Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Kɛ́ nakai ni lɛ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛɛ gbɛ nɔ wɔɔtsɔ wɔkɛ naatselɛ awie ‘wiemɔ krɔŋŋ,’ ni ji anɔkwale ni kɔɔ Nyɔŋmɔ kɛ eyiŋtoi ahe lɛ? (Zef. 3:9)

Taakɛ eji yɛ wiemɔ ko kasemɔ gbɛfaŋ lɛ, esa akɛ wɔbo sane toi jogbaŋŋ, wɔkase wielɔi ni naa tse lɛ, wɔkase Biblia mli woji ní ato naa lɛ agbɛi kɛ ŋmalɛi komɛi wɔwo wɔyitsoŋ, wɔtĩ nibii ni wɔkaseɔ lɛ amli, wɔkane nii ni anu, wɔsusu wiemɔ he mlai loo tsamɔ wiemɔi akadi lɛ he, wɔya nɔ wɔkase, wɔto be pɔtɛɛ wɔha nikasemɔ, ni wɔkafɔ̃ɔ wiemɔ bɔni afee ni wɔkɛ naatselɛ awie ‘wiemɔ krɔŋŋ’ lɛ.—8/15, baafa 21-25.

• Mɛni ji nibii komɛi ni baatsɔɔ akɛ mɔ ko le bɔ ni Nyɔŋmɔ ji?

“Yehowa ji egbɛi,” ni eesumɔ ni wɔle lɛ nakai. (2 Mose 15:3) Eji “suɔmɔ kɛ hejɔlɛ Nyɔŋmɔ.” (2 Kor. 13:11) Eji “Mawu nilelɔ” kɛ ‘yiwalaheremɔ Nyɔŋmɔ.’ (1 Sam. 2:3; Lala 25:5) No hewɔ lɛ, Nyɔŋmɔ baatsi ebɛŋkɛ mɛi ni le lɛ lɛ.—9/1, baafa 4-7.

• Te wiemɔ ni ji “kpãa ni akɛbɔ he shii etɛ” lɛ baanyɛ akɔ gbalashihilɛ he eha tɛŋŋ?

Wiemɔ ni ji “kpãa ni akɛbɔ he shii etɛ” lɛ ji fɔŋwiemɔ. (Jaj. 4:12) Kɛ́ akɛ wiemɔ nɛɛ kɔ gbalashihilɛ he lɛ, etsɔɔ akɛ alò wu lɛ kɛ ŋa lɛ, ni ji klɛŋklɛŋ kpãai enyɔ lɛ afata Nyɔŋmɔ, ni ji kpãa ni yɔɔ teŋ lɛ he. Akɛni wu lɛ kɛ ŋa lɛ kɛ Nyɔŋmɔ efee ekome hewɔ lɛ, no kanyaa amɛ koni amɛdamɔ naagbai anaa, ni no haa amɛnáa miishɛɛ.—9/15, baafa 16.

• Mɛni he “niji-kɛ-nɔshwiemɔ” ni yɔɔ Hebribii 6:2 lɛ kɔɔ?

Ekã shi faŋŋ akɛ ekɔɔ niji ní aŋɔshwieɔ mɛi anɔ koni amɛná mumɔ krɔŋkrɔŋ lɛ duromɔ keenii lɛ eko lɛ he, shi jeee asafoŋ onukpai aholemɔ. (Bɔf. 8:14-17; 19:6)—9/15, baafa 32.

• Mɛɛ gbɛ nɔ asafoŋ onukpai lɛ aaanyɛ amɛkɛ woo aha mɛi krokomɛi?

Gbɛ kome ni asafoŋ onukpa ko baanyɛ atsɔ nɔ afee nakai ji ní ekakɛɛ mɛi akɛ amɛfee nibii ni lɛ diɛŋtsɛ lɛ esumɔɔɔ akɛ efeɔ lɛ kɔkɔɔkɔ. Agbɛnɛ hu ejieɔ woo kpo etsɔɔ mɛi kɛ́ etsɔɔ amɛ yiŋtoi ahewɔ ni ekɛ gbɛtsɔɔmɔ ko haa amɛ, loo nɔ hewɔ ni ekɛɛ amɛfee nɔ ko.—10/15, baafa 22.

• Mɛni ji nibii komɛi ni haa mɔ hiɛɔ ehe ni etuu eha egbalashihilɛ lɛ mli daa?

Amɛteŋ enyɔ ji: (1) Okɛ ogbalashihilɛ lɛ aye klɛŋklɛŋ gbɛhe. (2) Kwa nibii fɛɛ ni tsɔɔ akɛ mɔ yeee anɔkwa lɛ. Kɛ́ naagba yɛ nyɛgbalashihilɛ lɛ mli jio naagba bɛ mli jio lɛ, ehe miihia ni oha ohefatalɔ lɛ ale akɛ otswa ofai shi akɛ obaaha nyɛgbalashihilɛ lɛ aye omanye; nibii enyɔ nɛɛ baaye abua.—10/1, baafa 12-15. *

• Mɛni asafoŋ onukpa ko baanyɛ akase kɛjɛ bɔ ni Israel tookwɛlɔ kɛ tookwɛmɔ tso tsuɔ nii ehaa lɛ mli?

Tookwɛlɔ kɛ tso kpalaa etooi lɛ. Kɛ́ tooi lɛ miibote tooi atsũ lɛ mli loo amɛmiije kpo lɛ, ‘amɛtsɔɔ tookwɛlɔ tso lɛ shishi,’ koni tookwɛlɔ lɛ akane amɛ. (3 Mose 27:32) Nakai nɔŋŋ hu ehe hiaa ni Kristofonyo tookwɛlɔ lɛ ale Nyɔŋmɔ tooku ní akɛ amɛnɔkwɛmɔ ewo edɛŋ lɛ jogbaŋŋ ní ele shihilɛ mli ni eko fɛɛ eko yɔɔ.—11/15, baafa 9.

[Shishigbɛ niŋmaa]