Anɔkwale Wui Lɛ Yashɛ Hei Ni Yɔɔ Shɔŋŋ

MAŊ ni ji Tuva Republic ni yɔɔ Russia lɛ yɛ Siberia wuoyigbɛ kwraa, ni ekɛ Mongolia eje husu yɛ wuoyi kɛ boka. Tuva maŋbii lɛ ateŋ mɛi babaoo yɛ hei ni etsetseei amɛhe banee, ni ewa ákɛ akɛ Maŋtsɛyeli shɛɛ sane lɛ baaya amɛŋɔɔ. Shi be ko lɛ, mɛi komɛi fã gbɛ kɛjɛ Tuva maŋ lɛ hei ni etsetseei amɛhe banee lɛ amli kɛba gwabɔɔ ko yɛ Kyzyl ni ji maŋtiase lɛ. Gbɛgbalɔ ko ni yɔɔ Kyzyl ni atsɛɔ lɛ Maria lɛ ná ele akɛ mɛi komɛi ejɛ hei ni etse amɛhe banee nɛɛ kɛba maŋ lɛ mli, no hewɔ lɛ eyɔse akɛ agbɛnɛ lɛ ená hegbɛ ni ekɛaashiɛ sanekpakpa lɛ eha amɛ.

Maria tsɔɔ nɔ ni ba lɛ mli akɛ: “Skul he ni mitsɔɔ nii yɛ lɛ to gbɛjianɔ koni atsɔɔ mɛi bɔ ni aaafee amɔ̃ tsofai ni akɛtsuɔ nii yɛ gbɛ ni ejaaa nɔ lɛ naa. Mɛi aaafee 50 baajɛ Tuva maŋ lɛ hei ni etse amɛhe banee lɛ mli aba. Mɛi ni ba lɛ ateŋ mɛi komɛi ji tsɔɔlɔi, jwɛŋmɔ he nilelɔi, mɛi ni kwɛɔ gbekɛbii ahilɛkɛhamɔ nɔ, kɛ mɛi krokomɛi.” Gwabɔɔ nɛɛ ha Maria ná hegbɛ ni ekɛaashiɛ, ni kɛlɛ efeemɔ bɛ mlɛo ha lɛ. Ekɛɛ akɛ: “Mihiɛ gboɔ waa, ni ewaa kɛhaa mi akɛ maye trukaa odase. Shi misɔle miha Yehowa koni eha maná ekãa ní mikɛ hegbɛ nɛɛ atsu nii kɛye odase.” Ani enyɛ efee nakai?

Maria tee nɔ etsɔɔ akɛ: “Mitao Awake! wolo tɛtrɛɛ lɛ eko ni wie nibii srɔtoi ni haa ŋmiŋmi mɔmɔɔ mɛi lɛ ahe. Misusu akɛ jwɛŋmɔ he nilelɔi baanya wolo tɛtrɛɛ nɛɛ he, no hewɔ lɛ mikɛtee skul. Nakai gbi lɛ tsɔɔlɔi ni eba gwabɔɔ lɛ ateŋ mɔ kome ba miŋɔɔ yɛ ɔfis, ni mikɛ wolo tɛtrɛɛ lɛ ha lɛ. Yoo nɛɛ kɛ miishɛɛ ŋɔ wolo tɛtrɛɛ lɛ. Yɛ anɔkwale mli lɛ, ekɛɛ mi akɛ lɛ diɛŋtsɛ lɛ nɔ ko yɛ ni haa ŋmiŋmi mɔɔ lɛ. Enɔ jetsɛremɔ lɛ, mibaha lɛ wolo ni ji Questions Young People Ask—Answers That Work, Kpo 1 lɛ eko. Ekɛ miishɛɛ ŋɔ no hu. Bɔ ni enya wolo nɛɛ he eha lɛ ha miyɔse akɛ ekolɛ tsɔɔlɔi krokomɛi lɛ hu baasumɔ eko. No hewɔ lɛ, miwo Young People Ask wolo lɛ adeka kome kɛ woji krokomɛi hu kɛtee skul lɛ.” Etsɛɛɛ ni ahà fɛɛ. Maria tsɔɔ nɔ ni ba: “Tsɔɔlɔ ni miha lɛ Young People Ask wolo lɛ nanemɛi babaoo ba miŋɔɔ yɛ ɔfis lɛ amɛbabi mi akɛ, ‘Nɛgbɛ ajaa woji lɛ yɛ?’” Amɛduko gbɛ!

Gwabɔɔ lɛ baaba naagbee Hɔɔ. Nakai gbi lɛ jeee Maria nitsumɔ gbi, no hewɔ lɛ ekɛ woji shwie okpɔlɔi srɔtoi anɔ yɛ e-ɔfis lɛ. Eŋma yɛ tao ko nɔ akɛ: “Tsɔɔlɔi ni Misumɔɔ! Nyɛbaanyɛ nyɛŋɔ woji lɛ eko ní nyɛkɛ eko hu aha nyɛnanemɛi. Woji kpakpai nɛɛ baaye abua nyɛ ni nyɛtsu nyɛnitsumɔ lɛ jogbaŋŋ, ni amɛbaaye amɛbua nyɛweku lɛ hu.” Mɛni jɛ mli kɛba? “Mitee ɔfis lɛ nakai gbi lɛ ni mina akɛ aŋɔ woji lɛ ateŋ babaoo. Oya nɔŋŋ ni mikɛ woji kɛ woji tɛtrɛbii lɛ eko yashwie jɛmɛ ekoŋŋ.” Beni agbeɔ gwabɔɔ lɛ naa lɛ, Maria eha woji tɛtrɛbii 380, woji wuji 173, kɛ woji bibii 34. Beni mɛi ni ba gwabɔɔ lɛ kũ amɛ sɛɛ amɛtee hei ni yɔɔ banee ní amɛjɛ lɛ kɛ amɛnitsumɔhei lɛ, amɛkɛ woji lɛ tee. Maria kɛɛ akɛ, “Miyɛ miishɛɛ waa akɛ amrɔ nɛɛ anɔkwale wui lɛ eyashɛ Tuva maŋ lɛ hei ni etsetseei amɛhe banee lɛ amli!”—Jaj. 11:6.

[Shikpɔŋ he mfoniri ni yɔɔ baafa 32]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

RUSSIA

TUVA REPUBLIC