Ohiɛ Asɔ Onyɛmimɛi Hii kɛ Yei Mumuii Lɛ!

NYƆŊMƆ tsuji hii kɛ yei ni yɔɔ ŋmɛnɛ lɛ ji weku wulu kome, ni Nyɔŋmɔ tsuji anɔkwafoi ehi shi kɛjɛ blema tɔ̃ɔ. Amɛteŋ mɛi komɛi ji Samuel, David, Samson, Rahab, Mose, Abraham, Sara, Noa, kɛ Abel. Mumuii babaoo fata Yehowa anɔkwa tsuji ahe ŋmɛnɛ. Ákɛ nɔkwɛmɔnɔ lɛ, mumuii enyɔ ni ji gbalashihilɛ mli hefatalɔi lɛ ji mɛi klɛŋklɛŋ ni batsɔmɔ Yehowa Odasefoi yɛ Mongolia. Akɛni wɔnyɛmimɛi mumuii ni yɔɔ Russia lɛ yeɔ anɔkwa hewɔ lɛ, wɔnyɛ wɔye bem yɛ Europabii a-Saneyelihe ni Ayeɔ Hegbɛi ni Adesai Yɔɔ lɛ Ahe Saji yɛ lɛ.

Yɛ bei nɛɛ amli lɛ, “tsulɔ anɔkwafo kɛ nilelɔ” lɛ efee nibii ni mumuii lɛ baanyɛ amɛkɛkase nii, ni eto asafoŋ kpeei, kpeei bibii kɛ kpeei wuji ahe gbɛjianɔ eha amɛ. (Mat. 24:45) Nibii nɛɛ ahe eba sɛɛnamɔ waa eha mumuii lɛ. * Shi ani obi ohe pɛŋ akɛ beni atoko nibii nɛɛ ahe gbɛjianɔ lɛ, te mumuii lɛ feɔ tɛŋŋ amɛkaseɔ anɔkwa Nyɔŋmɔ lɛ he nii ní amɛyaa amɛhiɛ yɛ anɔkwale lɛ mli lɛ? Mɛni obaanyɛ ofee ni okɛye obua mumuii ni yɔɔ he ni oyɔɔ lɛ?

Dani Aaato Nibii Ahe Gbɛjianɔ Aha Amɛ

Ni kɛ́ obi mumuii ni efɔ̃ nɔ yɛ afii amli lɛ ateŋ mɛi komɛi koni amɛgba bo bɔ ni fee ni amɛbale Nyɔŋmɔ lɛ hu? Ekolɛ amɛbaagba bo bɔ ni amɛnu he amɛha klɛŋklɛŋ kwraa beni amɛná amɛle akɛ Nyɔŋmɔ yɛ gbɛi lɛ—bɔ ni Nyɔŋmɔ gbɛi lɛ ní amɛbale lɛ tsake amɛ shihilɛ ní ewaje amɛ afii babaoo beni abɛ vidio loo DVD yɛ mumuii awiemɔ mli ní baaye abua amɛ koni amɛnu Ŋmalɛ mli anɔkwalei ni mli kwɔlɔ lɛ ashishi lɛ. Ekolɛ amɛbaagba bo bɔ ni amɛnu he amɛha beni afeee Kristofoi akpeei yɛ mumuii awiemɔ mli loo atsɔɔɔ shishi ahaaa amɛ lɛ. Yɛ no najiaŋ lɛ mɔ ko taa amɛmasɛi ni eŋmalaa wiemɔi lɛ ewoɔ wolo nɔ koni no aye abua amɛ ní amɛnu nɔ ni awieɔ lɛ shishi. Nyɛmi nuu mumui ko tsɔ nɛkɛ gbɛ nɔ ekase Biblia mli anɔkwalei lɛ afii kpawo sɔŋŋ, ni no sɛɛ dani abɔi anɔkwalei lɛ ashishi tsɔɔmɔ yɛ mumuii awiemɔ mli kɛ lɛ hamɔ.

Odasefoi ni ji mumuii ni efɔ̃ nɔ yɛ afii amli lɛ kaiɔ bɔ ni amɛnu he amɛha kɛ́ amɛfata nyɛmimɛi lɛ ahe kɛmiishiɛ amɛmiitsɔɔ mɛi ni nuɔ nii lɛ. Amɛkɛ amɛnine kome hiɛɔ wolo ko ni aŋma shiɛmɔ wiemɔ kuku yɛ nɔ, ni amɛkɛyashiɛɔ yɛ shĩa kɛ shĩa. Amɛkɛ nine kroko lɛ hiɛɔ Buu-Mɔɔ kɛ Awake! heei ni eba lɛ. Nakai beaŋ lɛ mumuii nɛɛ naaa lɛ mlɛo akɛ amɛkɛ woji ni akala lɛ pɛ aaatsu nii ni amɛkɛtsɔɔ mumuii krokomɛi Biblia mli anɔkwalei lɛ, ejaakɛ amɛkɛ mɛi ni amɛkɛkaseɔ nii lɛ fɛɛ nuuu nibii ni aŋmala lɛ ashishi jogbaŋŋ. Ekolɛ mumuii ni ji shiɛlɔi ni etsɛ yɛ anɔkwale lɛ mli lɛ baakai nijiaŋwujee ni amɛkɛkpe beni amɛshiɛɔ shi anuuu nɔ ni amɛtsɔɔ lɛ shishi lɛ, ni no hewɔ lɛ amɛnyɛɛɛ amɛya nɔ amɛshiɛ lɛ. Agbɛnɛ hu amɛle bɔ ni amɛnu he amɛha beni amɛná suɔmɔ waa amɛha Yehowa shi amɛnyɛɛɛ amɛkɛ ekãa afee esuɔmɔnaa nii lɛ. Mɛni ha eba lɛ nakai? Ejaakɛ no mli lɛ, amɛbɛ nɔmimaa akɛ amɛnu saji pɔtɛɛ komɛi ashishi jogbaŋŋ.

Yɛ naagbai ni wɔnyɛmimɛi mumuii nɛɛ kɛkpe lɛ fɛɛ sɛɛ lɛ, amɛŋmɛɛɛ amɛnɔkwayeli lɛ he. (Hiob 2:3) Amɛto amɛtsui shi amɛmɛ Yehowa. (Lala 37:7) Ni Yehowa miijɔɔ amɛ amrɔ nɛɛ fe bɔ ni amɛteŋ mɛi babaoo kpa gbɛ.

Susumɔ mɔdɛŋ ní nyɛmi nuu mumui ko ni yɔɔ ŋa kɛ bii lɛ bɔ lɛ he okwɛ. Beni abɛ vidio yɛ  mumuii awiemɔ mli lɛ, etee nɔ ekɛ eweku lɛ kase nii. Ebi nuu lɛ wie akɛ: “No mli lɛ mipapa náaa weku nikasemɔ lɛ mlɛo kwraa, ejaakɛ woji ni akala lɛ nɔ ekwɛɔ ekɛtsɔɔ wɔ nii. Bei pii lɛ, enuuu nibii ni aŋmala lɛ ashishi jogbaŋŋ. Ákɛ bii lɛ wɔha nikasemɔ lɛ nɔkwɛmɔ bafee nɔ ni wa kɛha Ataa. Kɛ́ egbalaaa nibii amli jogbaŋŋ lɛ, wɔtsɛɔ etoi sɛɛ amrɔ nɔŋŋ. Yɛ enɛɛmɛi fɛɛ sɛɛ lɛ, etee nɔ ekɛ weku lɛ kase nii. Eyɛ mli akɛ be komɛi lɛ wɔnifeemɔ lɛ woɔ lɛ hiɛgbele akɛni enuuu Blɔfo wiemɔ lɛ shishi jogbaŋŋ hewɔ lɛ moŋ, shi enu he akɛ Yehowa he nii ní wɔɔkase lɛ he miihia kwraa fe nakai hiɛgbele lɛ.”

Susumɔ nyɛmi nuu mumui ko ni eshwila ni atsɛɔ lɛ Richard ni eye afii 70 kɛ nɔ ko, ni yɔɔ Brooklyn, yɛ New York yɛ U.S.A. lɛ hu he okwɛ. Mɔ fɛɛ mɔ le Richard akɛ eji mɔ ko ni folɔɔɔ Kristofoi akpeei amli. Etaa oketeke mli, ni ekaneɔ shii abɔ ni oketeke lɛ waa lɛ ni ekɛnaa he ni esa akɛ eyi shi yɛ. Gbi ko lɛ, akɛni snoo miinɛ waa ni ahum hu miitswa hewɔ lɛ, ato gbɛjianɔ akɛ ayaŋ asafoŋ kpee. Akɛɛ mɛi fɛɛ ni yɔɔ asafo lɛ mli lɛ, shi hiɛ kpa Richard nɔ. Beni nyɛmimɛi lɛ hɛle shi lɛ, amɛbɔi Richard taomɔ, ni amɛyana lɛ ní edamɔ Maŋtsɛyeli Asa lɛ hiɛ ni eemɛ koni abagbele shinaa lɛ. Beni abi lɛ nɔ hewɔ ni enyiɛ snoo kɛ ahum lɛ mli lɛ, ekɛɛ akɛ: “Misumɔɔ Yehowa.”

Mɛni Obaanyɛ Ofee?

Ani mumuii yɛ he ni oyɔɔ lɛ? Ani obaanyɛ okase mumuii awiemɔ bɔni afee ni onyɛ okɛ amɛ agba sane? Bei pii lɛ mumuii toɔ amɛtsui shi kɛ amɛmiitsɔɔ mɛi mumuii awiemɔ lɛ, ni amɛyɛ he miishɛɛ waa akɛ amɛaafee nakai. Ekolɛ okɛ mumui ko baakpe yɛ he ko loo kɛ́ onyiɛ shiɛmɔ nɔ. Mɛni obaanyɛ ofee? Bɔɔ mɔdɛŋ ni okɛ lɛ agba sane. Okɛ oniji afee okadii, ŋmalamɔ nibii owo wolo nɔ ni okɛtsɔɔ lɛ, okɛ mfonirii atsɔɔ lɛ, aloo okɛ gbɛ̀i srɔtoi nɛɛ ateŋ nɔ ni fe ekome atsu nii. Kɛ́ mɔ lɛ kɛɛ bo akɛ ebɛ anɔkwale lɛ he miishɛɛ po lɛ, kɛɛmɔ Odasefonyo ko ni ji mumui loo Odasefonyo ko ni le mumuii awiemɔ koni eya mɔ lɛ ŋɔɔ. Ekolɛ mɔ lɛ baanya anɔkwale lɛ he waa kɛ́ ashiɛ atsɔɔ lɛ yɛ mumuii awiemɔ mli lɛ.

Ekolɛ ookase mumuii awiemɔ ni okɛ asafo ni wieɔ mumuii awiemɔ miibɔ. Te ooofee tɛŋŋ ole mumuii awiemɔ lɛ jogbaŋŋ? Eyɛ mli akɛ ekolɛ shiɛlɔi komɛi yɛ nyɛsafo lɛ mli ní nuɔ wiemɔ moŋ, shi okɛ amɛ awie yɛ mumuii awiemɔ mli. Enɛ baaye abua bo ni okɛ ojwɛŋmɔ ama mumuii awiemɔ lɛ nɔ. Bei komɛi lɛ, yɛ nɔ najiaŋ ni kulɛ esa akɛ wɔkɛ mɛi awie yɛ mumuii awiemɔ mli lɛ, wɔhiɛ baanyɛ akpa wɔhe nɔ ni wɔkɛ wɔnaabu baawie. Shi kɛ́ ookase wiemɔ hee ko lɛ, ebaabi ni omia ohiɛ waa koni onaa ahomɔ wiemɔ lɛ nɔ.

Kɛ́ omia ohiɛ akɛ obaawie mumuii awiemɔ lɛ, etsɔɔ akɛ oyɛ suɔmɔ kɛ bulɛ oha wɔnyɛmimɛi hii kɛ yei ni ji mumuii lɛ. Susumɔ nijiaŋwujee ni mumuii kɛkpeɔ daa gbi yɛ nitsumɔhe aloo skul akɛni amɛnuuu wiemɔ ni awieɔ lɛ hewɔ lɛ he okwɛ. Nyɛmi nuu mumui ko kɛɛ akɛ: “Mɛi ni mifutu amɛ lɛ fɛɛ wieɔ. Bei pii lɛ akɛni mihe feɔ shoo ni minuɔ he akɛ asusuuu  mihe hewɔ lɛ, edɔɔ mi ni mi mli woɔ la po. Mileee bɔ ni magbala bɔ ni minuɔ he mihaa bei komɛi lɛ mli maha ni abaanu shishi.” Esa akɛ wɔnyɛmimɛi ni nuuu nii lɛ aná mumɔŋ niyenii yɛ wɔkpeei lɛ ashishi, ni agbɛnɛ hu amɛkɛ nyɛmimɛi krokomɛi abɔ ni amɛkɛ amɛ agba sane.—Yoh. 13:34, 35.

Mɛi hu ni ehe baahia ni aye abua amɛ ji mumuii akui bibii babaoo ni kɛ asafoi ni ewieee mumuii awiemɔ yaa kpeei lɛ. Kɛ́ amɛtee kpeei lɛ, atsɔɔ nifeemɔi ni yaa nɔ yɛ jɛmɛ lɛ shishi ahaa amɛ. Mumuii lɛ taraa hiɛ sɛ̃ii lɛ anɔ yɛ Maŋtsɛyeli Asa lɛ nɔ, bɔni afee ni amɛnu nifeemɔ lɛ shishi jogbaŋŋ. Enɛ haaa nɔ ko agbala amɛjwɛŋmɔ, ni eyeɔ ebuaa amɛ ni amɛnaa wielɔ lɛ kɛ mɔ ni tsɔɔ wiemɔ lɛ shishi lɛ fɛɛ. Akpa shi ana akɛ etsɛɛɛ ni asafoŋbii krokomɛi lɛ baleɔ gbɛjianɔtoo nɛɛ, ni nifeemɔ nɛɛ gbalaaa amɛjwɛŋmɔ kɛjɛɛɛ wiemɔ lɛ nɔ. Akɛ gbɛjianɔtoo nɛɛ nɔŋŋ tsuɔ nii yɛ kpeei bibii kɛ kpeei wuji ní atoɔ he gbɛjianɔ koni atsɔɔ wiemɔi ashishi kɛya mumuii awiemɔ mli lɛ ashishi. Wɔmiiha nyɛmimɛi ni bɔɔ mɔdɛŋ amɛtsɔɔ wiemɔ shishi koni mumuii lɛ anu shishi jogbaŋŋ lɛ aekoo.

Ekolɛ oyɛ asafo ko ni ayɛ mumuii awiemɔ kuu ko yɛ mli lɛ mli, loo ekolɛ mumuii yɛ asafo lɛ mli ni atsɔɔ wiemɔi lɛ ashishi ahaa amɛ. Mɛni obaanyɛ ofee koni onyɛmimɛi mumuii nɛɛ anu he akɛ osusuɔ amɛhe? Tsɛ amɛ kɛba oshĩa. Kɛ́ ebaahi lɛ, kasemɔ mumuii awiemɔ fioo ko. Kaanu he akɛ akɛni onuuu mumuii awiemɔ lɛ hewɔ lɛ onyɛŋ okɛ amɛ agba sane. Obaanyɛ otsɔ gbɛ̀i srɔtoi anɔ okɛ amɛ awie, ni kɛ́ ojie suɔmɔ ni tamɔ nɛkɛ kpo lɛ ebaaha amɛhiɛ asɔ waa. (1 Yoh. 4:8) Wɔnyɛmimɛi Odasefoi mumuii lɛ ahe yɛ sɛɛnamɔ. Amɛhe esa kɛ sanegbaa, amɛhiɛ kã shi waa, ni amɛhe yɛ miishɛɛ. Nyɛmi nuu ko ni efɔlɔi enyɔ lɛ fɛɛ ji mumuii lɛ kɛɛ akɛ: “Mikɛ mumuii ebɔ miwala gbii abɔ fɛɛ, ni nibii ni amɛfee amɛha mi lɛ, minyɛŋ najiaŋ mato. Nibii pii yɛ ni wɔbaanyɛ wɔkase kɛjɛ wɔnyɛmimɛi mumuii lɛ aŋɔɔ.”

Yehowa sumɔɔ etsuji anɔkwafoi ní mumuii fata he lɛ. Hemɔkɛyeli kɛ tsuishitoo ni amɛjie lɛ kpo lɛ fata nibii ni feɔ Yehowa gbɛjianɔtoo lɛ srɔto lɛ he. Belɛ, nyɛhaa wɔjiea hiɛsɔɔ kpo wɔtsɔɔa wɔnyɛmimɛi mumuii lɛ!

[Shishigbɛ niŋmaa]

[Mfoniri ni yɔɔ baafa 31]

Mumuii baanyɛ anyá Maŋtsɛyeli shɛɛ sane lɛ he kɛ́ ashiɛ aha amɛ yɛ mumuii awiemɔ mli

[Mfonirii ni yɔɔ baafa 32]

Esa akɛ wɔnyɛmimɛi ni nuuu nii lɛ aná mumɔŋ niyenii yɛ wɔkpeei lɛ ashishi