Gilead Skul Lɛ Klas Ni Ji 123 Lɛ Naagbee Nifeemɔ

Awo Mɛi Ni Gbe Gilead Skul Lɛ Naa Lɛ Hewalɛ Ni “Amɛbɔi Shitsaa”

YƐ Hɔɔ September 8, 2007 lɛ, mɛi 6,352 ni jɛ maji srɔtoi 41 mli babua amɛhe naa kɛha Buu-Mɔɔ Gilead Biblia Skul lɛ klas ni ji 123 lɛ naagbee nifeemɔ lɛ. Anthony Morris ni eji Nɔyeli Kuu lɛ mlinyo lɛ, ji sɛinɔtalɔ kɛha nifeemɔ lɛ, ni beni atswa leebi ŋmɛlɛ 10:00 lɛ ekpee mɛi ni eba nifeemɔ lɛ shishi lɛ atuu. Ewie kuku, ni no sɛɛ lɛ efɔ̃ klɛŋklɛŋ wielɔ ni ji Gary Breaux ni eji United States Nitsumɔhe Nine lɛ Ajinafoi Akuu lɛ mlinyo lɛ nine.

Nyɛminuu Breaux mã nɔ mi eha skulbii lɛ akɛ mɛi ni feɔ Yehowa suɔmɔnaa nii lɛ ahe yɛ fɛo yɛ Yehowa hiɛ ekɔɔɔ he eko bɔ ni amɛji yɛ kponɔgbɛ. (Yer. 13:11) Ewo mɛi ni gbe skul lɛ naa lɛ hewalɛ ní amɛha amɛhe afee fɛo yɛ nakai gbɛ nɔ daa. No sɛɛ lɛ, Gerrit Lösch ni eji Nɔyeli Kuu lɛ mlinyo lɛ wie kɛ nɔmimaa akɛ eja gbɛ akɛ wɔkpaa nyɔmɔwoo gbɛ yɛ Yehowa sɔɔmɔ mli. (Heb. 11:6) Shi nɔ ni esa akɛ etsirɛɔ wɔ ni wɔsɔmɔ Yehowa ji suɔmɔ ni ŋkomeŋfa su bɛ mli.

Nitsumɔhe ni Kwɛɔ Teokrase Skul Srɔtoi Anɔ lɛ nɔkwɛlɔ ní atsɛɔ lɛ William Samuelson ji mɔ ni tsa nɔ kɛba wie, ni ewo mɛi ni gbe skul lɛ naa lɛ hewalɛ ni amɛya nɔ amɛtsu nitsumɔ ní yɔɔ nyam ní akɛwo amɛdɛŋ akɛ amɛtswa Maŋtsɛ ni miiye nɔ amrɔ nɛɛ he adafi lɛ, ni amɛfee amɛhe mɛi ni sa woo kɛtsɔ amɛjeŋ ni amɛaaba jogbaŋŋ lɛ nɔ. * Nitsumɔhe ni Kwɛɔ Teokrase Skul Srɔtoi Anɔ lɛ nɔkwɛlɔ lɛ sɛɛmɔ ni atsɛɔ lɛ Sam Roberson lɛ wo mɛi ni gbe skul lɛ naa lɛ hewalɛ akɛ, be fɛɛ be lɛ amɛkwɛ sui kpakpai ni mɛi krokomɛi yɔɔ lɛ. No baaha mɛi ni gbe skul lɛ naa nɛɛ anyɛ ‘asumɔ nyɛmimɛi’ lɛ fɛɛ.—1 Pet. 2:17.

Beni aha wiemɔi ni woɔ mɔ hewalɛ nɛɛ agbe naa lɛ, Mark Noumair ni etsɔɔ nii yɛ Gilead skul lɛ bibii mɛi ni gbe skul lɛ naa lɛ ateŋ mɛi komɛi saji ní amɛgba niiashikpamɔi ni amɛná yɛ shiɛmɔ nitsumɔ lɛ mli beni atsɔseɔ amɛ yɛ Gilead skul lɛ. Toibolɔi lɛ yɔse faŋŋ akɛ skulbii nɛɛ yɛ suɔmɔ kɛha sɔɔmɔ nitsumɔ lɛ, ni amɛyɛ shwelɛ akɛ amɛbaaye amɛbua mɛi krokomɛi. Kent Fischer ni etsuɔ nii yɛ Patterson Bethel Ɔfis lɛ bibii Nitsumɔhe Niji Ajinafoi Akuu mli bii ni jɛ maji etɛ ni maŋsɛɛ sanekpakpa shiɛlɔ miisɔmɔ yɛ jɛmɛ lɛ saji. Nyɛmimɛi hii nɛɛ awiemɔ lɛ ha efee faŋŋ kɛha toibolɔi ni mɛi ni gbe Gilead skul lɛ naa lɛ afɔlɔi hu fata he lɛ akɛ akwɛɔ mɛi heei ni sɔmɔɔ akɛ maŋsɛɛ sanekpakpa shiɛlɔi lɛ jogbaŋŋ yɛ hei ni amɛyasɔmɔɔ yɛ lɛ. No sɛɛ lɛ Izak Marais ni etsuɔ nii yɛ Nitsumɔhe ni Yeɔ Kɛbuaa Wiemɔi Ashishitsɔɔlɔi lɛ bibii maŋsɛɛ sanekpakpa shiɛlɔi ni amɛkɛ afii pii esɔmɔ lɛ saji, ni amɛniiashikpamɔi lɛ ha mɛi ni gbe skul lɛ naa kpaako lɛ na nɔ̃ miishɛɛ ní kã amɛhiɛ lɛ.

Geoffrey Jackson ni eji Nɔyeli Kuu lɛ mli nyo lɛ ji mɔ ni ha nifeemɔ lɛ shishi wiemɔ krɛdɛɛ lɛ, ni esaneyitso ji, “Mɛni Nyɛkɛ Nɔ ni Nyɛkase Nɛɛ Fɛɛ Baafee?” Nyɛminuu Jackson ni ekɛ nɔ ni miihe ashɛ afii 25 sɔmɔ akɛ maŋsɛɛ sanekpakpa shiɛlɔ yɛ Pasifik Ŋshɔ lɛ wuoyigbɛ lɛ kɛ amɛ susu wiemɔ ni Yesu kɛ mu e-Gɔŋ nɔ Shiɛmɔ lɛ naa lɛ he. Yesu wie hii enyɔ ni ma tsui ahe ákɛ mɔ kome lɛ nilelɔ ni, ni ákɛ  mɔ kroko lɛ ji kwashia. Nyɛminuu Jackson tsɔɔ mli akɛ eeenyɛ efee akɛ ama tsũi enyɔ lɛ fɛɛ yɛ ekome. Nuu kwashia lɛ tswa etsu lɛ ema shia nɔ, ni etsaaa shi, shi nuu nilelɔ lɛ tsa shi aahu kɛyashi beni eyanina tɛsaa, ni etswa etsu lɛ ema tɛsaa lɛ nɔ. Beni ahum ko ni naa wa waa tswa lɛ, ewule tsu ni atswa ama shia nɔ lɛ, shi nɔ̃ ni ama yɛ tɛsaa lɛ nɔ lɛ wuleee.—Mat. 7:24-27; Luka 6:48.

Yesu tsɔɔ mli akɛ nuu kwashia lɛ tamɔ mɛi ni baboɔ enitsɔɔmɔi lɛ atoi shi amɛkɛ nɔ ni etsɔɔ amɛ lɛ tsuuu nii lɛ. Nuu nilelɔ lɛ tamɔ mɛi ni boɔ Yesu wiemɔi lɛ atoi ní amɛkɛtsuɔ nii yɛ amɛshihilɛ mli lɛ. Nyɛminuu Jackson kɛɛ mɛi ni gbe skul lɛ naa lɛ akɛ: “Kɛ́ nyɛkɛ nibii ni nyɛkase yɛ Biblia lɛ mli lɛ aaatsu nii yɛ nyɛmaŋsɛɛ sanekpakpa shiɛmɔ nitsumɔ lɛ mli lɛ, nyɛbaatsɔmɔ tamɔ nuu nilelɔ lɛ.” No hewɔ lɛ, ewo mɛi ni gbe skul lɛ naa lɛ hewalɛ ni ekɛmu ewiemɔ lɛ naa akɛ “amɛbɔi shitsaa” yɛ amɛmaŋsɛɛ sanekpakpa shiɛmɔ nitsumɔ lɛ mli.

Naagbee lɛ, Nyɛminuu Morris kɛ skulbii lɛ ayijiemɔ woji lɛ ha amɛ, ni etsɔɔ amɛ hei ni amɛbaayasɔmɔ yɛ, ni ewo amɛ ŋaa kɛmu ewiemɔ lɛ naa. Ewo mɛi ni gbe skul lɛ naa lɛ hewalɛ ni amɛkase Yesu ní amɛkɛ amɛhe afɔ̃ Yehowa nɔ daa koni ewaje amɛ. Kɛkɛ ni akɛ Gilead Skul lɛ klas ni ji 123 lɛ naagbee nifeemɔ lɛ ba naagbee.

[Shishigbɛ niŋmaa]

[Akrabatsa ni yɔɔ baafa 31]

KLASBII LƐ AHE SAJI

Maji srɔtoi anɔ ni amɛjɛ kɛba: 10

Maji srɔtoi anɔ ni aha amɛ nitsumɔ yɛ: 24

Amɛyifalɛ: 56

Amɛfii lɛ mlijaa: 33.5

Afii abɔ ni amɛkɛhi anɔkwale lɛ mli lɛ mlijaa: 17.9

Afii abɔ ni amɛkɛhi be-fɛɛ sɔɔmɔ nitsumɔ lɛ mli lɛ mlijaa: 13.8

[Mfoniri ni yɔɔ baafa 32]

Buu-Mɔɔ Gilead Biblia Skul Klasbii ni Ji 123 ní Gbe Nikasemɔ Naa Lɛ

Gbɛii ni yɔɔ shishigbɛ lɛ miitsɔɔ bɔ ni amɛdamɔ shi amɛha lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛkugbɛ kɛyaa ninejurɔgbɛ.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T.(7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.