Sanekpakpa Lɛ Gbɛɛ Kɛ Shwãmɔ Yɛ Andes Gɔji Lɛ Anɔ

WƆYI 18 wɔkãmɔ shikpɔŋ yɛ agba ko ni mli ewo muji lɛ shishi. No mli lɛ nugbɔ miinɛ waa ni eegbɛɛ yɛ ziŋele lɛ nɔ, ni wɔhɔlɔ wɔkuŋtui lɛ amli ni wɔmiikpokpo blibli. Bɔ ni agba bibioo lɛ yɔɔ ha lɛ ha wɔsusu kɛji wɔji mɛi klɛŋklɛŋ ni kamɔ shishi amɛwɔ.

Mɛni hewɔ mɛi 18 tee he ko ni tamɔ nɛkɛ? Shwelɛ ni wɔyɔɔ akɛ wɔye famɔ ni Yesu kɛha akɛ ashiɛ sanekpakpa lɛ “kɛyashi shikpɔŋ lɛ naagbeehei lɛ” nɔ lɛ hewɔ wɔtee jɛmɛ. (Bɔf. 1:8; Mat. 24:14) Wɔtee koni wɔyashiɛ yɛ shikpɔŋkuku ni etse ehe banee ni yɔɔ Andes gɔji lɛ anɔ yɛ Bolivia lɛ mli.

Bɔ ni Wɔfee Wɔtee Jɛmɛ

Bɔ ni wɔɔfee wɔyashɛ jɛmɛ ji klɛŋklɛŋ naagba ni esa akɛ wɔtsu he nii. Wɔná wɔle akɛ akɛni jɛmɛ etse ehe banee lɛ hewɔ lɛ, abɛ be pɔtɛɛ ni akɛfoɔ bɔs kɛyaa jɛmɛ. Beni bɔs ni wɔkɛbaaya lɛ bashɛ shi lɛ, wɔna akɛ wɔ fɛɛ wɔnaŋ sɛi, no hewɔ lɛ wɔteŋ mɛi komɛi damɔ shi yɛ bɔs lɛ mli. Shi wɔ fɛɛ wɔyashɛ kɛ̃.

Oti ni ma wɔhiɛ ji ni wɔyashiɛ yɛ akrowai ni yɔɔ Andes gɔji lɛ anɔ yɛ Bolivia lɛ amli. No hewɔ lɛ, beni wɔyi shi yɛ bɔs lɛ mli lɛ, wɔteŋ mɔ fɛɛ mɔ  wó ejatsu ekpɛ, ni wɔto srɛnɛɛ kɛkwɔ gɔŋ ni ma shi somromoo lɛ.

Mɛi ni yɔɔ akrowai lɛ amli lɛ ayi faaa, ni tsui ni amɛyɔɔ mli lɛ bɛŋkɛɛɛ amɛhe, no hewɔ lɛ ehé wɔ ŋmɛlɛtswai babaoo dani wɔnyɛ wɔshiɛ yɛ akrowa fɛɛ akrowa mli. Be fɛɛ be kɛ́ wɔnyiɛ gbɛ kakadaŋŋ kɛyanina shĩa ko lɛ, wɔnaa ekroko hu yɛ shɔŋŋ. Be pii lɛ nanegbɛ̀i ni yɔɔ lɔgɔligi lɛ haa wɔlaajeɔ.

“Mɛni Hewɔ Kpaako Nyɛbaa?”

Yoo ko ná wɔhe miishɛɛ waa akɛni wɔnyiɛ gbɛ kakadaŋŋ kɛba eŋɔɔ lɛ hewɔ, ni eŋmɛ wɔ gbɛ ni eha wɔ lai hu ni wɔhòo wɔshwane niyenii yɛ ekpatashi. Beni nuu ko ná ele nɔ ni Biblia lɛ wieɔ yɛ gbohii lɛ ahe lɛ, ebi akɛ, “Mɛni hewɔ kpaako nyɛbaa?” Ená wɔsane lɛ he miishɛɛ aahu akɛ beni wɔshiɔ akrowa lɛ, eyajie wɔ gbɛ ni ebibii wɔ saji krokomɛi yɛ gbɛ lɛ nɔ. Nuu ko hu ni nuko Yehowa Odasefoi ahe sane pɛŋ lɛ ná wɔwoji lɛ ahe miishɛɛ waa. Eda wɔ shi akɛ wɔba jɛmɛ, ni ekɛ kpɛtɛŋkpɛ ko naa samfee ha wɔ koni wɔyawɔ mli.

Gbi ko gbɛkɛ lɛ, duŋ wo waa aahu akɛ wɔshi wɔbuu lɛ yɛ gãgãi pii ateŋ ní wɔleee. Oya nɔŋŋ ni gãgãi nɛɛ bɔi wɔ tsɛ̃rɛmɔ. Bɔ ni etɔ wɔ sɔŋŋ hewɔ lɛ, wɔnyɛɛɛ shi wɔte, shi etsɛɛɛ ni amɛkpa wɔ tsɛ̃rɛmɔ.

Akɛni wɔkamɔ shikpɔŋ hewɔ lɛ, shishijee mli lɛ wɔsɛɛ kɛ wɔŋmawutsei wa wɔhe  waa, shi beni shɛɔ nyɔɔŋteŋ lɛ, wɔnuuu he dɔŋŋ. Beni je tsɛre ní wɔna bɔ ni afua ewo yɛ jɔɔi lɛ amli ní snoo hu ehà gɔji lɛ anɔ lɛ, eha wɔhiɛ kpa nɔ po akɛ wɔhe ko miiwa wɔhe. Faa ko ní miiho shaa kɛ loofɔji abolɔmɔ pɛ he wɔnu.

Beni wɔju wɔhe yɛ faa lɛ mli wɔgbe naa lɛ, wɔfee ekome kɛsusu Biblia mli ŋmalɛ ko he, wɔye leebi niyenii, ni wɔyi mli kɛtee akrowai krokomɛi ni yɔɔ gɔŋ lɛ nɔ shɔŋŋ lɛ. Mɔdɛŋ ni wɔbɔ kɛkwɔ gɔŋ lɛ efeee efolo. Wɔkɛ yoo onukpa ko kpe, ni beni ená ele akɛ Nyɔŋmɔ gbɛi ni ji Yehowa lɛ yɛ Biblia lɛ mli lɛ, ejwa yaafo. Enaa kpɛ ehe waa. Agbɛnɛ ebaanyɛ etsɛ́ Nyɔŋmɔ gbɛi kɛ́ eesɔle!

Nuu onukpa ko kɛɛ akɛ Nyɔŋmɔ ekai lɛ, ni ewo lala akɛ ŋwɛi bɔfoi lɛ tsu wɔ kɛba eŋɔɔ. Nuu ko hu ni bɛ gbɔmɔtsoŋ hewalɛ kwraa ní enyɛɛɛ kpo eje lɛ kɛɛ wɔ akɛ ekrowa lɛŋ bii ateŋ mɔ ko kwraa ebasarako lɛ pɛŋ. Emii shɛ ehe waa akɛ wɔjɛ La Paz tɔɔ wɔbasara lɛ. Nuu ko hu ná miishɛɛ waa akɛ Yehowa Odasefoi lɛ basaraa mɛi yɛ amɛshĩai, yɛ be mli ni jamɔi krokomɛi lɛ tswaa ŋmɛlɛ kɛtsɛɔ amɛsɔlemɔi lɛ amli bii lɛ.

Akɛni srawa hewalɛ bɛ jɛmɛ hewɔ lɛ, kɛ́ duŋ wo nɔŋŋ pɛ lɛ, mɛi boteɔ saa mli, ni amɛteɔ shi kɛ́ hulu je. No hewɔ lɛ, wɔjeɔ shiɛmɔ nitsumɔ lɛ shishi leebi ŋmɛji ekpaa bɔni afee ni wɔnine ashɛ mɛi anɔ yɛ amɛshĩai. Kɛjeee nakai lɛ amɛteŋ mɛi babaoo baashi kɛya ŋmɔ mli. No sɛɛ lɛ wɔyaa mɛi ni etee ŋmɔ mli momo lɛ aŋɔɔ, ni amɛteŋ mɛi komɛi kpaa humɔ ni amɛboɔ wɔshɛɛ sane ni jɛ Nyɔŋmɔ Wiemɔ lɛ mli lɛ toi, ni enɛ haa tsinai ni gbalaa kɔi kɛhuɔ lɛ nyɛɔ amɛwoɔ amɛtsui fioo. Mɛi ni wɔnaa yɛ shĩa lɛ ateŋ mɛi babaoo ŋmɛɔ toohewolo yɛ shikpɔŋ koni wɔtara nɔ, ni amɛtsɛ́ɔ amɛweku muu lɛ fɛɛ koni amɛbabo sane lɛ toi. Okwaafoi lɛ ekomɛi ha wɔ abele kɛ kotokui yɛ Biblia kasemɔ woji ni wɔkɛha amɛ lɛ hewɔ.

“Nyɛhiɛ Kpako Mi Nɔ”

Yɛ anɔkwale mli lɛ dani mɛi aaaná Biblia mli nilee babaoo lɛ, ehe baahia ni aya amɛŋɔɔ shii abɔ. Mɛi babaoo kpa wɔ fai akɛ wɔku wɔsɛɛ kɛba ni wɔbatsɔɔ amɛ nibii krokomɛi. Enɛ hewɔ lɛ, wɔfã gbɛ kɛtee Bolivia gɔji nɛɛ anɔ shii abɔ.

Be ko beni wɔku wɔsɛɛ kɛtee jɛmɛ lɛ, yoo onukpa ko ná miishɛɛ waa akɛ wɔba ekoŋŋ, ni ekɛɛ akɛ: “Nyɛtamɔ mi diɛŋtsɛ mimusuŋ bii. Nyɛhiɛ kpako mi nɔ.” Nuu ko da wɔ shi yɛ wɔshiɛmɔ nitsumɔ lɛ hewɔ, ni ekɛɛ wɔ akɛ ebaasumɔ ni wɔbato eshĩa be kroko kɛ́ wɔba. Sɛɛ mli lɛ wɔna wɔle akɛ yoo ko ni wɔyashiɛ wɔtsɔɔ lɛ lɛ eshi kɛtee maŋtiase lɛ mli, ni amrɔ nɛɛ eji sanekpakpa lɛ shiɛlɔ. Ekolɛ enɛ ji wɔmɔdɛŋbɔɔ lɛ he sɛɛnamɔ ni fe fɛɛ.

Beni eshwɛ gbi kome ni wɔbaaku wɔsɛɛ kɛba shĩa lɛ, glaasin ni wɔkɛwoɔ wɔkane ni wɔsuɔ gbɛkɛ lɛ mli lɛ tã, ni eshwɛ niyenii ni wɔkɛtee lɛ hu fioo ko pɛ. Wɔbua lai saŋŋ naa ni wɔkɛshɛre la, ni wɔhoo wɔniyenii ni eshwɛ lɛ, kɛkɛ ni wɔyi gbɛ. Wɔkɛ maŋ ni wɔbaanyɛ wɔyafo bɔs yɛ mli lɛ teŋ jekɛ. Wɔyashɛ beni je ena.

Wɔku Wɔ Sɛɛ

Wɔkɛ naagbai kpe beni wɔkuɔ wɔsɛɛ lɛ, ejaakɛ bɔs lɛ fite yɛ gbɛ lɛ nɔ. Sɛɛ mli lɛ lɔle ko ni akɛloɔ jatsu ní ewo mɛi pii lɛ bawo wɔ. Enɛ ha wɔná hegbɛ kɛshiɛ wɔha mɛi ni yɔɔ lɔle lɛ mli ní amɛmiitao amɛle nɔ hewɔ ni wɔtee gɔji lɛ anɔ lɛ. Eyɛ mli akɛ yɛ fɔmɔ su naa lɛ maŋbii lɛ ahiɛ gboɔ moŋ, shi amɛyɛ mɛi ahe miishɛɛ.

Wɔta nakai lɔle lɛ mli ŋmɛlɛtswai nɛɛhu kɛbashɛ shĩa—ni beni wɔshɛɔ shi lɛ, wɔfɔ tsɔ̀ɔ ni fɛ̃i miiye wɔ waa. Shi wɔgbɛfãa lɛ efeee efolo. Yɛ gbɛfãa lɛ mli lɛ, wɔnyɛ wɔkɛ yoo ko ni yɔɔ maŋtiase lɛ mli lɛ to gbɛjianɔ koni wɔkɛ lɛ akase Biblia lɛ.

Eji hegbɛ kpele diɛŋtsɛ akɛ aaajaje sanekpakpa lɛ atsɔɔ mɛi ni yɔɔ hei banee tamɔ nɛkɛ. Wɔshiɛ yɛ akrowai wuji ejwɛ kɛ akrowai bibii babaoo amli. Wiemɔi nɛɛ ahe sɔŋŋ wɔsusu akɛ: “Kwɛ bɔ ni sanekpakpa jajelɔ ní shiɛɔ hejɔlɛ lɛ, sanekpakpa jajelɔ ní shiɛɔ yiwalaheremɔ lɛ naji yɔɔ fɛo yɛ gɔji lɛ anɔ.”—Yes. 52:7; Rom. 10:15.

[Mfoniri ni yɔɔ baafa 17]

Wɔfee klalo akɛ wɔɔshiɛ sanekpakpa lɛ