Sanebimɔi ni Jɛ Kanelɔi Adɛŋ

Mɛni wɔkaseɔ kɛjɛɔ Abɛi 24:27 lɛ mli?

Mɔ ni ŋma Abɛi Awolo lɛ wo oblanyo ŋaa akɛ: “Saamɔ onitsumɔ yɛ agbó naa, ni ofee lɛ klalo oha ohe yɛ ŋmɔshi; no sɛɛ dani oma otsu.” Mɛni he abɛ ní ajɛ mumɔŋ abu nɛɛ wieɔ lɛ? No ji akɛ esa akɛ nuu asaa ehe jogbaŋŋ dani ebote gbalashihilɛ mli ní ebɔi bii afɔmɔ, ní eyɔse sɔ̃i ni baaba abajwere enɔ akɛ wu kɛ tsɛ lɛ.

Tsutsu ko lɛ, bei komɛi lɛ atsɔɔ ŋmalɛ nɛɛ shishi akɛ kɛ́ mɔ ko yɛ ŋa kɛ bii lɛ, jeee eheloonaa nitsumɔ pɛ kɛkɛ esa akɛ etsu, shi moŋ esa akɛ etswa eweku lɛ ema shi ní ewo amɛ hewalɛ. Ákɛ nɔkwɛmɔnɔ lɛ, esa akɛ ekɛ amɛ akase Biblia lɛ ní etsɔɔ amɛ Nyɔŋmɔ he nii. Eyɛ mli akɛ susumɔ nɛɛ ji anɔkwale ni eja yɛ Ŋmalɛ naa moŋ, shi etamɔ nɔ ni jeee no ji nɔ̃ tuuntu he ni Abɛi 24:27 lɛ wieɔ lɛ. Mɛni hewɔ? Susumɔ yiŋtoi enyɔ nɛɛ ahe okwɛ.

Klɛŋklɛŋ lɛ, jeee weku ni ato shishi momo ní esa akɛ awo emli bii lɛ hewalɛ ní awaje amɛ lɛ he ŋmalɛ nɛɛ wieɔ lɛ. Yɛ no najiaŋ lɛ, eewie tsumaa diɛŋtsɛ he. Shi Hebri wiemɔ ni atsɔɔ shi akɛ “oma” lɛ hu baanyɛ afee mfonirifeemɔŋ wiemɔ ni kɔɔ weku shishi ni aaato lɛ he—ni ji ní mɔ abote gbalashihilɛ mli ní efɔ.

Nɔ ni ji enyɔ lɛ, ŋmalɛ lɛ miima nɔ mi akɛ esa akɛ wɔto nibii anaa wɔfee, ni tsɔɔ akɛ esa akɛ wɔfee klɛŋklɛŋ nɔ̃ dani wɔfee nɔ ni ji enyɔ. Belɛ, ani abɛ lɛ miitsɔɔ akɛ esa akɛ wɔtsu wɔheloonaa nitsumɔi dani no sɛɛ lɛ wɔtsu nibii ni Nyɔŋmɔ taoɔ yɛ wɔdɛŋ lɛ ahe nii? Dabi!

Yɛ Biblia beaŋ lɛ, kɛ́ nuu ko miitao ‘ema etsu,’ ni ji ebote gbalashihilɛ mli lɛ, ebiɔ ehe akɛ, ‘Ani mishɛ mɔ ni baanyɛ akwɛ ŋa kɛ bii ni ekolɛ wɔbaafɔ́ lɛ ní maye mabua amɛ?’ Esa akɛ enyɛ ekwɛ eŋmɔ loo eŋmɔshi nibii lɛ anɔ jogbaŋŋ dani ebote gbalashihilɛ mli. No hewɔ lɛ, Today’s English Version lɛ tsɔɔ Abɛi 24:27 lɛ shishi akɛ: “Mɛɛ kɛ́ oŋmɔshi nibii lɛ fee klalo ní oyɛ nɔmimaa akɛ obaaná odaaŋ ŋmaa dani omã otsu ní obote gbalashihilɛ mli.” Ani shishitoo mla nɛɛ he yɛ sɛɛnamɔ kɛha wɔ ŋmɛnɛ?

Hɛɛ. Esa akɛ nuu ni miitao abote gbalashihilɛ mli lɛ asaa ehe eto sɔ̃i ni yɔɔ gbalashihilɛ mli lɛ. Kɛ́ eyɛ gbɔmɔtsoŋ hewalɛ lɛ, no lɛ esa akɛ etsu nii. Yɛ anɔkwale mli lɛ, jeee heloonaa nibii pɛ esa akɛ nuu agbo he deŋme ní ekɛkwɛ eweku. Nyɔŋmɔ Wiemɔ lɛ tsɔɔ akɛ kɛ́ nuu ko nyɛɛɛ akwɛ eweku yɛ heloonaa, henumɔŋ, kɛ mumɔŋ lɛ, no lɛ efaŋ mɔ ni heee yeee fe lɛ! (1 Tim. 5:8) No hewɔ lɛ, kɛ́ oblanyo ko miitao abote gbalashihilɛ mli lɛ, esa akɛ ebi ehe saji tamɔ: ‘Ani misaa mihe jogbaŋŋ bɔ ni manyɛ maná heloonaa nibii ni he baahia miŋa kɛ mibii? Ani manyɛ matsɔɔ miweku lɛ Yehowa he nii? Ani manyɛ mikɛ miŋa kɛ mibii lɛ akase Biblia lɛ daa?’ Nyɔŋmɔ Wiemɔ lɛ maa sɔ̃i ni he hiaa waa nɛɛ anɔ mi.—5 Mose 6:6-8; Efe. 6:4.

No hewɔ lɛ, esa akɛ oblanyo ni miitao ŋa lɛ asusu shishitoo mla ni yɔɔ Abɛi 24:27 lɛ he jogbaŋŋ. Nakai nɔŋŋ hu esa akɛ oblayoo akwɛ akɛ esaa ehe eto sɔ̃i ni baajwere enɔ kɛ́ ebote gbalashihilɛ mli ní efɔ bii lɛ. Oblahii kɛ oblayei ni ebote gbalashihilɛ mli lɛ baanyɛ abi amɛhe saji ni tamɔ nakai kɛji amɛmiitao ni amɛfɔ. (Luka 14:28) Kɛ́ Nyɔŋmɔ tsuji kɛ Ŋmalɛ mli gbɛtsɔɔmɔ nɛɛ tsu nii yɛ amɛshihilɛ mli lɛ, ehaŋ amɛyoyoro, ni amɛbaaná weku shihilɛ ni miishɛɛ yɔɔ mli.

[Wiemɔ ni akɔ ni akɛmiitsu nii ni yɔɔ baafa 12]

Mɛɛ saji esa akɛ oblanyo ni miitao abote gbalashihilɛ mli lɛ abi ehe?