Yohane Wolo lɛ Mli Saji Otii
Yehowa Wiemɔ lɛ Hiɛ Kã
Yohane Wolo lɛ Mli Saji Otii
YOHANE—“kaselɔ ni Yesu sumɔɔ lɛ” lɛ—ji mɔ ni ŋma naagbee wolo ni ajɛ mumɔŋ aŋma ni bɔ Kristo sɔɔmɔ nitsumɔ lɛ kɛ ewala shihilɛ mli sane lɛ he amaniɛ lɛ. (Yoh. 21:20) Atsĩ Sanekpakpai krokomɛi lɛ amli saji fioo pɛ atã yɛ Yohane Sanekpakpa ni aŋma aaafee afi 98 Ŋ.B. lɛ mli.
Yohane ŋma e-Sanekpakpa lɛ yɛ yiŋtoo pɔtɛɛ ko hewɔ. Beni etsɔɔ nɔ hewɔ ni eŋma e-Sanekpakpa lɛ, ekɛɛ akɛ: “Enɛɛmɛi lɛ aŋma, koni nyɛhé nyɛye akɛ Yesu ji Kristo, Nyɔŋmɔ bi lɛ, ni kɛ́ nyɛheɔ nyɛyeɔ lɛ, ní nyɛná wala yɛ egbɛi lɛ mli.” (Yoh. 20:31) No hewɔ lɛ, emli shɛɛ sane lɛ he yɛ sɛɛnamɔ waa kɛha wɔ.—Heb. 4:12.
“NAA, NYƆŊMƆ TOOBI LƐ”
Beni Yohane Baptisilɔ lɛ na Yesu lɛ, ekɛ nɔmimaa wie akɛ: “Naa, Nyɔŋmɔ toobi lɛ ni wóɔ je lɛ he esha lɛ kɛyaa lɛ!” (Yoh. 1:29) Yesu shiɛ, etsɔɔ nii, ni efee naakpɛɛ nibii yɛ Samaria, Galilea, Yudea kɛ Yordan faa lɛ boka gbɛ, ni ‘mɛi pii ba eŋɔɔ ni amɛhe enɔ amɛye yɛ jɛi.’—Yoh. 10:41, 42.
Naakpɛɛ nibii ni Yesu fee ni sa kadimɔ waa lɛ ateŋ ekome ji shi ni etee Lazaro kɛjɛ gbele mli lɛ. Mɛi babaoo ná Yesu mli hemɔkɛyeli beni amɛna nuu ni egbo gbii ejwɛ ni atee lɛ shi kɛba wala mli ekoŋŋ lɛ. Shi osɔfonukpai lɛ kɛ Farisifoi lɛ kpɛ amɛyiŋ akɛ amɛbaagbe Yesu. No hewɔ lɛ, Yesu je jɛi “etee shikpɔŋ ko ni atsɛ́ɔ Efraim lɛ mli.”—Yoh. 11:53, 54.
Ŋmalɛ Naa Sanebimɔi ni Aha Hetoo:
1:35, 40—Yɛ Andrea sɛɛ lɛ, namɔ ji kaselɔ ni kɛ Yohane Baptisilɔ lɛ damɔ shi lɛ? Mɔ ni bɔɔ amaniɛ lɛ etsĩii lɛ diɛŋtsɛ egbɛi tã yɛ e-Sanekpakpa lɛ mli, ni efɔɔ Yohane Baptisilɔ lɛ tsɛmɔ akɛ “Yohane.” No hewɔ lɛ, ekã shi faŋŋ akɛ kaselɔ ni atsiii egbɛi tã lɛ ji Yohane mɔ ni ŋma Sanekpakpa nɛɛ lɛ.
2:20—Mɛɛ sɔlemɔtsu akɛ ‘afii nyɔŋmai-ejwɛ kɛ ekpaa mã’ lɛ? Sɔlemɔtsu ni Zerubabel kwɛ ni amã ni Yudea maŋtsɛ Herode saa emã ekoŋŋ lɛ he Yudafoi lɛ wieɔ lɛ. Yinɔsaneŋmalɔ Josephus bɔ amaniɛ akɛ abɔi tsu nɛɛ maa yɛ Herode maŋtsɛyeli lɛ afi ni ji 18 lɛ mli loo yɛ afi 18 loo afi 17 D.Ŋ.B. Akɛ afii kpaanyɔ mã sɔlemɔtsu lɛ diɛŋtsɛ kɛ ehe nibii krokomɛi ni he hiaa waa lɛ. Shi atee nɔ amã tsui krokomɛi ni fata sɔlemɔtsu lɛ he lɛ aahu kɛyashi Hehoo ní aye yɛ afi 30 Ŋ.B. lɛ sɛɛ, be mli ni Yudafoi lɛ kɛɛ ákɛ akɛ afii 46 ni mã lɛ.
5:14—Ani esha ni wɔfeɔ hewɔ hela mɔɔ wɔ lɛ? Jeee be fɛɛ be. Nuu ni Yesu tsa lɛ lɛ he eye afii 38 akɛni eyeee emuu lɛ hewɔ. (Yoh. 5:1-9) Nɔ ni Yesu tsɔɔ ji akɛ akɛni ana nuu lɛ mɔbɔ agbɛnɛ hewɔ lɛ, esa akɛ enyiɛ yiwalaheremɔ gbɛ lɛ nɔ, ni ekajɛ esuɔmɔ mli efee esha, kɛ́ jeee nakai lɛ nɔ ko ni naa wa fe hela baaba enɔ. Nuu lɛ baanyɛ afee esha ni aŋɔfaŋ lɛ, ni no baaha efee mɔ ni sa gbele ni ateŋ lɛ shi.—Mat. 12:31, 32; Luka 12:10; Heb. 10:26, 27.
5:24, 25—Namɛi “éfoŋ yɛ gbele mli kɛtee wala mli” lɛ? Yesu miiwie mɛi ni egbo yɛ mumɔŋ shi beni amɛnu ewiemɔi lɛ amɛhe enɔ amɛye ní amɛkwa eshafeemɔ gbɛ ni amɛkɔ lɛ. ‘Amɛfoŋ yɛ gbele mli kɛtee wala mli’ ejaakɛ abuuu amɛ gbele fɔ dɔŋŋ, ni aha amɛná hiɛnɔkamɔ akɛ amɛbaaná naanɔ wala akɛni amɛyɛ hemɔkɛyeli yɛ Nyɔŋmɔ mli lɛ hewɔ.—1 Pet. 4:3-6.
5:26; 6:53—Mɛni ‘wala ni aaahi mɔ ko mli’ lɛ tsɔɔ? Yɛ Yesu Kristo gbɛfaŋ lɛ, etsɔɔ akɛ Nyɔŋmɔ eha lɛ hewalɛ ni efee nibii enyɔ—eha adesai aná shidaamɔ kpakpa yɛ Yehowa hiɛ, ni agbɛnɛ hu eha amɛná wala kɛtsɔ amɛ shi ni eeetee kɛjɛ gbele mli lɛ nɔ. Yɛ Yesu sɛɛnyiɛlɔi lɛ agbɛfaŋ lɛ ‘wala ni aaahi amɛmli’ lɛ tsɔɔ akɛ amɛbaaná wala ni hi kɛwula shi. Kristofoi ni afɔ amɛ mu lɛ náa wala nɛɛ kɛ́ atee amɛ shi kɛtee ŋwɛi. Anɔkwafoi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ baaná wala ni hi kɛwula shi kɛ́ amɛnyɛ amɛye naagbee kaa ni amɛkɛbaakpe yɛ Kristo Afii Akpe Nɔyeli lɛ sɛɛ nɔŋŋ lɛ nɔ lɛ.—1 Kor. 15:52, 53; Kpoj. 20:5, 7-10.
6:64—Ani beni Yesu hala Yuda Iskariot lɛ, no mli lɛ ele akɛ Yuda ji mɔ ni baatsɔɔ esɛɛgbɛ lɛ? Eeenyɛ efee akɛ eleee. Shi be ko yɛ afi 32 Ŋ.B. lɛ, Yesu kɛɛ ebɔfoi lɛ akɛ: “Nyɛteŋ mɔ kome lɛ abonsam ni.” Eeenyɛ efee akɛ nakai beaŋ Yesu na Yuda Iskariot “shishijee,” ni ji be ni ebɔi ejeŋ baa yɛ gbɛ fɔŋ nɔ lɛ.—Yoh. 6:66-71.
Nibii ni Wɔkaseɔ Kɛjɛɔ Mli:
2:4. Yesu miikɛɛ Maria akɛ akɛni Nyɔŋmɔ Bi ji lɛ ni abaptisi lɛ ni afɔ lɛ mu hewɔ lɛ, esa akɛ ekɛ eŋwɛi Tsɛ lɛ gbɛtsɔɔmɔ atsu nii. Eyɛ mli akɛ no mli lɛ kpaako Yesu eje esɔɔmɔ nitsumɔ lɛ shishi moŋ, shi ele ŋmɛlɛtswaa lɛ loo be ni ekɛbaatsu nitsumɔ ni akɛwo edɛŋ ni ewala ni ekɛaashã afɔle fata he lɛ jogbaŋŋ. Eŋmɛɛɛ gbɛ ni ewekunyo ko po ni bɛŋkɛ lɛ kpaakpa tamɔ Maria atsɔɔ lɛ nɔ ni esa akɛ efee yɛ Nyɔŋmɔ suɔmɔnaa nifeemɔ gbɛfaŋ. Esa akɛ wɔkɛ ekãa ni tamɔ nakai nɔŋŋ asɔmɔ Yehowa Nyɔŋmɔ.
3:1-9. Wɔkaseɔ nibii enyɔ yɛ sane ni kɔɔ Nikodemo ni ji Yudafoi lɛ anukpa lɛ he lɛ mli. Klɛŋklɛŋ lɛ, Nikodemo tsɔɔ akɛ eyɛ heshibaa kɛ sɛɛyoomɔ, ehiɛ yɛ emumɔŋ hiamɔ nii anɔ, ni ekpɛlɛ nɔ akɛ kapintɛfonyo ohiafo lɛ binuu lɛ ji tsɔɔlɔ ni Nyɔŋmɔ tsu lɛ. Ŋmɛnɛ hu esa akɛ anɔkwa Kristofoi fɛɛ aba amɛhe shi. Nɔ ni ji enyɔ lɛ, Nikodemo kpoo akɛ eeetsɔ kaselɔ beni Yesu yɔɔ shikpɔŋ lɛ nɔ lɛ. Ekolɛ gbɔmɔ gbeyeishemɔ, egbɛhe ni eyɔɔ yɛ Sanhedrin lɛ mli ni esumɔɔɔ ni eŋmɛɔ he, loo bɔ ni etsui yɔɔ enii ni ená lɛ he hewɔ efee nakai. Wɔbaanyɛ wɔkase nɔ ko ni he hiaa waa yɛ sane nɛɛ mli: Esaaa akɛ wɔŋmɛɔ gbɛ ni nibii ni wɔnyaa he lɛ tsiɔ wɔnaa koni ‘wɔkawó wɔsɛŋmɔtso lɛ wɔtere daa nɛɛ kɛnyiɛ Yesu sɛɛ.’—Luka 9:23.
4:23, 24. Kɛ́ Nyɔŋmɔ aaakpɛlɛ wɔjamɔ nɔ lɛ, esa akɛ ekɛ Biblia mli anɔkwale lɛ akpã gbee, ni esa akɛ mumɔ krɔŋkrɔŋ lɛ akudɔ wɔnifeemɔi.
6:27. Kɛ́ wɔbɔɔ mɔdɛŋ akɛ wɔtsu wɔmumɔŋ hiamɔ nii lɛ ahe nii lɛ, belɛ wɔmiitsu “ŋmaa ni hiɔ shi kɛyaa naanɔ wala mli” lɛ he nii. Kɛ́ wɔfee nakai lɛ wɔbaaná miishɛɛ.—Mat. 5:3.
6:44. Yehowa susuɔ wɔ he. Egbalaa wɔ akɛ aŋkroaŋkroi kɛbɛŋkɛɔ e-Bi lɛ kɛtsɔ shiɛmɔ nitsumɔ lɛ kɛ E-mumɔ krɔŋkrɔŋ lɛ ni ekɛyeɔ ebua wɔ koni wɔnu Biblia mli anɔkwalei lɛ ashishi ní wɔkɛtsu nii yɛ wɔshihilɛ mli lɛ nɔ.
11:33-36. Kɛ́ wɔjie wɔhenumɔi akpo lɛ no etsɔɔɔ akɛ wɔhiɛ waaa.
‘NYIƐMƆ ESƐƐ DAA’
Beni eshwɛ fioo ni abaaye Hehoo lɛ yɛ afi 33 Ŋ.B. lɛ, Yesu tee Betania. Eta teji bi nɔ kɛtee Yerusalem yɛ Nisan gbi ni ji 9 lɛ nɔ. Yɛ Nisan gbi ni ji 10 lɛ nɔ lɛ, Yesu tee sɔlemɔwe lɛ ekoŋŋ. Beni esɔle koni awo e-Tsɛ gbɛi hiɛ nyam lɛ, gbee ko jɛ ŋwɛi ha esɔlemɔ lɛ hetoo akɛ: “Miná miwo ehiɛ nyam, ni masaa mawo ehiɛ nyam ekoŋŋ.”—Yoh. 12:28.
Beni Yesu kɛ ekaselɔi lɛ yeɔ Hehoo niyenii lɛ, ewo amɛ ŋaa, ni ekɛ amɛ ye shɛɛ ni esɔle eha amɛ. Beni amɔ Yesu, ní aye esane, ní asɛŋ lɛ lɛ sɛɛ lɛ, atee lɛ shi.
Ŋmalɛ Naa Sanebimɔi ni Aha Hetoo:
14:2—Mɛɛ gbɛ nɔ Yesu aaatsɔ ‘asaa gbɛhe’ yɛ ŋwɛi eto esɛɛnyiɛlɔi anɔkwafoi lɛ? Nɔ ni efee klɛŋklɛŋ kɛsaa gbɛhe eto amɛ ji, kpaŋmɔ hee lɛ ni eha ebɔi nitsumɔ beni etee Nyɔŋmɔ hiɛ ni ekɛ elá lɛ jara yaha Nyɔŋmɔ lɛ. Kɛfata he lɛ, kɛ́ awó Kristo maŋtsɛ lɛ, no sɛɛ lɛ esɛɛnyiɛlɔi ni afɔ amɛ mu lɛ ashitee kɛmiiya ŋwɛi lɛ baaje shishi.—1 Tes. 4:14-17; Heb. 9:12, 24-28; 1 Pet. 1:19; Kpoj. 11:15.
19:11—Beni Yesu wie mɔ ni jie lɛ ewo Pilato dɛŋ lɛ he lɛ, ani no mli lɛ Yuda Iskariot he ewieɔ lɛ? Eeenyɛ efee akɛ jeee Yuda loo mɔ ko pɔtɛɛ pɛ he Yesu wieɔ lɛ, shi moŋ eewie mɛi fɛɛ ni yeɔ gbe ni agbe lɛ lɛ he fɔ lɛ ahe. Yuda, “osɔfonukpai lɛ kɛ onukpai lɛ kɛ gwabɔɔ lɛ fɛɛ” kɛ “asafoi” lɛ po ni awo amɛyiŋ ni amɛbi ni ajie Baraba lɛ fata mɛi nɛɛ ahe.—Mat. 26:59-65; 27:1, 2, 20-22.
20:17—Mɛni hewɔ Yesu kɛɛ Maria Magdalena akɛ ekata ehe lɛ? Ekã shi faŋŋ akɛ nɔ hewɔ ni Maria mɔ Yesu mli lɛ ji akɛ esusu akɛ Yesu miiya ŋwɛi ni enaŋ lɛ dɔŋŋ. Bɔni afee ni Yesu amã nɔ mi eha lɛ akɛ enako aya ŋwɛi lɛ, ekɛɛ lɛ akɛ ekamɔ emli shi moŋ eya ni eyakɛɛ ekaselɔi lɛ akɛ atee lɛ shi.
Nibii ni Wɔkaseɔ Kɛjɛɔ Mli:
12:36. Esa akɛ wɔná Nyɔŋmɔ Wiemɔ ni ji Biblia lɛ mli anɔkwa nilee bɔni afee ni wɔtsɔmɔ “la bii” loo la hiɛlɔi. No sɛɛ lɛ esa akɛ wɔkɛ nilee nɛɛ atsu nii kɛgbala mɛi kɛjɛ mumɔŋ duŋ mli kɛba Nyɔŋmɔ la lɛ he.
14:6. Yesu Kristo pɛ nɔ wɔbaanyɛ wɔtsɔ ni Nyɔŋmɔ akpɛlɛ wɔnɔ. Ja wɔná Yesu mli hemɔkɛyeli ní wɔnyiɛ enɔkwɛmɔnɔ lɛ sɛɛ dani wɔbaanyɛ wɔtsi wɔbɛŋkɛ Yehowa.—1 Pet. 2:21.
14:15, 21, 23, 24; 15:10. Kɛ́ wɔye Nyɔŋmɔ kitai lɛ anɔ lɛ, no baaye abua wɔ koni wɔya nɔ wɔhi esuɔmɔ lɛ kɛ e-Bi lɛ suɔmɔ lɛ mli.—1 Yoh. 5:3.
14:26; 16:13. Yehowa mumɔ krɔŋkrɔŋ lɛ tsɔɔ wɔnii ni ehaa wɔnyɛɔ wɔkai nibii ni wɔkase lɛ. Ehaa Biblia mli anɔkwalei lɛ hu feɔ faŋŋ kɛhaa wɔ. No hewɔ lɛ, ebaanyɛ eye ebua wɔ koni wɔná nilee, sɛɛyomɔ, sanesɛɛkɔmɔ kɛ jwɛŋmɔŋ nyɛmɔ babaoo. No hewɔ lɛ, esa akɛ wɔkãhe wɔsɔle daa, titri lɛ ni wɔbi ni aha wɔ mumɔ krɔŋkrɔŋ lɛ.—Luka 11:5-13.
21:15, 19. Yesu bi Petro kɛji esumɔɔ lɛ fe “mɛnɛɛmɛi” ni ji looi ni jwere amɛhiɛ lɛ. Yesu kɛ nakai feemɔ ma nɔ mi eha Petro akɛ esa akɛ ehala akɛ ekɛ ebe fɛɛ baanyiɛ Yesu sɛɛ fe nɔ ni eeetsu wuoyaa nitsumɔ lɛ. Eba akɛ saji otii ni wɔkase kɛjɛ Sanekpakpai lɛ amli lɛ baaha wɔtswa wɔfai shi waa akɛ wɔbaasumɔ Yesu kwraa fe nɔ fɛɛ nɔ ni baanyɛ afee wɔ akɔnɔ. Hɛɛ, nyɛhaa wɔkɛ wɔtsui muu fɛɛ anyiɛa esɛɛ daa.
[Mfoniri ni yɔɔ baafa 31]
Mɛni wɔbaanyɛ wɔkase kɛjɛ Nikodemo sane lɛ mli?