Akɛ Ŋaatɛ Ŋmɛ Ŋsɛnii Mli

OBLAHII etɛ komɛi ni yɔɔ Central Afrika lɛ miitao amɛya kpokpaa wulu nɔ kpee ko ni abaafee yɛ amɛmaŋ lɛ mli lɛ. Te amɛaafee tɛŋŋ amɛyashɛ jɛmɛ? Amɛbɛ tsɔne, ni he ni abaafee kpee lɛ yɛ lɛ jekɛmɔ miihe ashɛ kilomitai 90, ni mlu yɛ gbɛ lɛ nɔ ni asaŋ enɔ yɛ dokoidokoi hu. Amɛfee amɛjwɛŋmɔ akɛ amɛbaayamã okɔokpei etɛ ni amɛkɛfã gbɛ lɛ, shi amɛnáaa eko ni yɔɔ hewalɛ bɔ ni amɛbaanyɛ amɛkɛfã gbɛ lɛ.

Asafoŋ onukpa ko ni amɛkɛ lɛ yɔɔ asafo mli lɛ na shihilɛ mli ni amɛyɔɔ lɛ, ni eŋɔ okɔokpe ni eyɔɔ lɛ eha amɛ—eji okɔokpe ni etsɛ moŋ shi ebaahi kɛ gbɛfãa. Etsɔɔ amɛ nɔ ni be ko ni eho lɛ, lɛ kɛ nyɛmimɛi komɛi feɔ kɛ amɛmiiya kpokpaa wulu nɔ kpee. Asafoŋ onukpa lɛ kɛɛ amɛ akɛ amɛyi etɛ lɛ fɛɛ amɛta okɔokpe kome lɛ fiofio kɛya kpee lɛ. Ewaaa, shi ebaabi ni amɛkɛ ŋaa ato he. Te aaafee tɛŋŋ ni mɛi etɛ aaata okɔokpe kome kɛfã gbɛ hu?

Nyɛmimɛi nɛɛ bakpe leebi maŋkpa ni amɛfimɔ amɛjatsui lɛ amɛ shwie okɔokpe lɛ nɔ, ni amɛyiŋ mra bɔni afee ni hulu lɛ akashã amɛ. Mɔ kome ta okɔokpe lɛ kɛyi gbɛ, ni mɛi enyɔ lɛ miishá amɛhe kɛmiinyiɛ esɛɛ. Beni klɛŋklɛŋ mɔ lɛ tá okɔokpe lɛ aaafee mitai 500 lɛ, ekɛ okɔokpe ni amɛfimɔ jatsui lɛ amɛshwie nɔ lɛ yakpasa tso ko. Ekɛ okɔokpe lɛ yama heni ejaraŋ ehaŋ mɛi enyɔ lɛ akɛ amɛaana, bɔni afee ni mɔ ko akabawo. Kɛkɛ ni lɛ hu ebɔi nantu tswaa.

Beni mɛi enyɔ lɛ bashɛ heni okɔokpe lɛ yɔɔ lɛ, amɛteŋ mɔ kome kwɔ ni mɔ kroko lɛ tsá nyiɛmɔ lɛ nɔ aaafee mitai 500 ekoŋŋ dani lɛ hu eshɛ enɔ. Akɛni nyɛmimɛi etɛ nɛɛ kɛ ŋaa to amɛgbɛfãa lɛ he ni amɛtswa amɛfai shi hu hewɔ lɛ, yɛ nɔ najiaŋ ni amɛ fɛɛ amɛaanyiɛ kilomitai 90 lɛ, amɛteŋ mɔ fɛɛ mɔ tswa nantu aaafee kilomitai 60 ni eta okɔokpe lɛ aaafee kilomitai 30. Amɛdeŋmegbomɔ lɛ efeee yaka. Amɛkɛ amɛnyɛmimɛi Kristofoi lɛ yakpe yɛ kpokpaa wulu nɔ kpee lɛ shishi, ni amɛná wiemɔ ni aha yɛ kpee lɛ shishi lɛ ahe sɛɛ. (5 Mose 31:12) Afi nɛɛ, ani obaatswa ofai shi ni oya kpokpaa wulu nɔ kpee ni abaafee yɛ he ni oyɔɔ lɛ?