Ná Miishɛɛ Yɛ Kaselɔ Feemɔ Nitsumɔ Lɛ Mli
Ná Miishɛɛ Yɛ Kaselɔ Feemɔ Nitsumɔ Lɛ Mli
‘No hewɔ lɛ nyɛyaa ni nyɛyafea kaselɔi.’—MAT. 28:19.
1-3. (a) Te mɛi babaoo nuɔ hegbɛ ni amɛná akɛ amɛfee Biblia mli nikasemɔ lɛ he amɛhaa tɛŋŋ? (b) Mɛɛ sanebimɔi ahe wɔbaasusu?
NYƐMI yoo ko ni fata Kristofoi akuu ko ni wieɔ Hindi wiemɔ lɛ ahe yɛ United States lɛ ŋma akɛ: “Mikɛ weku ko ni jɛ Pakistan lɛ bɔi nikasemɔ otsii 11 nɛ. Wɔbatsɔmɔ nanemɛi. Kɛ́ mikai akɛ etsɛŋ ni weku nɛɛ baaku amɛsɛɛ kɛya Pakistan lɛ, mihiŋmɛiiaŋ tɔɔ nu. Jeee shimɔ ni minanemɛi nɛɛ baashi mi lɛ pɛ kɛkɛ hewɔ mihiŋmɛiiaŋ tɔɔ nu lɛ, shi moŋ miishɛɛ hu ni miná akɛ miitsɔɔ amɛ Yehowa he nii lɛ hewɔ.”
2 Ani okɛ mɔ ko ekase Biblia lɛ ni oná miishɛɛ tamɔ nyɛmi yoo nɛɛ pɛŋ? Yesu kɛ ekaselɔi ni hi shi yɛ klɛŋklɛŋ afii 100 lɛ mli lɛ ná miishɛɛ waa yɛ kaselɔ feemɔ nitsumɔ lɛ mli. Beni kaselɔi 70 ni Yesu etsɔse amɛ lɛ ku amɛsɛɛ kɛ amaniɛbɔɔ ni yɔɔ miishɛɛ lɛ, Yesu diɛŋtsɛ hu “mli fili lɛ yɛ Mumɔ krɔŋkrɔŋ lɛ mli.” (Luka 10:17-21) Nakai nɔŋŋ ŋmɛnɛ lɛ, mɛi babaoo náa miishɛɛ waa yɛ kaselɔ feemɔ nitsumɔ lɛ mli. Nɔ ni maa enɛ nɔ mi ji akɛ yɛ afi 2007 lɛ, shiɛlɔi ni tsuɔ nii waa ni yɔɔ miishɛɛ hu lɛ kɛ mɛi aaafee akpekpei ekpaa kɛ fã kase Biblia lɛ daa nyɔɔŋ nɔ!
3 Shi kɛlɛ, shiɛlɔi komɛi efeee Biblia mli nikasemɔ. Ekolɛ mɛi krokomɛi hu fee eko etsɛ. Mɛɛ naagbai ekolɛ wɔkɛbaakpe beni wɔbɔɔ mɔdɛŋ akɛ wɔfee Biblia mli nikasemɔ lɛ? Te wɔɔfee tɛŋŋ wɔtsu nakai naagbai lɛ ahe nii? Ni mɛɛ sɛɛ wɔnáa kɛ́ wɔbɔ mɔdɛŋ fɛɛ ni wɔɔnyɛ kɛbo Yesu famɔ akɛ: ‘No hewɔ lɛ nyɛyaa ni nyɛyafea kaselɔi’ lɛ toi?—Mat. 28:19.
Naagbai ni Baanyɛ Afite Wɔmiishɛɛ
4, 5. (a) Te mɛi babaoo feɔ amɛnii amɛhaa tɛŋŋ yɛ sanekpakpa lɛ he yɛ je lɛŋ hei komɛi? (b) Mɛɛ naagbai shiɛlɔi kɛkpeɔ yɛ hei krokomɛi?
4 Yɛ je lɛŋ hei komɛi lɛ, mɛi kɛ miishɛɛ kpɛlɛɔ wɔwoji lɛ anɔ, ni amɛnyaa he akɛ wɔ kɛ amɛ aaakase Biblia lɛ. Nuu ko kɛ eŋa ni amɛjɛ Australia ní amɛkɛ be kukuoo miisɔmɔ yɛ Zambia lɛ ŋma akɛ: “Saji ni wɔnu lɛ ji anɔkwale. Mɛi babaoo boɔ sanekpakpa lɛ toi yɛ Zambia. Gbɛjegbɛi ahe odaseyeli lɛ yɛ miishɛɛ pam! Mɛi bɛŋkɛɔ wɔ tɛ̃ɛ, ni mɛi komɛi po biɔ wɔ ni wɔha amɛ woji tɛtrɛbii pɔtɛɛi komɛi.” Yɛ nyɛsɛɛ afi ko mli lɛ, nyɛmimɛi hii kɛ yei ni yɔɔ Zambia lɛ fee Biblia mli nikasemɔi ni fa fe 200,000—ni tsɔɔ akɛ kɛ́ aja mli lɛ shiɛlɔ fɛɛ shiɛlɔ fee Biblia mli nikasemɔ ni fe ekome.
5 Shi yɛ je lɛŋ hei komɛi hu lɛ, ekolɛ ewaa ehaa shiɛlɔi akɛ amɛaaha woji ní amɛkɛ mɛi akase Biblia lɛ daa. Mɛni hewɔ? Bei pii lɛ, shiɛlɔi eyanaaa mɛi yɛ amɛshĩai, ni ekolɛ mɛi ni nine shɛɔ amɛnɔ yɛ shĩa lɛ hu bɛ jamɔ he miishɛɛ. Ekolɛ akɛ Nyɔŋmɔjamɔ tsɔseee amɛ, loo ekolɛ osatofeemɔi ni yaa nɔ yɛ apasa jamɔ mli lɛ eha amɛnyaaa jamɔ he. Amale tookwɛlɔi eye mɛi babaoo awui yɛ mumɔŋ—amɛha etɔ mɛi nɛɛ ni amɛfee yuyaa. (Mat. 9:36) Ekã shi faŋŋ akɛ ekolɛ mɛi ni tamɔ nɛkɛ lɛ sumɔŋ ni akɛ amɛ agba Biblia lɛ he sane.
6. Mɛɛ naagbai ekolɛ shiɛlɔi komɛi kɛkpeɔ?
6 Shiɛlɔi anɔkwafoi komɛi kɛ kaa kroko ni baanyɛ afite amɛmiishɛɛ kpeɔ. Eyɛ mli akɛ be ko ni eho lɛ amɛtsu babaoo yɛ kaselɔ feemɔ nitsumɔ lɛ mli moŋ, shi amrɔ nɛɛ hela loo gbɔlɛ eha amɛnyɛɛɛ babaoo amɛtsu. Susumɔ fatɔɔi komɛi ni ekolɛ wɔbaasusu akɛ wɔyɔɔ ní wɔkɛaahao wɔhe lɛ hu ahe okwɛ. Ákɛ nɔkwɛmɔnɔ lɛ, ani onuɔ he akɛ onyɛŋ okɛ mɔ ko akase Biblia lɛ? Ekolɛ obaanu he tamɔ bɔ ni Mose nu he beni Yehowa tsu lɛ ni ekɛ Farao ayawie lɛ. Mose kɛɛ akɛ: “Ofainɛ, mi-Nuŋtsɔ! Minaa tseee kɛjɛ jeeŋmɔ beebe.” (2 Mose 4:10) Gbeyei ni wɔɔshe akɛ wɔyeŋ omanye lɛ hu baaha wɔnu he akɛ wɔhe esako. Ekolɛ wɔbaahao wɔhe akɛ wɔjeee tsɔɔlɔi ni he esa ní baanyɛ aye abua mɔ ko ni ebatsɔ kaselɔ. Ni enɛ hewɔ lɛ, ekolɛ wɔbaakpɛ wɔyiŋ akɛ wɔkɛ mɔ ko ekaseŋ Biblia lɛ. Te wɔɔfee tɛŋŋ wɔtsu naagbai nɛɛ ahe nii?
Saamɔ Otsui
7. Mɛni wo Yesu hewalɛ yɛ esɔɔmɔ nitsumɔ lɛ mli?
7 Nɔ̃ klɛŋklɛŋ ni esa akɛ wɔfee ji ní wɔsaa wɔ diɛŋtsɛ wɔtsui. Yesu kɛɛ akɛ: ‘Nɔ ni eyi tsui eteke nɔ lɛ, no naabu wieɔ.’ (Luka 6:45) Mɛi krokomɛi ahilɛkɛhamɔ kã Yesu tsui nɔ, ni no wo lɛ hewalɛ yɛ esɔɔmɔ nitsumɔ lɛ mli. Ákɛ nɔkwɛmɔnɔ lɛ, beni ena akɛ wekukpaa kpakpa bɛ emaŋbii ni ji Yudafoi lɛ kɛ Nyɔŋmɔ teŋ lɛ, “emusuŋ tsɔ̃ lɛ yɛ amɛhewɔ.” Ekɛɛ ekaselɔi lɛ akɛ: “Nikpamɔ lɛ fá . . . Nyɛkpaa nikpamɔ nuŋtsɔ lɛ fai, koni ewo nitsulɔi agbɛ kɛba enikpamɔ lɛ mli.”—Mat. 9:36-38.
8. (a) Mɛni esa akɛ wɔsusu he jogbaŋŋ? (b) Mɛni wɔbaanyɛ wɔkase kɛjɛ nɔ ni Biblia mli nikaselɔ ko wie lɛ mli?
8 Kɛ́ wɔmiitsu kaselɔ feemɔ nitsumɔ lɛ, esa akɛ wɔsusu bɔ ni mɔ ko to etsui shi ní ekɛ wɔ kase Biblia lɛ, ni wɔná he sɛɛ lɛ he jogbaŋŋ. Susumɔ mɛi ni wɔkɛbaakpe yɛ shiɛmɔ nitsumɔ lɛ mli kɛ bɔ ni amɛbaaná wɔshɛɛ sane lɛ toi ni amɛaabo lɛ he sɛɛ amɛha lɛ hu he. Yoo ko ŋma wolo eyaha nitsumɔhe nine ni yɔɔ maŋ nɔ he ni eyɔɔ lɛ akɛ: “Miisumɔ maha nyɛle akɛ mihiɛ sɔɔ Odasefoi ni kɛ mi bakaseɔ nii yɛ mishĩa lɛ waa. Mile akɛ saji babaoo ni mibiɔ amɛ kɛ bɔ ni mihaa amɛyeɔ be fe nine daa lɛ baaha misane aje amɛtsine bei komɛi. Shi amɛyɛ mihe tsui, ni amɛyɛ he miishɛɛ akɛ amɛaatsɔɔ mi nibii ni amɛkase lɛ. Miida Yehowa kɛ Yesu shi akɛ mikɛ Odasefoi nɛɛ shãraa.”
9. Mɛni nɔ Yesu kɛ ejwɛŋmɔ ma, ni mɛɛ gbɛ nɔ wɔɔtsɔ wɔkase lɛ?
9 Eji anɔkwale akɛ jeee mɛi fɛɛ kpɛlɛ koni Yesu aye abua amɛ. (Mat. 23:37) Mɛi komɛi nyiɛ esɛɛ be kukuoo ko, ni no sɛɛ lɛ amɛkpoo etsɔɔmɔi lɛ, ni “amɛkɛ lɛ enyiɛɛɛ dɔŋŋ.” (Yoh. 6:66) Shi Yesu eŋmɛɛɛ gbɛ ni sanekpakpa lɛ toi ni mɛi komɛi booo lɛ aha enu he akɛ eshɛɛ sane lɛ he ehiaaa. Eyɛ mli akɛ wui ni Yesu du lɛ ateŋ babaoo wooo yibii moŋ, shi ekɛ ejwɛŋmɔ ma nitsumɔ kpakpa ni etsuɔ lɛ nɔ. Ena akɛ ŋmɔji lɛ egba futaa bɔ ni sa kpamɔ, ni ehe ni ekɛwo nikpamɔ nɛɛ mli lɛ ha ená miishɛɛ waa. (Nyɛkanea Yohane 4:35, 36.) Yɛ nɔ najiaŋ ni wɔɔgbala wɔjwɛŋmɔ kɛya mɛi ni tamɔ shikpɔŋ ni wooo yibii ni kãmɔ ŋmaatsei lɛ ateŋ lɛ nɔ lɛ, ani wɔ hu wɔbaanyɛ wɔkɛ wɔjwɛŋmɔ ama ŋmaatsei ni sa kpamɔ ni yɔɔ shikpɔŋkuku ni akɛha wɔ lɛ mli lɛ anɔ? Nyɛhaa wɔpɛia bɔ ni wɔɔfee wɔná jwɛŋmɔ ni ja ni tamɔ nɛkɛ lɛ mli wɔkwɛa.
Du Kɛ Hiɛnɔkamɔ akɛ Ebaawo Yibii
10, 11. Mɛni obaanyɛ ofee koni oya nɔ oná miishɛɛ yɛ sɔɔmɔ nitsumɔ lɛ mli?
10 Okwaafonyo duɔ nii kɛ hiɛnɔkamɔ akɛ ebaawo yibii ni ekpa. Nakai nɔŋŋ esa akɛ wɔ hu wɔshiɛ kɛ hiɛnɔkamɔ akɛ wɔbaaje Biblia mli nikasemɔ shishi. Shi kɛ́ ofɔɔ shiɛmɔyaa shi mɛi fioo pɛ oyanaa yɛ shĩa loo onine nyɛɛɛ ashɛ mɛi ni okɛgbaa sane lɛ anɔ dɔŋŋ hu? Enɛ baanyɛ aje mɔ nijiaŋ wui. Ani esa akɛ okpa shĩa kɛ shĩa shiɛmɔ nitsumɔ lɛ? Dabi kwraa! Abɔ̃i shiɛmɔ yɛ shĩa kɛ shĩa kɛjɛ blema tɔŋŋ, ni ekã he eji gbɛ ni mɔɔ shi ní atsɔɔ nɔ ashiɛɔ ahaa mɛi babaoo klɛŋklɛŋ kwraa.
11 Shi bɔni afee ni oya nɔ oná miishɛɛ lɛ, ani obaanyɛ otsɔ gbɛ̀i krokomɛi anɔ oshiɛ otsɔɔ mɛi? Ákɛ nɔkwɛmɔnɔ lɛ, ani obɔ mɔdɛŋ akɛ oooye mɛi odase yɛ gbɛjegbɛi ahe loo yɛ amɛnitsumɔhei? Ani obaanyɛ otsɔ tɛlifoŋ nɔ oshiɛ otsɔɔ mɛi, loo ohé mɛi ni oshiɛ Maŋtsɛyeli shɛɛ sane lɛ otsɔɔ amɛ lɛ atɛlifoŋ nɔmbai bɔni afee ni otswa amɛ? Kɛ́ otee nɔ oto otsui shi ni otsɔ gbɛ̀i srɔtoi anɔ oshiɛ lɛ, no lɛ onine baashɛ mɛi ni sumɔɔ ni amɛbo Maŋtsɛyeli shɛɛ sane lɛ toi lɛ anɔ.
Sane lɛ He Miishɛɛ ni Mɛi Bɛ lɛ Naadaamɔ
12. Mɛni wɔbaanyɛ wɔfee kɛ́ mɛi ni yɔɔ wɔshikpɔŋkuku lɛ mli lɛ bɛ he miishɛɛ akɛ amɛaabo wɔ toi?
12 Ni kɛ́ mɛi ni yɔɔ nyɛshikpɔŋkuku lɛ mli lɛ bɛ Nyɔŋmɔjamɔ he miishɛɛ hu? Ani obaanyɛ owie nibii ni amɛbaaná he miishɛɛ lɛ ahe kɛje osanegbaa lɛ shishi? Bɔfo Paulo ŋma eyaha enanemɛi héyelilɔi ni yɔɔ Korinto lɛ akɛ: “Yudafoi lɛ, mitsɔ̃ tamɔ Yudanyo miha amɛ, . . . mɛi ni bɛ mla lɛ, mitsɔ̃ tamɔ mɔ ko ni bɛ mla miha amɛ, tsɛ mijeee mɔ ko ni bɛ Nyɔŋmɔ mla.” Mɛni hewɔ Paulo fee nakai lɛ? Ekɛɛ akɛ: “Mitsɔ̃ mihe nɔ fɛɛ nɔ miha mɛi fɛɛ koni bɔ fɛɛ bɔ ni aaafee lɛ mikɛhere mɛi komɛi ayiwala.” (1 Kor. 9:20-22) Ani wɔ hu wɔbaanyɛ wɔwie saji ni mɛi ni yɔɔ wɔshikpɔŋkuku lɛ mli lɛ baanya he lɛ ahe? Mɛi ni bɛ Nyɔŋmɔjamɔ he miishɛɛ lɛ ateŋ mɛi babaoo sumɔɔ ni shihilɛ kpakpa ahi amɛwekui lɛ amli. Ekolɛ amɛmiitao amɛle nɔ ni baaha amɛná miishɛɛ yɛ shihilɛ mli. Ani wɔbaanyɛ wɔshiɛ Maŋtsɛyeli lɛ he shɛɛ sane lɛ wɔtsɔɔ nɛkɛ mɛi nɛɛ yɛ gbɛ ni amɛbaaná he miishɛɛ akɛ amɛaabo toi lɛ nɔ?
13, 14. Mɛɛ gbɛ nɔ wɔɔtsɔ wɔná miishɛɛ babaoo yɛ kaselɔ feemɔ nitsumɔ lɛ mli?
13 Shiɛlɔi babaoo eha miishɛɛ ni amɛyɔɔ yɛ kaselɔ feemɔ nitsumɔ lɛ mli lɛ etee hiɛ yɛ hei po ni mɛi babaoo bɛ sane lɛ he miishɛɛ lɛ. Yɛ mɛɛ gbɛ nɔ? Kɛtsɔ wiemɔ kroko ni amɛkaseɔ lɛ nɔ. Nuu ko kɛ eŋa ni amɛye fe afii 60 lɛ yɔse akɛ nikaselɔi akpei abɔ ni jɛ China kɛ amɛwekui yɛ shikpɔŋkuku ni akɛha amɛsafo lɛ mli. Wu lɛ kɛɛ akɛ: “Enɛ kanya wɔ ni wɔkase China wiemɔ. Eyɛ mli akɛ enɛ bi ni wɔná be kɛkase wiemɔ lɛ daa gbi moŋ, shi nakai feemɔ ha wɔkɛ Chinabii ni yɔɔ wɔkutso lɛ mli lɛ ateŋ mɛi babaoo bɔi Biblia lɛ kasemɔ.”
14 Kɛ́ onyɛɛɛ okase wiemɔ kroko po lɛ, obaanyɛ okɛ wolo bibioo ni ji Good News for People of All Nations lɛ atsu nii kɛ́ okɛ mɛi ni wieɔ wiemɔ kroko kpe. Bei pii lɛ, obaanyɛ otao woji ni akala yɛ mɛi ni okɛkpeɔ lɛ awiemɔ mli lɛ koni okɛha amɛ. Eji anɔkwale akɛ, ebiɔ be kɛ mɔdɛŋbɔɔ babaoo dani anyɛ akɛ mɛi ni wieɔ wiemɔ kroko ní esoro amɛkusum lɛ agba sane. Shi kaimɔ shishitoo mla ni yɔɔ Nyɔŋmɔ Wiemɔ lɛ mli nɛɛ: “Mɔ ni duɔ babaoo lɛ, eeekpa babaoo.”—2 Kor. 9:6, NW.
Asafo Muu lɛ Fɛɛ Tsuɔ
15, 16. (a) Mɛni hewɔ asafo muu lɛ fɛɛ yeɔ kɛbuaa ni akɛfeɔ mɔ ko kaselɔ lɛ? (b) Mɛɛ gbɛfaŋnɔ mɛi ni efɔ̃ nɔ yɛ afii amli lɛ náa?
15 Shi kaselɔi afeemɔ nitsumɔ lɛ, jeee mɔ kome nitsumɔ ni. Asafo muu lɛ fɛɛ yeɔ ebuaa ni akɛfeɔ mɔ ko kaselɔ. Mɛni hewɔ eji nakai lɛ? Yesu kɛɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yoh. 13:35) Yɛ anɔkwale mli lɛ, kɛ́ Biblia mli nikaselɔi ba asafoŋ kpeei lɛ, bei pii lɛ amɛhiɛ sɔɔ suɔmɔ ni yɔɔ wɔteŋ lɛ. Biblia mli nikaselɔ ko ŋma akɛ: “Mináa miishɛɛ waa kɛ́ mitee asafoŋ kpeei lɛ. Asafoŋbii lɛ hereɔ mi hiɛmɛɛ waa!” Yesu kɛɛ akɛ mɛi ni batsɔmɔɔ esɛɛnyiɛlɔi lɛ awekumɛi baanyɛ ate shi awo amɛ. (Nyɛkanea Mateo 10:35-37.) Shi ewo shi akɛ amɛbaaná mumɔŋ “nyɛmimɛi hii kɛ nyɛmimɛi yei kɛ nyɛmɛi kɛ bii” babaoo yɛ asafo lɛ mli.—Mar. 10:30.
16 Wɔnyɛmimɛi hii kɛ yei ni efɔ̃ nɔ yɛ afii amli lɛ tsuɔ gbɛfaŋnɔ titri ko he nii kɛyeɔ amɛbuaa Biblia mli nikaselɔi lɛ koni amɛya amɛhiɛ. Yɛ mɛɛ gbɛ nɔ? Kɛ́ mɛi ni efɔ̃ nɔ yɛ afii amli lɛ ateŋ mɛi komɛi nyɛɛɛ amɛkɛ mɛi akase Biblia lɛ po lɛ, saji ahetoo ní woɔ mɔ hewalɛ ní amɛhaa yɛ asafoŋ kpeei ashishi lɛ wajeɔ mɛi fɛɛ ni boɔ amɛ toi lɛ ahemɔkɛyeli. Akɛni amɛtee nɔ amɛnyiɛ ‘yɛ jalɛ gbɛ lɛ nɔ’ afii pii hewɔ lɛ, ehaa asafo lɛ hiɛ baa nyam, ni egbalaa mɛi ni hiɛ tsui kpakpa lɛ kɛbaa Nyɔŋmɔ asafo lɛ mli.—Abɛi 16:31.
Wɔgbeyeishemɔi lɛ Anɔ ní Wɔɔye
17. Mɛni obaanyɛ ofee kɛ́ onuɔ he akɛ onyɛŋ okɛ mɛi akase Biblia lɛ?
17 Mɛni obaanyɛ ofee kɛ́ onuɔ he akɛ onyɛŋ okɛ mɛi akase Biblia lɛ? Kaimɔ akɛ Yehowa tsɔ mumɔ krɔŋkrɔŋ lɛ nɔ eye ebua Mose, ni ejie Aaron ni ji enyɛmi nuu lɛ hu eha lɛ koni eye ebua lɛ. (2 Mose 4:10-17) Yesu wo shi akɛ Nyɔŋmɔ mumɔ lɛ baaye abua wɔ yɛ odaseyeli nitsumɔ lɛ mli. (Bɔf. 1:8) Kɛfata he lɛ, Yesu tsu ekaselɔi lɛ enyɔnyɔɔnyɔ koni amɛyashiɛ. (Luka 10:1) No hewɔ lɛ, kɛ́ ewa kɛha bo akɛ okɛ mɛi aaafee Biblia mli nikasemɔ lɛ, sɔlemɔ oha Nyɔŋmɔ koni etsɔ emumɔ lɛ nɔ eha bo nilee, koni no sɛɛ lɛ okɛ shiɛlɔ ko ní baanyɛ awo bo hewalɛ ní obaanyɛ okase nii kɛjɛ eŋɔɔ lɛ aya shiɛmɔ. Kɛ́ okai akɛ Yehowa hala mɛi ni abuuu ni ji “je nɛŋ gbɔjɔmɔ nii lɛ” koni amɛtsu nitsumɔ ni he hiaa waa nɛɛ lɛ, ebaawaje ohemɔkɛyeli lɛ waa.—1 Kor. 1:26-29.
18. Mɛɛ gbɛ nɔ wɔɔtsɔ wɔye gbeyei ni wɔsheɔ akɛ wɔnyɛŋ wɔye wɔbua mɔ ko ni ebatsɔ kaselɔ lɛ nɔ?
18 Mɛɛ gbɛ nɔ wɔɔtsɔ wɔye gbeyei ni wɔsheɔ akɛ wɔnyɛŋ wɔye wɔbua mɔ ko ni ebatsɔ kaselɔ lɛ nɔ? Kɛ́ mɔ ko hoo nii, ni eŋɔɔ loo eŋɔɔɔ lɛ, akɛɔ akɛ ejɛ nihoolɔ lɛ, shi kaselɔ feemɔ nitsumɔ lɛ tamɔɔɔ nihoomɔ. Jeee mɔ aŋkro ko mɔdɛŋbɔɔ pɛ haa mɔ ko batsɔɔ kaselɔ. Yehowa ji mɔ ni tsuɔ nɔ ni he hiaa fe fɛɛ lɛ he nii, lɛ egbalaa mɔ lɛ. (Yoh. 6:44) Wɔkɛ mɛi krokomɛi ni yɔɔ asafo lɛ mli lɛ bɔɔ mɔdɛŋ waa akɛ wɔkɛ nitsɔɔmɔ hesaai srɔtoi aaatsu nii kɛye wɔbua nikaselɔ lɛ koni eya ehiɛ. (Nyɛkanea 2 Timoteo 2:15.) Ni esa akɛ nikaselɔ lɛ hu kɛ nɔ ni ekaseɔ lɛ atsu nii. (Mat. 7:24-27) Kɛ́ mɔ ko ni wɔkɛ lɛ kaseɔ Biblia lɛ haaa wɔkɛ lɛ akase nii dɔŋŋ lɛ, ekolɛ ebaadɔ wɔ waa. Wɔshwelɛ ji akɛ mɛi ni wɔkɛ amɛ kaseɔ Biblia lɛ asɔmɔ Yehowa, shi mɔ fɛɛ mɔ “baabu lɛ diɛŋtsɛ ehe akɔntaa eha Nyɔŋmɔ.”—Rom. 14:12.
Mɛɛ Jɔɔmɔi Wɔbaaná?
19-21. (a) Kɛ́ wɔkɛ mɛi fee Biblia mli nikasemɔ lɛ, mɛɛ sɛɛ wɔnáa? (b) Te Yehowa buɔ mɛi fɛɛ ni kɛ amɛhe woɔ shiɛmɔ nitsumɔ lɛ mli lɛ ehaa tɛŋŋ?
19 Kɛ́ wɔkɛ mɛi kaseɔ Biblia lɛ, ehaa wɔyaa nɔ wɔtaoɔ Maŋtsɛyeli lɛ tsutsu. Ehaa Nyɔŋmɔ Wiemɔ lɛ mli anɔkwalei lɛ kaa wɔjwɛŋmɔ kɛ wɔtsui mli waa. Yɛ mɛɛ gbɛ nɔ? Gbɛgbalɔ ko ni atsɛɔ lɛ Barak lɛ tsɔɔ mli akɛ: “Biblia mli nikasemɔi ni okɛ mɛi feɔ lɛ haa okaseɔ Nyɔŋmɔ Wiemɔ lɛ jogbaŋŋ. Minaa akɛ esa akɛ manu anɔkwale lɛ shishi jogbaŋŋ dani manyɛ matsɔɔ mɔ kroko.”
20 Kɛ́ okɛ mɔ ko efeee Biblia mli nikasemɔ lɛ, ani no tsɔɔ akɛ osɔɔmɔ lɛ he bɛ sɛɛnamɔ kɛha Nyɔŋmɔ? Dabi kwraa! Yehowa nyaa mɔdɛŋ ni wɔbɔɔ akɛ wɔjie eyi lɛ he waa diɛŋtsɛ. “Nyɔŋmɔ hefatalɔi nitsulɔi” ji mɛi fɛɛ ni kɛ amɛhe woɔ shiɛmɔ nitsumɔ lɛ mli lɛ. Shi kɛ́ wɔkɛ mɔ ko feɔ Biblia mli nikasemɔ, ni wɔna bɔ ni Nyɔŋmɔ haa nɔ ni wɔdu lɛ shwereɔ lɛ, ehaa wɔnáa miishɛɛ waa. (1 Kor. 3:6, 9) Gbɛgbalɔ ko ni atsɛɔ lɛ Amy lɛ kɛɛ akɛ: “Kɛ́ ona akɛ mɔ ni okɛkaseɔ Biblia lɛ miiya ehiɛ lɛ, odaa Yehowa shi waa diɛŋtsɛ akɛ ekɛ bo miitsu nii koni mɔ lɛ nine ashɛ nikeenii ni nɔ bɛ nɔ—ákɛ mɔ lɛ abale Yehowa ní ená naanɔ wala.”
21 Kɛ́ wɔbɔ mɔdɛŋ wɔje Biblia mli nikasemɔi ashishi ni wɔtsa nɔ lɛ, ebaaye ebua wɔ ni wɔkɛ wɔjwɛŋmɔ ama Nyɔŋmɔ sɔɔmɔ nɔ amrɔ nɛɛ, ni ebaawaje hiɛnɔkamɔ hu ni wɔyɔɔ akɛ wɔyibaaná wala kɛbote jeŋ hee lɛ mli lɛ. Yɛ Yehowa yelikɛbuamɔ naa lɛ, wɔbaanyɛ wɔye kɛbua ni ahere mɛi ni boɔ wɔ toi lɛ hu ayiwala. (Nyɛkanea 1 Timoteo 4:16.) Ekã shi faŋŋ akɛ enɛ baaha wɔná miishɛɛ naakpa!
Ani Okaiɔ?
• Mɛɛ naagbai ekolɛ ehaaa mɛi komɛi afee Biblia mli nikasemɔi lɛ?
• Mɛni wɔbaanyɛ wɔfee kɛ́ mɛi ni yɔɔ wɔshikpɔŋkuku lɛ mli lɛ ateŋ mɛi pii booo wɔ toi lɛ?
• Mɛɛ jɔɔmɔi wɔbaaná kɛ́ wɔkɛ mɔ ko kase Biblia lɛ?
[Nikasemɔ lɛ he Sanebimɔi]
[Mfonirii ni yɔɔ baafa 9]
Ani otsɔɔ gbɛ̀i krokomɛi anɔ oshiɛɔ bɔni afee ni onine ashɛ mɛi ni hiɛ tsui kpakpa lɛ anɔ?