Kristofoi Awekui—Nyɛnyiɛa Yesu Nɔkwɛmɔnɔ Lɛ Sɛɛ!
Kristofoi Awekui—Nyɛnyiɛa Yesu Nɔkwɛmɔnɔ Lɛ Sɛɛ!
‘Kristo to okadi efɔ̃ shi eha nyɛ, koni nyɛnyiɛ enanemaahei lɛ asɛɛ.’—1 PET. 2:21.
1. (a) Mɛɛ gbɛfaŋnɔ Nyɔŋmɔ Bi lɛ ná yɛ adebɔɔ mli? (b) Te Yesu dɔɔ adesai ahe ehaa tɛŋŋ?
BENI Nyɔŋmɔ bɔ ŋwɛi kɛ shikpɔŋ lɛ, no mli lɛ ekromɔ Bi lɛ yɛ emasɛi “akɛ ŋaalɔ.” Agbɛnɛ hu, beni Yehowa bɔ kooloi kɛ kwɛ̃ɛnii srɔtoisrɔtoi babaoo yɛ shikpɔŋ nɛɛ nɔ, ní efee Paradeiso ní adesai ni ebɔ yɛ esubaŋ nɔ lɛ baahi mli lɛ, e-Bi lɛ kɛ lɛ fee ekome kɛtsu. Nyɔŋmɔ Bi ni sɛɛ mli lɛ abale lɛ akɛ Yesu lɛ ná suɔmɔ kple kɛha adesai. ‘Enáa gbɔmɛi abii ahe miishɛɛ.’—Abɛi 8:27-31; 1 Mose 1:26, 27.
2. (a) Mɛni Yehowa kɛha adesai ni yeee emuu koni ekɛye ebua amɛ? (b) Mɛni ji nibii ni Biblia lɛ kɛ gbɛtsɔɔmɔ haa yɛ he lɛ ateŋ ekome?
2 Beni klɛŋklɛŋ nuu kɛ yoo lɛ tɔ̃ sɛɛ lɛ, gbɛ nɔ ni Yehowa aaatsɔ akpɔ̃ adesai eshafeelɔi lɛ batsɔ eyiŋtoo lɛ fã ko ni he hiaa waa. Yehowa kɛ Kristo kpɔ̃mɔ afɔleshãa lɛ ha bɔni afee ni anyɛ akpɔ̃ adesai. (Rom. 5:8) Kɛfata he lɛ, Yehowa kɛ e-Wiemɔ ni ji Biblia lɛ ní tsɔɔ adesa bɔ ni eeefee etsu esha ni ená akɛ gboshinii lɛ he nii yɛ omanyeyeli mli lɛ ha. (Lala 119:105) Yehowa tsɔɔ e-Wiemɔ lɛ nɔ etsɔɔ adesai agbɛ bɔni afee ni amɛná weku shihilɛ ni ekomefeemɔ kɛ miishɛɛ yɔɔ mli. Mose Klɛŋklɛŋ Wolo lɛ wie gbalashihilɛ he akɛ, esa akɛ nuu ‘akpɛtɛ eŋa he, ni amɛtsɔ̃ heloo kome.’—1 Mose 2:24.
3. (a) Mɛni Yesu ha ale yɛ gbalashihilɛ he? (b) Mɛni he wɔbaasusu yɛ nikasemɔ nɛɛ mli?
3 Beni Yesu tsuɔ esɔɔmɔ nitsumɔ lɛ yɛ shikpɔŋ lɛ nɔ lɛ, ema nɔ mi akɛ esaaa akɛ atseɔ gbãla. Etsɔɔ shishitoo mlai ní kɛ́ weku mli bii kɛtsu nii lɛ, ebaaye ebua amɛ ni amɛkpoo sui kɛ nifeemɔi ni baanyɛ afite amɛgbãla loo miishɛɛ ni yɔɔ amɛweku lɛ mli lɛ. (Mat. 5:27-37; 7:12) Nikasemɔ nɛɛ baawie bɔ ni Yesu tsɔɔmɔi lɛ kɛ nɔkwɛmɔnɔ ni efee beni eyɔɔ shikpɔŋ lɛ nɔ lɛ baanyɛ aye abua wumɛi, ŋamɛi, fɔlɔi, kɛ bii koni amɛná miishɛɛ ni amɛtsui anyɔ amɛ mli lɛ he.
Gbɛ nɔ ni Wu Kristofonyo Tsɔɔ Ewoɔ Eŋa
4. Mɛɛ tsakpaa kã hegbɛ ni Yesu yɔɔ lɛ kɛ hegbɛ ni wumɛi Kristofoi yɔɔ lɛ teŋ?
4 Nyɔŋmɔ to wu lɛ akɛ weku lɛ yitso taakɛ bɔ ni Yesu ji asafo lɛ Yitso lɛ. Bɔfo Paulo kɛɛ akɛ: “Wu lɛ ji ŋa lɛ yitso, taakɛ bɔ ni Kristo hu ji asafo lɛ yitso, ni lɛ nɔŋŋ ji gbɔmɔtso lɛ yiwalaherelɔ lɛ. Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi, taakɛ bɔ ni Kristo hu sumɔ asafo lɛ ni eŋɔ lɛ diɛŋtsɛ ehe eha yɛ ehewɔ lɛ.” (Efe. 5:23, 25) Yɛ anɔkwale mli lɛ, esa akɛ wumɛi Kristofoi akase bɔ ni Yesu kɛ esɛɛnyiɛlɔi lɛ ye eha lɛ, ní amɛkɛ amɛŋamɛi ahi shi nakai. Nyɛhaa wɔsusua gbɛ̀i komɛi anɔ ni Yesu tsɔ ekɛ hegbɛ ni Nyɔŋmɔ kɛha lɛ lɛ tsu nii lɛ ahe wɔkwɛa.
5. Te Yesu kɛ hegbɛ ni eyɔɔ yɛ ekaselɔi lɛ anɔ lɛ tsu nii eha tɛŋŋ?
5 Yesu ‘he jɔ, ni ebaa ehe shi kɛjɛɔ etsui mli.’ (Mat. 11:29) Kɛfata he lɛ, ekɛ hiɛdɔɔ tsu nibii ahe nii. Etsuɔ esɔ̃i ahe nii be fɛɛ be. (Mar. 6:34; Yoh. 2:14-17) Ejɛɔ mlihilɛ mli ewoɔ ekaselɔi lɛ aŋaa, ni kɛ́ ehe bahia lɛ, efeɔ nakai shii abɔ po. (Mat. 20:21-28; Mar. 9:33-37; Luka 22:24-27) Ni kɛlɛ, Yesu haaa amɛnu he akɛ amɛhe bɛ sɛɛnamɔ, ni asaŋ ehaaa amɛnu he hu akɛ esumɔɔɔ amɛ loo akɛ amɛnyɛŋ amɛfee nibii ni etsɔɔ amɛ akɛ amɛfee lɛ. Yɛ no najiaŋ lɛ, ejie amɛ yi ni ewo amɛ hewalɛ. (Luka 10:17-21) Ekã shi faŋŋ akɛ bɔ ni Yesu kɛ ekaselɔi lɛ ye yɛ suɔmɔ kɛ mlijɔlɛ mli lɛ ha amɛná bulɛ amɛha lɛ!
6. (a) Mɛni wu baanyɛ akase kɛjɛ bɔ ni Yesu kɛ ekaselɔi lɛ ye eha lɛ mli? (b) Mɛɛ ŋaa Petro wo wumɛi?
6 Wumɛi Kristofoi kaseɔ kɛjɛɔ Yesu nɔkwɛmɔnɔ lɛ mli akɛ amɛyitsoyeli lɛ jeee hegbɛ ni akɛyeɔ mɔ nɔ dɛŋdɛŋ. Yɛ no najiaŋ lɛ, esa akɛ amɛjie bulɛ kpo amɛtsɔɔ amɛŋamɛi lɛ ní amɛjɛ amɛsuɔmɔ mli amɛkɛ amɛhe ashã afɔle amɛha amɛ. Bɔfo Petro wo wumɛi ŋaa akɛ amɛkase gbɛ̀i anɔ ni Yesu tsɔ ejie suɔmɔ kpo lɛ ní amɛkɛ amɛŋamɛi lɛ ‘ahi shi nakai nɔŋŋ,’ ní ‘amɛkɛ woo awo’ amɛ. (Nyɛkanea 1 Petro 3:7.) Belɛ, mɛɛ gbɛ nɔ wu aaatsɔ ekɛ hegbɛ ni Nyɔŋmɔ kɛha lɛ lɛ atsu nii ní yɛ nakai beaŋ nɔŋŋ lɛ ewo eŋa?
7. Mɛɛ gbɛ nɔ wu aaatsɔ awo eŋa? Feemɔ enɛ he nɔkwɛmɔnɔ.
7 Gbɛ kome ni wu aaatsɔ nɔ etsɔɔ akɛ ewoɔ eŋa ji ni esusu eŋa lɛ henumɔi kɛ esusumɔi ahe jogbaŋŋ dani ekpɛ yiŋ ni baasa weku lɛ he. Ekolɛ ehe baahia ni ekpɛ yiŋ akɛ weku lɛ afã kɛyahi he kroko, loo etsake eheloonaa nitsumɔ, loo ekpɛ yiŋ yɛ saji tamɔ he ni amɛbaaya hejɔɔmɔ yɛ loo shika ni esa akɛ weku lɛ afite yɛ nibii ajara ni waa lɛ hewɔ lɛ he. Akɛni yiŋ ni ebaakpɛ lɛ baasa weku lɛ he hewɔ lɛ, ebaafee nɔ ni hi akɛ wu lɛ kɛ eŋa lɛ baasusu sane lɛ he koni no aye abua lɛ ni ekpɛ yiŋ ni ja ni ŋmɛɔ pɛpɛɛpɛ, ni no baaha efee mlɛo kɛha eŋa lɛ akɛ eeefi esɛɛ. (Abɛi 15:22) Wumɛi Kristofoi ni woɔ amɛŋamɛi lɛ haa amɛŋamɛi lɛ náa bulɛ kɛ suɔmɔ amɛhaa amɛ, ni nɔ ni fe fɛɛ lɛ, Yehowa kpɛlɛɔ amɛ nɔ.—Efe. 5:28, 29.
Gbɛ nɔ ni Ŋa Kristofonyo Tsɔɔ Esheɔ Ewu
8. Mɛni hewɔ esaaa akɛ mɔ ko kaseɔ nɔ ni Hawa fee lɛ?
8 Yesu ba ehe shi eha yitsoyeli ni ekɛfee nɔkwɛmɔnɔ ni nɔ bɛ eha ŋamɛi Kristofoi. Bɔ ni ebu yitsoyeli eha lɛ yɛ srɔto kwraa yɛ su ni Hawa ni ji klɛŋklɛŋ yoo lɛ jie lɛ kpo lɛ he! Hawa efeee nɔkwɛmɔnɔ kpakpa ehaaa ŋamɛi. Yehowa to yitso eha lɛ, ni Yehowa tsɔɔ nakai yitso lɛ nɔ ekɛ famɔ haa lɛ. Ni kɛlɛ, Hawa ebuuu nakai gbɛjianɔtoo lɛ. Ekɛ famɔ ni Adam kɛha lɛ lɛ tsuuu nii. (1 Mose 2:16, 17; 3:3; 1 Kor. 11:3) Eyɛ mli akɛ lakamɔ alaka Hawa moŋ, shi kulɛ esa akɛ ebi ewu lɛ kɛji eja gbɛ akɛ ebo gbee ni tsɔɔ lɛ nɔ ni “Nyɔŋmɔ le” lɛ toi. Yɛ no najiaŋ lɛ, lɛ moŋ ekɛ henɔwomɔ tsɔɔ ewu lɛ gbɛ.—1 Mose 3:5, 6; 1 Tim. 2:14.
9. Mɛɛ heshibaa he nɔkwɛmɔnɔ Yesu feɔ?
9 Ákɛ nɔ ni tamɔɔɔ nakai lɛ, Yesu ba ehe shi eha e-Yitso lɛ ni ekɛfee nɔkwɛmɔnɔ ni nɔ bɛ. Ekɛ enifeemɔ kɛ eshihilɛ tsɔɔ akɛ ‘ebuuu akɛ ekɛ Nyɔŋmɔ yeɔ egbɔ.’ Yɛ no najiaŋ lɛ, “ejie yɛ ehe efɔ̃ shi, eŋɔ tsulɔ su efɔ̃ enɔ.” (Fil. 2:5-7) Ŋmɛnɛ lɛ, eyɛ mli akɛ Yesu ji Maŋtsɛ ni miiye nɔ moŋ, shi ejieɔ nakai heshibaa su lɛ nɔŋŋ kpo. Ebaa ehe shi ehaa e-Tsɛ lɛ yɛ nɔ fɛɛ nɔ mli, ni efiɔ E-yitsoyeli lɛ sɛɛ.—Mat. 20:23; Yoh. 5:30; 1 Kor. 15:28.
10. Mɛɛ gbɛ nɔ ŋa baanyɛ atsɔ afi ewu yitsoyeli lɛ sɛɛ?
10 Esa akɛ ŋa ni ji Kristofonyo lɛ akase Yesu nɔkwɛmɔnɔ lɛ kɛtsɔ ewu lɛ yitsoyeli sɛɛ ni eeefi lɛ nɔ. (Nyɛkanea 1 Petro 2:21; 3:1, 2.) Susumɔ shihilɛ ko ni ebaanyɛ efee nakai yɛ mli lɛ he okwɛ. Ŋɔɔ lɛ akɛ ebi nuu eba eebi lɛ gbɛ koni eyafee nɔ ko. Akɛni fɔlɔi enyɔ lɛ tsɔko hiɛ amɛsusuko sane lɛ he hewɔ lɛ, ebaafee nɔ ni hi akɛ nyɛ lɛ aaabi akɛ, “Ani obi opapa?” Kɛji ebi nuu lɛ efeko nakai lɛ, no lɛ esa akɛ ekɛ ewu lɛ asusu sane lɛ he dã. Ekã shi faŋŋ akɛ esaaa akɛ ŋa Kristofonyo wieɔ eshiɔ nɔ ni ewu ewie, loo ekɛ lɛ taa sane naa yɛ amɛbii lɛ ahiɛ. Kɛ́ ekɛ ewu lɛ kpãaa gbee yɛ nɔ ko he lɛ, esa akɛ ekɛ lɛ awie he yɛ teemɔŋ.—Efe. 6:4.
Nɔkwɛmɔnɔ ni Yesu Fee Eha Fɔlɔi
11. Mɛɛ nɔkwɛmɔnɔ Yesu fee eha fɔlɔi?
11 Eyɛ mli akɛ Yesu boteee gbalashihilɛ mli ni asaŋ efɔɔɔ hu moŋ, shi efee nɔkwɛmɔnɔ ni nɔ bɛ eha fɔlɔi Kristofoi. Yɛ mɛɛ gbɛ nɔ? Ejɛ suɔmɔ kɛ tsuishitoo mli etsɔɔ ekaselɔi lɛ anii kɛtsɔ ewiemɔ kɛ enifeemɔ nɔ. Etsɔɔ amɛ gbɛ nɔ ni amɛaatsɔ amɛtsu nitsumɔ ni ekɛwo amɛdɛŋ lɛ. (Luka 8:1) Bɔ ni Yesu kɛ ekaselɔi lɛ ye eha lɛ ha amɛna bɔ ni esa akɛ amɛkɛ amɛhe ahi shi.—Nyɛkanea Yohane 13:14-17.
12, 13. Mɛni ebiɔ ni fɔlɔi afee koni amɛtsɔse amɛbii lɛ ni amɛshe Nyɔŋmɔ gbeyei?
12 Gbekɛbii kaseɔ amɛfɔlɔi yɛ gbɛ kpakpa loo gbɛ gbonyo nɔ. No hewɔ lɛ, fɔlɔi, nyɛbia nyɛhe akɛ: ‘Mɛɛ nɔkwɛmɔnɔ wɔfeɔ wɔhaa wɔbii lɛ yɛ be ni wɔfiteɔ kɛkwɛɔ TV loo wɔkɛjieɔ wɔhiɛtserɛ, kɛ nɔ ni wɔkɛkaseɔ Biblia lɛ loo wɔkɛyaa shiɛmɔ lɛ gbɛfaŋ? Mɛɛ nibii wɔweku lɛ kɛyeɔ klɛŋklɛŋ gbɛhe? Ani wɔkɛ anɔkwa jamɔ yeɔ klɛŋklɛŋ gbɛhe yɛ wɔshihilɛ kɛ wɔyiŋkpɛi amli ni wɔkɛfeɔ nɔkwɛmɔnɔ kpakpa wɔhaa wɔbii lɛ?’ Kɛ́ fɔlɔi aaatsɔse amɛbii lɛ ni amɛshe Nyɔŋmɔ gbeyei lɛ, no lɛ esa akɛ amɛ tsutsu amɛha Nyɔŋmɔ mla lɛ akã amɛtsui nɔ.—5 Mose 6:6.
13 Kɛ́ fɔlɔi bɔ mɔdɛŋ amɛkɛ Biblia mli shishitoo mlai lɛ tsu nii yɛ amɛshihilɛ mli fɛɛ lɛ, amɛbii lɛ baayɔse. No baaha fɔlɔi lɛ awiemɔi kɛ amɛnitsɔɔmɔi lɛ aná amɛbii lɛ anɔ hewalɛ. Shi kɛ́ bii lɛ na akɛ amɛfɔlɔi lɛ kɛ Biblia mli shishitoo mlai ni amɛtsɔɔ amɛ lɛ tsuuu nii lɛ, ebaanyɛ eha bii lɛ amu sane naa akɛ nakai shishitoo mlai lɛ ahe ehiaaa tsɔ, loo akɛ anyɛŋ akɛtsu nii. Enɛ baaha je lɛ aná amɛnɔ hewalɛ yɛ gbɛ ni waaa nɔ.
14, 15. Mɛɛ otii esa akɛ fɔlɔi kɛmamɔ amɛbii lɛ ahiɛ, ni mɛni ji gbɛ kome ni amɛaatsɔ nɔ amɛfee nakai?
14 Fɔlɔi Kristofoi yɔseɔ akɛ bi kwɛmɔ biɔ babaoo fe eheloonaa hiamɔ nii ni aaaha lɛ kɛkɛ. No hewɔ lɛ, nilee bɛ mli kwraa akɛ aaatsɔɔ gbekɛ lɛ ni etiu heloonaa otii pɛ ni baaha ená nii lɛ asɛɛ. (Jaj. 7:12) Yesu tsɔɔ ekaselɔi lɛ ni amɛkɛ mumɔŋ nibii aye klɛŋklɛŋ gbɛhe. (Mat. 6:33) No hewɔ lɛ, esa akɛ fɔlɔi Kristofoi akase Yesu, ní amɛbɔ mɔdɛŋ amɛha amɛbii lɛ aná he miishɛɛ akɛ amɛaatiu mumɔŋ otii asɛɛ.
15 Gbɛ kome ni fɔlɔi aaatsɔ nɔ amɛfee enɛ ji ni amɛha amɛbii lɛ aná hegbɛ ni amɛkɛ mɛi ni yɔɔ be fɛɛ sɔɔmɔ nitsumɔ lɛ mli lɛ abɔ. Kɛ́ oblahii kɛ oblayei bibii kɛ gbɛgbalɔi loo kpokpaa nɔkwɛlɔ lɛ kɛ eŋa shãra lɛ, ebaanyɛ ewo oblahii kɛ oblayei lɛ hewalɛ waa. Kɛ́ fɔlɔi lɛ ha maŋsɛɛ sanekpakpa jajelɔi, Betelbii, kɛ majimaji ateŋ tsumaa nitsulɔi basara weku lɛ, mɛi nɛɛ baanyɛ amɛkɛ miishɛɛ awie jɔɔmɔi ni yɔɔ Yehowa sɔɔmɔ mli lɛ ahe. Ŋwanejee ko kwraa bɛ he akɛ saralɔi nɛɛ baagba niiashikpamɔi ni yɔɔ miishɛɛ. Amɛhe ni amɛkɛshã afɔle yɛ Yehowa sɔɔmɔ mli lɛ ji nɔkwɛmɔnɔ ni baanyɛ aye abua nyɛbii lɛ koni amɛkpɛ yiŋ ni ja, amɛkɛ otii kpakpai amamɔ amɛhiɛ, ní amɛná wolokasemɔ ni sa ni baaha amɛnyɛ amɛkwɛ amɛhe kɛtsu be fɛɛ sɔɔmɔ nitsumɔ lɛ.
Bii—Mɛni Baaye Abua Nyɛ ni Nyɛnyiɛ Yesu Nɔkwɛmɔnɔ lɛ Sɛɛ?
16. Mɛɛ gbɛ nɔ Yesu tsɔ ewo efɔlɔi kɛ agbɛnɛ hu eŋwɛi Tsɛ lɛ?
16 Bii, nyɛ hu Yesu fee nɔkwɛmɔnɔ ni nɔ bɛ efɔ̃ shi eha nyɛ. Yehowa ŋɔ Yesu ewo Yosef kɛ Maria dɛŋ koni amɛkwɛ lɛ, ni Yesu bo amɛ toi. (Nyɛkanea Luka 2:51.) Eyɔse akɛ eyɛ mli akɛ amɛyeee emuu moŋ, shi Nyɔŋmɔ kɛ lɛ wo amɛdɛŋ koni amɛkwɛ lɛ. Enɛ hewɔ lɛ, esa akɛ ewo amɛ. (5 Mose 5:16; Mat. 15:4) Beni Yesu batsɔ onukpa lɛ, efee nibii ni saa eŋwɛi Tsɛ lɛ hiɛ be fɛɛ be. Enɛ bi ni ete shi eshi kaa. (Mat. 4:1-10) Bii, bei komɛi lɛ abaanyɛ aka nyɛ ni nyɛgbo nyɛfɔlɔi anɔ toi. Belɛ, mɛni baanyɛ aye abua nyɛ ni nyɛnyiɛ Yesu nɔkwɛmɔnɔ lɛ sɛɛ?
17, 18. (a) Mɛɛ nɔnyɛɛ oblahii kɛ oblayei bibii kɛkpeɔ yɛ skul? (b) Mɛni kɛ́ oblahii kɛ oblayei kai lɛ, ebaaye ebua amɛ koni amɛte shi amɛshi kaai?
17 Ekã shi faŋŋ akɛ mɛi ni nyɛkɛyaa skul lɛ ateŋ mɛi babaoo bɛ bulɛ kɛha Biblia mli shishitoo mlai lɛ. Ekolɛ amɛbaanyɛ̃ nyɛ nɔ ni nyɛkɛ nyɛhe awo nifeemɔi ni esaaa mli, ni kɛ́ nyɛkpɛlɛɛɛ lɛ, amɛbaaye nyɛhe fɛo. Ani oskulbii lɛ ewo bo gbɛi pɛŋ akɛni ofataaa amɛhe kɛfeee nibii komɛi lɛ hewɔ? Kɛ́ nakai ni lɛ, te ofeɔ onii ohaa tɛŋŋ? Ole akɛ kɛ́ oŋmɛ gbɛ ni amɛwo ohe gbeyei ni ofata amɛhe kɛfee nɔ ni esaaa lɛ, ebaadɔ ofɔlɔi lɛ kɛ agbɛnɛ hu Yehowa. Mɛni baaba onɔ kɛ́ oyabo oskulbii lɛ atoi? Ekolɛ okɛ otii komɛi emamɔ ohiɛ akɛ obaasumɔ ni otsɔ gbɛgbalɔ, asafoŋ sɔɔlɔ, oyasɔmɔ yɛ he ni Maŋtsɛyeli shiɛlɔi ahe hiaa waa yɛ, loo osɔmɔ yɛ Betel. Ani kɛ́ okɛ oskulbii lɛ bɔ lɛ, ebaaye ebua bo ni oshɛ otii ni okɛmamɔ ohiɛ lɛ ahe?
18 Oblahii kɛ oblayei ní nyɛyɔɔ Kristofoi asafo lɛ mli, ani nyɛkɛ shihilɛi ni kaa nyɛ hemɔkɛyeli lɛ kpeɔ? Te nyɛfeɔ nyɛnii nyɛhaa tɛŋŋ? Nyɛsusua nɔkwɛmɔnɔ ni Yesu fee eha nyɛ lɛ he. Yesu haaa kaa aye enɔ, ni efee shiŋŋ kɛfee nɔ ni ele akɛ eji jalɛ nii. Kɛ́ nyɛkai enɛ lɛ, no baawo nyɛ hewalɛ ni nyɛkɛɛ nyɛskulbii lɛ faŋŋ akɛ nyɛfataŋ amɛhe kɛfeŋ nɔ ko ní nyɛle akɛ ejaaa. Taakɛ Yesu fee lɛ, nyɛkɛ nyɛjwɛŋmɔ amaa Yehowa toi ni nyɛaabo daa kɛ gbɛkpamɔ ni nyɛyɔɔ akɛ nyɛkɛ miishɛɛ baasɔmɔ lɛ nyɛwala bei abɔ fɛɛ lɛ nɔ.—Heb. 12:2.
Nɔ̃ Diɛŋtsɛ ni Haa Anáa Miishɛɛ yɛ Weku Shihilɛ Mli
19. Mɛni haa mɔ náa miishɛɛ diɛŋtsɛ yɛ shihilɛ mli?
19 Yehowa Nyɔŋmɔ kɛ Yesu Kristo miisumɔ ni adesai aná nɔ ni hi fe fɛɛ yɛ shihilɛ mli. Eyɛ mli akɛ amrɔ nɛɛ po lɛ wɔyeee emuu moŋ, shi wɔbaanyɛ wɔná miishɛɛ bɔ ni sa. (Yes. 48:17, 18; Mat. 5:3) Yesu tsɔɔ Nyɔŋmɔjamɔ he anɔkwalei komɛi ni bafeɔ shishijee nibii ni haa adesai náa miishɛɛ, shi jeee nomɛi pɛ etsɔɔ ekaselɔi lɛ. Yesu tsɔɔ shihilɛ gbɛ ni hi fe fɛɛ. Kɛfata he lɛ, ekɛ eshihilɛ kɛ enifeemɔ fee nɔkwɛmɔnɔ kpakpa efɔ̃ shi. Ekɔɔɔ he eko mɛi ni wɔji yɛ weku lɛ mli lɛ, kɛ́ wɔnyiɛ enɔkwɛmɔnɔ lɛ sɛɛ lɛ, wɔbaaná he sɛɛ. No hewɔ lɛ, wumɛi, ŋamɛi, fɔlɔi, kɛ bii, nyɛnyiɛa Yesu nɔkwɛmɔnɔ lɛ sɛɛ! Nɔ̃ diɛŋtsɛ ni baaha mɔ ko aná miishɛɛ yɛ eweku shihilɛ mli ni etsui anyɔ emli ji ni ekɛ Yesu tsɔɔmɔi lɛ atsu nii ní ekase lɛ.
Te Obaaha Hetoo Oha Tɛŋŋ?
• Te esa akɛ wumɛi kɛ hegbɛ ni Nyɔŋmɔ kɛha amɛ lɛ atsu nii aha tɛŋŋ?
• Mɛɛ gbɛ nɔ ŋa baanyɛ akase Yesu nɔkwɛmɔnɔ lɛ?
• Mɛni fɔlɔi baanyɛ akase kɛjɛ bɔ ni Yesu kɛ ekaslɔi lɛ ye eha lɛ mli?
• Mɛni oblahii kɛ oblayei baanyɛ akase kɛjɛ Yesu nɔkwɛmɔnɔ lɛ mli?
[Nikasemɔ lɛ he Sanebimɔi]
[Mfoniri ni yɔɔ baafa 8]
Dani wu ko ni yɔɔ suɔmɔ lɛ baakpɛ yiŋ ni baasa weku lɛ he lɛ, mɛni ebaafee?
[Mfoniri ni yɔɔ baafa 9]
Mɛɛ shihilɛ haa ŋa lɛ náa hegbɛ koni efi ewu lɛ yitsoyeli lɛ sɛɛ?
[Mfoniri ni yɔɔ baafa 10]
Gbekɛbii kaseɔ sui kpakpai ni amɛfɔlɔi yɔɔ lɛ