Miwo Lɛ Shi Waa akɛ Mikɛ Lɛ Baakpe

MIWO mɔ ko shi waa diɛŋtsɛ akɛ mikɛ lɛ baakpe. Ha matsɔɔ bo nɔ ni ha mifee nakai. Mijɛ Spain, ni yoofɔyoo oblayoo ji mi.

Toiŋjɔlɛ kɛ ekomefeemɔ bɛ mifɔlɔi ateŋ. Wɔweku lɛ hao waa beni minyɛmi nuu fioo ni eye afii ejwɛ lɛ gbo musuŋshaa yɛ oshara mli lɛ. Kɛfata he lɛ, mitsɛ sui gbohii lɛ haaa mimami aná miishɛɛ kwraa yɛ gbalashihilɛ lɛ mli. Yɛ naagba nɛɛ fɛɛ sɛɛ lɛ, mimami nyɛ etsɔse mi kɛ minyɛmi nuu onukpa lɛ koni wɔba wɔjeŋ jogbaŋŋ.

Sɛɛ mli lɛ, minyɛmi nuu lɛ bote gbalashihilɛ mli, ni mi hu mibote gbalashihilɛ mli. No sɛɛ etsɛɛɛ tsɔ lɛ, mimami ná gbɔmɔtsoŋ fala ní gbooo, ni no nɔŋŋ gbe lɛ. Shi eŋɔ jwetri ko eshi wɔ dani egbo.

Yoo ko ni le mimami lɛ kɛ lɛ bagba Ŋmalɛ mli hiɛnɔkamɔ ni kɔɔ gbohiiashitee lɛ he lɛ he sane, ni ekpɛlɛ ni akɛ lɛ akase Biblia lɛ. Beni eshwɛ fioo po ni ebaagbo lɛ, Biblia mli wiemɔi ni haa mɔ hiɛnɔkamɔ lɛ ye ebua lɛ ni ená miishɛɛ.

Beni mi kɛ minyɛmi nuu lɛ na bɔ ni Biblia mli shɛɛ sane lɛ ye ebua wɔmami lɛ, wɔ hu wɔbɔi Nyɔŋmɔ Wiemɔ lɛ kasemɔ. Abaptisi mi akɛ Yehowa Odasefonyo, ni nyɔɔŋ kome sɛɛ lɛ mifɔ́ biyoo fɛfɛo ni ji mibi ni ji enyɔ nɔ lɛ, ni wɔwo lɛ Lucía.

Mihiɛ kpaŋ gbi ni abaptisi mi lɛ nɔ kɔkɔɔkɔ. Yiŋtoo kome hewɔ ji akɛ, agbɛnɛ lɛ mibatsɔ Yehowa nɔ̃ ejaakɛ mijɔɔ mihe nɔ miha lɛ koni masɔmɔ lɛ kɛya naanɔ. Nɔ̃ kroko hu hewɔ ji akɛ manyɛ matsɔɔ mibi nuu kɛ mibi yoo lɛ mihemɔkɛyeli lɛ.

Shi etsɛɛɛ tsɔ ni sane ba yiŋtoo ni ji enyɔ nɛɛ ni baaha maná miishɛɛ lɛ he. Beni Lucía ye afii ejwɛ lɛ, ebaná musuŋhela ko ní waa mɔ he waa. Asha lɛ X-Ray shii abɔ, ni datrɛfonyo ni sha lɛ X-Ray lɛ tsɔɔ mli akɛ, nɔ ko ni dalɛ shɛɔ akutu dalɛ efuu mibi yoo lɛ mlɛbo. Datrɛfonyo lɛ ha wɔle akɛ nɔ ni efuu mibi yoo lɛ kansa ni, ni ákɛ eji nɔ ko ni baada oyayaayai. Kansa nɛɛ kɛ Lucía tswia shi afii kpawo, ni bei komɛi lɛ wɔyayeɔ gbii babaoo yɛ helatsamɔhe lɛ.

Eyɛ He-kɛ-Afɔleshãa

Lucía nifeemɔi wo mi hewalɛ bei pii yɛ nakai jaramɔ bei lɛ amli po ejaakɛ efuaa mi, ni eshɔɔ minaa. Bɔ ni efi shi yɛ ehela beaŋ nɛɛ ha mɛi ni tsuɔ nii yɛ helatsamɔhe lɛ ná ehe miishɛɛ waa. Daa nɛɛ esumɔ akɛ eye ebua mɛi ni kwɛɔ helatsɛmɛi lɛ, ni kɛ́ amɛyaaha gbekɛbii ni atsi amɛnaa yɛ helatsamɔ he lɛ yogɔt, aduawai amli nu, kɛ nibii krokomɛi lɛ, efataa amɛhe kɛjaa. Helatsɛmɛi akwɛlɔi lɛ ha Lucía atade yɛŋ ni datrɛfoi woɔ lɛ eko, ni amɛha lɛ tsitsi nɔ tsɛɛ nii ni haa anaa lɛ akɛ eji “helatsɛmɛi akwɛlɔi ayelikɛbualɔ.”

Mɔ ko ni tsuɔ nii yɛ helatsamɔhe lɛ kɛɛ akɛ: “Lucía wo mi hewalɛ waa. Eji gbekɛyoo ni yɔɔ ekãa ni hiɛ kã shi, ni esumɔɔ nitɛŋmɔ waa. Enaa tse, ni ejwɛŋmɔŋ kã shi waa.”

Nyɔŋmɔ Wiemɔ lɛ wo Lucía hewalɛ ni ehaaa eye awerɛhoo. (Heb. 4:12) Eyɛ nɔmimaa akɛ yɛ jeŋ hee lɛ mli lɛ shiwoo ni yɔɔ Nyɔŋmɔ Wiemɔ lɛ mli akɛ “gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ” lɛ baaba mli. (Kpoj. 21:4) Akɛni eyɛ mɛi ahe miishɛɛ hewɔ lɛ, eshiɛɔ Biblia mli shɛɛ sane lɛ ehaa mɛi be fɛɛ be. Hiɛnɔkamɔ ni gbugbaaa ni Lucía yɔɔ yɛ gbohiiashitee lɛ mli lɛ ha efi shi shiŋŋ, ni eyɛ mli akɛ akɛɛ lɛ  akɛ ehela lɛ baagbe lɛ moŋ, shi eyeee awerɛhoo. (Yes. 25:8) Efee enii yɛ nakai gbɛ nɔ kɛyashi kansa lɛ gbe lɛ.

Nakai gbi lɛ ji be ni miwo lɛ shi waa akɛ mikɛ lɛ baakpe lɛ. Lucía nyɛɛɛ agbele ehiŋmɛi jogbaŋŋ. Etsɛ mɔ enine kome mli ni mi hu mimɔ ekroko lɛ mli. Miwo etoiŋ akɛ: “Kaashe gbeyei, mishiŋo. Bo lɛ, muu blɛoo. Kɛ́ ohiɛ tsɛ̃ lɛ, ohe baawa bo. Onaŋ nɔ̃ dɔŋŋ, ni mikɛo aaahi shi.”

Agbɛnɛ esa akɛ maye nakai shiwoo lɛ nɔ. Mile akɛ minaŋ lɛ mlɛo kɛyashi nakai be lɛ aaashɛ. Shi mile hu akɛ kɛ miŋmɛ mitsui shi ni mikɛ mihe fɔ̃ Yehowa nɔ, ni miye Yehowa anɔkwa lɛ, no lɛ beni abaatee Lucía shi kɛba wala mli lɛ mahi jɛi.

Nɔ ni Lucía Shi yɛ Esɛɛ

Ekãa ni Lucía fee, kɛ bɔ ni asafo lɛ fi wɔsɛɛ waa amɛha lɛ ná miwu ni jeee Odasefonyo lɛ nɔ hewalɛ waa. Gbi nɔ ni Lucía gbo lɛ, miwu kɛɛ mi akɛ esa akɛ etsake eshihilɛ. Otsii fioo komɛi asɛɛ lɛ, ekɛɛ asafoŋ onukpa ko ní ekɛ lɛ abakase Biblia lɛ. Etsɛɛɛ ni ebɔi asafoŋ kpeei lɛ fɛɛ yaa. Tsutsu ko lɛ, eka akɛ eeekpa tawa shɛremɔ shi enyɛɛɛ ekpa, shi agbɛnɛ lɛ Yehowa ye ebua lɛ ni ekpa.

Bei komɛi lɛ miyeɔ Lucía gbele lɛ he awerɛhoo, shi nɔ ni Lucía shi yɛ esɛɛ lɛ haa midaa Yehowa shi. Mi kɛ miwu kɛ gbohiiashitee he hiɛnɔkamɔ ni yɔɔ miishɛɛ lɛ shɛjeshɛjeɔ wɔmii, ni bei komɛi po lɛ wɔfeɔ beni wɔbaana lɛ ekoŋŋ lɛ he mfoniri yɛ wɔjwɛŋmɔŋ—ehiŋmɛi kokrobii fɛfɛji kɛ bɔ ni edabii ahe woɔ bu kɛ eeŋmɔ lɛ.

Nɔ ni ba mibiyoo lɛ nɔ lɛ ná wɔkutsoŋnyo ko nɔ hewalɛ waa. Yoo ko ni ebinuu kɛ Lucía yaa skul lɛ ba wɔshĩa lɛ Hɔɔ leebi ko beni nugbɔ enɛ. Hela nɛɛ nɔŋŋ gbe ebinuu ko ni no mli lɛ eye afii 11 lɛ. Beni yoo nɛɛ ná ele nɔ ni ba Lucía nɔ lɛ, etao wɔsɛɛ gbɛ ni ebasara wɔ. Ebi mi bɔ ni mifeɔ miyeɔ miwerɛhoyeli lɛ nɔ, ni ekɛɛ ebaasumɔ ni wɔtse kuu ko ni wɔkɛshɛje yeifɔyei krokomɛi ni yɔɔ shihilɛ ni tamɔ wɔnɔ lɛ mli lɛ amii.

Migbala mli mi ha lɛ akɛ Biblia lɛ mli shiwoo lɛ shɛjeɔ mimii diɛŋtsɛ, ni nɔ ko kwraa bɛ ni adesai baanyɛ afee kɛshɛje mɔ mii tamɔ no. Ená miishɛɛ waa beni mikaneɔ Yesu wiemɔi ni yɔɔ Yohane 5:28, 29 lɛ mihaa lɛ lɛ. Ekpɛlɛ ni mikɛ lɛ bɔi Biblia lɛ kasemɔ, ni etsɛɛɛ ni ebɔi “Nyɔŋmɔ hejɔlɛ ni fe jwɛŋmɔi fɛɛ lɛ” namɔ. (Filip. 4:7) Bei pii lɛ kɛ wɔmiikase Biblia lɛ, wɔŋɔɔ be fioo wɔkɛfeɔ bɔ ni wɔbaakpee wɔsuɔlɔi lɛ kɛ́ atee amɛ shi yɛ jeŋ hee lɛ mli lɛ he mfoniri yɛ wɔjwɛŋmɔ mli.

Hɛɛ, be kuku ni Lucía kɛhi shi lɛ eha miná nɔ ko ni baahi shi kɛya naanɔ. Hemɔkɛyeli ni Lucía jie lɛ kpo lɛ eha wɔweku lɛ efee ekome kɛmiisɔmɔ Nyɔŋmɔ, ni eha mitswa mifai shi waa akɛ mafi shi yɛ hemɔkɛyeli lɛ mli kɛyawula shi. Ekã shi faŋŋ akɛ esa akɛ wɔteŋ mɛi fɛɛ ni wɔsuɔlɔi egboi, ní abaanyɛ atée amɛ shi lɛ asaa wɔhe wɔto koni wɔnyɛ wɔna amɛ ekoŋŋ.

[Mfoniri ni yɔɔ baafa 20]

Paradeiso he mfoniri ni Lucía tɛŋ