Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Kɛ nakai ni lɛ, no lɛ kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛɛ be ŋulamiiaŋkwɛlɔi lɛ yasara Yesu lɛ?

Biblia shishitsɔɔmɔ ko wie akɛ: “Nilelɔi lɛ eyasaraaa Yesu ni kã kooloi aniyenii anɔ mli lɛ yɛ gbi gbɛkɛ ni afɔ́ lɛ lɛ nɔ, taakɛ tookwɛlɔi lɛ fee lɛ. Amɛtee amɛyasara . . . lɛ yɛ nyɔji komɛi asɛɛ.” No mli lɛ Yesu ji “abifao” ni amɛyɛ shĩa ko mli. (Mat. 2:7-11) Eji abake Yesu shika kɛ nibii krokomɛi ni jara wala gbi gbɛkɛ ni afɔ́ lɛ lɛ kulɛ, ani loofɔji enyɔ pɛ Maria baaŋɔ shã afɔle yɛ sɔlemɔwe lɛ no sɛɛ gbii 40 lɛ?—1/1, baafa 31.

• Mɛni mɛi pii baanyɛ afee koni amɛtsui anyɔ amɛmli waa?

Ekolɛ obaabi ohe akɛ, ‘Ani manyɛ matsake mishihilɛ ni maha efee mlɛo?’ Amy fee nakai. Ená nii waa shi enáaa miishɛɛ. Ebayɔse akɛ shwɛ sharao ni nitsumɔ sɛɛ ni etiuɔ yɛ je nɛŋ lɛ aha edu gbɛ kɛjɛ hemɔkɛyeli lɛ mli. No hewɔ lɛ, ekpɛ eyiŋ akɛ ekɛ Maŋtsɛyeli lɛ baaye klɛŋklɛŋ gbɛhe yɛ eshihilɛ mli, ni enyɛ ekɛ ehe wo gbɛgbamɔ nitsumɔ lɛ mli kɛyashi be ko. Amy kɛɛ akɛ: “Amrɔ nɛɛ mitsui enyɔ mimli waa fe beni” mitiuɔ heloonaa nibii asɛɛ lɛ.—1/15, baafa 19.

• Mɛni baanyɛ aye abua yeifɔyei komɛi ni atsui anyɔ amɛmli?

Yeifɔyei pii yaa nitsumɔ. Amɛteŋ mɛi komɛi tsuɔ nii bɔni afee ni amɛná shika kɛtsu weku lɛ hiamɔ nii komɛi ahe nii, ni mɛi komɛi hu tsuɔ nii bɔni afee ni amɛná shika loo amɛhi shi ogbɔjɔ. Yeifɔyei krokomɛi hu tsuɔ nii akɛni amɛyɛ amɛnitsumɔ lɛ he miishɛɛ lɛ hewɔ. Yeifɔyei ni ji Kristofoi lɛ tsuɔ gbɛfaŋnɔ ko ni he hiaa waa he nii yɛ shĩa—titri lɛ yɛ abifao lɛ gbekɛbiiashi. Amɛteŋ mɛi komɛi ekpɛ amɛyiŋ akɛ amɛkɛ be fã pɛ baatsu nii loo amɛkpaa heloonaa nitsumɔ kwraa bɔni afee ni amɛná be pii amɛha weku lɛ, ni enɛ eha amɛtsui enyɔ amɛmli waa.—2/1, baafa 28-31.

• Mɛɛ “yinɔ” he Yesu wiemɔi ni aŋma yɛ Mateo 24:34 lɛ kɔɔ?

Yesu kɛ wiemɔ ni ji “yinɔ” lɛ fɔɔ nitsumɔ kɛ ekɛ efɔŋfeelɔi miiwie loo kɛ́ eewie amɛhe. Shi beni ekɛ ekaselɔi lɛ ní no mli lɛ eshwɛ fioo ni akɛ mumɔ krɔŋkrɔŋ lɛ baafɔ amɛ mu lɛ wieɔ lɛ, ekɛ wiemɔ ni ji yinɔ lɛ tsu nii yɛ gbɛ kroko nɔ. Taakɛ Mateo 24:32, 33 lɛ tsɔɔ lɛ, amɛ pɛ amɛbaanyɛ amɛ mu saji anaa kɛ nɔmimaa. Wɔbaanyɛ wɔkɛɛ akɛ Yesu miiwie esɛɛnyiɛlɔi ní afɔ amɛ mu ni hi shi yɛ klɛŋklɛŋ afii 100 lɛ mli lɛ ahe, ni ákɛ ŋmalɛ nɛɛ kɔɔ mɛi ni afɔ amɛ mu ni yɔɔ ŋmɛnɛ lɛ hu ahe.—2/15, baafa 23-24.

• Mɛɛ gbɛ nɔ Mla lɛ ji tsɔselɔ taakɛ atsĩ ta yɛ Galatabii 3:24 lɛ?

Yɛ blema lɛ, bei pii lɛ tsɔselɔ ji nyɔŋ ko ni anyɛɔ akɛ he fɔ̃ɔ enɔ, ni enitsumɔ ji ni ekwɛ enuŋtsɔ lɛ bi ní atuu awo edɛŋ lɛ, ni agbɛnɛ hu ebɔ mɔdɛŋ ni efee nɔ fɛɛ nɔ ni gbekɛ lɛ tsɛ taoɔ akɛ efee eha gbekɛ lɛ. Nakai nɔŋŋ hu Mla lɛ bu Yudafoi lɛ ahe kɛjɛ nibii ni baafite amɛjeŋba, tamɔ yoowɛɛ ni aaahi amɛ kɛ wɔŋjalɔi ateŋ lɛ he. Ni taakɛ gbekɛ ko tsɔselɔ tsɔseɔ gbekɛ lɛ kɛyashiɔ be ko lɛ, nakai nɔŋŋ Mla lɛ hu hi shi be kukuoo ko pɛ kɛyashi Kristo ba.—3/1, baafa 18-21.

• Taakɛ Yakobo 3:17 lɛ tsɔɔ lɛ, mɛɛ sui esa akɛ wɔjie lɛ kpo?

Wɔhe ni aaatse lɛ biɔ ni wɔhe afee oya kɛkpoo nibii fɔji. (1 Mose 39:7-9) Esa akɛ wɔtiu toiŋjɔlɛ sɛɛ, ni wɔkpoo mlifu loo nifeemɔi ni baanyɛ afite toiŋjɔlɛ ni yɔɔ wɔteŋ lɛ. No hewɔ lɛ, esa akɛ wɔteŋ mɔ fɛɛ mɔ abi ehe akɛ: ‘Ani ale mi akɛ mɔ ni baa toiŋjɔlɛ yi loo mɔ ni fiteɔ toiŋjɔlɛ? Ani béi fɔɔ mi kɛ mɛi krokomɛi ateŋ baa? Ani mimli fũɔ oyayaayai, loo minifeemɔ haa mɛi amli fuɔ? Ani mikɛ eshai faa oya, ni mimaaa nɔ mi doo ákɛ akɛ misusumɔi atsu nii?’—3/15, baafa 24-5.

• Mɛni hewɔ Yesu tsa nuu shwilafo lɛ fiofio lɛ? (Mar. 8:22-26)

Biblia lɛ etsɔɔɔ nɔ̃ tuuŋtu hewɔ ni Yesu fee nakai lɛ. Shi etamɔ nɔ ni yɛ sane nɛɛ mli lɛ, Yesu tsa nuu lɛ fiofio koni eha nuu lɛ naa akakpɛ ehe fe nine akɛni eenyɛ eena nii ekoŋŋ lɛ hewɔ. Enɛ tsɔɔ akɛ Yesu yɛ suɔmɔ kɛha shwilafo lɛ ni esusuɔ ehe waa.—4/1, baafa 30.