Buu-Mɔɔ ní Abaakase Lɛ

WOLO tɛtrɛɛ ni ohiɛ nɛɛ ji Buu-Mɔɔ ni abaakase lɛ klɛŋklɛŋ nɔ̃. Wɔmiisumɔ ni wɔha ole wolo tɛtrɛɛ nɛɛ he nibii heei komɛi.

Afee Buu-Mɔɔ ni abaakase nɛɛ aha Yehowa Odasefoi kɛ Biblia mli nikaselɔi ni miiya amɛhiɛ. Abaafee ekome daa nyɔɔŋ nɔ, ni ebaahiɛ saji srɔtoi ejwɛ loo enumɔ ní abaakase. Akɛ be ni akɛbaakase saji nɛɛ ewo wolo tɛtrɛɛ nɛɛ hiɛ. Akɛni akɛ Buu-Mɔɔ ni abaakase lɛ haŋ yɛ shiɛmɔ nitsumɔ lɛ mli taakɛ akɛ maŋbii anɔ̃ lɛ baaha lɛ hewɔ lɛ, mfoniri kometoo lɛ nɔŋŋ baahi eko fɛɛ eko hiɛ.

Kɛ́ okwɛ wolo nɛɛ baafã 2 lɛ, obaana akɛ atsɔɔ yiŋtoo hewɔ ni aŋma saji ni abaakase yɛ asafoŋ kpeei ashishi lɛ eko fɛɛ eko mli kuku, ni atsɔɔ nɔ hewɔ ni aŋma saji srɔtoi ni tsara nɔ ni wieɔ saneyitso kome he lɛ, ni agbɛnɛ hu atsɔɔ saji krokomɛi ni akɛwo wolo tɛtrɛɛ lɛ mli lɛ. Enɛ baaye abua Buu-Mɔɔ Nikasemɔ nɔkwɛlɔi lɛ be mli ni amɛsaa amɛhe kɛha saji ni abaakase lɛ bɔni afee ni aná he sɛɛ.

Obaakadi akɛ nibii ni abaakase lɛ asɛɛ kɛlɛɛɛ tsɔ tamɔ tsutsu lɛ. Enɛ hewɔ lɛ abaaná be ni fa koni akɛkane ŋmalɛi ni he hiaa waa lɛ beni akaseɔ Buu-Mɔɔ lɛ. Wɔmiiwo bo hewalɛ ni daa otsi lɛ okane ŋmalɛi ni aŋmalako amɛmli wiemɔi lɛ fɛɛ. Akadi ŋmalɛi komɛi ni atsɛ́ yisɛɛ shi aŋmalako amɛmli wiemɔ lɛ akɛ “kanemɔ.” Esa akɛ akane nakai ŋmalɛi lɛ ni asusu he yɛ Buu-Mɔɔ Nikasemɔ lɛ shishi. Abaanyɛ akane ŋmalɛi krokomɛi bɔ ni be baaŋmɛ gbɛ. Obaana akɛ akadi ŋmalɛi komɛi akɛ “kwɛmɔ.” Akɛni ŋmalɛi nɛɛ kɔɔɔ oti ni yɔɔ kuku lɛ mli lɛ he tɛɛ hewɔ lɛ, bei pii lɛ akaneŋ nomɛi yɛ asafoŋ kpeei ashishi. Fɛɛ sɛɛ lɛ, saji komɛi yɛ ŋmalɛi ni akadi akɛ “kwɛmɔ” lɛ amli ni amɛkɛ sane ni asusuɔ he lɛ yɛ tsakpaa ko loo ákɛ amɛmaa oti ni asusuɔ he lɛ nɔ mi yɛ gbɛ ko nɔ. Wɔmiiwo bo hewalɛ ni okane ŋmalɛi nɛɛ beni osaa ohe kɛha Buu-Mɔɔ Nikasemɔ lɛ. Ekolɛ obaanyɛ okɛtsu nii yɛ osane hetoohamɔ mli.

Akɛ wɔshiɛmɔ nitsumɔ lɛ he akɔntaabuu ni jeɔ kpo daa afi lɛ woŋ Buu-Mɔɔ lɛ mli dɔŋŋ. Kɛjɛ afi 2008 kɛmiiya lɛ, akɛbaawo Wɔ Maŋtsɛyeli Sɔɔmɔ lɛ kɛ agbɛnɛ hu Yearbook lɛ mli. Taakɛ awie he kɛtsɔ hiɛ lɛ, akɛ saji krokomɛi baawo Buu-Mɔɔ ni abaakase lɛ mli. Tsɛ akaseŋ yɛ asafoŋ kpeei ashishi moŋ, shi aawo bo hewalɛ ni okase nomɛi hu jogbaŋŋ. Amɛfata mumɔŋ niyenii ni jɛ “tsulɔ anɔkwafo kɛ nilelɔ” lɛ ŋɔɔ lɛ ahe.—Mat. 24:45-47.

Enaamuu ji akɛ, Buu-Mɔɔ ni abaakase lɛ kɛ nɔ ni akɛbaaha maŋbii lɛ fɛɛ lɛ wolo kome ni. Enyɔ lɛ fɛɛ gbɛi ji Buu-Mɔɔ Eetswa Yehowa Maŋtsɛyeli He Adafi. Akɛ sane kometoo lɛ nɔŋŋ baatsɔɔ nɔ hewɔ ni aŋma Buu-Mɔɔ lɛ yɛ nɔ ni abaakase lɛ kɛ nɔ ni akɛbaaha maŋbii lɛ amli yɛ amɛbaafa 2 lɛ mli. Abaafee enyɔ lɛ fɛɛ wolokpo kome daa afi. Abaana enyɔ lɛ fɛɛ mli saji yɛ sane ni yitso ji “Ani Okaiɔ?” ni baaje kpo yɛ nɔ ni abaakase lɛ mli lɛ mli.

Kɛjɛ afi 1879 kɛbaa lɛ Buu-Mɔɔ lɛ etee nɔ ejaje Nyɔŋmɔ Maŋtsɛyeli lɛ he anɔkwalei lɛ faŋŋ yɛ tai, shika he naagbai kɛ yiwaa beaŋ. Wɔyɛ hiɛnɔkamɔ akɛ Yehowa baajɔɔ wɔ koni wɔyanɔ wɔfee nakai yɛ Buu-Mɔɔ he gbɛjianɔtoo hee nɛɛ hu mli. Agbɛnɛ hu wɔyɛ hiɛnɔkamɔ akɛ Yehowa baajɔɔ bo, beni okɛ nɔ ni abaakase lɛ tsuɔ nii jogbaŋŋ lɛ.