Sanebimɔi ni Jɛ Kanelɔi Adɛŋ

Ani eja gbɛ akɛ kɛ́ nyɛmi yoo ko miitsɔɔ wiemɔi ashishi kɛmiiya mumuii awiemɔ mli yɛ asafoŋ kpeei, kpeei bibii, loo kpeei wuji ashishi lɛ ehà eyi nɔ?

Esa akɛ yoo ni ji Kristofonyo lɛ ahà eyi nɔ kɛ́ eetsu sɔ̃i ni esa akɛ kulɛ ewu loo nyɛmimɛi hii ni yɔɔ asafo lɛ mli lɛ atsu he nii lɛ ahe nii. Enɛ kɛ shishitoo mla ni bɔfo Paulo wie lɛ kpãa gbee. Ekɛɛ akɛ ‘yoo fɛɛ yoo ní sɔleɔ aloo egbaa ní eyitso kã efolo lɛ, eegbe eyitso lɛ he guɔ’ ejaakɛ ‘yoo fɛɛ yoo yitso ji nuu.’ (1 Kor. 11:3-10) Kɛ́ nyɛmi yoo lɛ kɛ yihaanɔ̃ ni bɛ haŋtsii ni sa hà eyi nɔ yɛ shihilɛi ni tamɔ nɛkɛ mli lɛ, eji okadi ni tsɔɔ akɛ eeba ehe shi eeha teokrase gbɛjianɔtoo ni yɔɔ Kristofoi asafo lɛ mli lɛ.—1 Tim. 2:11, 12. *

Ni kɛ́ nyɛmi yoo ko miitsɔɔ wiemɔ ni nyɛmi nuu ko miiha lɛ shishi kɛmiiya mumuii awiemɔ mli hu? Eji anɔkwale akɛ nyɛmi yoo lɛ miiha toibolɔi lɛ ale nɔ ni nyɛmi nuu lɛ kɛɔ lɛ kɛkɛ. Ní tsɔɔ akɛ jeee lɛ etsɔɔ nii lɛ, shi moŋ nyɛmi nuu ni etsɔɔ wiemɔ lɛ shishi ehaa lɛ lɛ ji mɔ ni tsɔɔ nii lɛ. Shi srɔtofeemɔ agbo yɛ wiemɔi ashishi ni atsɔɔ kɛyaa mumuii awiemɔ mli lɛ kɛ nɔ ni atsɔɔ shishi kɛyaa wiemɔ diɛŋtsɛ mli lɛ teŋ. Kɛ́ mɔ ko miiha wiemɔ ni anuɔ lɛ, toibolɔi lɛ baanyɛ akwɛ wielɔ lɛ ni yɛ nakai beaŋ nɔŋŋ lɛ amɛbo mɔ ni tsɔɔ shishi lɛ hu toi. Agbɛnɛ hu, nɔ ni tamɔɔɔ wiemɔi ni atsɔɔ shishi kɛyaa mumuii awiemɔ mli lɛ, be pii lɛ nyɛmimɛi yei ni tsɔɔ wiemɔi ashishi kɛyaa wiemɔi ni anuɔ lɛ amli lɛ damɔɔɔ hei ni mɛi ajwɛŋmɔ baaya amɛ nɔ. Bei komɛi lɛ, amɛbaanyɛ amɛta shi po kɛ́ amɛmiitsɔɔ wiemɔ shishi, loo kɛ́ amɛdamɔ shi lɛ amɛtsɔ amɛhiɛ  amɛha wielɔ lɛ fe nɔ ni amɛaatsɔ amɛhiɛ amɛha toibolɔi lɛ. No hewɔ lɛ, ehe ebahiaŋ ni nyɛmi yoo ni tsɔɔ wiemɔi ashishi kɛyaa wiemɔi ni anuɔ mli lɛ ahà eyi nɔ.

Kɛfata he lɛ, tsɔji ni akɛtsuɔ nii amrɔ nɛɛ kɛ́ aatsɔɔ wiemɔi ashishi kɛmiiya mumuii awiemɔ mli lɛ haa bei pii lɛ toibolɔi lɛ gbalaa amɛjwɛŋmɔ kɛyaa mɔ ni tsɔɔ wiemɔ lɛ shishi lɛ nɔ titri. Mɔ ni tsɔɔ wiemɔ lɛ shishi lɛ ji mɔ titri ni ajieɔ atsɔɔ toibolɔi lɛ, ni ekolɛ toibolɔi lɛ enaŋ wielɔ lɛ diɛŋtsɛ po. Nibii nɛɛ ahewɔ lɛ, ebaafee nɔ ni sa akɛ nyɛmi yoo ni tsɔɔ wiemɔ lɛ shishi kɛyaa mumuii awiemɔ mli lɛ ahà eyi nɔ koni ekɛtsɔɔ akɛ jeee lɛ ehaa wiemɔ lɛ.

Yɛ gbɛtsɔɔmɔ hee nɛɛ naa lɛ, mɛni ebaabi ni afee kɛ́ aatsɔɔ wiemɔ shishi kɛmiiya mumuii awiemɔ mli beni afeɔ Teokrase Sɔɔmɔ Skul lɛ, beni aafee nɔkwɛmɔnii, kɛ́ aaha saji ahetoo beni afeɔ Asafoŋ Biblia Nikasemɔ lɛ, Sɔɔmɔ Kpee lɛ, kɛ Buu-Mɔɔ nikasemɔ lɛ? Ani esa akɛ nyɛmi yoo ahà eyi nɔ kɛ́ eetsɔɔ wiemɔ shishi kɛmiiya mumuii awiemɔ mli yɛ shihilɛ ni tamɔ nɛkɛ mli lɛ? Etamɔ nɔ ni ehe ehiaaa ni nyɛmi yoo lɛ ahà eyi nɔ yɛ shihilɛi komɛi amli, ejaakɛ mɛi fɛɛ ni yɔɔ kpee lɛ shishi lɛ yɔseɔ akɛ jeee lɛ ji wielɔ lɛ. Ákɛ nɔkwɛmɔnɔ lɛ, ehe ebahiaŋ ní nyɛmi yoo lɛ ahà eyi nɔ kɛ́ toibolɔi miiha sane hetoo ni eetsɔɔ shishi loo kɛ́ nyɛmimɛi yei miitsu skul nifeemɔi ahe nii loo aafee nɔkwɛmɔnii ni eetsɔɔ shishi. Shi esa akɛ nyɛmi yoo lɛ ahà eyi nɔ kɛ́ nyɛmi nuu miiha wiemɔ yɛ kpeei ni atsĩ tã kɛtsɔ hiɛ nɛɛ amli ni eetsɔɔ shishi, kɛ́ eetsɔɔ Buu-Muu lɛ nɔkwɛlɔ lɛ loo Asafoŋ Biblia Nikasemɔ lɛ nɔkwɛlɔ lɛ wiemɔi lɛ ashishi, loo kɛ́ enyiɛ asafo lɛ hiɛ kɛmiila. Beni kpee lɛ yaa nɔ lɛ, ekolɛ abaaha nyɛmi yoo ko atsɔɔ nyɛmimɛi hii, yei, gbekɛbii, kɛ asafoŋ onukpai awiemɔi ashishi. Enɛ hewɔ lɛ, ebaafee nɔ ni hi akɛ nyɛmi yoo lɛ ahà eyi nɔ kpee be lɛ fɛɛ.

[Shishigbɛ niŋmaa]