Ekomefeemɔ Haa Ayaa Hiɛ yɛ Mumɔŋ

KƐ́ NYƐMIISUMƆ ni nyɛweku lɛ aya hiɛ yɛ mumɔŋ lɛ, no lɛ esa akɛ nyɛfee ekome. Beni Yehowa bɔ klɛŋklɛŋ nuu kɛ yoo lɛ, ema nɔ mi akɛ ehe miihia ni amɛfee ekome. Esa akɛ Hawa kɛ Adam atsu nii akɛ Adam “hefatalɔ.” (1 Mose 2:18) Esa akɛ nuu kɛ yoo ni ebote gbalashihilɛ mli lɛ afee ekome ní amɛye amɛbua amɛhe. (Jaj. 4:9-12) Esa akɛ fɔlɔi kɛ bii hu aha ekomefeemɔ ahi amɛteŋ bɔni afee ni amɛtsu nitsumɔi ni Yehowa kɛwo amɛdɛŋ lɛ.

Weku Jamɔ

Barry kɛ Heidi yɛ bii enumɔ. Amɛna akɛ ekome ni amɛfeɔ kɛfeɔ weku Biblia mli nikasemɔ lɛ haa amɛyaa hiɛ. Barry kɛɛ akɛ: “Mihaa gbekɛbii lɛ nifeemɔ yɛ weku nikasemɔ lɛ mli yɛ be kɛ beaŋ. Mikɛɔ amɛ koni amɛkɛ saji ni yɔɔ Awake! lɛ mli asaa amɛhe ni amɛbawie he kɛ́ wɔmiifee weku nikasemɔ lɛ. Wɔkɛ shiɛmɔ wiemɔi hu saa wɔhe ni wɔfeɔ he nɔkwɛmɔnɔ bɔni afee ni gbekɛbii lɛ ateŋ mɔ fɛɛ mɔ kɛ eko asaa ehe.” Heidi kɛfata he akɛ: “Wɔteŋ mɔ fɛɛ mɔ eŋmala mumɔŋ otii ni ekɛmamɔ ehiɛ lɛ eshwie shi, ni kɛ́ wɔmiifee weku nikasemɔ lɛ, bei komɛi lɛ wɔkwɛɔ he ni mɔ fɛɛ mɔ etsu enɔ̃ he nii kɛshɛ.” Gbalashihilɛ mli hefatalɔi nɛɛ na hu akɛ gbii komɛi ni amɛhala yɛ otsi lɛ mli akɛ amɛkɛkwɛŋ tɛlivishiŋ gbɛkɛ lɛ haa mɔ fɛɛ mɔ ni yɔɔ weku lɛ mli lɛ náa hegbɛ kɛkaneɔ nii.

Asafoŋ Kpeei

Mike kɛ Denise tsɔse bii ejwɛ. Te amɛweku lɛ ná ekome ni amɛfee lɛ he sɛɛ amɛha tɛŋŋ? Mike kɛɛ akɛ: “Bei komɛi lɛ, gbɛjianɔ ni wɔtoɔ jogbaŋŋ koni wɔshɛ asafoŋ kpeei ashishi mra lɛ po yeee omanye, shi ekomefeemɔ ye ebua wɔ ni wɔnyɛ wɔtsu he nii.” Denise tsɔɔ mli akɛ: “Beni gbekɛbii lɛ daraa lɛ, wɔha amɛteŋ mɔ fɛɛ mɔ nitsumɔ. Kim ni ji wɔbi yoo onukpa lɛ yeɔ ebuaa kɛhoɔ nii ni etoɔ okpɔlɔ.” Amɛbi nuu Michael kɛɛ akɛ: “Afeɔ asafoŋ kpee yɛ wɔshĩa lɛ daa Jufɔ gbɛkɛ. No hewɔ lɛ, wɔbɛɔ tsũ lɛ mli, wɔsaa jɛmɛ, ni wɔtoɔ sɛ̃i lɛ.” Amɛbi nuu kroko ni atsɛɔ lɛ Matthew lɛ kɛɛ kɛfata he akɛ: “Kɛ́ abaaya asafoŋ kpeei lɛ, Ataa kpaa nitsumɔ ebaa shĩa mra, ni ebayeɔ ebuaa wɔ koni wɔsaa wɔhe kɛya kpee lɛ.” Mɛni ejɛ mli kɛba?

Deŋmegbomɔ lɛ Efeee Efolo

Mike kɛɛ akɛ: “Mi kɛ Denise bɔi sɔɔmɔ akɛ gbɛgbalɔi yɛ afi 1987 lɛ. No mli lɛ, wɔbii lɛ ateŋ mɛi etɛ yɛ wɔŋɔɔ lolo. Amɛteŋ mɛi enyɔ batsɔmɔ gbɛgbalɔi, ni mɛi krokomɛi lɛ hu ye amɛbua kɛmamɔ Betel shĩai. Nɔ̃ kroko hu ni eha wɔweku lɛ ená miishɛɛ ji akɛ wɔnyɛ wɔye wɔbua mɛi 40 ni amɛjɔɔ amɛwala nɔ ni abaptisi amɛ. Wɔná hegbɛ hu kɛtsu tsumaa nitsumɔi krokomɛi akɛ weku yɛ maŋsɛɛ po.”

Eji anɔkwale akɛ deŋme ni wekui gboɔ kɛtsuɔ nii yɛ ekomefeemɔ mli lɛ efeee efolo. Ani nyɛbaanyɛ nyɛtsɔ gbɛ̀i krokomɛi anɔ nyɛfee ekome kɛtsu nii akɛ weku? Kɛ́ nyɛfee ekome kɛtsu nii lɛ, ebaaye ebua nyɛweku lɛ koni nyɛya hiɛ yɛ mumɔŋ babaoo.

[Mfoniri ni yɔɔ baafa 28]

Shiɛmɔ wiemɔi ahe nɔkwɛmɔnɔ ni afeɔ lɛ haa ayaa hiɛ yɛ shiɛmɔ nitsumɔ lɛ mli