Esa akɛ Wɔha yɛ Tsuijurɔnaa

BƆFO Paulo ŋma yɛ nɔhamɔ he akɛ: “Mɔ fɛɛ mɔ aha bɔ ni ekpɛ mli momo yɛ etsui mli, ni ekajɛ ŋkɔmɔyeli aloo fimɔ mli: ejaakɛ tsuijurɔnaa halɔ Nyɔŋmɔ sumɔɔ.” (2 Kor. 9:7) Yehowa enyɛɛɛ mɔ ko nɔ akɛ etsu onia kɛfi anɔkwa jamɔ sɛɛ. Ehaa etsuji lɛ diɛŋtsɛ jɛɔ amɛsuɔmɔ mli amɛhaa yɛ tsuijurɔnaa kɛtsɔɔ akɛ amɛtuu amɛhe amɛha lɛ. Kɛjɛ blema tɔ̃ɔ lɛ, ewebii lɛ jɛɔ amɛsuɔmɔ mli amɛhaa yɛ tsuijurɔnaa. Susumɔ nɔkwɛmɔnii etɛ ni nyiɛ sɛɛ nɛɛ ahe okwɛ.

Beni Yehowa kpɔ̃ Israelbii lɛ kɛjɛ Mizraim lɛ, efã koni amɛmã kpeebuu lɛ. Akɛni ehe baahia ni aná nibii kɛmã hewɔ lɛ, abi Israelbii lɛ ni amɛkɛ nikeenii abaha. Kɛkɛ ni “mɔ fɛɛ mɔ ni etsui mli ta lɛ” lɛ kɛ shika, jwiɛtɛi, jwine, kɛ nibii krokomɛi baha. Maŋbii lɛ jɛ suɔmɔ mli amɛha aahu akɛ akɛɛ amɛ akɛ amɛkɛ eko akaba dɔŋŋ.—2 Mose 35:5, 21; 36:6, 7.

Afii ohai komɛi asɛɛ beni abaamã sɔlemɔwe lɛ, Nyɔŋmɔ webii lɛ ná hegbɛ ekoŋŋ  kɛtsɔɔ akɛ amɛfiɔ anɔkwa jamɔ sɛɛ. Maŋtsɛ David kɛ nibii babaoo ha koni akɛmã sɔlemɔwe lɛ, ni ebi koni maŋbii lɛ hu kɛ nikeenii abaha. Amɛfee nakai kɛ miishɛɛ. Kɛ́ abu shika kɛ jwiɛtɛi lɛ pɛ naa ŋmɛnɛ lɛ, efe dɔlai akpekpe toi akpei 100! Maŋbii lɛ nya naakpa ejaakɛ amɛha Yehowa kɛ amɛtsui muu lɛ fɛɛ yɛ suɔmɔ naa.—1 Kron. 29:3-9; 2 Kron. 5:1.

Yesu Kristo mra be mli sɛɛnyiɛlɔi lɛ hu jɛ amɛtsui mli amɛtsu onia kɛ miishɛɛ. Abaptisi mɛi aaafee 3,000 yɛ Pentekoste gbi lɛ nɔ yɛ afi 33 Ŋ.B., ni amɛteŋ mɛi babaoo jɛɛɛ Yerusalem. Ehe bahia ni abua shika naa kɛkwɛ amɛteŋ mɛi ni bɛ nɔ ko lɛ bɔni afee ni amɛya nɔ amɛhi Yerusalem ni amɛkase Nyɔŋmɔ he nii babaoo. Nyɛmimɛi lɛ hɔ̃ɔhɔ̃ɔ amɛnibii ni amɛkɛ shika lɛ baha bɔfoi lɛ bɔni afee ni akɛye abua mɛi ni ehia amɛ lɛ. Ekã shi faŋŋ akɛ Yehowa tsui nyɔ emli naakpa beni ena nifeemɔ ni tsɔɔ hemɔkɛyeli kɛ suɔmɔ nɛɛ!—Bɔf. 2:41-47.

Ŋmɛnɛ lɛ, Kristofoi jɛɔ suɔmɔ mli amɛkɛ amɛbe, hewalɛ, kɛ shika fiɔ anɔkwa jamɔ sɛɛ yɛ tsuijurɔnaa. Akrabatsa ni fata he nɛɛ tsɔɔ gbɛ̀i komɛi anɔ ni obaanyɛ otsɔ ofee enɛ.

[Akrabatsa ni yɔɔ baafa 18, 19]

GBƐ̀I NI MƐI KOMƐI TSƆƆ NƆ AMƐKEƆ NII

ONIATSUMƆI KƐHA JEŊ MUU FƐƐ NITSUMƆ LƐ

Mɛi pii kɛ shika ko fɔɔ shi, loo amɛtoɔ he gbɛjianɔ ni amɛkɛwoɔ oniatsumɔ adekai ni akadi amɛ akɛ “Jeŋ Muu Fɛɛ Nitsumɔ Lɛ” amli.

Daa nyɔɔŋ nɔ lɛ, asafoi kɛ shika nɛɛ majeɔ kɛyaa Yehowa Odasefoi anitsumɔhe ni yɔɔ maŋ nɔ he ni amɛyɔɔ lɛ. Abaanyɛ akɛ shika ni ataoɔ akɛke hu amaje tɛɛ kɛyaha Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483, aloo abaanyɛ akɛya Yehowa Odasefoi anitsumɔhe nine ni kwɛɔ maŋ ni oyɔɔ mli lɛ nɔ lɛ. (Abaanyɛ akɛ shika ni ataoɔ akɛke ní abaatsĩ tã kɛnyiɛ sɛɛ nɛɛ hu amaje Yehowa Odasefoi anitsumɔhe nine ni kwɛɔ maŋ ni oyɔɔ mli lɛ nɔ lɛ.) Kɛ́ akɛ tsɛk miitsɔ adrɛs ni yɔɔ yiteŋgbɛ lɛ nɔ kɛmiiha lɛ, esa akɛ aŋma “Watchtower” yɛ nɔ ákɛ mɛi ni aawo shika lɛ aaha. Abaanyɛ akɛ jwetrii aloo ojarawa nibii krokomɛi hu ake. Esa akɛ aŋma wolo fioo ko afata nɛkɛ nikeenii nɛɛ ahe ni akɛtsɔɔ akɛ amɛji nibii ni akɛmiike kwraa.

NIBII NI AKƐHA SHI AKƐKEKO LƐ AHE GBƐJIANƆTOO

Abaanyɛ akɛ shika aha Watch Tower Bible and Tract Society of Pennsylvania koni ekɛtsu enibii ahe nii yɛ jeŋ fɛɛ. Shi kɛ mɔ ni kɛha lɛ miitao lɛ, akɛbaaha lɛ. Bɔni afee ni oná sane nɛɛ mlitsɔɔmɔ lolo lɛ, ofainɛ ŋmaa kɛyabi yɛ Treasurer’s Office lɛ kɛtsɔ adrɛs ni atsɔɔ yɛ yiteŋgbɛ lɛ nɔ loo obaanyɛ otswa tɛlifoŋ kɛya (718) 560-7500.

EJURƆFEEMƆ NI AKPƐ YIŊ YƐ HE

Kɛfata shika ni akɛkeɔ kwraa lɛ he lɛ, ayɛ gbɛi krokomɛi hu ni atsɔɔ nɔ akeɔ nii koni ehe aba sɛɛnamɔ kɛha Maŋtsɛyeli nitsumɔ lɛ yɛ jeŋ fɛɛ. Enɛɛmɛi ateŋ ekomɛi ji:

Inshuɔrans: Abaanyɛ aŋma Watch Tower Bible and Tract Society of Pennsylvania gbɛi akɛ mɛi ni baaná inshuɔrans gbɛjianɔtoo lɛ he sɛɛ yɛ mɔ ni kɛhaa lɛ gbele sɛɛ, aloo mɛi ni baaná enitsumɔ hejɔɔmɔ mli gbɛjianɔtoo lɛ he sɛɛ.

Shika ni Akɛtoɔ Shikatoohe: Abaanyɛ aha shika ni akɛto, shika nɔ woji, aloo akɛ nitsumɔ mli hejɔɔmɔ mli shika ato aloo akɛha Watch Tower Bible and Tract Society of Pennsylvania yɛ mɔ lɛ gbele sɛɛ, yɛ bɔ ni nyɛmaŋ lɛ shikatoohei ŋmɛɔ gbɛ ni afee lɛ naa.

Nitsumɔi Amli Gbɛfaŋnɔ kɛ Shika ni Akɛfaa Shikatoohei kɛ Ehe Kpa: Obaanyɛ okɛ nitsumɔi amli gbɛfaŋnɔ ni oyɔɔ kɛ shika ni okɛfa shikatoohei kɛ ehe kpa lɛ aha Watch Tower Bible and Tract Society of Pennsylvania akɛ nibii ni okɛmiike kwraa loo obaanyɛ ofee shamaŋsheo ákɛ akɛ nibii nɛɛ ahã Watch Tower Bible and Tract Society of Pennsylvania yɛ ogbele sɛɛ.

Shikpɔji kɛ Tsũi: Abaanyɛ akɛ shikpɔji kɛ tsũi ni baahi hɔɔmɔ, loo shĩa ko ni mɔ ko yɔɔ mli lɛ aha kɛtsɔ ke kwraa ni akɛaake nɔ, aloo ni abaashi shikpɔŋ loo tsũ lɛ yɛ mɔ ni kɛke lɛ dɛŋ, koni ehi tsũ lɛ mli aloo ekwɛ nɔ aahu kɛyashi be mli ni ebaagbo. Ha nitsumɔhe nine ni yɔɔ maŋ mli he ni oyɔɔ lɛ ale dani okɛ shikpɔŋ loo tsũ ko aha.

Daa Afi Shika ni Anáa yɛ Nikeenii Ahe: Daa afi shika ni anáa yɛ nikeenii ahe ji gbɛjianɔ ko ni atoɔ ni mɔ ko kɛ shika loo nibii ni jara wawai haa koni nitsumɔhe nine pɔtɛɛ ko ní Yehowa Odasefoi kɛtsuɔ nii lɛ akwɛ nɔ. Yɛ no najiaŋ lɛ, mɔ ni kɛha lɛ, loo mɔ ko ni mɔ ni kɛha lɛ ehala lɛ lɛ nine shɛɔ shika falɛ pɔtɛɛ ko nɔ daa afi yɛ ewala be fɛɛ mli. Atseɔ tóo yɛ shika ni mɔ ni kɛha lɛ nine shɛɔ nɔ lɛ nɔ yɛ afi mli ni daa afi shika ni anáa lɛ jeɔ nitsumɔ shishi lɛ.

Shamaŋsheo kɛ Nii ni Ahaa Mɔ Kroko Gbɛi Kãa Nɔ: Abaanyɛ akɛ nibii ni ayɔɔ loo shika ake Watch Tower Bible and Tract Society of Pennsylvania kɛtsɔ shamaŋsheo ni aŋma yɛ mla naa nɔ, aloo abaanyɛ aha Watch Tower Bible and Tract Society of Pennsylvania gbɛi akã shika ni akɛto lɛ nɔ akɛ mɔ ni baaná he sɛɛ. Bei komɛi lɛ, jamɔ gbɛjianɔtoo ko gbɛi ni kãa shika ko nɔ lɛ haa enáa toowoo mli heyelii komɛi.

Taakɛ gbɛi “charitable planning” (ejurɔfeemɔ ni akpɛ yiŋ yɛ he) lɛ tsɔɔ lɛ, nɛkɛ nikeei henɔi nɛɛ biɔ gbɛjianɔtoo yɛ mɔ ni kɛ nii keɔ lɛ gbɛfaŋ. Bɔni afee ni akɛye abua aŋkroaŋkroi ni miisumɔ koni amɛye amɛbua Yehowa Odasefoi ajeŋ muu fɛɛ nitsumɔ lɛ kɛtsɔ nɛkɛ ejurɔfeemɔ ni akpɛ yiŋ yɛ he nɛɛ ateŋ eko nɔ lɛ, afee wolo bibioo ko yɛ Blɔfo wiemɔ kɛ Spain wiemɔ mli ni yitso ji Charitable Planning to Benefit Kingdom Service Worldwide (Ejurɔfeemɔ ni Akpɛ Yiŋ yɛ He Koni Ehe Aba Sɛɛnamɔ Kɛha Maŋtsɛyeli Nitsumɔ yɛ Jeŋ Fɛɛ). Aŋma wolo bibioo nɛɛ koni eha ale gbɛi srɔtoi anɔ ni abaanyɛ atsɔ ni akɛ nibii kɛ shika ake amrɔ nɛɛ loo bɔ ni mɔ aaafee eha nine ashɛ shika loo jwetri ko ni ekɛke yɛ mla naa lɛ nɔ yɛ egbele sɛɛ. Mɛi babaoo enyɛ eye ebua kɛfi Yehowa Odasefoi ajamɔ lɛ kɛ nitsumɔi ni amɛtsuɔ kɛyeɔ buaa adesai lɛ asɛɛ yɛ jeŋ fɛɛ, yɛ be mli ni amɛkane wolo bibioo lɛ ni amɛkɛ amɛ diɛŋtsɛ amɛmla kɛ toowoo he ŋaawolɔi esusu he lɛ sɛɛ, ni yɛ nakai beaŋ nɔŋŋ lɛ, amɛha sɛɛnamɔi ni amɛnáa yɛ toowoo mli yɛ enɛ feemɔ mli lɛ etee hiɛ. Nine baanyɛ ashɛ wolo bibioo nɛɛ nɔ kɛtsɔ eko ni aaashɛ kɛjɛ Charitable Planning Office (Nitsumɔhe ni Kwɛɔ Ejurɔfeemɔ ni Akpɛ Yiŋ yɛ He lɛ Nɔ) lɛ dɛŋ tɛɛ lɛ nɔ.

Bɔni afee ni oná enɛ mlitsɔɔmɔ lolo lɛ, obaanyɛ obi kɛjɛ Charitable Planning Office lɛ, kɛtsɔ woloŋmaa loo tɛlifoŋ tswaa nɔ, kɛtsɔ adrɛs ni atsɔɔ yɛ shishigbɛ lɛ loo nitsumɔhe nine ni sɔmɔɔ maŋ ni oyɔɔ mli lɛ nɔ.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Tɛlifoŋ: (845) 306-0707