Ani Ofee Klalo Akɛ Ooofã Ohemɔkɛyeli Lɛ He?

ANI okɛ shihilɛ ko ekpe pɛŋ ní ha onu he akɛ ofã ohemɔkɛyeli lɛ he? Susumɔ shihilɛ ni nyɛmi yoo ko ni atsɛɔ lɛ Susana ni eye afii 16 ni yɔɔ Paraguay lɛ kɛkpe lɛ he okwɛ. Gbi ko beni atsɔɔ amɛ nii yɛ skul lɛ, awie akɛ Yehowa Odasefoi lɛ kɛ “Kpaŋmɔ Momo” lɛ tsuuu nii ni amɛheee Yesu Kristo kɛ Maria nɔ amɛyeee. Awie hu akɛ Odasefoi lɛ feɔ shɛii yɛ jamɔŋ saji ahe ni ákɛ amɛsumɔɔ ni amɛgboi fe nɔ ni aaatsa amɛ. Eji oyɛ jɛmɛ kulɛ mɛni obaafee?

Susana sɔle eha Yehowa, kɛkɛ ni ewo enine nɔ. No mli lɛ, eshwɛ fioo ni abaakpa skul, no hewɔ lɛ ekɛɛ tsɔɔlɔ lɛ akɛ ebaasumɔ ni eŋmɛ lɛ gbɛ ni be kroko lɛ egbála ehemɔkɛyeli akɛ Yehowa Odasefonyo lɛ mli eha amɛ. Tsɔɔlɔ lɛ kpɛlɛ nɔ. Susana ŋɔ otsii enyɔ kɛsaa ehe, ni ekwɛ wolo bibioo ni ji Yehowa Odasefoi—Namɛi Ni? Mɛni Amɛheɔ Amɛyeɔ? lɛ mli.

Be ni ato ni ekɛgbála saji lɛ amli lɛ bashɛ. Susana tsɔɔ nɔ hewɔ ni atsɛɔ wɔ Yehowa Odasefoi lɛ. Eha klasbii lɛ le hiɛnɔkamɔ ni wɔyɔɔ lɛ he sane, kɛ nɔ hewɔ ni wɔkpɛlɛɛɛ ni agbala lá awo wɔ mli lɛ. No sɛɛ lɛ, eha klasbii lɛ hegbɛ ni amɛbi lɛ saji. Klasbii lɛ ateŋ mɛi babaoo hole amɛniji anɔ. Nyɛmi yoo fioo lɛ jɛ Ŋmalɛ lɛ mli eha sanebimɔi lɛ ahetoo, ni enɛ sa tsɔɔlɔ lɛ hiɛ naakpa.

Klasbii lɛ ateŋ mɔ kome wie akɛ, “Mitee Maŋtsɛyeli Asa ko nɔ, shi minaaa amaga ko yɛ jɛmɛ.” Tsɔɔlɔ lɛ bi Susana ni etsɔɔ nɔ hewɔ. Susana kane Lala 115:4-8 kɛ 2 Mose 20:4 lɛ. Tsɔɔlɔ lɛ naa kpɛ ehe ni ebi akɛ, “Mɛni hewɔ mɔ ni wɔsɔlemɔ tsũi lɛ mli eyi obɔ kɛ amagai be mli ni Biblia lɛ wieɔ eshiɔ amagai ni akɛtsuɔ nii lɛ?”

Sanebimɔ kɛ hetoohamɔ lɛ hé minitii 40. Susana bi eklasbii lɛ kɛji amɛbaasumɔ ni amɛkwɛ vidio ni ji No Blood—Medicine Meets the Challenge lɛ, ni amɛ fɛɛ amɛkpɛlɛ nɔ. Nɔ hewɔ lɛ, tsɔɔlɔ lɛ to gbɛjianɔ ni amɛkwɛ no enɔ jetsɛremɔ. Beni amɛkwɛ vidio lɛ amɛgbe naa lɛ, Susana ha klasbii lɛ le nibii krokomɛi ni akɛyeɔ lá najiaŋ ni Yehowa Odasefoi lɛ ateŋ mɛi komɛi kpɛlɛɔ nɔ lɛ ahe saji. Tsɔɔlɔ lɛ wie enɛ he akɛ: “Mileee akɛ ayɛ nibii krokomɛi babaoo ni abaanyɛ akɛye lá najiaŋ; asaŋ mileee akɛ sɛɛnamɔi yɛ lá ni akɛtsuuu nii lɛ he nɛkɛ. Ani Yehowa Odasefoi pɛ ji mɛi ni ahaa amɛ tsofa ni akɛyeɔ lá najiaŋ lɛ?” Beni eha tsɔɔlɔ lɛ le akɛ jeee Odasefoi pɛ ji mɛi ni ahaa amɛ lɛ, ekɛɛ akɛ,  “Kɛ́ Yehowa Odasefoi ba mishĩa lɛ, mabo amɛtoi.”

Susana saa ehe koni eyagbála saji amli etsɔɔ eklasbii lɛ minitii 20, shi nifeemɔ lɛ hé ŋmɛlɛtswai etɛ. Otsi sɛɛ lɛ, klasbii krokomɛi hu wie sɔlemɔi ni amɛyaa lɛ ahemɔkɛyelii lɛ ahe amɛtsɔɔ klas lɛ. Beni amɛgbe naa lɛ, abi amɛ saji pii, shi amɛnyɛɛɛ amɛfã amɛhemɔkɛyeli lɛ he. Tsɔɔlɔ lɛ bi amɛ akɛ, “Mɛni hewɔ nyɛnyɛɛɛ nyɛfã nyɛhemɔkɛyeli lɛ he tamɔ bɔ ni nyɛklasnyo ni ji Yehowa Odasefonyo lɛ fee lɛ?”

Amɛha hetoo akɛ: “Amɛ lɛ, amɛkaseɔ Biblia lɛ jogbaŋŋ. Shi wɔ lɛ wɔfeee nakai.”

Tsɔɔlɔ lɛ kwɛ Susana ni ekɛɛ lɛ akɛ: “Okaseɔ Biblia lɛ jogbaŋŋ diɛŋtsɛ, ni obɔɔ mɔdɛŋ ni otsu nɔ ni ekɛɔ lɛ he nii. Osa yijiemɔ.”

Kulɛ Susana baanyɛ amu enaa. Shi, etsɔ hemɔkɛyeli lɛ he ni efã lɛ nɔ efee enii etamɔ Israel gbekɛ yoo fioo ko ni atsĩii egbɛi atã ni Siriabii lɛ ŋɔ lɛ nom lɛ. Nakai gbekɛ yoo lɛ yaje Siria tatsɛ ni ji Naeman ni ye kpiti lɛ shĩa lɛ. Israel gbekɛ yoo lɛ kɛɛ ewura lɛ akɛ: “Miná ni minuntsɔ yaje gbalɔ ní yɔɔ Samaria lɛ ŋɔɔ kulɛ, eeetsá ekpiti nɛɛ eha lɛ kwa!” Gbekɛ yoo lɛ nu he akɛ esa akɛ eye anɔkwa Nyɔŋmɔ lɛ he odase. Enɛ ha enuŋtsɔ Naeman batsɔ Yehowa jálɔ.—2 Maŋ. 5:3, 17.

Nakai nɔŋŋ Susana hu nu he akɛ esa akɛ eye Yehowa kɛ ewebii lɛ ahe odase. Beni awie ashi Susana hemɔkɛyeli lɛ, ewie ni ekɛfã ehemɔkɛyeli lɛ he. Susana bo famɔ ni yɔɔ Ŋmalɛ lɛ mli lɛ toi akɛ: “Nuŋtsɔ, Kristo lɛ, nyɛbua lɛ krɔŋkrɔŋ yɛ nyɛtsuii amli; ni daa nɛɛ nyɛsaa nyɛhe nyɛtoa, koni nyɛná hetoo nyɛha mɔ fɛɛ mɔ ni biɔ nyɛ hiɛnɔkamɔ ní yɔɔ nyɛmli lɛ shishi lɛ, kɛ mlijɔlɛ kɛ gbeyeishemɔ.” (1 Pet. 3:15) Ani osaa ohe oto akɛ ooofã ohemɔkɛyeli lɛ he, ni ofãa he kɛ́ ona hegbɛ akɛ ofee nakai lɛ?

[Mfoniri ni yɔɔ baafa 17]

Nibii nɛɛ baanyɛ aye abua bo ni ofã ohemɔkɛyeli lɛ he