Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Kɛ nakai ni lɛ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛɛ naagbai wuji Kristofoi komɛi kɛkpeɔ beni amɛbote gbalashihilɛ mli lɛ sɛɛ, ni mɛni esa akɛ amɛbɔ mɔdɛŋ amɛfee?

Ekolɛ Kristofoi komɛi ni ebote gbalashihilɛ mli lɛ baayɔse akɛ amɛkɛ amɛhefatalɔi lɛ kpãaa gbee yɛ shihilɛ mli nibii babaoo amli. Akɛni amɛle akɛ jeee gbalamlitsemɔ ni damɔɔɔ ŋmalɛ nɔ ji nɔ ni tsuɔ gbalashihilɛ mli naagbai ahe nii hewɔ lɛ, esa akɛ amɛmia amɛhiɛ koni amɛbaa amɛgbalashihilɛ lɛ yi.—4/15, baafa 17.

• Mɛɛ naagbai Kristofonyo ko ní yɔɔ hei ni akwɛɔ mɛi ni egbɔlɔ yɛ lɛ baanyɛ ekɛkpe?

Ekolɛ elé nyɛmimɛi ni yɔɔ asafo ni yɔɔ jɛmɛ lɛ mli lɛ. Ekolɛ mɛi ni yɔɔ he ni akwɛɔ mɛi ni egbɔlɔ lɛ yɛ lɛ hiɛ hemɔkɛyelii srɔtoi, ni amɛbaabɔ mɔdɛŋ akɛ amɛha ekɛ ehe awo amɛjamɔ mli nifeemɔi amli. Esa akɛ mɔ lɛ wekumɛi ni ji Kristofoi kɛ asafo ni yɔɔ jɛmɛ lɛ ale naagbai nɛɛ ní amɛye amɛbua lɛ.—4/15, baafa 25-27.

• Mɛɛ gbɛ̀i ejwɛ baanyɛ aye abua gbalashihilɛ mli hefatalɔi koni amɛtsu naagbai ahe nii?

Nyɛtoa be ni nyɛkɛsusua naagba lɛ he. (Jaj. 3:1, 7) Nyɛjɛa anɔkwayeli kɛ bulɛ mli nyɛtsɔa nyɛsusumɔi. (Efe. 4:25) Bo ohefatalɔ lɛ toi ni okpɛlɛ ehenumɔi anɔ. (Mat. 7:12) Nyɛbaa gbeekpamɔ yɛ bɔ ni nyɛtaoɔ ni nyɛtsu naagba lɛ he nii nyɛha lɛ he, ni nyɛfee ekome kɛtsu he nii. (Jaj. 4:9, 10)—5/1, baafa 10-12.

• Beni Yesu kɛɛ wɔsɔle ni akɛ wɔnyɔji lɛ ake wɔ lɛ, no mli lɛ mɛɛ nyɔji ahe ewieɔ lɛ?

Kɛ́ wɔkɛ Mateo 6:12 lɛ to Luka 11:4 lɛ he lɛ, wɔnaa faŋŋ akɛ nyɔji ni Yesu wie he lɛ kɔɔɔ shika he. Nyɔji ni ewie he lɛ kɔɔ eshai ahe. Esa akɛ wɔkase Nyɔŋmɔ kɛtsɔ mɛi krokomɛi ahe eshai ni wɔkɛaafa amɛ lɛ nɔ.—5/15, baafa 9.

• Mɛɛ ajinafoi akui srɔtoi amli ajara Nɔyeli Kuu lɛ mli bii lɛ awo?

Nɔkwɛlɔi Ajinafoi Akuu; Ajinafoi Akuu ni Kwɛɔ Betel Nitsulɔi Anɔ; Wolo Kalamɔ Ajinafoi Akuu; Sɔɔmɔ Nitsumɔ Ajinafoi Akuu; Nitsɔɔmɔ Ajinafoi Akuu; Niŋmaa Ajinafoi Akuu.—5/15, baafa 29.

• Mɛɛ odaseyeli yɔɔ ni tsɔɔ akɛ Noa Nu Afua lɛ hà shikpɔŋ muu lɛ fɛɛ nɔ?

Yesu he eye akɛ Nu Afua lɛ ba ni ehà shikpɔŋ muu lɛ fɛɛ nɔ. Bɔ ni Biblia lɛ tsɛ́ Nu Afua lɛ yisɛɛ kɛbɔ mɛi akɔkɔ lɛ tsɔɔ akɛ eji nɔ ko ni ba mli lɛɛlɛŋ.—6/1, baafa 8.

• Ani jeŋba ni awie he yɛ Romabii 1:24-32 lɛ kɔɔ Yudafoi lɛ ahe loo Jeŋmajiaŋbii lɛ ahe?

Eyɛ mli akɛ sane nɛɛ baanyɛ akɔ kui enyɔ lɛ fɛɛ ahe moŋ, shi Paulo miiwie Israelbii ni kɛ Mla lɛ tsuuu nii kɛjɛ blema lɛ ahe. Eyɛ mli akɛ Israelbii nɛɛ le akpɔi ni Nyɔŋmɔ wo amɛ lɛ moŋ, shi amɛhiii shi yɛ naa.—6/15, baafa 29.

• Nɛgbɛ ji ni he ni Tel Arad yɔɔ, ni mɛni hewɔ eji maŋ ni he hiaa waa lɛ?

Ato Blema maŋ ni ji Arad lɛ yɛ he ni amrɔ nɛɛ gɔŋ kpɔ bibioo ko yɔɔ yɛ Israel yɛ Ŋshɔ ni Egbo lɛ anaigbɛ. Shitsalɔi na gbɛkoi ni akɛtsu nii akɛ niŋmaa tɛtaoi srɔtoi yɛ he ni gɔŋ kpɔ bibioo nɛɛ yɔɔ lɛ. Aŋmala gbɛi ni yɔɔ Biblia lɛ mli lɛ yɛ ekomɛi anɔ, ni amɛhaa wɔnaa akɛ jeee Biblia lɛ pɛ mli akɛ Nyɔŋmɔ gbɛi lɛ tsu nii yɛ.—7/1, baafa 23-24.

• Mɛni hewɔ hiɛshikamɔ ni wɔkɛaayɔse wɔnyɛmɔ lɛ baanyɛ aha wɔná miishɛɛ lɛ?

Kɛ́ wɔkɛ otii wuji ni wɔnyɛŋ wɔshɛ he mamɔ wɔhiɛ lɛ, wɔfeɔ yeyeeye bɔ ni esaaa. Ni kɛlɛ, no etsɔɔɔ akɛ esa akɛ wɔfee anihao, ní wɔkɛ gbɔjɔmɔi ni wɔsusuɔ akɛ wɔyɔɔ lɛ ajie wɔnaa akɛ no haaa wɔnyɛ wɔtsu babaoo yɛ sɔɔmɔ nitsumɔ lɛ mli.—7/15, baafa 29.

• Mɛni ekolɛ nomɛi haŋ fɔlɔi anyɛ amɛkɛ amɛbii oblahii kɛ oblayei bibii lɛ anyɛ agba sane?

Ekolɛ bɔ ni oblahii kɛ oblayei bibii lɛ ahiɛ gboɔ, ní amɛtaoɔ heyeli, ní amɛsumɔɔɔ ni mɛi kɛ amɛhe awo amɛsaji amli lɛ baaha amɛmu amɛnaa. Fɔlɔi baanyɛ amɛkɛ amɛbii lɛ agba sane be mli ni amɛjeko gbɛ akɛ amɛaafee nakai, ní amɛbɔ mɔdɛŋ akɛ amɛaanu nɔ hewɔ ni amɛbii lɛ wieɔ saji komɛi lɛ shishi.—8/1, baafa 10-11.