Yehowa Kwaŋ Enɔkwafoi Lɛ
Yehowa Kwaŋ Enɔkwafoi Lɛ
“[Yehowa] kwaŋ enɔkwafoi lɛ. Abaabu amɛhe kɛya naanɔ kɛ̃.”—LALA 37:28, NW.
1, 2. (a) Mɛɛ nibii ni tee nɔ yɛ afi 900 D.Ŋ.B. afii lɛ amli lɛ ka anɔkwa ni Nyɔŋmɔ tsuji yeɔ lɛ lɛ? (b) Mɛɛ shihilɛi etɛ amli Yehowa bu enɔkwa tsuji lɛ ahe yɛ?
YƐ AFI 900 D.Ŋ.B. afii lɛ amli lɛ, ehe bahia ni Yehowa webii lɛ akpɛ amɛyiŋ. Kulɛ Israelbii lɛ yaagbá ta amɛwo amɛ sɔŋŋ amɛhe, shi kpɛlɛmɔ ni akpɛlɛ koni akutsei ni yɔɔ kooyigbɛ ní amɛtsui enyɔɔɔ amɛ mli lɛ aná amɛ diɛŋtsɛ amɛmaŋtsɛ lɛ tsĩ ta lɛ naa. Etsɛɛɛ ni Yerobeam ni ji maŋtsɛ hee ni awo yɛ akutsei nyɔŋma lɛ nɔ lɛ to jamɔ hee eha maŋbii lɛ fɛɛ koni enɔyeli lɛ akaje edɛŋ. Eetao koni maŋbii lɛ afi esɛɛ kwraa kɛmɔ shi. Mɛni Yehowa tsuji anɔkwafoi lɛ baafee? Ani amɛbaaya nɔ amɛye Nyɔŋmɔ ni amɛjáa lɛ lɛ anɔkwa? Amɛteŋ mɛi akpei abɔ fee nakai, ni Yehowa bu amɛhe yɛ anɔkwa ni amɛye lɛ hewɔ.—1 Maŋ. 12:1-33; 2 Kron. 11:13, 14.
2 Ŋmɛnɛ hu lɛ, aaka anɔkwa ni Nyɔŋmɔ tsuji yeɔ lɛ lɛ aakwɛ. Biblia lɛ bɔ kɔkɔ akɛ: “Nyɛhiɛ akãa shi, nyɛsaraa; ejaakɛ nyɛhenyɛlɔ, abonsam lɛ, nyiɛ tamɔ jata ni hũuɔ eetao mɔ ni eeemi.” Ani wɔbaanyɛ ‘wɔdamɔ shi shiŋŋ yɛ hemɔkɛyeli lɛ mli wɔtsĩ lɛ gbɛ’? (1 Pet. 5:8, 9) Nyɛhaa wɔsusua nifeemɔi komɛi ni tee nɔ beni awó Yerobeam maŋtsɛ yɛ afi 997 D.Ŋ.B. lɛ he wɔkwɛa, ni wɔkwɛ nɔ ni wɔbaanyɛ wɔkase kɛjɛ mli. Awa Yehowa anɔkwa tsuji lɛ ayi yɛ nakai jaramɔ bei lɛ amli. Beni amɛtsuɔ amɛnitsumɔi ni bɛ mlɛo lɛ ahe nii lɛ, anyɛ amɛnɔ hu koni amɛkwa amɛhemɔkɛyeli lɛ. Yɛ shihilɛi nɛɛ fɛɛ amli lɛ, Yehowa kwaaa enɔkwafoi lɛ, ni nakai nɔŋŋ ekwaŋ enɔkwa tsuji ni yɔɔ ŋmɛnɛ lɛ.—Lala 37:28, NW.
Beni Awaa Amɛ Yi
3. Mɛni hewɔ Maŋtsɛ David nɔyeli lɛ haaa maŋbii lɛ apiŋ lɛ?
3 Klɛŋklɛŋ lɛ, nyɛhaa wɔsusua nibii ni ha awó Yerobeam maŋtsɛ lɛ ahe wɔkwɛa. Abɛi 29:2 lɛ kɛɔ akɛ: “Kɛ́ mɔ fɔŋ miiye lumɔ lɛ, maŋ dɔmɔɔ ŋtsɔi.” Beni Maŋtsɛ David yeɔ nɔ yɛ blema Israel lɛ, maŋbii lɛ dɔmɔɔɔ ŋtsɔi. Eyɛ mli akɛ David yeee emuu moŋ nɛ, shi eye Nyɔŋmɔ anɔkwa ni ekɛ ehe fɔ̃ enɔ. David nɔyeli lɛ haaa maŋbii lɛ apiŋ. Yehowa kɛ David kpaŋ akɛ: “Owe kɛ omaŋtsɛyeli lɛ aaadamɔ shi shiŋŋ yɛ ohiɛ kɛaatee naanɔ: omaŋtsɛsɛi lɛ aaama shi shiŋŋ kɛaatee naanɔ!”—2 Sam. 7:16.
4. Mɛni esa akɛ Salomo kɛ maŋbii lɛ afee koni amɛya nɔ amɛná jɔɔmɔi?
4 Yɛ David bi Salomo nɔyeli lɛ shishijee mli lɛ, maŋbii lɛ atoiŋ jɔ amɛ ni amɛshwere aahu akɛ efee Kristo Yesu Afii Akpe Nɔyeli ni baaba lɛ he mfoniri yɛ gbɛ ni ja nɔ. (Lala 72:1, 17) Nɔ ko kwraa bɛ ni baaha Israel akutsei 12 lɛ ateŋ eko atse atua yɛ Salomo nɔyeli lɛ shishijee mli. Shi bɔni afee ni Salomo kɛ maŋbii lɛ aya nɔ aná jɔɔmɔi lɛ, esa akɛ amɛfee nɔ ko. Yehowa tsɔ hiɛ ekɛɛ Salomo akɛ: “Kɛji onyiɛ yɛ mikpɔi lɛ amli ni oye mimlai lɛ anɔ ni oto mikitai lɛ fɛɛ ni onyiɛ yɛ mli lɛ, no lɛ maha miwiemɔ ní mikɛ otsɛ David wie lɛ aba mli ahao; ni mahi shi yɛ Israelbii lɛ ateŋ, ni mishiŋ mimaŋ Israel.”—1 Maŋ. 6:11-13.
5, 6. Mɛni jɛ kwamɔ ni Salomo kwa Nyɔŋmɔ lɛ mli kɛba?
5 Beni Salomo gbɔ lɛ, ekwa Yehowa ni ebɔi amaga jamɔ. (1 Maŋ. 11:4-6) Fiofio lɛ Salomo kɛ Yehowa mlai lɛ kpa nitsumɔ ni eye mɛi anɔ dɛŋdɛŋ. Bɔ ni eye mɛi anɔ dɛŋdɛŋ yɛ nakai beaŋ lɛ naa wa aahu akɛ yɛ egbele sɛɛ lɛ, maŋbii lɛ tee nɔ amɛye he ŋkɔmɔ amɛtsɔɔ ebi nuu Rehabeam ní baye esɛɛ lɛ, ni amɛkpa lɛ fai ni ena mli eha amɛ. (1 Maŋ. 12:4) Mɛni Yehowa fee beni Salomo kwa lɛ lɛ?
6 Biblia lɛ kɛɔ wɔ akɛ: “Yehowa mli fũ Salomo, ejaakɛ etsui etsɔ kɛjɛ . . . Israel Nyɔŋmɔ lɛ he, tsɛ ejie ehe kpo etsɔɔ lɛ shii enyɔ.” Yehowa kɛɛ Salomo akɛ: “Gbii abɔ ní ofee enɛ, ní oyeee mikpaŋmɔ kɛ mikpɔi lɛ ní miwoo lɛ anɔ hewɔ lɛ, shɔ̃ kɛ̃ mashɔ̃ omaŋtsɛyeli lɛ yɛ odɛŋ, ni maŋɔ ha otsulɔ.”—1 Maŋ. 11:9-11.
7. Eyɛ mli akɛ Yehowa kpoo Salomo moŋ, shi mɛɛ gbɛ nɔ etsɔ eye ebua E-tsuji anɔkwafoi lɛ?
7 No sɛɛ lɛ, Yehowa tsu gbalɔ Ahia koni eyafɔ Yerobeam mu akɛ maŋtsɛ ni baakpɔ̃ maŋbii lɛ. Yerobeam ji nuu ni bɔɔ mɔdɛŋ waa, ni esɔmɔ akɛ Salomo tsulɔ. Yehowa ekuuu Maŋtsɛyeli he kpaŋmɔ ni ekɛ David fee lɛ mli, shi ekpɛlɛ koni aja maŋtsɛyeli lɛ mli enyɔ aha akutsei 12 lɛ. Yerobeam baaye akutsei nyɔŋma nɔ; ni Maŋtsɛ Rehabeam ni jɛ David wekutɔkpãa lɛ mli lɛ baaye akutsei enyɔ nɔ. (1 Maŋ. 11:29-37; 12:16, 17, 21) Yehowa kɛɛ Yerobeam akɛ: “Aaaba mli akɛ, kɛji obo mikitãi fɛɛ ní miwoo lɛ toi, ni onyiɛ migbɛ̀i lɛ anɔ, ni ofee nɔ ni ja yɛ mihiɛ lɛ, ni oye mikpɔi kɛ mikitãi lɛ anɔ, tamɔ bɔ ni mitsulɔ David fee lɛ, no lɛ mikɛo aaahi shi, ni mama shĩa ní ma shi shiŋŋ mahao, taakɛ bɔ ni mima miha David lɛ, ni maŋɔ Israel mahao.” (1 Maŋ. 11:38) Yehowa ye ebua ewebii lɛ ni ejie amɛ kɛjɛ yiwaa mli.
8. Mɛɛ yiwalɛ nifeemɔi haa Nyɔŋmɔ webii haoɔ ŋmɛnɛ?
8 Ŋmɛnɛ lɛ, yiwalɛ kɛ jalɛsane ni ayeee egbɛ eshwã he fɛɛ he. Jajelɔ 8:9 lɛ kɛɔ akɛ: ‘Gbɔmɔ yeɔ enaanyo gbɔmɔ nɔ ni ekɛyeɔ lɛ awui.’ Ekolɛ jarayelɔi hiɛjoolɔi kɛ nɔyelɔi ni yeee anɔkwa baaha wɔye ohia futaa. Bei pii lɛ, nɔyelɔi, nitsumɔtsɛmɛi kɛ jamɔŋ hiɛnyiɛlɔi feɔ nibii gbohii. Taakɛ nuu anɔkwafo Lot ji lɛ, Nyɔŋmɔ tsuji ni yɔɔ ŋmɛnɛ lɛ “hao yɛ nɔtɔlɔi lɛ anyenyeŋtswibɔɔ jeŋba lɛ he.” (2 Pet. 2:7) Kɛfata he lɛ, bei pii lɛ nɔyelɔi ni pupuuɔ amɛhe lɛ waa wɔ yi, tsɛbelɛ wɔhiɔ shi kpoo ni wɔkɛ Nyɔŋmɔ shishitoo mlai lɛ tsuɔ nii.—2 Tim. 3:1-5, 12.
9. (a) Mɛni Yehowa etsɔ hiɛ efee koni ekɛkpɔ̃ ewebii lɛ? (b) Mɛni hewɔ wɔbaanyɛ wɔná nɔmimaa akɛ Yesu baaye Nyɔŋmɔ anɔkwa be fɛɛ be lɛ?
9 Shi wɔbaanyɛ wɔná nɔmimaa akɛ Yehowa kwaŋ enɔkwa tsuji lɛ, ni anɔkwa sane nɛ! Bo lɛ susumɔ nɔyeli ni etsɔ hiɛ eto koni ekɛye je lɛŋ nɔyelɔi ní yeee anɔkwa lɛ anajiaŋ lɛ he okwɛ. Áto Nyɔŋmɔ Maŋtsɛyeli ni Mesia ni ji Kristo Yesu yeɔ nɔ lɛ shishi momo. Yesu Kristo bɔi nɔyeli yɛ ŋwɛi nɔ ni miihe ashɛ afii 100 nɛ. Etsɛŋ ni ebaaha mɛi ni sheɔ Nyɔŋmɔ gbɛi lɛ gbeyei lɛ aná hejɔlɛ. (Nyɛkanea Kpojiemɔ 11:15-18.) Yesu ye Nyɔŋmɔ anɔkwa kɛtee gbele mli. Ehaŋ mɛi ni ebaaye amɛnɔ lɛ anine anyɛ shi tamɔ bɔ ni Salomo fee lɛ kɔkɔɔkɔ.—Heb. 7:26; 1 Pet. 2:6.
10. (a) Te wɔɔfee tɛŋŋ wɔtsɔɔ akɛ wɔhiɛ sɔɔ Nyɔŋmɔ Maŋtsɛyeli lɛ? (b) Kɛ́ wɔkɛ kaai miikpe lɛ, mɛɛ nɔmimaa wɔbaanyɛ wɔná?
10 Nyɔŋmɔ Maŋtsɛyeli lɛ ji nɔyeli ni yɔɔ diɛŋtsɛ ní baafo yiwalɛ nifeemɔi fɛɛ asɛɛ. Wɔyeɔ Yehowa Nyɔŋmɔ anɔkwa ni wɔfiɔ enɔyeli lɛ sɛɛ. Akɛni wɔyɛ hekɛnɔfɔɔ kwraa yɛ Maŋtsɛyeli lɛ mli hewɔ lɛ, wɔkpoɔ je lɛŋ sui gbohii lɛ ni wɔkɛ ekãa tiuɔ nitsumɔi kpakpai asɛɛ. (Tito 2:12-14) Wɔbɔɔ mɔdɛŋ ni wɔhe akahi kpa ko yɛ je nɛŋ. (2 Pet. 3:14) Ekɔɔɔ he eko kaai ni wɔkɛbaakpe lɛ, wɔbaanyɛ wɔná nɔmimaa akɛ Yehowa baabu wɔhe kɛ́ aaka wɔhemɔkɛyeli lɛ. (Nyɛkanea Lala 97:10.) Kɛfata he lɛ, Lala 116:15 lɛ maa nɔ mi ehaa wɔ akɛ: “Yehowa mɛi krɔŋkrɔŋi lɛ agbele jara wa yɛ ehiɛ.” Yehowa tsuji ajara wa yɛ ehiɛ aahu akɛ eŋmɛŋ gbɛ ni akpata amɛhiɛ ákɛ kuu.
Beni Hemɔkɛyeli Kwalɔi Teɔ Shi Kɛwoɔ Amɛ
11. Te fee tɛŋŋ ni Yerobeam batsɔ mɔ ko ni yeee anɔkwa?
11 Kulɛ Maŋtsɛ Yerobeam nɔyeli lɛ baanyɛ aha Nyɔŋmɔ webii lɛ aná hejɔlɛ fioo. Yɛ no najiaŋ lɛ, enifeemɔi moŋ ka anɔkwa ni amɛyeɔ Nyɔŋmɔ lɛ. Yerobeam tsui enyɔɔɔ emli yɛ woo kɛ hegbɛ ni eyɔɔ akɛ maŋtsɛ lɛ he, no hewɔ lɛ etao gbɛ̀i anɔ ní eeetsɔ ewaje emaŋtsɛyeli lɛ. Eshwie eyiŋ akɛ: “Kɛji maŋ nɛɛ tee afɔleshãa yɛ Yehowa we lɛ yɛ Yerusalem lɛ, no lɛ maŋ nɛɛ tsui baatsɔ kɛya amɛnuŋtsɔ Rehabeam, Yuda maŋtsɛ lɛ, ŋɔɔ ekoŋŋ, ni amɛaagbemi, ni amɛaaku amɛsɛɛ kɛaatee Rehabeam, Yuda maŋtsɛ lɛ, ŋɔɔ ekoŋŋ.” Enɛ hewɔ lɛ, Yerobeam fee shika tsinabii enyɔ ni ekɛto jamɔ hee ko shishi. “Eŋɔ ekome ema Betel, ni eŋɔ ekome hu ema Dan. Ni nɛkɛ sane nɛɛ tsɔ esha; shi maŋ lɛ nyiɛ ekome lɛ hiɛ kɛtee Dan tɔ̃ɔ. Ni emamɔ shĩai yɛ hei grɔŋŋi lɛ, ni eŋɔɔ mɛi kɛjɛɔ maŋ lɛŋ he fɛɛ he ewoɔ amɛ osɔfoi, tsɛ amɛjɛɛɛ Levibii lɛ ateŋ.” Yerobeam diɛŋtsɛ to gbi koni “Israelbii lɛ aye gbijurɔ,” ni “eshã afɔle kɛ tsofã-kɛ-ŋma yɛ afɔleshãalatɛ lɛ nɔ.”—1 Maŋ. 12:26-33.
12. Beni Yerobeam to tsinabi amaga jamɔ yɛ Israel lɛ, mɛni Nyɔŋmɔ tsuji anɔkwafoi ni yɔɔ kooyigbɛ maŋtsɛyeli lɛ mli lɛ fee?
12 Mɛni Nyɔŋmɔ tsuji anɔkwafoi ni yɔɔ kooyigbɛ maŋtsɛyeli lɛ mli lɛ fee agbɛnɛ? Taakɛ amɛblematsɛmɛi ni ye anɔkwa lɛ fee lɛ, Levibii ni yɔɔ maji ni akɛha amɛ lɛ amli yɛ kooyigbɛ maŋtsɛyeli lɛ mli lɛ kpɛ amɛyiŋ amrɔ nɔŋŋ. (2 Mose 32:26-28; 4 Mose 35:6-8; 5 Mose 33:8, 9) Amɛshi amɛgboshinii lɛ ni amɛkɛ amɛwekui lɛ fã kɛtee wuoyigbɛ yɛ Yuda, ni amɛtee nɔ amɛjá Yehowa yɛ jɛmɛ ni nɔ ko etsĩii amɛnaa. (2 Kron. 11:13, 14) Israelbii krokomɛi ní eyato gbɔ yɛ Yuda lɛ hala akɛ amɛbaaya nɔ amɛhi jɛmɛ kwraa moŋ fe nɔ ni amɛaaku amɛ sɛɛ kɛya amɛmaŋ. (2 Kron. 10:17) Yehowa haaa anɔkwa jamɔ agu bɔni afee ni kooyigbɛ maŋtsɛyeli lɛ mli yinɔbii ni baaba yɛ sɛɛ mli lɛ afɔ̃ɔ amaga jamɔ lɛ ni amɛku amɛsɛɛ kɛba Yuda.—2 Kron. 15:9-15.
13. Mɛɛ gbɛ nɔ hemɔkɛyeli kwalɔi ebɔ mɔdɛŋ akɛ amɛná Nyɔŋmɔ webii anɔ hewalɛ ŋmɛnɛ?
13 Ŋmɛnɛ lɛ, hemɔkɛyeli kwalɔi bɔɔ mɔdɛŋ akɛ amɛná Nyɔŋmɔ webii anɔ hewalɛ. Nɔyelɔi komɛi bɔɔ mɔdɛŋ akɛ amɛto amɛ diɛŋtsɛ amɛjamɔ, ni amɛnyɛɔ maŋbii lɛ anɔ koni amɛkɛ amɛhe awo mli. Kristendom osɔfoi lɛ kɛ henɔwolɔi krokomɛi kɛɔ akɛ amɛji “maŋtsɛmɛi ni yeɔ osɔfoi” lɛ. Shi anɔkwa Kristofoi ateŋ pɛ anaa mɛi diɛŋtsɛ ni afɔ amɛ mu ni ji “maŋtsɛmɛi ni yeɔ osɔfoi” lɛ yɛ.—1 Pet. 2:9; Kpoj. 14:1-5.
14. Te esa akɛ wɔfee wɔnii wɔha tɛŋŋ yɛ hemɔkɛyeli kwamɔ he?
14 Taakɛ Levibii anɔkwafoi ni hi shi yɛ afi 900 D.Ŋ.B. afii lɛ amli ji lɛ, Nyɔŋmɔ tsuji anɔkwafoi ni yɔɔ ŋmɛnɛ lɛ haaa hemɔkɛyeli kwalɔi alaka amɛ. Mɛi ni afɔ amɛ mu lɛ kɛ amɛnanemɛi Kristofoi lɛ ahe feɔ oya ni amɛtsiɔ amɛhe kɛjɛɔ hemɔkɛyeli kwalɔi ahe, ni amɛkpoɔ amɛ. (Nyɛkanea Romabii 16:17.) Eyɛ mli akɛ wɔjɛɔ wɔsuɔmɔ mli wɔbaa wɔhe shi wɔhaa maŋ nɔyelɔi lɛ yɛ saji ni kɔɔɔ jamɔ he lɛ amli moŋ, shi wɔwuuu tai ni yaa nɔ yɛ je lɛŋ lɛ eko, ni wɔfiɔ Nyɔŋmɔ Maŋtsɛyeli lɛ sɛɛ. (Yoh. 18:36; Rom. 13:1-8) Wɔkpoɔ mɛi ni kɛɔ akɛ amɛsɔmɔɔ Nyɔŋmɔ shi amɛkɛ amɛnifeemɔi gbeɔ ehe guɔ lɛ.—Tito 1:16.
15. Mɛni hewɔ esa akɛ wɔfi “tsulɔ anɔkwafo kɛ nilelɔ” lɛ sɛɛ?
15 Susumɔ anɔkwale ni eji akɛ Yehowa eha mɛi ni hiɛ tsui kpakpa lɛ ená hegbɛ koni amɛshi jeŋ fɔŋ nɛɛ mli yɛ mfonirifeemɔŋ, ní amɛbote mumɔŋ paradeiso ni eto lɛ mli lɛ hu he okwɛ. (2 Kor. 12:1-4) Akɛni wɔhiɛ esɔ enɛ waa hewɔ lɛ, wɔnyiɛɔ “tsulɔ anɔkwafo kɛ nilelɔ mɔ ni enuŋtsɔ ŋɔ lɛ eto ewebii lɛ anɔ, koni eha amɛ amɛŋmaa yɛ be ni sa nɔ lɛ” sɛɛ kpaakpa. Kristo eŋɔ tsulɔ nɛɛ “eto enii fɛɛ kwa nɔ.” (Mat. 24:45-47) Enɛ hewɔ lɛ, kɛ́ wɔnuuu gbɛtsɔɔmɔi komɛi ni tsulɔ kuu lɛ kɛhaa lɛ ashishi jogbaŋŋ po lɛ, esaaa akɛ wɔkpoo nakai gbɛtsɔɔmɔi lɛ, loo wɔku wɔ sɛɛ kɛya Satan je lɛŋ. Yɛ no najiaŋ lɛ, esa akɛ anɔkwayeli atsirɛ wɔ ni wɔba wɔhe shi wɔha amɛ, ní wɔmɛ kɛyashi Yehowa baaha nibii afee faŋŋ aha wɔ.
Beni Wɔtsuɔ Nitsumɔ ni Nyɔŋmɔ Kɛwo Wɔdɛŋ Lɛ
16. Mɛɛ nitsumɔ atuu awo gbalɔ ko ni jɛ Yuda lɛ dɛŋ?
16 Yehowa bu Yerobeam fɔ́ yɛ ehemɔkɛyeli kwamɔ lɛ hewɔ. Etsu gbalɔ ko kɛjɛ Yuda kɛtee kooyigbɛ yɛ Betel koni eya Yerobeam ŋɔɔ ní eyanina lɛ beni eeshã afɔle yɛ efɔleshãalatɛ lɛ nɔ. Esa akɛ gbalɔ lɛ ayajaje kojomɔ shɛɛ sane ni naa wa eshi Yerobeam. Ekã shi faŋŋ akɛ, nitsumɔ ni wa nɛ.—1 Maŋ. 13:1-3.
17. Mɛɛ gbɛ nɔ Yehowa tsɔ ebu etsulɔ lɛ he koni akafee lɛ efɔŋ ko?
17 Beni Yerobeam nu Yehowa kojomɔ shɛɛ sane lɛ, emli wo la naakpa. Ekpa enine mli etsɔɔ Nyɔŋmɔ najiaŋdamɔlɔ lɛ, ni ebo ekɛɛ hii ni damɔ jɛmɛ akɛ: “Nyɛmɔa lɛ!” Shi amrɔ nɔŋŋ lɛ, “enine ni ekpã mli yɛ enɔ lɛ shɔ̃ kekeree, ni enyɛɛɛ esu dɔŋŋ. Ni afɔleshaa latɛ lɛ mli gbá, ni lamlu lɛ jɛ afɔleshaa latɛ lɛ nɔ shwie shi.” Enɛ ha Yerobeam kpa gbalɔ lɛ fai agbɛnɛ koni esɔle eha lɛ ní Yehowa atsa enine ní eshɔ̃ kekeree lɛ. Gbalɔ lɛ kpa Yehowa fai, ni atsa nine lɛ. No hewɔ lɛ, Yehowa bu etsulɔ lɛ he koni akafee lɛ efɔŋ ko.—1 Maŋ. 13:4-6.
18. Mɛɛ gbɛ nɔ Yehowa tsɔɔ ebuɔ wɔhe be mli ni wɔkɛ ekãa sɔmɔɔ lɛ lɛ?
18 Be mli ni wɔtsuɔ Maŋtsɛyeli shiɛmɔ kɛ kaselɔi afeemɔ nitsumɔ lɛ jogbaŋŋ lɛ, be komɛi lɛ mɛi teɔ shi amɛwoɔ wɔ loo amɛbooo wɔ toi. (Mat. 24:14; 28:19, 20) Shi esaaa akɛ wɔhaa bɔ ni mɛi boŋ wɔ toi lɛ baa ekãa ni wɔkɛtsuɔ shiɛmɔ nitsumɔ lɛ shi. Taakɛ gbalɔ ni hi shi yɛ Yerobeam gbii lɛ amli ni atsĩii egbɛi lɛ tã lɛ ji lɛ, ‘wɔsɔmɔɔ Yehowa ni gbeyeishemɔ ko bɛ mli yɛ anɔkwayeli mli.’ * (Luka 1:74, 75) Eyɛ mli akɛ ŋmɛnɛ lɛ wɔkpaaa gbɛ akɛ Yehowa afee naakpɛɛ nii yɛ wɔgbɛfaŋ moŋ, shi ákɛ e-Dasefoi lɛ, etsɔɔ emumɔ krɔŋkrɔŋ lɛ kɛ ebɔfoi lɛ anɔ ebuɔ wɔhe ni efãa wɔhe. (Nyɛkanea Yohane 14:15-17; Kpojiemɔ 14:6.) Nyɔŋmɔ kwaŋ mɛi ni kɛ ekãa yaa nɔ amɛshiɛɔ ewiemɔ lɛ kɔkɔɔkɔ.—Filip. 1:14, 28.
Yehowa Baabu Enɔkwafoi lɛ Ahe
19, 20. (a) Mɛni hewɔ wɔbaanyɛ wɔná nɔmimaa akɛ Yehowa kwaŋ wɔ kɔkɔɔkɔ lɛ? (b) Mɛɛ sanebimɔi abaasusu he yɛ nikasemɔ ni nyiɛ sɛɛ lɛ mli?
19 Yehowa ji wɔ-Nyɔŋmɔ ni yeɔ anɔkwa. (Kpoj. 15:4; 16:5) “Durolɔ [loo anɔkwafo] ji lɛ yɛ enitsumɔi fiaa mli.” (Lala 145:17) Ni Biblia lɛ maa nɔ mi ehaa wɔ akɛ: “Ebaa emɛi krɔŋkrɔŋi [loo enɔkwafoi] lɛ agbɛ̀i lɛ ayi.” (Abɛi 2:8) Kɛ́ Nyɔŋmɔ tsuji anɔkwafoi lɛ miitsu enitsumɔ ko ni wa, loo amɛkɛ kaai kpe, loo hemɔkɛyeli kwalɔi te shi amɛwo amɛ lɛ, amɛbaanyɛ amɛná nɔmimaa akɛ Yehowa baabu amɛhe ni ebaatsɔɔ amɛ gbɛ.
20 Esa akɛ wɔteŋ mɔ fɛɛ mɔ asusu sane nɛɛ he agbɛnɛ: Mɛni baaye abua mi ni maya nɔ maye Yehowa anɔkwa yɛ kaai ni ekolɛ mikɛbaakpe lɛ fɛɛ asɛɛ? Yɛ gbɛ kroko nɔ lɛ, te mafee tɛŋŋ maya nɔ maye Nyɔŋmɔ anɔkwa?
[Shishigbɛ niŋmaa]
^ kk. 18 Nikasemɔ ni nyiɛ sɛɛ lɛ baaha wɔle kɛji gbalɔ lɛ tee nɔ ebo Yehowa toi loo efeee nakai, kɛ nɔ ni jɛ mli kɛba.
Te Obaaha Hetoo Oha Tɛŋŋ?
• Mɛɛ gbɛ nɔ Yehowa etsɔɔ yɛ akɛ ekwaaa enɔkwafoi lɛ be mli ni awaa amɛ yi lɛ?
• Te esa akɛ wɔfee wɔnii wɔha tɛŋŋ yɛ hemɔkɛyeli kwamɔ he?
• Mɛɛ gbɛ nɔ Yehowa tsɔɔ ebuɔ enɔkwafoi lɛ ahe beni amɛkɛ amɛhe woɔ Kristofoi ashiɛmɔ nitsumɔ lɛ mli lɛ?
[Nikasemɔ lɛ he Sanebimɔi]
[Shikpɔŋ he mfoniri/Mfoniri ni yɔɔ baafa]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
KOOYIGBƐ MAŊTSƐYELI (Yerobeam)
YERUSALEM
Dan
SHEKEM
Betel
WUOYIGBƐ MAŊTSƐYELI (Rehabeam)
YERUSALEM
[Mfoniri]
Yehowa kwaaa enɔkwafoi lɛ beni Yerobeam to amaga jamɔ lɛ shishi lɛ
[Mfoniri ni yɔɔ baafa 3]
Jɔɔmɔi ni Salomo kɛ maŋbii lɛ ná lɛ baaa trukaa