Ana Jwetrii ni Aŋɔtee

ANI ona jwetri ni aŋɔtee yɛ he ko ni kulɛ okpaaa gbɛ ákɛ akɛbaato jɛmɛ lɛ pɛŋ? Nakai ebalɛ yɛ nyɛmi nuu Odasefonyo ko ni yɔɔ Estonia ni atsɛɔ lɛ Ivo Laud lɛ gbɛfaŋ yɛ March 27, 2005 lɛ. No mli lɛ eewa Alma Vardja ni ji nyɛmi Odasefonyo ni hiɛ efã lɛ koni amɛkumɔ kpɛtɛŋkpɛ momo ko. Beni amɛjieɔ tsei ni akɛha kpɛtɛŋkpɛ lɛ he lɛ, amɛyɔse akɛ aka ŋmoŋmolo ko akpɛtɛ akulashiŋ lɛ eko he. Beni amɛjie ŋmoŋmolo lɛ, amɛna akɛ akpɛ́ akulashiŋ lɛ mli aaafee sɛntimitai 10 lɛɛmɔ, ekɛlɛ aaafee mitai 1.2, ni emli kwɔlɛ hu ji sɛntimitai 10, ni atsĩ nɔ kɛ tso ní kɛ bu ni akpɛ́ lɛ kɛlɛ kɛ elɛɛmɔ yeɔ egbɔ. (1) Naa! he ko ni akpɛ́ ní aŋɔ jwetrii ato. Mɛɛ jwetrii ana lɛ? Namɔ kɛto jɛmɛ?

 Ana nibii komɛi ni akɛ wolo ni ti ehahaa he yɛ bu ni akpɛ́ lɛ mli. (2) Nibii ni ahahaa he nɛɛ ji Yehowa Odasefoi awoji, titri lɛ Buu-Mɔɔ fãi ni akaseɔ yɛ asafoŋ kpeei ashishi lɛ, ni 1947 nɔ̃ po fata he. (3) Akwɛ nɔ ni akala lɛ anɔ, ni akɛ niji ŋmala pɛpɛɛpɛ yɛ Estonia wiemɔ mli. Nibii nɛɛ ateŋ ekomɛi ha anyɛ ana mɔ ni kɛ woji lɛ to nɛkɛ he nɛɛ. Enɛɛmɛi ji nibii ni aŋmala ashwie shi ni kɔɔ Alma wu Villem Vardja daaŋ ni ata lɛ he. Nibii ni ana lɛ ekomɛi hu kɔɔ afii abɔ ni eye yɛ tsuŋwoo mli lɛ he. Mɛni hewɔ awo lɛ tsuŋ?

Villem Vardja ná sɔɔmɔ hegbɛ yɛ Tartu Asafo lɛ kɛ no sɛɛ lɛ Otepää Asafo lɛ mli, ni asafoi nɛɛ fɛɛ yɛ tsutsu Soviet Socialist Republic maji lɛ ateŋ ekome ni ji Estonia lɛ mli. Ekã shi faŋŋ akɛ ekase Biblia mli anɔkwalei lɛ dani Jeŋ Ta ni ji Enyɔ lɛ je shishi. Afii fioo komɛi asɛɛ yɛ December 24, 1948 lɛ, Komunist nɔyeli lɛ ha amɔ Nyɛminuu Vardja, ekolɛ yɛ shiɛmɔ nitsumɔ lɛ hewɔ. Polisifoi lɛ ta edaaŋ ni amɛfee lɛ niseniianii bɔni afee ni etsɔɔ amɛ Odasefoi krokomɛi agbɛi. Akɛ lɛ tee kojomɔhe, shi ahaaa ejie enaa ni abu lɛ fɔ́ ni awo lɛ tsuŋ afii nyɔŋma yɛ nsrai srɔtoi amli yɛ Russia.

Villem Vardja ye Yehowa anɔkwa kɛyashi egbo yɛ March 6, 1990. Eŋa leee ákɛ akɛ woji lɛ eto. Eeenyɛ efee akɛ, eesumɔ ni ebu eŋa lɛ he kɛ́ ebalɛ akɛ abaata eŋa lɛ daaŋ lɛ. Mɛni hewɔ ekɛ woji lɛ to lɛ? Ekɛ woji lɛ to ejaakɛ Soviet Maŋ lɛ Hebuu Kuu ni atsɛɔ amɛ KGB lɛ boteɔ Yehowa Odasefoi lɛ ashĩai trukaa, ní amɛmiitao asafo lɛ woji. Eeenyɛ efee akɛ Nyɛminuu Vardja kɛ woji lɛ to koni kɛ́ ebalɛ akɛ KGB bii lɛ shɔ̃ woji fɛɛ ni nyɛmimɛi lɛ yɔɔ lɛ, amɛkã he amɛná mumɔŋ niyenii. Yɛ afi 1990 teŋgbɛ lɛ, ayana woji krokomɛi ni akɛto. Ana eko hu yɛ Tartu yɛ Estonia wuoyigbɛ. Villem Vardja ji mɔ ni kɛ no hu to.

Mɛni hewɔ wɔtsɛɔ woji nɛɛ akɛ jwetrii lɛ? Ejaakɛ nɛkɛ woji nɛɛ ní akwɛ nɔ̃ ni akala lɛ anɔ ní aŋmɛ tsui shi akɛ niji ŋmala fitsofitso, ni akɛto jogbaŋŋ nɛɛ tsɔɔ akɛ Odasefoi lɛ ahiɛ sɔɔ mumɔŋ niyenii ni yɔɔ yɛ nakai beaŋ lɛ waa. (Mat. 24:45) Ani ohiɛ sɔɔ mumɔŋ niyenii ni onine nyɛɔ eshɛɔ nɔ amrɔ nɛɛ yɛ heni oyɔɔ lɛ? Mumɔŋ niyenii lɛ ateŋ ekome ji Buu-Mɔɔ ni akalaa yɛ Estonia wiemɔ kɛ wiemɔi krokomɛi ni fa fe 170 amli lɛ.