Bɔ ni Ato Nɔyeli Kuu lɛ He Gbɛjianɔ Aha

YEHOWA ODASEFOI a-Nɔyeli Kuu lɛ mli bii lɛ ji Nyɔŋmɔ tsuji hii ni amɛjɔɔ amɛhe nɔ ní afɔ amɛ mu. Amɛdamɔɔ tsulɔ anɔkwafo kɛ nilelɔ kuu lɛ najiaŋ, ni tsulɔ kuu nɛɛ nitsumɔ ji akɛ amɛha Nyɔŋmɔ webii lɛ mumɔŋ niyenii, ní amɛwo amɛ hewalɛ ní amɛtsɔɔ amɛ gbɛ nɔ ni amɛaatsɔ amɛshiɛ Maŋtsɛyeli lɛ he shɛɛ sane lɛ yɛ je lɛŋ fɛɛ.—Mat. 24:14, 45-47.

Nɔyeli Kuu lɛ kpeɔ daa otsi, bei pii lɛ Shɔ. Enɛ haa nyɛmimɛi hii nɛɛ tsuɔ nii yɛ ekomefeemɔ mli. (Lala 133:1) Ajara Nɔyeli Kuu lɛ mli bii lɛ amli awo ajinafoi akui srɔtoi amli. Ajinafoi akuu lɛ eko fɛɛ eko yɛ nitsumɔ ni etsuɔ bɔni afee ni Maŋtsɛyeli nitsumɔ lɛ aya nɔ, taakɛ sane ni nyiɛ sɛɛ nɛɛ tsɔɔ lɛ.

▪ NƆKWƐLƆI AJINAFOI AKUU: Nɔyeli Kuu lɛ ajinafoi akui krokomɛi enumɔ lɛ anɔkwɛlɔi kɛ Nɔyeli Kuu lɛ mlinyo kroko ni ahala lɛ akɛ woloŋmalɔ lɛ ji mɛi ni feɔ ajinafoi akuu nɛɛ. Kuu nɛɛ kwɛɔ koni ajinafoi akui krokomɛi lɛ anitsumɔ aya nɔ jogbaŋŋ. Amɛtsuɔ naagbai wuji ni baa trukaa, yiwaai, adebɔɔ naa osharai kɛ osharai krokomɛi, kɛ saji ni esa akɛ atsu he nii amrɔ nɔŋŋ ni kɔɔ Yehowa Odasefoi ni yɔɔ je lɛŋ fɛɛ lɛ ahe lɛ he nii.

▪ AJINAFOI AKUU NI KWƐƆ BETEL NITSULƆI ANƆ: Kuu nɛɛ mli bii tsuɔ Betel weku lɛ mli bii ni yɔɔ je lɛŋ fɛɛ lɛ aheloonaa kɛ mumɔŋ hiamɔ nii ahe nii ni amɛyeɔ amɛbuaa amɛ. Ajinafoi akuu nɛɛ ji mɛi ni halaa mɛi koni amɛsɔmɔ yɛ Betel, ni amɛtsuɔ saji fɛɛ ni kɔɔ mɛi ni sɔmɔɔ yɛ Betel lɛ he lɛ ahe nii.

▪ WOLO KALAMƆ AJINAFOI AKUU: Kuu nɛɛ kwɛɔ Biblia kasemɔ he woji akalamɔ kɛ amɛkɛmajemɔ nɔ yɛ jeŋ fɛɛ. Amɛkwɛɔ tsɔji ni akɛkalaa woji, tsui, kɛ nibii krokomɛi ni Yehowa Odasefoi asafo lɛ kɛtsuɔ nii lɛ anɔ. Ajinafoi akuu nɛɛ kwɛɔ koni akɛ shika ni akɛkeɔ kɛha Maŋtsɛyeli nitsumɔ lɛ yɛ jeŋ muu fɛɛ lɛ atsu nii jogbaŋŋ.

▪ SƆƆMƆ NITSUMƆ AJINAFOI AKUU: Ajinafoi akuu nɛɛ kwɛɔ shiɛmɔ nitsumɔ lɛ nɔ, ni amɛtsuɔ saji ni kɔɔ asafoi, gbɛgbalɔi, asafoŋ onukpai, kɛ nɔkwɛlɔi gbɛfalɔi ahe lɛ he nii. Amɛtoɔ Wɔ Maŋtsɛyeli Sɔɔmɔ lɛ he gbɛjianɔ, amɛhalaa mɛi ni esa akɛ amɛya Gilead Skul lɛ kɛ Sɔɔmɔ Tsɔsemɔ Skul lɛ, ni amɛtsɔɔ hei ni mɛi nɛɛ baayasɔmɔ yɛ.

▪ NITSƆƆMƆ AJINAFOI AKUU: Ajinafoi akuu nɛɛ toɔ nii ni atsɔɔ yɛ kpokpaa nɔ kpeei, kpokpaa wulu nɔ kpeei, kɛ asafoŋ kpeei ashishi lɛ he gbɛjianɔ. Amɛtoɔ Biblia mli tsɔsemɔ he gbɛjianɔ amɛhaa Betel weku lɛ, ni amɛkwɛɔ skul srɔtoi tamɔ Gilead Skul lɛ kɛ Gbɛgbalɔi Asɔɔmɔ Skul lɛ nɔ. Amɛtoɔ vidio kɛ saji ni amɔmɔɔ awoɔ kpãa nɔ lɛ hu ahe gbɛjianɔ.

▪ NIŊMAA AJINAAFOI AKUU: Ajinafoi akuu nɛɛ ji mɛi ni kwɛɔ koni aŋmala Biblia kasemɔ woji ní ajara aha Odasefoi kɛ maŋbii fɛɛ. Amɛhaa Biblia mli saji ahetoo, ni kɛ́ aŋma drama kɛ woji ni akwɛɔ nɔ kɛhaa maŋshiɛmɔ lɛ, amɛkwɛɔ akɛ nɔ ni aŋma lɛ ja lo. Amɛkwɛɔ wiemɔi ashishitsɔɔmɔ hu ni yaa nɔ yɛ je lɛŋ fɛɛ lɛ nɔ.

Bɔfo Paulo kɛ mɛi ni afɔ amɛ mu lɛ to gbɔmɔtso he, ni ema nɔ mi akɛ, henii lɛ eko fɛɛ eko he yɛ sɛɛnamɔ, ni amɛyeɔ amɛbuaa amɛ he, amɛsumɔɔ amɛhe, ní amɛfeɔ ekome kɛtsuɔ nitsumɔ ni Nyɔŋmɔ kɛwo amɛdɛŋ lɛ. (Rom. 12:4, 5; 1 Kor. 12:12-31) Yesu Kristo ni ji Yitso lɛ yeɔ ebuaa henii lɛ koni amɛfee ekome ní amɛkwɛ nitsumɔ lɛ nɔ jogbaŋŋ, ni ekɛ Biblia mli gbɛtsɔɔmɔ haa amɛ. (Efe. 4:15, 16; Kol. 2:19) Nɛkɛ ji bɔ ni ato Nɔyeli Kuu lɛ he gbɛjianɔ, ni Yehowa kɛ emumɔ krɔŋkrɔŋ lɛ kudɔɔ amɛ koni amɛtsɔɔ ewebii lɛ agbɛ.