Nitsumɔ Ni Atuɔ Awoɔ Mɛi Adɛŋ—Mɛni Hewɔ, ni Mɛɛ Gbɛ Nɔ?

AKƐ nitsumɔ bɔi mɛi adɛŋ woo dani abɔ shikpɔŋ nɛɛ. Yehowa bɔ e-Bi koome lɛ, ni no sɛɛ lɛ ekɛ lɛ tsu nii akɛ “ŋaalɔ” kɛbɔ jeŋ muu lɛ fɛɛ. (Abɛi 8:22, 23, 30; Yoh. 1:3) Beni Nyɔŋmɔ bɔ klɛŋklɛŋ adesai enyɔ lɛ, ekɛɛ amɛ koni ‘amɛyi shikpɔŋ lɛ nɔ obɔ, ni amɛnaanaa nɔ.’ (1 Mose 1:28) Bɔlɔ lɛ kɛ nitsumɔ wo adesai adɛŋ akɛ amɛlɛɛ Eden abɔɔ lɛ mli koni ekpele shikpɔŋ muu lɛ fɛɛ nɔ. Hɛɛ, kɛjɛ shishijee mli tɔɔ lɛ, Yehowa kɛ nitsumɔ wo ebɔɔ nii lɛ adɛŋ.

Mɛni nitsumɔ ni atuɔ awoɔ mɛi adɛŋ lɛ biɔ? Mɛni hewɔ esa akɛ asafoŋ onukpai atuu asafoŋ nitsumɔi komɛi amɛwo mɛi krokomɛi adɛŋ, ni mɛɛ gbɛ nɔ amɛaatsɔ amɛfee nakai?

Mɛni Nitsumɔ ni Atuɔ Awoɔ Mɛi Adɛŋ lɛ Biɔ?

Nitsumɔ ni atuɔ awoɔ mɛi adɛŋ lɛ biɔ ni aha mɛi krokomɛi aye abua kɛtsu otii komɛi ahe nii. Enɛ biɔ ní wɔkɛ hegbɛ ni wɔyɔɔ lɛ eko awo mɛi krokomɛi adɛŋ.

Esa akɛ mɛi ni akɛ nitsumɔ ewo amɛdɛŋ yɛ Kristofoi asafo lɛ mli lɛ atsu nitsumɔ ni akɛwo amɛdɛŋ lɛ, amɛha ale bɔ ni nitsumɔ lɛ yaa nɔ ehaa, ni amɛbi ŋaawoo kɛjɛ mɔ ni kɛ nitsumɔ lɛ wo amɛdɛŋ lɛ ŋɔɔ. Shi kɛlɛ, mɔ titri ni nitsumɔ lɛ he gbɛnaanii kã enɔ ji mɔ ni kɛ nitsumɔ lɛ ha koni atsu lɛ. Esa akɛ ekwɛ bɔ ni nitsumɔ lɛ yaa nɔ ehaa, ni ewo mɛi ni etuu nitsumɔ lɛ  ewo amɛdɛŋ lɛ ŋaa kɛ́ ehe bahia. Ni kɛlɛ, ekolɛ mɛi komɛi baabi akɛ, ‘Mɛni hewɔ esa akɛ otuu nitsumɔ owo mɛi krokomɛi adɛŋ kɛji bo diɛŋtsɛ obaanyɛ otsu?’

Mɛni Hewɔ Esa akɛ Otuu Nitsumɔ Owo Mɛi Adɛŋ?

Susumɔ sane nɛɛ he ekoŋŋ okwɛ: Yehowa bɔ e-Bi koome lɛ, ni ekɛ nitsumɔ wo edɛŋ koni efata ehe kɛbɔ nibii krokomɛi ni eshwɛ lɛ. Hɛɛ, “emli abɔ nii fiaa yɛ, nii ni yɔɔ ŋwɛi kɛ nii ni yɔɔ shikpɔŋ lɛ nɔ, nii ni anaa kɛ nii ni anaaa.” (Kol. 1:16) Kulɛ Bɔlɔ lɛ kome pɛ baanyɛ afee nɔ fɛɛ nɔ, shi eesumɔ ni e-Bi lɛ hu aná nitsumɔ ni he yɔɔ sɛɛnamɔ ní haa mɔ náa miishɛɛ lɛ mli gbɛfaŋnɔ. (Abɛi 8:31) Enɛ ye ebua Bi lɛ ni ekase Nyɔŋmɔ sui lɛ ahe nii babaoo. Yɛ gbɛ ko nɔ lɛ, Tsɛ lɛ kɛ hegbɛ nɛɛ tsu nii kɛtsɔse e-Bi koome lɛ.

Beni Yesu Kristo yɔɔ shikpɔŋ lɛ nɔ lɛ, etuu nitsumɔ ewo mɛi krokomɛi adɛŋ taakɛ e-Tsɛ lɛ fee lɛ. Etee nɔ etsɔse ekaselɔi lɛ fiofio. Etsu ebɔfoi 12 lɛ kɛtsɔ ehiɛ ni amɛyashiɛ, ni sɛɛ mli lɛ, etsu kaselɔi 70 krokomɛi hu ni amɛyafee nakai nɔŋŋ. (Luka 9:1-6; 10:1-7) Sɛɛ mli beni Yesu yashɛ hei ni etsu ekaselɔi lɛ kɛtee lɛ, eyatsa nitsumɔ ni amɛje shishi lɛ nɔ. Beni Yesu baashi shikpɔŋ lɛ nɔ lɛ, etuu nitsumɔ ni he hiaa waa ni jeŋ muu fɛɛ shiɛmɔ nitsumɔ lɛ fata he lɛ ewo ekaselɔi ni etsɔse amɛ lɛ adɛŋ.—Mat. 24:45-47; Bɔf. 1:8.

Nitsumɔ ni atuɔ awoɔ mɛi krokomɛi adɛŋ kɛ mɛi atsɔsemɔ ji nɔ ko ni afeɔ yɛ Kristofoi asafo lɛ mli. Bɔfo Paulo kɛɛ Timoteo akɛ: ‘Tuu nibii nɛɛ owo gbɔmɛi anɔkwafoi adɛŋ, mɛi ni yɔɔ hewalɛ ni amɛkɛaatsɔɔ mɛi krokomɛi hu lɛ.’ (2 Tim. 2:2) Hɛɛ, esa akɛ mɛi ni he esa lɛ atsɔse mɛi krokomɛi, ni mɛi ni atsɔseɔ lɛ hu baatsɔse mɛi krokomɛi.

Kɛ́ asafoŋ onukpa ko ní akɛ nitsumɔ ewo edɛŋ lɛ tuu enitsumɔ lɛ eko ewo mɛi adɛŋ lɛ, ebaanyɛ eha mɛi lɛ hu atsɔɔ asafoŋbii lɛ anii ni amɛsara amɛ, ni enɛ haa ekɛ mɛi nɛɛ náa miishɛɛ. Akɛni asafoŋ onukpai lɛ le akɛ jeee nɔ fɛɛ nɔ amɛbaanyɛ amɛtsu hewɔ lɛ, amɛhaa mɛi yeɔ amɛbuaa amɛ kɛtsuɔ asafoŋ nitsumɔi lɛ. Biblia lɛ kɛɛ akɛ: “Heshibalɔi moŋ yɔɔ nilee.” (Abɛi 11:2) Heshibalɔ le nibii ni ebaanyɛ etsu kɛ nɔ ni enyɛŋ etsu. Kɛ́ okome okɛɛ obaatsu nɔ fɛɛ nɔ lɛ, ebaaha etɔ bo ni agbɛnɛ hu onaŋ be oha oweku lɛ. No hewɔ lɛ, nilee yɛ mli akɛ oha mɛi aye abua bo kɛtsu. Ákɛ nɔkwɛmɔnɔ lɛ, onukpai akuu lɛ asaji ahe gbɛjianɔtolɔ lɛ baanyɛ aha onukpai krokomɛi akwɛ asafo lɛ shika he saji amli. Enɛ baaha onukpai nɛɛ ale asafo lɛ shika he saji ahe nii jogbaŋŋ.

Kɛ́ akɛ nitsumɔ wo mɛi adɛŋ lɛ, ehaa amɛhe saa ni amɛnáa niiashikpamɔ, ni agbɛnɛ ehaa mɔ ni kɛ nitsumɔ lɛ wo amɛdɛŋ lɛ naa nyɛmɔi ni amɛyɔɔ. No hewɔ lɛ, kɛ́ onukpai kɛ asafoŋ nitsumɔi komɛi wo mɛi adɛŋ lɛ, ebaaye ebua onukpai lɛ koni ‘amɛka’ mɛi ni baanyɛ asɔmɔ akɛ asafoŋ sɔɔlɔi lɛ ‘amɛkwɛ.’—1 Tim. 3:10.

Agbɛnɛ hu, kɛ́ onukpai lɛ kɛ nitsumɔi wo mɛi adɛŋ lɛ etsɔɔ akɛ amɛyɛ hekɛnɔfɔɔ yɛ mɛi nɛɛ amli. Paulo tsɔse Timoteo beni amɛtsuɔ nii akɛ maŋsɛɛ sanekpakpa jajelɔi lɛ. Hii enyɔ nɛɛ kɛ amɛhe bɔ gbagbalii. Paulo tsɛ Timoteo akɛ ‘ebi krɔŋŋ yɛ hemɔkɛyeli lɛ mli.’ (1 Tim. 1:2) Nakai nɔŋŋ hu, beni Yehowa kɛ Yesu tsuɔ nii kɛbɔɔ nibii krokomɛi ni eshwɛ lɛ, eha wekukpãa ni yɔɔ gbagbalii bakã amɛteŋ. Kɛ́ asafoŋ onukpai tuu nitsumɔ amɛwo mɛi adɛŋ lɛ,  ebaanyɛ eha wekukpãa ni yɔɔ gbagbalii abakã amɛ kɛ mɛi lɛ ateŋ.

Nɔ̃ Hewɔ ni Mɛi Komɛi Shashaoɔ Shi

Eyɛ mli akɛ asafoŋ onukpai lɛ le sɛɛnamɔ ni yɔɔ nitsumɔ ni atuɔ awoɔ mɛi adɛŋ lɛ he moŋ, shi ewaa kɛhaa amɛteŋ mɛi komɛi akɛ amɛaafee nakai akɛni ekolɛ amɛnuɔ he akɛ no baaha amɛŋmɛɛ hegbɛ ni amɛyɔɔ lɛ he lɛ hewɔ. Ekolɛ amɛbaasusu akɛ esa akɛ amɛ diɛŋtsɛ amɛtsu nibii ahe nii. Shi kaimɔ akɛ dani Yesu baaya ŋwɛi lɛ, ekɛ nitsumɔ ko ni he hiaa waa wo ekaselɔi lɛ adɛŋ, tsɛbelɛ ele akɛ amɛbaatsu nii ní fe enɔ lɛ tete!—Mat. 28:19, 20; Yoh. 14:12.

Ekolɛ asafoŋ onukpai komɛi kɛ́ nitsumɔ ewo mɛi adɛŋ pɛŋ, shi mɛi lɛ tsuuu lɛ jogbaŋŋ. Ekolɛ amɛbaanu he akɛ amɛ diɛŋtsɛ amɛbaanyɛ amɛtsu nitsumɔ lɛ jogbaŋŋ ni amɛbaafee lɛ oya hu. Shi kɛlɛ, susumɔ Paulo nɔkwɛmɔnɔ lɛ he okwɛ. Ele akɛ sɛɛnamɔ yɛ he akɛ aaatuu nitsumɔ awo mɛi adɛŋ, shi ele hu akɛ jeee be fɛɛ be mɛi ni ekɛ nitsumɔ woɔ amɛdɛŋ lɛ baatsu he nii taakɛ ekpaa gbɛ. Paulo tsɔse enaanyo oblanyo fioo ni ji Marko beni ekɛ lɛ fãa gbɛ yɛ eklɛŋklɛŋ maŋsɛɛ sanekpakpa shiɛmɔ nitsumɔ lɛ mli lɛ. Beni Marko kpa nitsumɔ lɛ ní eku esɛɛ kɛtee shĩa lɛ, edɔ Paulo waa. (Bɔf. 13:13; 15:37, 38) Ni kɛlɛ, enɛ haaa Paulo akpa mɛi krokomɛi tsɔsemɔ. Taakɛ atsĩ tã kɛtsɔ hiɛ lɛ, eha Kristofonyo oblanyo fioo ni ji Timoteo bafata ehe yɛ emaŋsɛɛ sanekpakpa shiɛmɔ nitsumɔ lɛ mli. Beni Timoteo he basa kɛha nitsumɔ ni he hiaa waa lɛ, Paulo shi lɛ yɛ Efeso ni eha lɛ hegbɛ koni ehole asafoŋ onukpai kɛ sɔɔlɔi yɛ asafo lɛ mli.—1 Tim. 1:3; 3:1-10, 12, 13; 5:22.

Nakai nɔŋŋ hu ŋmɛnɛ lɛ, kɛji mɔ ko ni atuu nitsumɔ awo edɛŋ lɛ tsuuu lɛ jogbaŋŋ lɛ, esaaa akɛ asafoŋ onukpai lɛ anijiaŋ jeɔ wui akɛ amɛaatsɔse nyɛmimɛi hii krokomɛi. Ehe miihia ni nilee hu yɛ mli akɛ asafoŋ onukpai lɛ aaaná hekɛnɔfɔɔ yɛ mɛi krokomɛi amli ni amɛtsɔse amɛ. Shi, mɛɛ nibii komɛi esa akɛ asafoŋ onukpai lɛ aha ehi amɛjwɛŋmɔŋ beni amɛkɛ nitsumɔ woɔ mɛi adɛŋ lɛ?

Bɔ ni Afeɔ Lɛ Ahaa

Kɛ́ nyɛkɛ nitsumɔ baawo nyɛmimɛi adɛŋ lɛ, nyɛsusua hesaai ni amɛyɔɔ lɛ ahe nyɛkwɛa. Beni ehe bahia ni aná mɛi ni baaja niyenii daa gbi yɛ Yerusalem lɛ, bɔfoi lɛ hala “hii kpawo ni yɔɔ gbɛi kpakpa ni Mumɔ krɔŋkrɔŋ kɛ nilee eyi amɛ obɔ.” (Bɔf. 6:3) Kɛ́ okɛ nitsumɔ wo mɔ ko ni he esako dɛŋ lɛ, enyɛŋ etsu. No hewɔ lɛ, okɛ nitsumɔi bibii aje shishi dã. Kɛ́ mɔ lɛ tsu nitsumɔ lɛ jogbaŋŋ lɛ, ebaanyɛ etsu nibii babaoo ahe nii yɛ sɛɛ mli.

Kɛlɛ, nibii krokomɛi hu ahe baahia. Esoro mɔ fɛɛ mɔ su kɛ enyɛmɔ. Nakai nɔŋŋ esoro shihilɛ mli niiashikpamɔ ni mɔ fɛɛ mɔ ená. Nyɛmi nuu ni yɔɔ naanyobɔɔ su ni hiɛ yɔɔ ŋmɔlɔŋmɔlɔ lɛ baanyɛ asɔmɔ akɛ mɔ ko ni kwɛɔ shitaramɔ nɔ, ni mɔ ko ni le nibii ahe gbɛjianɔtoo jogbaŋŋ ni feɔ nɔ fɛɛ nɔ gbɛnaagbɛnaa lɛ baanyɛ aye abua asafoŋ woloŋmalɔ lɛ. Abaanyɛ aha nyɛmi yoo ni ŋaa yɔɔ ehiŋmɛiiaŋ lɛ kɛ fɔfɔi asaa he ni abaafee Kaimɔ lɛ yɛ lɛ.

Kɛ́ akɛ nitsumɔi miiwo mɛi dɛŋ lɛ, esa akɛ aha nɔ ni ataoɔ ni amɛtsu lɛ afee faŋŋ. Beni Yohane Baptisilɔ lɛ tsu kɛtee Yesu ŋɔɔ lɛ, etsɔɔ mɛi ni etsu lɛ nɔ ni etaoɔ ni ele kɛ bɔ ni amɛyabi sane lɛ amɛha. (Luka 7:18-20) Yɛ gbɛ kroko nɔ lɛ, beni Yesu kɛɛ ekaselɔi lɛ ni amɛyabua niyenii ni ekɛlɛ̀ mɛi yɛ naakpɛɛ gbɛ nɔ ní shwɛ lɛ anaa lɛ, etsɔɔɔ amɛ bɔ ni esa akɛ amɛtsu lɛ  amɛha lɛ mli fitsofitso. (Yoh. 6:12, 13) Gbɛ nɔ ni aaatsɔ akɛ nitsumɔ awo mɔ ko dɛŋ lɛ damɔ bɔ ni nitsumɔ lɛ ji kɛ hesaai ni mɔ lɛ yɔɔ lɛ nɔ titri. Esa akɛ mɔ ni akɛ nitsumɔ lɛ ewo edɛŋ lɛ kɛ mɔ ni kɛwo edɛŋ lɛ fɛɛ ale bɔ ni esa akɛ atsu nitsumɔ lɛ aha, kɛ be ni esa akɛ akɛbɔ he ni atsu nitsumɔ lɛ kɛyashɛ lɛ he amaniɛ. Esa akɛ amɛyi enyɔ lɛ fɛɛ amɛle nitsumɔ lɛ he nibii ní esa akɛ mɔ ni baatsu nitsumɔ lɛ diɛŋtsɛ akpɛ eyiŋ yɛ he. Kɛ́ ebaabi ni agbe nitsumɔ lɛ naa yɛ be pɔtɛɛ ko mli lɛ, ebaafee nɔ ni sa ákɛ akɛ mɔ lɛ asusu be ni esa akɛ akɛgbe nitsumɔ naa lɛ he ní mɛi enyɔ lɛ fɛɛ akpɛlɛ nɔ, fe nɔ ni akɛ be lɛ baafi mɔ lɛ nɔ.

Esa akɛ aha mɔ ni akɛ nitsumɔ ewo edɛŋ lɛ nine ashɛ shika, nitsumɔ lɛ he nibii, kɛ yelikɛbuamɔ ni he baahia lɛ lɛ nɔ. Ekolɛ ehe baahia ni awó mɛi krokomɛi atoi nɔ yɛ gbɛjianɔ ní ato lɛ he. Beni Yesu tuu “ŋwɛi maŋtsɛyeli lɛ naa samfei lɛ” ewo Petro dɛŋ lɛ, no mli lɛ kaselɔi krokomɛi lɛ yɛ jɛi. (Mat. 16:13-19) Nakai nɔŋŋ hu bei komɛi lɛ ehe baahia ni aha asafo lɛ ale mɔ tuuntu ni akɛ nitsumɔ lɛ ewo edɛŋ lɛ.

Shi ehe miihia hu ni akwɛ jogbaŋŋ. Kɛ́ okã he oobɔ mɔdɛŋ akɛ otsu nitsumɔ ni otuu owo mɔ ko dɛŋ lɛ, obaaha mɔ lɛ anu he akɛ oheee lɛ oyeee. Eji anɔkwale akɛ jeee be fɛɛ be mɔ lɛ baatsu nitsumɔ lɛ bɔ ni otaoɔ. Shi kɛlɛ, kɛ́ aha nyɛmi nuu ni atuu nitsumɔ awo edɛŋ lɛ hegbɛ koni etsu nitsumɔ lɛ, ebaanyɛ eha ená hekɛnɔfɔɔ, ni ebaale nitsumɔ lɛ. Shi enɛ etsɔɔɔ akɛ esaaa ni okwɛɔ bɔ ni etsuɔ nitsumɔ lɛ ehaa. Eyɛ mli akɛ beni Yehowa bɔɔ nii lɛ, etuu nitsumɔ ewo e-Bi lɛ dɛŋ moŋ, shi Yehowa tee nɔ ekɛ lɛ tsu. Ekɛɛ Ŋaalɔ lɛ akɛ: ‘Ha wɔfee gbɔmɔ yɛ wɔsubaŋ nɔ.’ (1 Mose 1:26) No hewɔ lɛ, ha ana yɛ owiemɔi kɛ onifeemɔi amli akɛ ooofi nitsumɔ lɛ sɛɛ, ni ojie mɔ lɛ yi yɛ mɔdɛŋ ni ebɔɔ lɛ hewɔ. Kɛ́ okɛ lɛ susu bɔ ni etsuɔ nitsumɔ lɛ ehaa lɛ he lɛ, no baanyɛ aye abua lɛ. Kɛ́ etsuuu nitsumɔ lɛ jogbaŋŋ lɛ, kaashashao shi akɛ ooowo lɛ ŋaa loo oooye obua lɛ. Kaimɔ akɛ ekã onɔ akɛ okwɛ ni atsu nitsumɔ lɛ.—Luka 12:48.

Mɛi babaoo ená nitsumɔi ni asafoŋ onukpai ní ná amɛhe miishɛɛ lɛ tuu amɛwo amɛdɛŋ lɛ ahe sɛɛ. Eji anɔkwale akɛ, esa akɛ asafoŋ onukpai fɛɛ ale nɔ hewɔ ni esa akɛ amɛtuu nitsumɔ amɛwo mɛi adɛŋ kɛ gbɛ nɔ ni amɛaatsɔ amɛfee nakai bɔni afee ni amɛkɛkase Yehowa.

[Akrabatsa ni yɔɔ baafa 29]

NITSUMƆ NI ATUƆ AWOƆ MƐI ADƐŊ LƐ JI

• gbɛ ni atsɔɔ nɔ ahaa mɛi krokomɛi náa miishɛɛ ni jɛɔ nitsumɔ mli kɛbaa lɛ eko

• gbɛ ni atsɔɔ nɔ atsuɔ babaoo

• nilee kɛ heshibaa kpojiemɔ

• gbɛ ni atsɔɔ nɔ atsɔseɔ mɛi krokomɛi

• gbɛ ni akɛtsɔɔ akɛ ayɛ hekɛnɔfɔɔ yɛ mɛi krokomɛi amli

[Akrabatsa ni yɔɔ baafa 30]

BƆ NI AFEƆ LƐ AHAA

• Halamɔ mɛi ni sa kɛha nitsumɔ lɛ

• Gbálamɔ nibii amli faŋŋ/okɛ mɔ lɛ agba nitsumɔ lɛ he sane

• Tsɔɔmɔ lɛ nɔ ni esa akɛ etsu

• Ha lɛ nibii ni he baahia lɛ

• Ha nitsumɔ lɛ akã otsui nɔ, ni oha mɔ lɛ ana akɛ oheɔ lɛ oyeɔ

• Ná he miishɛɛ akɛ ekã onɔ akɛ okwɛ ni atsu nitsumɔ lɛ

[Mfonirii ni yɔɔ baafa 31]

Kɛ́ atuu nitsumɔ awo mɔ ko dɛŋ lɛ, ebiɔ ni akwɛ bɔ ni nitsumɔ lɛ yaa nɔ ehaa