛtsi onaa kɛmiijɛ Yehowa sɔɔmɔ he. Kɛ́ okaseɔ Biblia lɛ jogbaŋŋ, ni osɔleɔ waa, ni oyaa asafoŋ kpeei daa ni okɛ mɛi ni okɛ amɛ hiɛ hemɔkɛyeli kome lɛ bɔɔ daa lɛ, no baaye ebua bo koni ‘osusuma nijiaŋ akaje wui.’ Yehowa ewo shi akɛ ebaaha mɛi ni sɔmɔɔ lɛ lɛ aná hewalɛ hee, ni eshiwoo lɛ anɔkwaleŋ. (Kanemɔ Yesaia 40:30, 31.) Okɛ ohe awo Maŋtsɛyeli lɛ he sɔɔmɔ nitsumɔ lɛ mli waa. Okɛ ohe akawo nibii ni fiteɔ mɔ be lɛ amli, ni oha yelikɛbuamɔ ni okɛaaha mɛi krokomɛi lɛ akã otsui nɔ. Kɛ́ ofee nakai lɛ ebaawaje bo koni ofi shi ekɔɔɔ he eko nibii ni haa mɔ nijiaŋ jeɔ wui ni okɛbaakpe lɛ.—Gal. 6:1, 2.
Abaa Amɛyi yɛ Amanehulu lɛ Mli Kɛbote Jeŋ Hee lɛ Mli
13. Mɛɛ nitsumɔ yɔɔ kɛha mɛi ni abaabaa amɛyi kɛfo Harmagedon lɛ?
13 Ehe baahia ni atsɔɔ mɛi babaoo ni amɛjaaa ni abaatee amɛ shi yɛ Harmagedon sɛɛ lɛ Yehowa gbɛ̀i lɛ. (Bɔf. 24:15) Esa akɛ atsɔɔ amɛ Yesu kpɔmɔ afɔleshãa lɛ he nii; kɛfata he lɛ esa akɛ atsɔɔ amɛ ní amɛná hemɔkɛyeli yɛ nakai afɔleshãa lɛ mli bɔni afee ni amɛnine ashɛ emli jɔɔmɔi lɛ anɔ. Ehe baahia ni amɛkpoo tsutsu apasa jamɔ mli hemɔkɛyelii ni amɛyɔɔ lɛ ní amɛŋmɛɛ amɛsá jeŋba lɛ he. Esa akɛ amɛkase bɔ ni awoɔ gbɔmɔ hee lɛ ni akɛkadiɔ anɔkwa Kristofoi lɛ ahaa. (Efe. 4:22-24; Kol. 3:9, 10) Nitsumɔ babaoo yɛ kɛha tooi krokomɛi lɛ ateŋ mɛi ni baafo Harmagedon lɛ. Eyɛ miishɛɛ waa akɛ aaatsu nitsumɔi tamɔ nɛkɛ aha Yehowa be mli ni jeŋ fɔŋ nɛɛ mli naagbai kɛ emli nibii ni feɔ mɔ ahuntoo lɛ fɛɛ asɛɛ efo lɛ!
14, 15. Tsɔɔmɔ bɔ ni mɛi ni baafo amanehulu kpeteŋkpele lɛ kɛ jalɔi ni abaatee amɛ shi lɛ baagba sane aha.
14 Yehowa tsuji anɔkwafoi ni gboi dani Yesu gbe esɔɔmɔ lɛ naa yɛ shikpɔŋ lɛ nɔ lɛ hu baakase nibii babaoo yɛ nakai beaŋ. Abaatsɔɔ amɛ mɔ ni ji Mesia ni awo shi yɛ ehe ni amɛkpa lɛ gbɛ shi amɛnaaa lɛ lɛ. Ana yɛ amɛshihilɛ mli akɛ amɛmiisumɔ ni Yehowa atsɔɔ amɛ nii dani amɛgbo. Ákɛ nɔkwɛmɔnɔ lɛ, feemɔ miishɛɛ kɛ hegbɛ kpele ni oooná akɛ oooye obua amɛ ni amɛgbala Daniel gbalɛi ni lɛ diɛŋtsɛ lɛ enuuu shishi lɛ amlibaa lɛ mli amɛtsɔɔ Daniel lɛ he mfoniri yɛ ojwɛŋmɔ mli okwɛ!—Dan. 12:8, 9.
15 Eyɛ mli akɛ wɔbaatsɔɔ mɛi ni atee amɛ shi lɛ nibii pii moŋ, shi wɔ hu wɔyɛ saji pii ni wɔbaabi amɛ. Amɛbaanyɛ amɛha wɔle Biblia lɛ mli amaniɛbɔi ni awieee he pii lɛ ahe saji fitsofitso. Feemɔ bɔ ni ooona miishɛɛ waa kɛ́ Yesu nyɛkwɛ bi Yohane Baptisilɔ lɛ ha ole nibii ni ba yɛ Yesu shihilɛ mli lɛ fitsofitso lɛ he mfoniri yɛ ojwɛŋmɔ mli! Nibii ni wɔbaakase kɛjɛ Odasefoi anɔkwafoi nɛɛ adɛŋ lɛ baaha wɔnu Nyɔŋmɔ Wiemɔ ni wɔyɔɔ amrɔ nɛɛ shishi fe bɔ ni wɔnuɔ shishi ŋmɛnɛ lɛ. Yehowa tsuji anɔkwafoi ni egboi ní asafo babaoo lɛ mli bii ni baagbo yɛ naagbee gbii nɛɛ amli lɛ fata amɛhe lɛ anine baashɛ “shitee ní hi” nɔ. Amɛje Yehowa sɔɔmɔ shishi yɛ jeŋ ni Satan ná nɔ hewalɛ waa mli. Kwɛmɔ miishɛɛ ni amɛaaná akɛ amɛbaatsa amɛsɔɔmɔ lɛ nɔ yɛ jeŋ hee ni mli shihilɛ hi kwraa fe tsutsu nɔ lɛ mli!—Heb. 11:35; 1 Yoh. 5:19.
16. Te nibii baaya lɛ aha tɛŋŋ yɛ Kojomɔ Gbi lɛ nɔ taakɛ agba afɔ shi lɛ?
16 Yɛ be pɔtɛɛ ko mli yɛ Kojomɔ Gbi lɛ nɔ lɛ abaagbele woji anaa. Akɛ woji nɛɛ kɛ Biblia lɛ baatsu nii ni akɛna mɛi fɛɛ ni baahi wala mli yɛ nakai beaŋ lɛ ateŋ mɛi ni esa akɛ aha amɛ naanɔ wala. (Kanemɔ Kpojiemɔ 20:12, 13.) Be ni Kojomɔ Gbi lɛ aaaba naagbee lɛ, no mli lɛ mɔ fɛɛ mɔ ená bei bɔ ni sa ni ekɛaatsɔɔ mɔ sɛɛ ni efiɔ yɛ sane ni kɔɔ mɔ ni sa akɛ eyeɔ jeŋ muu lɛ fɛɛ nɔ lɛ he lɛ. Ani eeeba ehe shi eha Nyɔŋmɔ Maŋtsɛyeli lɛ ni eŋmɛ Toobi lɛ gbɛ ni etsɔɔ lɛ gbɛ kɛya “wala nubui ahe”? Aloo ebaŋ ehe shi ehaŋ Nyɔŋmɔ Maŋtsɛyeli lɛ? (Kpoj. 7:17; Yes. 65:20) Yɛ nakai beaŋ lɛ mɛi fɛɛ baaye emuu ni nibii fɔji ni baanyɛ aná amɛnɔ hewalɛ fɔŋ ehiŋ shi, ni no hewɔ lɛ mɔ fɛɛ mɔ ni yɔɔ shikpɔŋ lɛ nɔ lɛ baakpɛ yiŋ eha ehe. Mɔ ko mɔ ko nyɛŋ awie eshi naagbee kojomɔ ni Yehowa kɛ aaaha lɛ. Efɔŋfeelɔi lɛ pɛ hiɛ abaakpata kɛya naanɔ.—Kpoj. 20:14, 15.
17, 18. Mɛni hewɔ Kristofoi ni afɔ amɛ mu lɛ kɛ tooi krokomɛi lɛ kɛ miishɛɛ kpaa Kojomɔ Gbi lɛ gbɛ lɛ?
17 Kristofoi ni afɔ amɛ mu lɛ kɛ miishɛɛ miikpa be ni amɛbaaye nɔ yɛ Kojomɔ Gbi lɛ nɔ lɛ gbɛ, ejaakɛ abu amɛ akɛ mɛi ni sa akɛ amɛŋɔɔ Maŋtsɛyeli ko. Eji hegbɛ kpele diɛŋtsɛ kɛha amɛ! Gbɛkpamɔ nɛɛ tsirɛɔ amɛ ni amɛkɛ Petro ŋaawoo ni ekɛha amɛnyɛmimɛi ni hi shi yɛ klɛŋklɛŋ afii 100 lɛ mli lɛ tsuɔ nii. Ekɛɛ akɛ: “Nyɛbɔa mɔdɛŋ ni nyɛwajea nyɛtsɛmɔ kɛ halamɔ lɛ; ejaakɛ, kɛ nyɛfee enɛ lɛ, nyɛtɛrɛŋ gbi ko gbi ko. Ejaakɛ nakai ni aaaŋmɛ nyɛ wɔ-Nuŋtsɔ kɛ yiwalaherelɔ Yesu Kristo naanɔ maŋtsɛyeli lɛ mli gbɛ aaahu.”—2 Pet. 1:10, 11.
18 Tooi krokomɛi lɛ hu náa miishɛɛ akɛ amɛnyɛmimɛi ni afɔ amɛ mu lɛ anine baashɛ nyɔmɔwoo ni tamɔ nakai nɔ. Amɛtswa amɛfai shi akɛ amɛbaaye amɛbua amɛ. Akɛni Nyɔŋmɔ buɔ amɛ akɛ amɛji eshieŋtsɛmɛi ŋmɛnɛ hewɔ lɛ, amɛtswa amɛfai shi akɛ amɛbaafee bɔ fɛɛ bɔ ni amɛaanyɛ yɛ Nyɔŋmɔ sɔɔmɔ nitsumɔ lɛ mli. Yɛ Kojomɔ Gbi lɛ nɔ lɛ, amɛbaajɛ amɛtsui mli tɔɔ ni amɛkɛ miishɛɛ afi Nyɔŋmɔ gbɛjianɔtoi lɛ asɛɛ beni Yesu tsɔɔ amɛ gbɛ kɛyaa wala nubui ahe lɛ. No sɛɛ yɛ naagbee kwraa lɛ, abaabu amɛ akɛ amɛsa mɛi ni esa akɛ atsɛɔ amɛ Yehowa tsuji yɛ shikpɔŋ lɛ nɔ kɛya naanɔi anaanɔ!—Rom. 8:20, 21; Kpoj. 21:1-7.
Ani Okaiɔ?
• Mɛni ji Yesu nibii lɛ?
• Mɛɛ gbɛ nɔ asafo babaoo lɛ mli bii lɛ yeɔ amɛbuaa amɛnyɛmimɛi ni afɔ amɛ mu lɛ?
• Mɛɛ hegbɛi asafo babaoo lɛ mli bii lɛ ená, ni mɛni ji amɛhiɛnɔkamɔ?
• Mɛni ji osusumɔ yɛ Kojomɔ Gbi lɛ he?
[Nikasemɔ lɛ he Sanebimɔi]
[Mfoniri ni yɔɔ baafa 25]
Asafo babaoo lɛ efɔ́ amɛtadei lɛ ahe ni amɛha eyɛ futaa yɛ Toobi lɛ lá lɛ mli
[Mfoniri ni yɔɔ baafa 27]
Mɛni ji nɔ ni okpaa gbɛ akɛ obaakase kɛjɛ anɔkwafoi ni abaatee amɛ shi lɛ adɛŋ?