Kasemɔ Nii Kɛjɛ Israelbii lɛ Atɔmɔi lɛ Amli

BENI Israelbii lɛ tee Shiwoo Shikpɔŋ lɛ nɔ lɛ, no mli lɛ amɛle nɔ ni Yehowa kpaa gbɛ yɛ amɛdɛŋ. Nyɔŋmɔ tsɔ Mose nɔ efã amɛ akɛ: “Nyɛshwiea shikpɔŋ lɛ nɔ bii lɛ fɛɛ kɛjɛa nyɛhiɛ, ni nyɛkpãtaa amɛtɛ mfonirii lɛ fɛɛ hiɛ, ni amɛmagai ní ashwie lɛ hu nyɛkpãtaa fɛɛ hiɛ, ni nyɛfitea amɛhei grɔŋŋi lɛ fɛɛ.”—4 Mose 33:52.

Esaaa akɛ Israelbii lɛ kɛ mɛi ni yɔɔ shikpɔŋ ni amɛyaaŋɔ lɛ nɔ lɛ kpaŋɔ kpaŋmɔ ko, ni asaŋ esaaa akɛ amɛkɛ amɛ yeɔ yoowɛɛ. (5 Mose 7:2, 3) Yɛ anɔkwale mli lɛ, Nyɔŋmɔ bɔ ewebii ni ehala amɛ lɛ kɔkɔ akɛ: “Kwɛ ohe ni ahi, ni okɛ shikpɔŋ nɔ heni oyaa lɛ bii lɛ akakpãŋ ni ebatsɔ tsɔne yɛ oteŋ.” (2 Mose 34:12) Ni kɛlɛ, Israelbii lɛ gbo Nyɔŋmɔ nɔ toi, ni ebatsɔ tsɔne ní du amɛ. Mɛni kɛ amɛshigbeemɔ lɛ ba? Mɛni wɔbaanyɛ wɔkase kɛjɛ nɔ ni amɛfee lɛ kɛ nɔ ni ba amɛnɔ lɛ mli?—1 Kor. 10:11.

Amɛkɛ Amɛ Bɔ, ni No Ha Amɛjá Wɔŋ

Beni Israelbii lɛ ŋɔ Shiwoo Shikpɔŋ lɛ, amɛye shikpɔŋ lɛ nɔ bii lɛ anɔ kunim babaoo yɛ shishijee mli. Shi Israelbii lɛ eyabooo Nyɔŋmɔ famɔi lɛ atoi kɛmɔɔɔ shi. Amɛshwieee amɛhenyɛlɔi lɛ kɛjɛɛɛ shikpɔŋ lɛ nɔ. (Koj. 1:1–2:10) Yɛ no najiaŋ lɛ, beni Israelbii lɛ hi shi yɛ “jeŋmaji kpawo” ni yɔɔ shikpɔŋ lɛ nɔ lɛ ateŋ lɛ, akɛni amɛkɛ amɛ sharaa gbo kɛ gbiɛnaa hewɔ lɛ, amɛkɛ jeŋmaji nɛɛ bɔ. (5 Mose 7:1) Mɛɛ hewalɛ enɛ ná yɛ Israelbii lɛ anɔ? Biblia lɛ kɛɛ akɛ: “Amɛwɛwɛɛ amɛbiyei, amɛkɛ amɛbiyei hu hãhãa amɛbihii agbãla, ni amɛsɔmɔ amɛnyɔŋmɔi lɛ. Ni Israelbii lɛ fee efɔŋ yɛ Yehowa hiɛ, ni amɛhiɛkpa Yehowa, amɛ-Nyɔŋmɔ lɛ nɔ, ni amɛyasɔmɔ Baalim kɛ Asherot.” (Koj. 3:5-7) Akɛni Israelbii lɛ kɛ shikpɔŋ lɛ nɔ bii lɛ bɔ hewɔ lɛ, eha amɛkɛ amɛ ye yoowɛɛ, ni amɛjá wɔji. Akɛni Israelbii lɛ kɛ wɔŋjalɔi nɛɛ ye yoowɛɛ hewɔ lɛ, ebawa kɛha Israelbii lɛ akɛ amɛaashwie amɛ kɛjɛ shikpɔŋ lɛ nɔ. Israelbii lɛ kɛ apasa jamɔ futu anɔkwa jamɔ, ni amɛyasɔmɔ apasa nyɔŋmɔi.

Eyɛ mli akɛ beni jeŋmaji ni yɔɔ Shiwoo Shikpɔŋ lɛ nɔ lɛ ji Israelbii lɛ ahenyɛlɔi  lɛ, no mli lɛ amɛhe yɛ oshara moŋ, shi beni Israelbii lɛ kɛ amɛ bɔi bɔɔ lɛ, jeŋmaji nɛɛ ahe bafee oshara waa kɛha amɛ ejaakɛ amɛbaanyɛ amɛfite wekukpãa ni kã amɛ kɛ Nyɔŋmɔ teŋ lɛ. Susumɔ gbɛ kroko ni Israelbii lɛ tsɔ nɔ amɛfite amɛjamɔ lɛ he okwɛ.

Tsakpaa ni Kã Okwaayeli kɛ Baal Jamɔ Teŋ

Beni Israelbii lɛ tee Shiwoo Shikpɔŋ lɛ nɔ lɛ, amɛkpa tsomlomɔ, ni amɛteŋ mɛi pii tsɔmɔ okwaafoi. Ekolɛ gbɛ nɔ ni amɛtsɔ amɛye okwaa lɛ tamɔ Kanaanbii lɛ anɔ̃ lɛ nɔŋŋ. Ekã shi faŋŋ akɛ jeee bɔ ni Kanaanbii lɛ yeɔ okwaa lɛ pɛ Israelbii lɛ kase. Akɛni Israelbii lɛ kɛ Kanaanbii lɛ bɔ hewɔ lɛ, no ha amɛkpɛlɛ Kanaanbii lɛ ahemɔkɛyelii ni kɛ okwaayeli yɔɔ tsakpaa lɛ anɔ.

Kanaanbii lɛ já Baal srɔtoi babaoo—ejaakɛ amɛsusuɔ akɛ nyɔŋmɔi nɛɛ haa shikpɔŋ lɛ baa nii. Beni be shwie mli lɛ, jeee shikpɔŋ lɛ nɔ pɛ Israelbii lɛ hũ, ni jeee enɔ nii pɛ amɛkpá, shi amɛfata Kanaanbii lɛ ahe kɛjá amɛnyɔŋmɔi ní amɛsusuɔ akɛ amɛhaa nii baa babaoo lɛ. Israelbii lɛ ateŋ mɛi pii kwa amɛjá Yehowa, shi yɛ anɔkwale mli lɛ, amɛji hemɔkɛyeli kwalɔi diɛŋtsɛ.

Eji Kɔkɔbɔɔ ni Yɔɔ Hiɛdɔɔ Kɛha Wɔ Ŋmɛnɛ

Beni Israelbii lɛ tee Shiwoo Shikpɔŋ lɛ nɔ klɛŋklɛŋ lɛ, no mli ebɛ amɛjwɛŋmɔ mli akɛ amɛkɛ amɛhe baawo Baal jamɔ kɛ emli ahoshwibɔɔ lɛ mli. Ni kɛlɛ nakai eba lɛ beni amɛkɛ Kanaanbii lɛ bɔ lɛ. Kɛ́ wɔkɛ mɛi ni etamɔ nɔ ni amɛsumɔɔ wɔ sane shi amɛkɛ wɔ ehiɛɛɛ hemɔkɛyeli kome, ní esoro shishitoo mlai ni amɛhiɔ shi yɛ naa kɛ bɔ ni amɛbaa amɛjeŋ amɛhaa lɛ bɔ lɛ, aso esaaa akɛ wɔkpaa gbɛ akɛ amɛbaaná wɔ nɔ hewalɛ fɔŋ? Ŋwanejee ko bɛ he akɛ wɔkɛ mɛi ni heee yeee lɛ baashara yɛ gbɛ ko nɔ yɛ wɔnitsumɔhe, skul, loo ekolɛ wɔshĩa tete. Shi nɔ ni Israelbii lɛ fee kɛ nɔ ni jɛ mli kɛba lɛ ji kɔkɔbɔɔ nɔ̃ kɛha wɔ akɛ, kɛ́ wɔyadi naanyobɔɔ ni tamɔ nɛkɛ sɛɛ lɛ wɔbaagbala haomɔ kɛshwie wɔ nɔ. Nɔ ni Biblia lɛ wie lɛ ji anɔkwale shiishi akɛ: “Naanyobɔɔ fɔŋ fiteɔ jeŋba kpakpa.”—1 Kor. 15:33.

Ŋmɛnɛ lɛ, wɔkɛ kaai srɔtoi babaoo ni tamɔ nɔ ni Israelbii lɛ kɛkpe lɛ nɔŋŋ miikpe. Ayɛ nibii srɔtoi babaoo ni mɛi kɛfee amɛnyɔŋmɔi ŋmɛnɛ. Nibii ni mɛi kɛfee amɛnyɔŋmɔi lɛ ekomɛi ji shika, mɛi ni ehé gbɛi yɛ hiɛtserɛjiemɔi amli, mɛi ni ehé gbɛi yɛ akaŋshii amli, maŋkwramɔŋ gbɛjianɔtoi, jamɔŋ hiɛnyiɛlɔi komɛi, kɛ amɛweku kɔkrɔɔ lɛ mli bii po. Nibii nɛɛ ateŋ ekomɛi baanyɛ atsɔmɔ nibii ni wɔkɛyeɔ klɛŋklɛŋ gbɛhe yɛ wɔshihilɛ mli. Kɛ́ wɔkɛ mɛi ni bɛ suɔmɔ kɛha Yehowa bɔ lɛ, ebaanyɛ efite wekukpãa ni kã wɔ kɛ Nyɔŋmɔ teŋ lɛ.

Ajwamaŋbɔɔ ji nifeemɔ ko ni yaa nɔ yɛ Baal jamɔ mli, ni enɛ ji nɔ ni ha Israelbii lɛ ateŋ mɛi babaoo nya Baal jamɔ he, ni edu amɛ lɛ. Nibii ni tamɔ nɛkɛ miitsɔ Nyɔŋmɔ webii lɛ ateŋ mɛi komɛi tsɔne ŋmɛnɛ. Ákɛ nɔkwɛmɔnɔ lɛ, bɔlɛnamɔ he mfoniri ni mɔ ko aaakwɛ yɛ Intanɛt lɛ nɔ yɛ eshĩa akɛni eeetao ele nɔ ko, loo akɛni ehiɛ bɛ ehe nɔ hewɔ lɛ pɛ kɛkɛ baanyɛ afite ehenilee kpakpa lɛ. Eji dɔlɛ sane waa akɛ Kristofonyo ko baaŋmɛ gbɛ ni Intanɛt lɛ nɔ bɔlɛnamɔ he mfoniri kwɛmɔ adu lɛ!

“Ajɔɔ Mɛi ni Yeɔ Edasei lɛ Anɔ” Lɛ

Yɛ nanemɛi ahalamɔ gbɛfaŋ lɛ, mɔ fɛɛ mɔ baakpɛ lɛ diɛŋtsɛ eyiŋ eha ehe kɛ́ ebaabo Yehowa toi loo eboŋ lɛ toi. (5 Mose 30:19, 20) No hewɔ lɛ, esa akɛ wɔbi wɔhe akɛ: ‘Namɛi mikɛbɔɔ kɛjieɔ mihiɛtserɛ? Te amɛbuɔ Nyɔŋmɔ mlai lɛ amɛhaa tɛŋŋ, ni te amɛbaa amɛjeŋ amɛhaa tɛŋŋ? Ani amɛjáa Yehowa? Kɛ́ mikɛ amɛbɔ lɛ ani amɛbaaha maba mijeŋ jogbaŋŋ akɛ Kristofonyo?’

Lalatsɛ lɛ la akɛ: “Ajɔɔ mɛi ni eye emuu yɛ gbɛ lɛ nɔ, ni amɛnyiɛɔ Yehowa mla lɛ mli lɛ! Ajɔɔ mɛi ni yeɔ edasei lɛ anɔ, ni amɛkɛ amɛtsui muu fɛɛ taoɔ esɛɛgbɛ lɛ.” (Lala 119:1, 2) Lɛɛlɛŋ, “ajɔɔ mɔ fɛɛ mɔ ni sheɔ Yehowa, ni enyiɛɔ egbɛ̀i lɛ anɔ lɛ!” (Lala 128:1) Nyɛhaa wɔkasea nii kɛjɛa Israelbii lɛ atɔmɔi lɛ amli ni wɔbo Yehowa toi kɛwula shi kɛ́ wɔmiikpɛ wɔyiŋ yɛ mɛi ni wɔkɛaabɔ nanemɛi lɛ ahe.—Abɛi 13:20.

[Mfoniri ni yɔɔ baafa 26]

Kɛ́ wɔkɛ mɛi ni bɛ suɔmɔ kɛha Yehowa bɔ lɛ, ebaaha wɔkɛ wɔhe awo wɔŋjamɔ mli