Sanebimɔi ni Jɛ Kanelɔi Adɛŋ

Mɛɛ be ashɛ Satan afɔ̃ kɛjɛ ŋwɛi?—Kpoj. 12:1-9.

Eyɛ mli akɛ Kpojiemɔ wolo ni yɔɔ Biblia lɛ mli lɛ etsɔɔɔ wɔ be pɔtɛɛ ni ashɛ Satan afɔ̃ kɛjɛ ŋwɛi lɛ moŋ, shi etsɔɔ nibii komɛi ni tee nɔ ni baanyɛ aye abua wɔ koni wɔna be mli ni ashɛ lɛ afɔ̃ lɛ. Nibii nɛɛ ateŋ klɛŋklɛŋ nɔ̃ ji Mesia Maŋtsɛyeli lɛ shishitoo. No sɛɛ lɛ, “ta te shi yɛ ŋwɛi,” ni no ha aye Satan nɔ kunim, ni ashwie lɛ kɛjɛ ŋwɛi.

Ŋmalɛ lɛ tsɔɔ faŋŋ akɛ, ato Nyɔŋmɔ Maŋtsɛyeli lɛ shishi yɛ afi 1914 beni “jeŋmaji abe lɛ” ba naagbee lɛ. * (Luka 21:24) Yɛ enɛ sɛɛ lɛ, bei enyiɛ shwie mli dani awu ta ni akɛshwie Satan kɛjɛ ŋwɛi lɛ?

Kpojiemɔ 12:4 lɛ kɛɛ akɛ: “Drako lɛ [Satan] badamɔ yoo lɛ ni baafɔ lɛ hiɛ, koni kɛ efɔ lɛ ni emi ebi lɛ.” Enɛ tsɔɔ akɛ Satan miitao ni kɛ́ hooo lɛ ebutu Maŋtsɛyeli hee lɛ kɛ́ ato shishi amrɔ nɔŋŋ. Eyɛ mli akɛ Yehowa tsi Satan gbɛ ni ekanyɛ etsu eyiŋtoo gbonyo lɛ he nii moŋ, shi Satan tswa efai shi ni ebɔ mɔdɛŋ fɛɛ ni eeenyɛ koni etutua Maŋtsɛyeli hee ni ato nɛɛ. Enɛ hewɔ lɛ, “Mikael kɛ ebɔfoi lɛ” fiteee be kwraa akɛ amɛaajie ‘drako lɛ kɛ ebɔfoi lɛ’ kɛjɛ ŋwɛi koni amɛkatutua Maŋtsɛyeli lɛ. Enɛ tsɔɔ akɛ beni ato Maŋtsɛyeli lɛ shishi yɛ afi 1914 lɛ sɛɛ nɔŋŋ ni aye Satan nɔ kunim ni ashɛ lɛ afɔ̃ lɛ.

Nɔ kroko ni esa akɛ wɔsusu he ji Kristofoi ni afɔ amɛ mu lɛ ashitee lɛ. Ŋmalɛi lɛ tsɔɔ faŋŋ akɛ amɛshitee lɛ je shishi beni ato Maŋtsɛyeli lɛ sɛɛ nɔŋŋ. * (Kpoj. 20:6) Akɛni atsiii Kristo nyɛmimɛi ni afɔ amɛ mu lɛ eko tã akɛ efata Yesu he kɛfã drako lɛ kɛ ebɔfoi lɛ anɔ ta hewɔ lɛ, awu ta lɛ ni ashɛ Satan kɛ edaimonioi lɛ afɔ̃ shikpɔŋ lɛ nɔ dani Kristo nyɛmimɛi lɛ ashitee lɛ je shishi.

No hewɔ lɛ, Biblia lɛ etsɔɔɔ be tuuntu ni ashwie Satan kɛ edaimonio lɛ kɛjɛ ŋwɛi. Shi kɛlɛ, eka shi faŋŋ akɛ nifeemɔ nɛɛ tee nɔ beni awo Yesu Kristo maŋtsɛ yɛ ŋwɛi yɛ afi 1914 lɛ sɛɛ nɔŋŋ.

[Shishigbɛ niŋmai]