Sanebimɔi ni Jɛ Kanelɔi Adɛŋ

Bɔfo Paulo wie akɛ, “aaahere Israel fɛɛ yiwala.” (Rom. 11:26) Ani Paulo miitsɔɔ akɛ Yudafoi lɛ fɛɛ baatsake kɛba Kristojamɔ mli?

Dabi, jeee nakai ji bɔ ni Paulo tsɔɔ lɛ. Israelbii ni ji Abraham seshibii lɛ ekpɛlɛɛɛ Yesu nɔ ákɛ lɛ ji Mesia lɛ. Yɛ Yesu gbele sɛɛ lɛ, ebafee faŋŋ akɛ jeee Yudafoi fɛɛ baatsake kɛba Kristojamɔ mli. Kɛlɛ, wiemɔ ni Paulo wie akɛ “aaahere Israel fɛɛ yiwala” lɛ ji anɔkwale. Yɛ mɛɛ gbɛ nɔ?

Yesu kɛɛ Yudafoi ajamɔ mli hiɛnyiɛlɔi ni hi shi yɛ egbii lɛ amli lɛ akɛ: “Abaashɔ̃ Nyɔŋmɔ maŋtsɛyeli lɛ yɛ nyɛdɛŋ, ni aaaŋɔha jeŋmaŋ ko ní woɔ yibii.” (Mat. 21:43) Akɛni Israel maŋ lɛ kpoo Yesu hewɔ lɛ, Yehowa gbala ejwɛŋmɔ kɛtee maŋ hee ko ni ji mumɔ nɔ̃ lɛ nɔ. Paulo tsɛ́ maŋ nɛɛ akɛ “Nyɔŋmɔ Israel lɛ!”—Gal. 6:16.

Ŋmalɛi krokomɛi ni yɔɔ Kristofoi a-Hela Ŋmalɛi lɛ amli lɛ tsɔɔ akɛ “Nyɔŋmɔ Israel lɛ” ji Kristofoi 144,000 ni akɛ mumɔ efɔ amɛ mu lɛ. ( Rom. 8:15-17; Kpoj. 7:4) Kpojiemɔ 5:9, 10 lɛ tsɔɔ akɛ ahala Kristofoi ni afɔ amɛ mu lɛ “kɛjɛ akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli,” ni tsɔɔ akɛ jeee Yudafoi sɔŋŋ ji Nyɔŋmɔ Israel lɛ. Nɔ hewɔ ni ahala mumɔŋ Israel lɛ ji koni amɛtsɔmɔ ‘maŋtsɛmɛi kɛ osɔfoi, ni amɛye shikpɔŋ lɛ nɔ maŋtsɛ.’ Eyɛ mli akɛ Yehowa kpoo Israel maŋ lɛ moŋ, shi Israelbii lɛ baanyɛ aha akpata amɛ kɛ Nyɔŋmɔ teŋ akɛ aŋkroaŋkroi. Bɔfoi lɛ kɛ mra be mli Kristofoi krokomɛi babaoo fee nakai. Yɛ anɔkwale mli lɛ akɛ Yesu Kristo lá lɛ hé nakai Yudafoi lɛ taakɛ eji yɛ mɛi krokomɛi fɛɛ agbɛfaŋ lɛ.—1 Tim. 2:5, 6; Heb. 2:9; 1 Pet. 1:17-19.

Anɔkwale ni eji akɛ Yudafoi ni hi shi yɛ klɛŋklɛŋ afii 100 lɛ mli lɛ ateŋ mɛi babaoo ha hegbɛ ni amɛná akɛ amɛaafata Yesu he kɛye nɔ lɛ ŋmɛɛ amɛ lɛ fiteee Nyɔŋmɔ yiŋtoo lɛ. Nɔ ko nɔ ko nyɛŋ afite Yehowa yiŋtoo, ejaakɛ ewie kɛtsɔ gbalɔ Yesaia nɔ akɛ: “Nakai miwiemɔi ni jɛɔ midaaŋ lɛ hu aaafee: ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ, ni eeeha nɔ ni mitsu lɛ yɛ hewɔ lɛ aya nɔ!”—Yes. 55:11.

Nɔ ko nɔ ko nyɛŋ afite Nyɔŋmɔ yiŋtoo akɛ ehala mɛi 144,000 koni amɛkɛ e-Bi lɛ aye nɔ yɛ ŋwɛi lɛ. Biblia lɛ feɔ lɛ faŋŋ akɛ, Nyɔŋmɔ baafɔ mɛi 144,000 amu. Eshwɛŋ amɛteŋ mɔ kome po!—Kpoj. 14:1-5.

No hewɔ lɛ, beni Paulo ŋma akɛ “aaahere Israel fɛɛ yiwala” lɛ, no mli lɛ etsɔɔɔ akɛ Yudafoi lɛ fɛɛ baatsake kɛba Kristojamɔ mli. Yɛ no najiaŋ lɛ, nɔ ni etsɔɔ ji akɛ Nyɔŋmɔ baaha eyiŋ ni eto akɛ eha mumɔŋ Israelbii 144,000 afata e-Bi Yesu Kristo he kɛye nɔ yɛ ŋwɛi lɛ aba mli. Kɛ́ be ni Nyɔŋmɔ eto lɛ shɛ lɛ, abaahere mɛi ni afɔ amɛ mu lɛ fɛɛ ni ji “Israel fɛɛ” yiwala, ni amɛbaatsɔmɔ maŋtsɛmɛi kɛ osɔfoi yɛ Mesia Maŋtsɛyeli lɛ mli.—Efe. 2:8.

[Mfonirii ni yɔɔ baafa 28]

Ahala mɛi ni afɔ amɛ mu lɛ “kɛjɛ akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli”