Ani Obaaya nɔ Ofee Nɔ ni Sa Ohiɛ?

NAA gbekɛbii enyɔ komɛi ni amɛmiishwɛ. Amɛteŋ mɔ kome shá tsobi ni esumɔɔ waa lɛ yɛ mɔ kroko lɛ dɛŋ, ni ebo ekɛɛ, “Mi nɔ̃ ni!” Adesai ni yeee emuu lɛ jieɔ ŋkomeŋfa su kpo yɛ gbɛ ko nɔ kɛjɛɔ amɛgbekɛbiiashi tɔɔ. (1 Mose 8:21; Rom. 3:23) Agbɛnɛ hu, je lɛ woɔ mɛi hewalɛ koni amɛfó amɛ pɛ amɛnɔ̃ mli. Bɔni afee ni wɔkpoo nifeemɔ nɛɛ, ebaabi ni wɔkɛ hiɛmiamɔ awu ashi ŋkomeŋfa sui. Kɛ́ wɔfeee nakai lɛ, no lɛ wɔbaato mɛi pampi yɛ gbɛ ni waaa nɔ, ni ebaagoi wekukpaa ni yɔɔ wɔ kɛ Yehowa teŋ lɛ.—Rom. 7:21-23.

Bɔfo Paulo wo wɔ hewalɛ ni wɔsusu bɔ ni wɔnifeemɔi baanyɛ aye mɛi krokomɛi awui lɛ he. Eŋma akɛ: “Wɔyɛ nibii fɛɛ hegbɛ, shi jeee nibii fɛɛ hi; wɔyɛ nibii fɛɛ hegbɛ, shi jeee nibii fɛɛ haa mɔ nane mɔɔ shi.” Paulo kɛɛ hu akɛ: “Nyɛkatsɔmɔa pampii.” (1 Kor. 10:23, 32) No hewɔ lɛ, yɛ nibii ni kɔɔ saji ni awoko mla yɛ he, shi mɔ fɛɛ mɔ yɛ hegbɛ akɛ efeɔ lɛ bɔ ni esumɔɔ lɛ agbɛfaŋ lɛ, nilee yɛ mli akɛ ooobi bo diɛŋtsɛ ohe akɛ: ‘Ani manyɛ majɛ mitsui mli maŋmɛɛ bɔ ni misumɔɔ akɛ afee nibii komɛi aha lɛ he kɛji no baafite toiŋjɔlɛ ni yɔɔ asafo lɛ mli lɛ? Ani mifee klalo akɛ mikɛ Biblia mli shishitoo mlai baatsu nii kɛji nakai feemɔ baawa eha mi po?’

 Be Mli ni Oohala Nitsumɔ

Mɛi babaoo susuɔ akɛ nitsumɔ ni amɛhalaa akɛ amɛbaatsu lɛ ji amɛ diɛŋtsɛ amɛyiŋkpɛɛ, ni ákɛ ekɔɔɔ mɛi krokomɛi ahe. Shi susumɔ sane ni kɔɔ nuu ko ní yɔɔ maŋ bibioo ko mli yɛ South America, ni ehiɛ lɛ diɛŋtsɛ enitsumɔ lɛ he okwɛ. Eji asɔshwɛlɔ kɛ dãatɔlɔ. Shi akɛni Yehowa Odasefoi kɛ lɛ bɔi Biblia lɛ kasemɔ hewɔ lɛ, ekɛ nibii ni ekase lɛ bɔi nitsumɔ ni etsake ejeŋba. (2 Kor. 7:1) Beni eha efee faŋŋ akɛ eesumɔ ni efata asafoŋbii lɛ ahe kɛya shiɛmɔ lɛ, asafoŋ onukpa ko jɛ bulɛ mli ewo lɛ hewalɛ ní esusu nɔ̃ nitsumɔ ni etsuɔ lɛ he jogbaŋŋ. Nuu nɛɛ hɔɔ shɛ̃ dãa ŋmiiŋmi, ni lɛ ji mɔ titri ni hɔɔ dãa lɛ ehaa maŋ lɛ mli bii lɛ. Eyɛ mli akɛ anyɛɔ akɛ dãa nɛɛ feɔ nibii srɔtoi moŋ, shi nɔ̃ pɛ ni mɛi ni yɔɔ nakai kpokpaa lɛ nɔ lɛ kɛ dãa nɛɛ feɔ ji akɛ amɛŋɔɔ lamlee amɛfutuɔ dãa lɛ amɛnuɔ koni amɛtɔrɔ.

Nuu lɛ yɔse akɛ kɛ́ ekɛɛ ebaashiɛ yɛ maŋ lɛ mli ní nakai beaŋ nɔŋŋ lɛ ehɔɔ dãa nɛɛ lɛ, no haŋ awie asafo lɛ he ekpakpa, ni ebaafite wekukpaa ni yɔɔ ekɛ Nyɔŋmɔ teŋ lɛ hu. Eyɛ mli akɛ eweku ni ekwɛɔ amɛ lɛ ayi fa moŋ, shi ekpa dãa lɛ hɔɔmɔ. Amrɔ nɛɛ ehɔɔ nii, ni ejɛɔ no mli ekɛkwɛɔ eweku lɛ. Abaptisi nuu nɛɛ, eŋa, kɛ amɛbii enumɔ lɛ ateŋ mɛi enyɔ bianɛ. Amɛkɛ ekãa miishiɛ sanekpakpa lɛ, ni amɛtsui ebuuu amɛfɔ́ yɛ nɔ ko he.

Beni Oohala Nanemɛi

Ani mɛi ni wɔkɛ amɛ ehiɛɛɛ hemɔkɛyeli kome ni wɔkɛaabɔ lɛ ji mɔ aŋkro sane, loo ehe miihia ni wɔkɛ Biblia mli shishitoo mlai atsu nii? Nyɛmi yoo ko miisumɔ ni ekɛ oblanyo ko ni ejeee anɔkwa Kristofonyo lɛ aya okpɔlɔŋmɛɛ ko shishi. Eyɛ mli akɛ abɔ lɛ kɔkɔ yɛ oshrai ni baajɛ mli aba lɛ ahe moŋ, shi esusu akɛ eyɛ hegbɛ akɛ eyaa, ni no hewɔ lɛ etee okpɔlɔŋmɛɛ lɛ. Eshɛ jɛmɛ etsɛɛɛ tsɔ ni aha lɛ dãa ni akɛ tsofa ni haa mɔ wɔɔ vii efutu mli. Ŋmɛlɛtswai abɔ sɛɛ beni ehiɛ tsɛ̃ɔ lɛ, eyɔse akɛ nakai enaanyo lɛ eto lɛ kabonaa.—Okɛto 1 Mose 34:2 lɛ he.

Eyɛ mli akɛ ekolɛ jeee be fɛɛ be oshara ni tamɔ nɛkɛ baajɛ mɛi ni heee yeee lɛ ni wɔkɛaabɔ lɛ mli aba moŋ, shi Biblia lɛ bɔɔ wɔ kɔkɔ akɛ: “Mɔ ni kɛ nilelɔi nyiɛɔ lɛ, eeetsɔ nilelɔ; shi mɔ ni kɛ kwashiai bɔɔ lɛ, eeena amane.” (Abɛi 13:20) Ŋwanejee ko bɛ he akɛ kɛ́ wɔhala nanemɛi fɔji lɛ, ekɛ wɔ woɔ oshara mli! Abɛi 22:3 lɛ kɛɛ akɛ: “Hiɛtɛ̃lɔ naa efɔŋ ní baa, ni eteeɔ ehe; shi mɛi ni náko jwɛŋmɔ lɛ batsɔɔ he kɛhoɔ, ni amɛnaa nɔ̃.” Mɛi ni wɔkɛbɔɔ lɛ baanyɛ amɛná wɔnɔ hewalɛ, ni ebaanyɛ esa wekukpaa ni kã wɔ kɛ Nyɔŋmɔ teŋ lɛ he.—1 Kor. 15:33; Yak. 4:4.

Yɛ Ohesaamɔ kɛ Otadewoo Mli

Yinɔ fɛɛ yinɔ kɛ amɛhesaamɔ kɛ bɔ ni amɛkpɛɔ amɛtadei amɛhaa. Shi Biblia mli shishitoo mlai ni kɔɔ hesaamɔ kɛ atadewoo he lɛ tsakeee. Paulo wo Kristofoi yei ŋaa akɛ “amɛkɛ atade ni sa kɛ hiɛ ni gboɔ nɔ̃ kɛ jwɛŋmɔ ni sa awula amɛhe”—ni shishitoo mla nɛɛ kɔɔ hii hu  ahe. (1 Tim. 2:9) Paulo etsɔɔɔ akɛ esa akɛ wɔwo atade ni ayeko ŋaa awoko mli kwraa, ni asaŋ ewieee hu akɛ esa akɛ Kristofoi fɛɛ awo atade kome. Shi mɛni wiemɔ ni ji hiɛ ni gboɔ nɔ̃ lɛ tsɔɔ? Wiemɔ komekomei ashishitsɔɔmɔ wolo ko tsɔɔ hiɛ ni gboɔ nɔ̃ shishi akɛ “nɔ ko ni etsɔɔɔ henɔwomɔ loo hepupuumɔ . . . atade, wiemɔ, loo jeŋba ni sa.”

Esa akɛ wɔbi wɔhe akɛ: ‘Ani manyɛ mawie yɛ anɔkwale mli akɛ mihiɛ gboɔ nɔ̃ kɛ́ mitee nɔ misaa mihe bɔ ni baaha mɛi agbala amɛjwɛŋmɔ kɛba minɔ bɔ ni esaaa lɛ? Ani bɔ ni misaa mihe mihaa lɛ haa mɛi náa jwɛŋmɔ ni ejaaa yɛ mihe loo ehaa mɛi susuɔ akɛ mibɛ jeŋba?’ Kɛ́ ‘wɔfóoo wɔnɔ̃ mli, shi wɔfó mɛi anɔ̃ mli’ lɛ, no lɛ ‘wɔtoŋ mɔ ko mɔ ko pampi’ yɛ nifeemɔi nɛɛ amli.—2 Kor. 6:3; Filip. 2:4.

Yɛ Nitsumɔ Mli Saji Amli

Beni ojotswaa he saji te shi yɛ Korinto asafo lɛ mli lɛ, Paulo ŋma akɛ: “Mɛɛba nyɛhaaa aye nyɛ amim moŋ? mɛɛba nyɛhaaa ashishiu nyɛ moŋ?” Paulo wo Kristofoi ŋaa koni amɛha nibii komɛi aŋmɛɛ amɛ fe nɔ ni amɛkɛ amɛnyɛmimɛi baaye sane yɛ saneyelihei. (1 Kor. 6:1-7) Nyɛmi nuu ko ni yɔɔ United States lɛ kɛ ŋaawoo nɛɛ tsu nii. Ekɛ enitsumɔtsɛ ko ni ji Kristofonyo lɛ naa eyaaa bɛlɛ kome mli yɛ nyɔmɔ ni enitsumɔtsɛ lɛ hiɛ lɛ lɛ he. Ekɛ Ŋmalɛ naa gbɛtsɔɔmɔi tsu nii, ni amɛyi enyɔ lɛ amɛkpe shii abɔ koni amɛtsu naagba lɛ he nii, shi fɛɛ yeee omanye. Naagbee lɛ, amɛkɛ sane lɛ yafɔ̃ asafoŋ onukpai lɛ ni damɔ shi kɛha “asafo lɛ” hiɛ.—Mat. 18:15-17.

Dɔlɛ sane ji akɛ, yɛ mɔdɛŋ ni abɔ fɛɛ sɛɛ lɛ, afũ ma emaahe. Nyɛmi nuu ni ji nitsulɔ lɛ sɔle yɛ sane lɛ he be saŋŋ, ni ekpɛ eyiŋ akɛ ebaaha nyɔmɔ ni enu he akɛ ahiɛ lɛ lɛ babaoo aŋmɛɛ lɛ. Mɛni hewɔ? Sɛɛ mli lɛ ekɛɛ akɛ, “Gbeekpamɔ ni eyabaaa wɔteŋ nɛɛ haaa maná miishɛɛ, ni eefite be ni kulɛ manyɛ mikɛtsu sɔɔmɔ nitsumɔ lɛ.” Beni nyɛmi nuu lɛ kpɛ eyiŋ nakai lɛ, ená miishɛɛ ekoŋŋ, ni ena akɛ Yehowa miijɔɔ esɔɔmɔ nitsumɔ lɛ nɔ.

Yɛ Nibii Bibii Po Amli

Wɔbaaná jɔɔmɔi yɛ saji bibii hu amli kɛ́ wɔmaaa nɔ mi doo akɛ wɔbaafee nɔ ni sa wɔ pɛ wɔhiɛ lɛ. Gbalashihilɛ mli hefatalɔi komɛi ni ji gbɛgbalɔi lɛ yashɛ kpokpaa wulu nɔ kpee ko ni afee lɛ shishi mra yɛ klɛŋklɛŋ gbi lɛ nɔ, ni amɛyatara he ni ekã amɛtsui nɔ akɛ amɛbaayatara lɛ. Beni aje gbɛjianɔtoo lɛ shishi lɛ, nuu ko kɛ eŋa kɛ amɛbii pii ye amɛhe oyai koni amɛtao he ko amɛtara yɛ mɛi babaoo lɛ ateŋ yɛ kpee lɛ shishi. Beni gbalashihilɛ mli hefatalɔi ni ji gbɛgbalɔi lɛ yɔse akɛ weku lɛ náaa sɛ̃i bɔ ni baashɛ amɛteŋ mɔ fɛɛ mɔ lɛ, amɛte shi amɛha amɛ. Enɛ ha weku muu lɛ fɛɛ nyɛ amɛtara he kome. Kpee lɛ sɛɛ gbii fioo komɛi lɛ, gbɛgbalɔi lɛ anine shɛ wolo nɔ kɛjɛ weku lɛ dɛŋ ní amɛkɛmiida amɛ shi. Weku lɛ tsɔɔ mli yɛ wolo lɛ mli akɛ beni amɛkpe sɛɛ kɛba kpee lɛ shishi lɛ, amɛnijiaŋ je wui waa. Shi amɛnijiaŋwujee lɛ sɛɛ etsɛɛɛ tsɔ ejaakɛ mlihilɛ kpo ni gbɛgbalɔi lɛ jie amɛtsɔɔ amɛ lɛ ha amɛná miishɛɛ kɛ hiɛsɔɔ.

Kɛ́ wɔná hegbɛ lɛ, nyɛhaa wɔkɛ nibii ni wɔsumɔɔ lɛ ashãa afɔle yɛ mɛi krokomɛi ahewɔ. Kɛ́ wɔjie suɔmɔ ni “epeleee lɛ diɛŋtsɛ enɔ̃” kpo lɛ, ebaaha wɔye wɔbua ni toiŋjɔlɛ ahi asafo lɛ mli, kɛ agbɛnɛ hu wɔ kɛ mɛi krokomɛi ateŋ. (1 Kor. 13:5) Ni nɔ ni fe fɛɛ lɛ, ehaaa wɔfite naanyobɔɔ ni yɔɔ wɔ kɛ Yehowa teŋ lɛ.

[Mfoniri ni yɔɔ baafa 20]

Ani oyɛ he miishɛɛ akɛ oootsake bɔ ni kulɛ osumɔɔ akɛ osaa ohe lɛ?

[Mfoniri ni yɔɔ baafa 20, 21]

Ani oyɛ he miishɛɛ akɛ ooote shi koni onyɛmimɛi lɛ abatara he ni ota lɛ?