Gilead Skul Lɛ Klas Ni Ji 125

Lɛ Naagbee Nifeemɔ Akanya Maŋsɛɛ Sanekpakpa Jajelɔi Koni Amɛkase Yeremia

GEOFFREY JACKSON ni efata Nɔyeli Kuu lɛ he lɛ jaje akɛ: “Gilead klas nɛɛ sa kadimɔ waa yɛ yinɔsane mli.” Ewie sane nɛɛ yɛ September 13, 2008 lɛ beni mɛi 6,156 ebabua amɛhe naa kɛha Buu-Mɔɔ Biblia Gilead Skul lɛ klas ni ji 125 lɛ naagbee nifeemɔ lɛ. Kɛ́ mɛi 56 ní egbe skul lɛ naa amrɔ nɛɛ fata he lɛ, Gilead Skul lɛ ewo maŋsɛɛ sanekpakpa jajelɔi ni fa fe 8,000 agbɛ kɛtee “shikpɔŋ lɛ naagbeehei lɛ”!—Bɔf. 1:8.

Nyɛminuu Jackson, ni fee sɛinɔtalɔ lɛ bi akɛ, “Ani hekɛnɔfɔɔ ni mɛi aaaná yɛ nyɛmli lɛ baaha nyɛshiɛmɔ nitsumɔ lɛ aná amɛ nɔ hewalɛ?” No sɛɛ lɛ, etsɔɔ nibii ejwɛ ni haa mɛi náa hekɛnɔfɔɔ yɛ mɔ mli: su kpakpa, nɔkwɛmɔnɔ kpakpa feemɔ, Nyɔŋmɔ Wiemɔ lɛ mli ni aaajɛ atsɔɔ nii, kɛ Yehowa gbɛi lɛ ni aaaha mɛi ale be fɛɛ be.

David Schafer, ni fata Nitsɔɔmɔ Ajinafoi Akuu lɛ he lɛ ha wiemɔ ni yitso ji “Ani Nyɛbaanu Nɔ Fɛɛ Nɔ Shishi?” Eha skulbii lɛ le akɛ kɛ́ amɛtee nɔ amɛtao Yehowa sɛɛgbɛ, ni amɛba amɛhe shi amɛha “tsulɔ anɔkwafo kɛ nilelɔ” lɛ, no lɛ amɛbaanyɛ ‘amɛnu nɔ fɛɛ nɔ’ ni baaye abua amɛ koni amɛsɔmɔ akɛ maŋsɛɛ sanekpakpa jajelɔi lɛ “shishi.”—Abɛi 28:5; Mat. 24:45.

No sɛɛ lɛ, John E. Barr ni efata Nɔyeli Kuu lɛ he lɛ ha wiemɔ ni yitso ji “Nyɛkahaa Nɔ ko Gbálaa Nyɛ kɛ Nyɔŋmɔ Suɔmɔ lɛ Mli.” Ewo mɛi ni egbe skul lɛ naa lɛ kɛ amɛfɔlɔi lɛ ŋaa tamɔ tsɛ ni kɛ ebii miiwie, ni ekɛ no ku gbeyei ni ekolɛ amɛsheɔ yɛ naagbai ni maŋsɛɛ sanekpakpa jajelɔi heei nyɛɔ amɛkɛkpeɔ yɛ hei ni amɛbaayasɔmɔ yɛ lɛ hewɔ lɛ naa. Etsɔɔ mli akɛ: “Nyɔŋmɔ suɔmɔ lɛ mli ni wɔɔhi lɛ haa wɔfeɔ shweshweeshwe ni wɔtsui nyɔɔ wɔ mli.” Nɔ ko nyɛŋ ajie maŋsɛɛ sanekpakpa jajelɔi lɛ kɛjɛ Nyɔŋmɔ suɔmɔ lɛ mli, ja amɛ diɛŋtsɛ amɛtsi amɛhe kɛjɛ Nyɔŋmɔ he.

No sɛɛ lɛ, Sam Roberson ni tsuɔ nii yɛ Nitsumɔhe ni Kwɛɔ Teokrase Skul Srɔtoi Anɔ lɛ wo toibolɔi lɛ hewalɛ koni amɛwo “atade ni hi fe fɛɛ lɛ.” Skulbii lɛ baanyɛ ‘awo Nuŋtsɔ Yesu Kristo’ kɛ́ amɛkase nibii ni Yesu fee lɛ ahe nii ní amɛkɛtsu nii yɛ amɛshihilɛ mli lɛ. (Rom. 13:14) No sɛɛ lɛ, William Samuelson, Teokrase Skul Srɔtoi lɛ anɔkwɛlɔ lɛ tsɔɔ nɔ ni haa mɔ hiɛ baa nyam. Jeee bɔ ni adesa kwɛɔ nii ehaa lɛ ji nɔ ni haa mɔ hiɛ baa nyam shi moŋ bɔ ni Nyɔŋmɔ kwɛɔ nii ehaa lɛ.

Michael Burnett, ni efata tsɔɔlɔi lɛ ahe lɛ ha skulbii lɛ gba niiashikpamɔi ni amɛná yɛ shiɛmɔ nitsumɔ lɛ mli lɛ. Eyɛ mli akɛ beni atsɔseɔ skulbii lɛ yɛ Gilead Skul lɛ yɛ Patterson, yɛ New York lɛ, aha amɛteŋ mɛi babaoo tsu nii yɛ shikpɔŋkukuji ni atsu mli nii jogbaŋŋ lɛ amli moŋ, shi amɛná mɛi komɛi kɛ̃ ni yɛ wiemɔ lɛ he miishɛɛ. Gerald Grizzle ni tsuɔ nii yɛ Nitsumɔhe ni Kwɛɔ Kpeei Wuji Anɔ lɛ bibii nyɛmimɛi hii ni eba Skul ni Afeɔ Ahaa Nitsumɔhe Nine Ajinafoi Akuu Mlibii lɛ ateŋ mɛi etɛ saji. Nibii ni amɛwie lɛ saa mɛi ni egbe Gilead Skul lɛ naa lɛ ajwɛŋmɔ kɛto nibii ni amɛkɛbaayakpe yɛ maŋsɛɛ hei ni amɛbaayasɔmɔ yɛ lɛ.

 David Splane ni eji Nɔyeli Kuu lɛ mlinyo ni efata mɛi ni gbe Gilead Skul lɛ klas ni ji 42 lɛ naa lɛ ahe lɛ ha wiemɔ ni yitso ji “Nyɛkasea Yeremia.” Eyɛ mli akɛ Yeremia she nitsumɔ ni akɛwo edɛŋ lɛ he gbeyei moŋ, shi Yehowa waje lɛ. (Yer. 1:7, 8) Nyɔŋmɔ baafee nakai nɔŋŋ eha maŋsɛɛ sanekpakpa jajelɔi heei lɛ. Nyɛminuu Splane kɛɛ akɛ: “Kɛ́ nibii eyaaa nɔ jogbaŋŋ yɛ okɛ mɔ ko teŋ lɛ, bo lɛ ta shi ni oŋmala sui kpakpai nyɔŋma ni osumɔɔ yɛ mɔ lɛ he. Kɛ onyɛɛɛ oná nyɔŋma lɛ, no tsɔɔ akɛ oleko mɔ lɛ jogbaŋŋ.”

Yeremia ná he-kɛ-afɔleshaa su. Beni enu he akɛ ekpa sɔɔmɔ lɛ, esɔle, ni Yehowa ye ebua lɛ. (Yer. 20:11) Nyɛminuu Splane kɛɛ akɛ: “Kɛ́ onu he akɛ onijiaŋ eje wui lɛ, okɛ Yehowa agba he sane. Obaana akɛ Yehowa baaye ebua bo.”

Beni nifeemɔ lɛ baa naagbee lɛ, sɛinɔtalɔ lɛ kɛɛ toibolɔi lɛ akɛ mɛi ni egbe skul lɛ naa lɛ ekase gbɛ̀i srɔtoi anɔ ni amɛaatsɔ amɛha mɛi aná hekɛnɔfɔɔ yɛ amɛ mli. Amɛshɛɛ sane lɛ baaná mɛi ni yɔɔ hei ni abaawo amɛ gbɛ kɛya lɛ anɔ hewalɛ kɛ́ mɛi lɛ ná hekɛnɔfɔɔ yɛ amɛ mli.—Yes. 43:8-12.

[Akrabatsa ni yɔɔ baafa 22]

KLASBII LƐ AHE SAJI

Maji srɔtoi anɔ ni amɛjɛ kɛba: 6

Maji srɔtoi anɔ ni aha amɛ nitsumɔ yɛ: 21

Amɛyifalɛ: 56

Amɛfii lɛ mlijaa: 32.9

Afii abɔ ni amɛkɛhi anɔkwale lɛ mli lɛ mlijaa: 17.4

Afii abɔ ni amɛkɛhi be-fɛɛ sɔɔmɔ nitsumɔ lɛ mli lɛ mlijaa: 13

[Mfoniri ni yɔɔ baafa 23]

Buu-Mɔɔ Gilead Biblia Skul Klasbii ni Ji 125 ní Gbe Nikasemɔ Naa Lɛ

Gbɛii ni yɔɔ shishigbɛ lɛ miitsɔɔ bɔ ni amɛdamɔ shi amɛha lɛ mli, kɛjɛ hiɛgbɛ kɛmiiya sɛɛgbɛ, ni amɛgbɛi lɛ jeɔ shishi kɛjɛɔ abɛkugbɛ kɛyaa ninejurɔgbɛ.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.