Abu Amɛ Akɛ Mɛi Ni Sa Akɛ Amɛŋɔɔ Maŋtsɛyeli Ko
Abu Amɛ Akɛ Mɛi Ni Sa Akɛ Amɛŋɔɔ Maŋtsɛyeli Ko
‘Nii ni ji Nyɔŋmɔ kojomɔ ni ja gbɛ lɛ he okadi ni anaa faŋŋ, koni abu nyɛ akɛ nyɛsa Nyɔŋmɔ maŋtsɛyeli lɛ.’—2 TES. 1:5.
1, 2. Mɛni Nyɔŋmɔ eto eyiŋ akɛ ebaafee, ni namɔ ekɛbaatsu he nii?
AAAFEE afi 50 Ŋ.B. lɛ no mli lɛ bɔfo Paulo yɛ Ateene. Akɛni wɔŋjamɔ ehe shi waa yɛ jɛmɛ hewɔ lɛ ehao waa ni enɛ tsirɛ lɛ ni eha wiemɔ ko mi mɔɔ shi waa ni ekɛye amɛ odase. Ekolɛ wiemɔ ni ekɛmu wiemɔ ni eha lɛ naa lɛ mɔ wɔŋjalɔi ni eshiɛ etsɔɔ amɛ lɛ tsui waa. Ekɛɛ akɛ: ‘Agbɛnɛ lɛ Nyɔŋmɔ miiwo gbɔmɛi fɛɛ ní yɔɔ he fɛɛ he lɛ kita akɛ amɛtsake amɛtsui, ejaakɛ eto gbi ko, no nɔ ni ebaatsɔ nuu ni eto lɛ nɔ ekojo jeŋ muu lɛ fɛɛ yɛ jalɛ naa; ni ekɛ shi ni etee lɛ kɛjɛ gbohii ateŋ lɛ maa enɛ nɔ mi ehaa mɔ fɛɛ mɔ.’—Bɔf. 17:30, 31, Ga Biblia hee lɛ.
2 Esa akɛ wɔkɛ hiɛdɔɔ asusu anɔkwale ni eji akɛ Nyɔŋmɔ eto gbi ko ni ekɛbaakojo adesai lɛ he! Wɔle akɛ mɔ ni baatsu kojomɔ nɛɛ he nii ní Paulo etsiii egbɛi atã beni ekɛ Ateenebii lɛ wieɔ lɛ ji Yesu Kristo ni atee lɛ shi lɛ. Kojomɔ ni Yesu baakojo lɛ baatsɔɔ wala loo gbele kɛha mɛi.
3. Mɛni hewɔ Yehowa kɛ Abraham fee kpaŋmɔ lɛ, ni namɔ baana gbɛfaŋnɔ krɛdɛɛ yɛ ehe nitsumɔ mli?
3 Nakai Kojomɔ Gbi lɛ baahe afii 1,000. Ákɛ Nyɔŋmɔ Maŋtsɛyeli lɛ nɔ Maŋtsɛ lɛ Yesu baadamɔ Yehowa najiaŋ ni ekojo, ni mɛi krokomɛi baafata ehe kɛkojo. Yehowa miihala mɛi kɛmiijɛ adesai ateŋ koni amɛfata Yesu he kɛye nɔ, ni amɛkojo yɛ nakai gbi ni damɔ shi kɛha afii akpe lɛ mli. (Kwɛmɔ Luka 22:29, 30 lɛ.) Yehowa to gbɛjianɔ kɛha nakai Kojomɔ Gbi lɛ beni ekɛ etsulɔ anɔkwafo Abraham fee kpaŋmɔ nɔ ni miihe ashɛ afii 4,000 nɛ lɛ. (Kanemɔ 1 Mose 22:17, 18.) Eeenyɛ efee akɛ nakai kpaŋmɔ lɛ bɔi nitsumɔ yɛ afi 1943 D.Ŋ.B. Yɛ anɔkwale mli lɛ, no mli lɛ Abraham nuuu bɔ ni kpaŋmɔ lɛ baakɔ adesai ahe eha lɛ shishi fitsofitso. Shi ŋmɛnɛ lɛ wɔbaanyɛ wɔna akɛ yɛ bɔ ni ato kpaŋmɔ lɛ he gbɛjianɔ aha lɛ naa lɛ, Abraham seshi lɛ baaná gbɛfaŋnɔ krɛdɛɛ yɛ Nyɔŋmɔ yiŋ ni eto akɛ ebaakojo adesai lɛ mli.
4, 5. (a) Namɔ tuuntu ji Abraham seshi lɛ, ni mɛni ewie yɛ Maŋtsɛyeli lɛ he? (b) Mɛɛ be hegbɛ naa gbele kɛha mɛi ni baaná Maŋtsɛyeli lɛ mli gbɛfaŋnɔ lɛ?
4 Yɛ afi 29 Ŋ.B. beni akɛ mumɔ krɔŋkrɔŋ lɛ fɔ Yesu mu ní ebatsɔ Mesia loo Kristo ni awo shi yɛ ehe lɛ, ebafee faŋŋ akɛ lɛ ji mɔ tuuntu ni ji Abraham seshi lɛ. (Gal. 3:16) No sɛɛ lɛ, Yesu kɛ afii etɛ kɛ fã tsu nii ni ekɛshiɛ Maŋtsɛyeli lɛ he sanekpakpa lɛ etsɔɔ Yudafoi lɛ yɛ Israel. Beni amɔ Yohane Baptisilɔ lɛ sɛɛ lɛ Yesu tsɔɔ akɛ mɛi komɛi baanyɛ aná Maŋtsɛyeli lɛ mli gbɛ, ekɛɛ akɛ: “Kɛjɛ Yohane, baptisilɔ lɛ, yinɔ kɛba nɛɛ, hewalɛ naa aŋɔɔ ŋwɛi maŋtsɛyeli lɛ, ni hewalɔi gbalaa lɛ hewalɛ naa.”—Mat. 11:12.
5 Nɔ ni sa kadimɔ waa ji akɛ dani Yesu aaawie mɛi ni ‘ŋɔɔ’ ŋwɛi Maŋtsɛyeli lɛ he lɛ, ekɛɛ akɛ: “Lɛɛlɛŋ, miikɛɛ nyɛ akɛ: Mɛi ni yei fɔ́ amɛ lɛ ateŋ mɔ ko eteko shi ni fe Yohane, baptisilɔ lɛ; tsɛbelɛ mɔ ni ji bibioo kwraa yɛ ŋwɛi maŋtsɛyeli lɛ mli lɛ fe lɛ.” (Mat. 11:11) Mɛni hewɔ ewie nakai? Ejaakɛ akɛ hegbɛ ni haa anɔkwafoi komɛi batsɔmɔɔ Maŋtsɛyeli lɛ mli bii lɛ bɔiii nitsumɔ kɛyashi afɔse mumɔŋ krɔŋkrɔŋ lɛ ashwie shi yɛ afi 33 Ŋ.B. Pentekoste gbi lɛ nɔ. Beni shɛɔ nakai be lɛ, no mli lɛ Yohane Baptisilɔ lɛ egbo momo.—Bɔf. 2:1-4.
Abu Abraham Seshi lɛ Bem akɛ Jalɔ
6, 7. (a) Mɛɛ shishinumɔ naa Abraham seshi lɛ baafá “tamɔ ŋwɛi ŋulamii”? (b) Mɛɛ jɔɔmɔ Abraham ná, ni mɛɛ jɔɔmɔ ní tamɔ enɔ lɛ eseshi lɛ náa?
6 Akɛɛ Abraham akɛ eseshi lɛ baafá “tamɔ ŋwɛi ŋulamii” kɛ ŋshɔ naa shia. (1 Mose 13:16; 22:17) Enɛ tsɔɔ akɛ adesai ni hi shi yɛ Abraham beaŋ lɛ nyɛŋ ale mɛi ayibɔ ni baafee eseshi lɛ. Shi sɛɛ mli lɛ aha ale mɛi ayibɔ pɔtɛɛ ni baafee eseshi lɛ. Eseshi lɛ ji Yesu kɛ mɛi 144,000 lɛ.—Kpoj. 7:4; 14:1.
7 Nyɔŋmɔ Wiemɔ lɛ wie hemɔkɛyeli ni Abraham yɔɔ lɛ he akɛ: “[Abraham he] Yehowa eye, ni ebu enɛ jalɛ eha lɛ.” (1 Mose 15:5, 6) Eji anɔkwale akɛ gbɔmɔ ko bɛ ni ja kɛmɔ shi. (Yak. 3:2) Enɛ fɛɛ sɛɛ lɛ, akɛni Abraham hemɔkɛyeli lɛ mli wa waa hewɔ lɛ Yehowa kɛ lɛ ye ookɛɛ jalɔ ji lɛ, ni etsɛ lɛ akɛ eshieŋtsɛ po. (Yes. 41:8) Abu Yesu kɛ mɛi krokomɛi ni fata ehe kɛfeɔ Abraham mfonirifeemɔŋ seshi lɛ bem akɛ jalɔi, ni enɛ haa amɛnáa jɔɔmɔ ni fe nɔ ni Abraham nine shɛ nɔ lɛ kwraa.
8. Mɛɛ jɔɔmɔi Abraham seshi lɛ mli bii lɛ náa?
8 Abuɔ Kristofoi ni afɔ amɛ mu lɛ bem akɛ jalɔi ejaakɛ amɛyɛ hemɔkɛyeli yɛ Yesu kpɔmɔ afɔleshaa lɛ mli. (Rom. 3:24, 28) Yɛ Yehowa hiɛ lɛ, abu amɛ bem kɛjɛ esha mli ni no hewɔ lɛ abaanyɛ akɛ mumɔ krɔŋkrɔŋ lɛ afɔ amɛ mu koni amɛbatsɔmɔ Nyɔŋmɔ mumɔŋ bii, ni tsɔɔ akɛ amɛji Yesu Kristo nyɛmimɛi. (Yoh. 1:12, 13) Amɛ akɛfee kpaŋmɔ hee lɛ, ni amɛji maŋ hee ni ji “Nyɔŋmɔ Israel lɛ” mli bii. (Gal. 6:16; Luka 22:20) Enɛɛmɛi fɛɛ ji hegbɛ kpele diɛŋtsɛ! Nɔ ni Nyɔŋmɔ efee eha amɛ nɛɛ hewɔ lɛ, jeee amɛhiɛnɔkamɔ ji akɛ amɛbaahi shi yɛ shikpɔŋ lɛ nɔ kɛya naanɔ. Amɛŋmɛɛɔ shihilɛ yɛ shikpɔŋ lɛ nɔ kɛmiiya naanɔ lɛ he hiɛnɔkamɔ lɛ he koni amɛkɛ Yesu afee ekomɛ kɛye maŋtsɛ yɛ ŋwɛi yɛ Kojomɔ Gbi lɛ nɔ, hegbɛ ni baaha amɛná miishɛɛ ní anyɛɛɛ atsɔɔ mli lɛ.—Kanemɔ Romabii 8:17.
9, 10. (a) Mɛɛ be akɛ mumɔ krɔŋkrɔŋ lɛ fɔ Kristofoi amu klɛŋklɛŋ kwraa, ni mɛni esa akɛ amɛtsɔmɔ mli koni amɛnine ashɛ wala akekre lɛ nɔ? (b) Mɛɛ yelikɛbuamɔ akɛhaa Kristofoi ni afɔ amɛ mu lɛ?
9 Yɛ afi 33 Ŋ.B. Pentekoste gbi lɛ nɔ lɛ, aha adesai anɔkwafoi akuu ko hegbɛ koni amɛfata mɛi ni kɛ Yesu baaye maŋtsɛ yɛ Kojomɔ Gbi lɛ nɔ lɛ he. Akɛ mumɔ krɔŋkrɔŋ lɛ baptisi Yesu kaselɔi aaafee 120 ni amɛbatsɔmɔ klɛŋklɛŋ Kristofoi ni afɔ amɛ mu. Shi enɛ ji nifeemɔi ni baaha amɛná naanɔ wala yɛ ŋwɛi lɛ shishijee nɔ̃. Kɛjɛ no sɛɛ kɛyaa lɛ, esa akɛ amɛye Yehowa anɔkwa yɛ kaai fɛɛ ni Satan kɛaaba amɛ nɔ lɛ mli. Ja amɛye anɔkwa kɛtee gbele mli dani amɛnine baashɛ ŋwɛi wala akekre lɛ nɔ.—Kpoj. 2:10.
10 Enɛ hewɔ lɛ, Yehowa tsɔɔ e-Wiemɔ lɛ kɛ Kristofoi asafo lɛ nɔ ewoɔ Kristofoi ni afɔ amɛ mu lɛ ŋaa kɛ hewalɛ ní esa akɛ amɛná lɛ. Akɛ nɔkwɛmɔnɔ lɛ, bɔfo Paulo ŋma kɛyaha Kristofoi ni afɔ amɛ mu ni hi Tesalonika lɛ akɛ: “Wɔwieɔ wɔtsɔɔ nyɛteŋ mɔ fɛɛ mɔ tamɔ bɔ ni tsɛ ko wieɔ tsɔɔ ebii, ni wɔshɛjeɔ nyɛmii hu ni wɔma nɔ mi wɔha nyɛ akɛ nyɛnyiɛ bɔ ni sa Nyɔŋmɔ ni tsɛ́ nyɛ kɛba lɛ diɛŋtsɛ emaŋtsɛyeli kɛ enunyam lɛ mli lɛ hiɛ lɛ.”—1 Tes. 2:11, 12.
11. Mɛni Yehowa ha aŋma aha “Nyɔŋmɔ Israel lɛ” mli bii lɛ?
11 Beni ahala mɛi klɛŋklɛŋ ni ji Kristofoi ni afɔ amɛ lɛ sɛɛ lɛ, Yehowa ha aŋma Yesu shikpɔŋ nɔ sɔɔmɔ nitsumɔ lɛ kɛ bɔ ni E-kɛ klɛŋklɛŋ afii 100 lɛ mli Kristofoi ni afɔ amɛ mu lɛ ye eha kɛ ŋaa ni ewo amɛ lɛ he saji afɔ shi, ni enɛ hé fe afii 60. No hewɔ lɛ, Yehowa kɛ Kristofoi a-Hela Ŋmalɛi ni ajɛ mumɔŋ aŋma lɛ fata Ŋmalɛ ni yɔɔ momo ni ji Hebri Ŋmalɛi ni ajɛ mumɔŋ aŋma lɛ he. Aŋma Hebri Ŋmalɛi lɛ aha heloonaa Israelbii ní no mli lɛ amɛkɛ Nyɔŋmɔ yɛ wekukpãa krɛdɛɛ lɛ. Mɛi tuuntu hewɔ ni aŋma Kristofoi a-Hela Ŋmalɛi lɛ ji “Nyɔŋmɔ Israel lɛ” ni ji mɛi ni afɔ amɛ mu akɛ Kristo nyɛmimɛi lɛ ni amɛji Nyɔŋmɔ mumɔŋ bii lɛ. Enɛ etsɔɔɔ kwraa akɛ mɛi ni jeee Israelbii lɛ naŋ he sɛɛ kɛ́ amɛkase Hebri Ŋmalɛi lɛ. Nakai nɔŋŋ Kristofoi ni akɛ mumɔ krɔŋkrɔŋ lɛ efɔko amɛ mu lɛ náa he sɛɛ waa kɛ́ amɛkase Kristofoi a-Hela Ŋmalɛi lɛ, ní amɛkɛ emli ŋaawoo lɛ tsu nii yɛ amɛshihilɛ mli.—Kanemɔ 2 Timoteo 3:15-17.
12. Mɛɛ kaimɔ Paulo kɛha Kristofoi ni afɔ amɛ mu lɛ?
12 Abu klɛŋklɛŋ afii 100 lɛ mli Kristofoi lɛ bem akɛ jalɔi, ni akɛ mumɔ krɔŋkrɔŋ lɛ fɔ amɛ mu koni amɛnyɛ amɛŋɔ amɛŋwɛi gboshinii lɛ. Mu ni afɔ amɛ lɛ haaa amɛtsɔmɔ maŋtsɛmɛi yɛ amɛnanemɛi Kristofoi ni afɔ amɛ mu lɛ anɔ yɛ shikpɔŋ lɛ nɔ. Eeenyɛ efee akɛ mra be mli Kristofoi lɛ ateŋ mɛi komɛi ku amɛhiɛ amɛfɔ anɔkwa sane nɛɛ nɔ, ni amɛbɔi hiɛnyam taomɔ yɛ gbɛ ni esaaa nɔ yɛ amɛnyɛmimɛi ni yɔɔ asafo lɛ mli lɛ ateŋ. Enɛ tsirɛ Paulo ni ewie akɛ: “Nyɛtɔrɔ momo, nyɛná nii momo, nyɛ shi wɔ sɛɛ nyɛmiiye maŋtsɛ; ni miná ni kulɛ nyɛmiiye maŋtsɛ lɛɛlɛŋ, koni wɔ hu wɔkɛ nyɛ aye!” (1 Kor. 4:8) No hewɔ lɛ, Paulo kai mɛi ni afɔ amɛ mu ni ekɛ amɛ hi shi yɛ be kome mli lɛ akɛ: “Jeee akɛ nyɛhemɔkɛyeli lɛ nyɔŋ wɔyeɔ, . . . shi moŋ wɔfata nyɛhe kɛmiitsu nii kɛha nyɛmiishɛɛnamɔ.”—2 Kor. 1:24, Ga Biblia hee lɛ.
Mɛi Ayibɔ ni Awo Shi yɛ He lɛ Namɔ
13. Te mɛi ni afɔ amɛ mu lɛ ahalamɔ lɛ tee nɔ eha tɛŋŋ yɛ afi 33 Ŋ.B. lɛ sɛɛ?
13 Ahalaaa Kristofoi ni afɔ amɛ mu ni amɛyibɔ ji 144,000 lɛ fɛɛ yɛ klɛŋklɛŋ afii 100 lɛ mli. Amɛhalamɔ lɛ tee nɔ beni Yesu bɔfoi lɛ yɔɔ wala mli lɛ, ni no sɛɛ afii lɛ amli lɛ ahala mɛi fioo ko. Shi amɛhalamɔ lɛ tee nɔ yɛ afii ohai ni nyiɛ sɛɛ lɛ amli aahu kɛbashi wɔbei nɛɛ amli. (Mat. 28:20) Naagbee lɛ Yesu bɔi nɔyeli yɛ afi 1914, ni nibii tee lɛ oyayaayai.
14, 15. Mɛni etee nɔ yɛ wɔbei nɛɛ amli ni kɔɔ mɛi ni afɔ amɛ mu lɛ ahalamɔ lɛ he?
14 Nɔ ni Yesu fee klɛŋklɛŋ ji, ejie mɛi fɛɛ ní teɔ shi woɔ Nyɔŋmɔ nɔyeli lɛ kɛjɛ ŋwɛi. (Kanemɔ Kpojiemɔ 12:10, 12.) No sɛɛ lɛ, egbala ejwɛŋmɔ kɛtee mɛi ni eshwɛ ni baanyɛ abafata ehe kɛye nɔ akɛ Maŋtsɛ lɛ anaabuamɔ lɛ nɔ koni mɛi 144,000 lɛ ayibɔ lɛ ashɛ. Beni shɛɔ afi 1930 afii lɛ teŋgbɛ lɛ, efee tamɔ nɔ ni amɛhalamɔ lɛ miihe aba naagbee ejaakɛ mɛi ni kpɛlɛ shiɛmɔ ni ashiɛ yɛ nakai beaŋ lɛ nɔ lɛ ateŋ mɛi pii bɛ ŋwɛi hiɛnɔkamɔ lɛ. Mumɔ lɛ kɛ amɛ yeee odase akɛ Nyɔŋmɔ bii ji amɛ. (Kwɛmɔ Romabii 8:16 lɛ.) Yɛ no najiaŋ lɛ, amɛna amɛhe akɛ amɛji “tooi krokomɛi” ni yɔɔ hiɛnɔkamɔ akɛ amɛbaahi shi yɛ paradeiso yɛ shikpɔŋ lɛ nɔ kɛya naanɔ lɛ mli bii. (Yoh. 10:16) No hewɔ lɛ, yɛ afi 1935 lɛ sɛɛ lɛ, yiŋtoo titri hewɔ ni atsu shiɛmɔ nitsumɔ lɛ ji ni akɛbua “asafo babaoo” lɛ ni Yohane na yɛ ninaa mli ni baafo “amanehulu kpeteŋkpele lɛ” anaa.—Kpoj. 7:9, 10, 14.
15 Fɛɛ sɛɛ lɛ, kɛjɛ afi 1930 afii lɛ amli kɛbaa lɛ aŋkroaŋkroi fioo komɛi ená ŋwɛiyaa he hiɛnɔkamɔ lɛ eko. Mɛni hewɔ? Bei komɛi lɛ eeenyɛ efee ákɛ akɛ amɛ miiye mɛi ni no mli amɛyɛ ŋwɛiyaa he hiɛnɔkamɔ lɛ eko shi amɛyayeee anɔkwa lɛ anajiaŋ. (Kwɛmɔ Kpojiemɔ 3:16 lɛ.) Paulo wie akɛ mɛi komɛi ni ji enanemɛi lɛ shi anɔkwale lɛ. (Filip. 3:17-19) Namɛi Yehowa halaa kɛyeɔ mɛi nɛɛ anajiaŋ? Ŋwanejee ko bɛ he akɛ, Nyɔŋmɔ ji mɔ ni baahala mɛi ni ekɛbaaye amɛnajiaŋ. Shi fɛɛ sɛɛ lɛ, etamɔ nɔ ni shishinumɔ yɛ he akɛ ehalaŋ mɛi ni tsɔmɔ Kristofoi etsɛko, shi moŋ ebaahala aŋkroaŋkro ni etsɔɔ akɛ amɛji anɔkwafoi yɛ gbɛ ko nɔ taakɛ kaselɔi ni Yesu kɛwie beni eto egbele lɛ Kaimɔ lɛ shishi lɛ ji lɛ kɛye amɛnajiaŋ. *—Luka 22:28.
16. Mɛɛ anɔkwa sane ni kɔɔ mɛi ni afɔ amɛ mu lɛ he lɛ wɔhiɛ sɔɔ, ni mɛni wɔbaanyɛ wɔkɛ hekɛnɔfɔɔ ahe aye?
16 Shi etamɔ nɔ ni jeee mɛi fɛɛ ní náa ŋwɛi tsɛmɔ lɛ eko kɛjɛ afi 1930 afii lɛ amli kɛbaa nɛɛ ji mɛi ni akɛ amɛ miiye mɛi ni eyayeee anɔkwa lɛ anajiaŋ. Yehowa ema nɔ mi eha wɔ akɛ mɛi ni afɔ amɛ mu lɛ ateŋ mɛi komɛi kɛwɔ baahi shi yɛ nibii agbɛjianɔtoo nɛɛ anaagbee gbii lɛ amli kɛyashi abaakpata “Babilon kpeteŋkpele lɛ” hiɛ. * (Kpoj. 17:5) Ni wɔbaanyɛ wɔná hekɛnɔfɔɔ akɛ mɛi 144,000 lɛ anaabuamɔ lɛ baaba naagbee yɛ be ni Yehowa eto lɛ mli, ni ákɛ amɛ fɛɛ amɛnine baashɛ Maŋtsɛyeli lɛ nɔ. Wɔbaanyɛ wɔhe gbalɛ wiemɔi ákɛ asafo babaoo lɛ ni amɛyi miifá daa lɛ baayanɔ aye anɔkwa akɛ kuu lɛ hu wɔye. Etsɛŋ ni ‘amɛaajɛ amanehulu kpeteŋkpele lɛ’ ni akɛbaaba Satan je lɛ nɔ lɛ mli, ni amɛkɛ miishɛɛ baabote Nyɔŋmɔ jeŋ hee lɛ mli.
Nyɔŋmɔ Ŋwɛi Nɔyeli lɛ Mli Bii lɛ Ayikulɛ lɛ Eshɛ Eta!
17. Taakɛ 1 Tesalonikabii 4:15-17 kɛ Kpojiemɔ 6:9-11 tsɔɔ lɛ, mɛni Kristofoi ni afɔ amɛ mu ni ye anɔkwa kɛtee gbele mli lɛ anine eshɛ nɔ?
17 Kɛjɛ afi 33 Ŋ.B. kɛbaa nɛɛ Kristofoi ni afɔ amɛ mu lɛ akpei nyɔŋmai abɔ etsɔɔ akɛ amɛyɛ hemɔkɛyeli ni mli wa ni amɛye anɔkwa kɛtee gbele mli. Abu mɛnɛɛmɛi momo akɛ mɛi ni sa akɛ amɛŋɔɔ Maŋtsɛyeli lɛ, ni eka shi faŋŋ akɛ amɛnine shɛ amɛŋwɛi nyɔmɔwoo lɛ nɔ yɛ Kristo nɔyeli lɛ shishijee afii lɛ amli.—Kanemɔ 1 Tesalonikabii 4:15-17; Kpojiemɔ 6:9-11.
18. (a) Mɛɛ nɔmimaa mɛi ni afɔ amɛ mu ni eshwɛ yɛ shikpɔŋ lɛ nɔ lɛ yɔɔ? (b) Te tooi krokomɛi lɛ buɔ amɛnyɛmimɛi Kristofoi ni afɔ amɛ mu lɛ amɛhaa tɛŋŋ?
18 Kristofoi ni afɔ amɛ mu ni yɔɔ wala mli lolo yɛ shikpɔŋ lɛ nɔ lɛ yɛ nɔmimaa waa akɛ kɛ́ amɛye anɔkwa kɛyawula shi lɛ etsɛŋ ni amɛnine baashɛ amɛnɔkwayeli lɛ he nyɔmɔwoo lɛ nɔ yɛ ŋwɛi. Kɛ́ tooi krokomɛi akpekpei abɔ ni yɔɔ lɛ jwɛŋ hemɔkɛyeli ni amɛnyɛmimɛi ni afɔ amɛ mu lɛ yɔɔ lɛ nɔ lɛ, ehaa amɛkɛ nɔ ni bɔfo Paulo wie yɛ mɛi ni afɔ amɛ mu ni hi Tesalonika lɛ ahe lɛ kpãa gbee akɛ: “Wɔ diɛŋtsɛ tete wɔshwãa wɔfɔɔ nyɛnɔ yɛ Nyɔŋmɔ asafoi lɛ amli, yɛ nyɛtsuishiŋmɛɛ kɛ nyɛhemɔkɛyeli ni nyɛhiɛ yɛ nyɛyiwalɛi kɛ nyɛmanehului ni nyɛmiaa nyɛhiɛ yɛ mli lɛŋ lɛ ahewɔ, nii ni ji Nyɔŋmɔ kojomɔ ni ja gbɛ lɛ he okadi ni anaa faŋŋ, koni abu nyɛ akɛ nyɛsa Nyɔŋmɔ maŋtsɛyeli ní nyɛnaa hewɔ nɔ̃ lɛ.” (2 Tes. 1:3-5) Gbi ni mɛi ni afɔ amɛ mu lɛ ateŋ naagbee mɔ baashi shikpɔŋ lɛ nɔ kɛ́ egbo lɛ, Nyɔŋmɔ ŋwɛi nɔyeli lɛ mli bii lɛ ayikulɛ lɛ baashɛ. Kwɛ bɔ ni enɛ baaha aná miishɛɛ waa yɛ ŋwɛi kɛ shikpɔŋ lɛ nɔ!
[Shishigbɛ niŋmai]
^ kk. 15 Kwɛmɔ March 1, 1992 Buu-Mɔɔ lɛ baafa 20, kuku 17 lɛ.
^ kk. 16 Kwɛmɔ “Sanebimɔi ni Jɛ Kanelɔi Adɛŋ” ni yɔɔ May 1, 2007 Buu-Mɔɔ lɛ mli lɛ.
Ani Obaanyɛ Otsɔɔ Mli?
• Mɛni Nyɔŋmɔ ha Abraham le ni kɔɔ Kojomɔ Gbi lɛ he?
• Mɛni hewɔ abu Abraham bem akɛ jalɔ?
• Mɛni bem ni abuɔ Abraham seshi lɛ mli bii lɛ akɛ jalɔi lɛ baaha amɛná?
• Mɛɛ nɔmimaa Kristofoi fɛɛ yɔɔ?
[Nikasemɔ lɛ he Sanebimɔi]
[Mfoniri ni yɔɔ baafa 20]
Yesu wo esɛɛnyiɛlɔi lɛ ahewalɛ akɛ amɛkɛ ekãa aŋɔ Maŋtsɛyeli lɛ
[Mfoniri ni yɔɔ baafa 21]
Yehowa bɔi mɛi ni fata Abraham seshi lɛ he lɛ ahalamɔ kɛjɛ Pentekoste gbi lɛ nɔ yɛ afi 33 Ŋ.B.
[Mfonirii ni yɔɔ baafa 23]
Tooi krokomɛi lɛ ahiɛ sɔɔ akɛ Kristofoi ni afɔ amɛ mu lɛ kɛ amɛyɛ yɛ naagbee gbii nɛɛ amli